Thursday, June 11, 2015
មហាក្សត្រ និងគណៈប្រតិភូស្ថាប័នកំពូល ចូលគោរពវិញ្ញាណក្ខន្ធសម្តេច ជាស៊ីម
នាព្រឹកថ្ងៃទី១០ ខែមិថុនានេះ ព្រះមហាក្សត្រនៃព្រះរាជាណាចក្រកម្ពុជា ព្រះករុណាព្រះបាទសម្តេច ព្រះបរមនាថ នរោត្តម សីហមុនី និងសម្តេចព្រះមហាក្សត្រី នរោត្តម មុនីនាថ សីហនុ បានយាងចូលគោរពវិញ្ញាណក្ខន្ធនៃសពសម្តេចអគ្គមហាធម្មពោធិសាល ជា ស៊ីម ប្រធានព្រឹទ្ធសភា ប្រធានគណបក្សប្រជាជនកម្ពុជា និងជាប្រធានគណៈអធិបតីកិត្តិយសក្រុមប្រឹក្សាជាតិរណសិរ្សសាមគ្គីអភិវឌ្ឍន៍មាតុភូមិកម្ពុជា ដែលបានទទួលមរណៈភាពកាលពី វេលាម៉ោង១៥និង៤៥នាទី រសៀលថ្ងៃទី៨ ខែមិថុនាឆ្នាំ២០១៥ ដោយរោគាពាធ ក្នុងជន្មាអាយុ៨៣ឆ្នាំ។ ពិធីបុណ្យសព ត្រូវបានរៀបចំធ្វើនៅភូមិគ្រឹះរបស់សម្តេចអគ្គមហាធម្មពោធិសាលជា ស៊ីម ក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ដោយព្រះរាជក្រឹត ចេញកាលពីថ្ងៃទី៨ ខែមិថុនាឆ្នាំ២០១៥ បានបង្គាប់ឲ្យបង្កើតគណៈកម្មការរៀបចំពិធីបុណ្យសពនេះឲ្យបានល្អសក្តិសមទៅនឹងឋានៈរបស់សម្តេច។
រីឯវត្តមានរបស់គណៈប្រតិភូស្ថាប័នរដ្ឋសភាដែលចូលគោរពវិញ្ញាណក្ខន្ធ គឺដឹកនាំដោយសម្តេចអគ្គមហាពញាចក្រី ហេង សំរិន ប្រធានរដ្ឋសភា ហើយក៏មានវត្តមានឯកឧត្តម កឹម សុខា អនុប្រធានទី១ រដ្ឋសភាផងដែរ។ ដោយឡែកសម្តេច តេជោ ហ៊ុន សែន នាយករដ្ឋមន្រ្តី និងជាអនុប្រធានគណបក្សប្រជាជនកម្ពុជាបានដឹកនាំគណៈប្រតិភូរាជរដ្ឋាភិបាលកម្ពុជា ចូលគោរពវិញ្ញាណក្ខន្ធសពសម្តេចអគ្គមហាធម្មពោធិសាលជាស៊ីម នាព្រឹកថ្ងៃទី១០ ខែមិថុនានេះផងដែរ។
វត្តមានជាបន្តបន្ទាប់ដែលចូលគោរពវិញ្ញាណក្ខន្ធ មានដូចជាគណៈប្រតិភូព្រឹទ្ធសភា ដឹកនាំដោយ ឯកឧត្តម សាយ ឈុំ ដែលទើបបានទទួលសំលេងបោះឆ្នោតជាប្រធានថ្មីនៃព្រឹទ្ធសភា កាលពីថ្ងៃទី ៩ ខែមិថុនាឆ្នាំ២០១៥នេះ។ គណៈប្រតិភូនៃក្រសួងព្រះបរមរាជវាំង ដឹកនាំដោយសម្តេច ចៅហ្វាវំាង គង់ សំអុល និងគណៈប្រតិភូកាកបាទក្រហមកម្ពុជា ដឹកនាំដោយសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាកបាទក្រហមកម្ពុជា។
បើតាមសារាចរណែនាំរបស់រាជរដ្ឋាភិបាលកម្ពុជាចេញកាលពីថ្ងៃទី៨ ខែមិថុនាកន្លងមកនេះ បានបញ្ជាក់ថា នឹងយកថ្ងៃទី១៩ ខែមិថុនាឆ្នាំ២០១៥ ជាថ្ងៃកាន់ទុក្ខជាផ្លូវការ ដោយនៅក្នុងថ្ងៃកាន់ទុក្ខនោះ គ្រប់ក្រសួងស្ថាប័នរដ្ឋនិងឯកជនទាំងអស់ ព្រមទាំងប្រជាជនទូទំាងប្រទេស ត្រូវបង្ហូតទង់ជាតិត្រឹមមួយភាគបីនៃដងទង់ជាតិចាប់លើ។ រីឯគ្រប់ស្ថានីយវិទ្យុទូរទស្សន៍ជាតិ និងឯកជន គឺត្រូវផ្អាកការសម្តែងនិងការចាក់ផ្សាយដែលមានលក្ខណៈសប្បាយគគ្រឹកគគ្រេងផងដែរក្នុងថ្ងៃកាន់ទុក្ខនោះ។ ហើយនៅក្នុងកម្មវិធីបុណ្យសពនេះ បានបញ្ជាក់ថា សពរបស់សម្តេចអគ្គមហាធម្មពោធិសាល ជាស៊ីម នឹងត្រូវធ្វើពិធីរំកិលចេញទៅលើរថយន្តបុស្បុកនិងដង្ហែ នៅព្រឹកថ្ងៃទី១៩ ខែមិថុនា ខាងមុខនេះ។
គួររំលឹកថា សម្តេចអគ្គមហាធម្មពោធិសាល ជា ស៊ីម បានក្លាយជាប្រធានគណបក្សប្រជាជនកម្ពុជាចាប់តាំងពីឆ្នាំ១៩៩១មកដល់ពេលបច្ចុប្បន្ន។ ហើយពីឆ្នាំ១៩៨១ដល់ឆ្នាំ១៩៩៩ ជាប្រធានរដ្ឋសភា។ ពីឆ្នាំ១៩៩៩មកដល់ពេលទទួលមរណៈភាព គឺជាប្រធានព្រឹទ្ធសភា ដោយនៅក្នុងឆ្នាំ២០១០ សម្តេចអគ្គមហាធម្មពោធិសាល ជា ស៊ីម បានទទួលសញ្ញាបត្របណ្ឌិតកិត្តិយសផ្នែកទស្សនវិជ្ជា និងផ្នែកជាអ្នកដឹកនាំកិច្ចការព្រឹទ្ធសភាពីសាកលវិទ្យាល័យ ឌីអូជិន សឺមីណឺរី សហរដ្ឋអាមេរិក។
ចំពោះគ្រឿងឥស្សរិយយស និងគោរមងារវិញ សម្តេចអគ្គមហាធម្មពោធិសាល ជា ស៊ីម បានទទួលងារជា សម្តេច ពីព្រះករុណា ព្រះបាទសម្តេចព្រះ នរោត្តម សីហនុ កាលពីឆ្នាំ១៩៩៣ និងបានទទួលងារជា សម្តេចអគ្គមហាធម្មពោធិសាល ពីព្រះករុណាសម្តេចព្រះបាទ ព្រះបរមនាថ នរោត្តម សីហមុនី កាលពីឆ្នាំ២០០៧។ និងក្នុងឆ្នាំ ២០១១ បានទទួលគោរមងារជា កិត្តិព្រឹទ្ធបណ្ឌិត នៃរាជបណ្ឌិតសភាកម្ពុជា ពីព្រះមហាក្សត្រ។
ក្រៅពីនេះ ក្នុងឆ្នាំ២០០៩ក៏បានទទួលគ្រឿងឥស្សរយយសមាស ខ្ពស់បំផុត ពីប្រធានរដ្ឋសភានៃប្រជាធិបតេយ្យប្រជាមានិតឡាវ។ និងក្នុងឆ្នាំ២០១៣កន្លងមកនេះ បានទទួលគ្រឿងឥស្សរិយយស ថ្នាក់ខ្ពស់បំផុតនៃប្រទេសជប៉ុន ដែលហៅថា Grand cordon of the Orders of the Rising Sun ពីអធិរាជជប៉ុនផងដែរ៕
សម្តេចតេជោ ហ៊ុន សែន ជួបគណៈប្រតិភូបក្សកុំម្មុយនីស្តវៀតណាម
នៅក្នុងជំនួបសម្តែងការគួរសមរបស់ ឯកឧត្តម ឡឺ ហុងអាញ់ សមាជិកការិយាល័យនយោបាយនៃគណបក្សកុំម្មុយនីស្តវៀតណាម នារសៀលថ្ងៃទី០៩ ខែមិថុនានេះ នៅវិមាន សន្តិភាពសម្តេចតេជោនាយករដ្ឋមន្ត្រី ហ៊ុន សែន បានស្នើឲរដ្ឋាភិបាលវៀតណាមបន្ត រក្សា ស្ថានភាព ស្ងៀមស្ងាត់នៅតំបន់ព្រំដែនកម្ពុជា-វៀតណាម ជាពិសេសក្នុងតំបន់ ព្រំដែន នៃ ខេត្តរតនគិរីរបស់កម្ពុជា ដែលរដ្ឋាភិបាលប្រទេសទាំង២កំពុងធ្វើការសំរបសំរួល និងរក ដំណោះស្រាយលើបញ្ហាមិនទាន់ឯកភាពគ្នា ធ្វើយ៉ាងណាឲទំនាក់ទំនងភាគីប្រទេសទាំង២កម្ពុជា-វៀតណាមនៅតែល្អដដែល។ ចំពោះសំណើរនេះ គណៈប្រតិភូវៀតណាម ក៏បាន ឯកភាពបន្តរក្សាស្ថានភាពរវាងប្រទេសទាំង២ដដែល។
សម្តេចតេជោ ហ៊ុនសែន ក៏បានជំរាបជូនថា នាពេលខាងមុខ គណបក្សប្រជាជនកម្ពុជា នឹង រៀបចំ សមាជពិសេសមួយ ដើម្បីរៀបចំអ្នកដឹកនាំគណបក្ស ប៉ុន្តែនៅក្នុងទ្រង់ទ្រាយយ៉ាង ណានោះ គណបក្សប្រជាជនកម្ពុជា មិនទាន់បានបញ្ជាក់នៅឡើយ។
ក្នុងជំនួបនោះដែរ ភាគីកម្ពុជា-វៀតណាម ក៏បានពិភាក្សាគ្នាជាច្រើនធ្វើយ៉ាងណាឲ្យទំហំពាណិជ្ជកម្មរវាងប្រទេសទាំង២អាចបន្តកើនឡើងរហូតដល់៥ពាន់លានដុល្លារអាមេរិកក្នុងមួយឆ្នាំ ដោយបច្ចុប្បន្នទំហំពាណិជ្ជកម្មរវាង ប្រទេសកម្ពុជានិងវៀតណាម មានជាង២ពាន់លានដុល្លារអាមេរិក៕
អ្នកនាំពាក្យគណបក្សប្រជាជន ថា ឯកឧត្តម សម រង្ស៊ី ឆ្លើយបង្វែងដាន
ថ្មីៗនេះ បន្ទាប់ពីមានលើកឡើងសារជាថ្មីពីគណបក្សសង្គ្រោះជាតិ ចោទប្រកាន់មកលើរាជរដ្ឋាភិបាលកម្ពុជា ដឹកនាំដោយគណបក្សប្រជាជនកម្ពុជា ថាបានលួចបន្លំសន្លឹកឆ្នោតក្នុងការបោះឆ្នោតសកល អាណត្តិទី ៥ ឆ្នាំ២០១៣កន្លងទៅ និងបានលើកឡើងថា កាកបាទក្រហមកម្ពុជា ធ្វើការងារប្រកាន់បក្ខពួកនោះ សម្តេចតេជោ បានមានប្រសាសន៍នៅក្នុងរដ្ឋសភាជាតិ កាលពីថ្ងៃទី ០៨ ខែមិថុនា ឆ្នាំ២០១៥ ថា សម្តេចហ៊ាន ស្បថ និងហៅ ឯកឧត្តម សម រង្ស៊ី មកស្បថជាមួយក្នុងរឿងនេះ។ ឆ្លើយតបនិងការលើកឡើងរបស់សម្តេច ឯកឧត្តម សម រង្ស៊ី ប្រធានគណបក្សសង្គ្រោះជាតិ និងជាប្រធានក្រុមមតិភាគតិចនៃរដ្ឋសភា បាននិយាយនៅព្រលានយន្យហោះភ្នំពេញថា លោកព្រមស្បថ តែសូមឲ្យមានការរាប់សន្លឹកឆ្នោតឡើងវិញ។
ការទាមទារឲ្យមានការរាប់សន្លឹកឆ្នោតឡើងវិញនេះ ត្រូវបានឯកឧត្តម សួស យ៉ារ៉ា អ្នកនាំពាក្យគណបក្សប្រជាជនកម្ពុជា បញ្ចេញការយល់ឃើញថា ចម្លើយរបស់ ឯកឧត្តម សម រង្ស៊ី គឺហាក់មានចេតនាបង្វែងដាន ទៅជារឿងផ្សេង។
ឯកឧត្តម សួស យ៉ារ៉ា មានប្រសាសន៍ ប្រាប់គេហទំព័រ GNN Cambodia នៅល្ងាចនេះថា «ខ្ញុំយល់ថាពាក្យស្បថមួយម៉ាត់ហ្នឹង គឺគាត់មិនបានឆ្លើយតបឲ្យចំជាមួយនឹងសំនួរទេ គឺគាត់បង្វែងរឿងផ្សេងវិញ។ ខ្ញុំយល់ថាគ្រាន់តែជារឿងបំប៉ោងពាក្យសំដី ព្រោះសម្តេចនាយករដ្ឋមន្ត្រីមានប្រសាសន៍ ក្នុងសភាចង់ឲ្យសមាជិកសភាឆ្លើយតបរឿងហ្នឹង តែគាត់បង្វែររឿងហ្នឹងឆ្លើយរឿងផ្សេង ខ្ញុំមើលទៅដូចជាបង្កប់ន័យអ្វីម៉្យាង នៅក្នុងការឆ្លើយតបរបស់គាត់។»
ឯកឧត្តម សួស យ៉ារ៉ា បន្តថា គណបក្សសង្គ្រោះជាតិ មិនគួរលើករឿងលួចសន្លឹកឆ្នោត មកនិយាយនៅពេលហ្នឹងនោះទេ ព្រោះរាជរដ្ឋាភិបាលបាននិងកំពុងដំណើការការងារ ក្នុងអាណត្តិទី៥នេះ ដោយគណបក្សទាំងពីរក៏បានឯកភាពគ្នាចូលសភា និងបង្កើតនូវវប្បធម៌សន្ទនាដើម្បីដោះស្រាយបញ្ហានយោបាយនានារវាងបក្សទាំងពីរ។ ឯកឧត្តម សួស យ៉ារ៉ា សង្កត់ធ្ងន់ថា «មិនត្រូវលើកពេលហ្នឹងទេ យើងបានប្រើប្រាស់វប្បធម៌សន្ទនាដោយការជួបនិយាយគ្នា រវាងថ្នាក់ដឹកនាំ និងថ្នាក់ដឹកនាំ ហើយមុននឹងឆ្លើយអ្វីជាមួយនិងសារព័ត៌មានសាធារណៈនោះគាត់គួរតែធ្វើការប្រាស្រ័យទាក់ទង និងថ្នាក់ដឹកនាំគណបក្សទាំងពីរសិន គឺចាំមើលលទ្ធផលចុងក្រោយសិន។ មុននិយាយគួរតាមដានឲ្យច្បាស់់លាស់ វប្បធម៌សន្ទនាមិនអនុញ្ញាតឲ្យយើងធ្វើកិច្ចការអ្វីមួយ ដោយល្មើសទៅនិងភាពមិនទុកចិត្តទេ»។
ឯកឧត្តមបន្ថែមថា «ការដែលលើកឡើង ហើងចោទថាលួចសន្លឹកឆ្នោត គឺជាការអុជអាលមួយ ដែលធ្វើឲ្យសង្គមយើងមិនបានសុខ។ គាត់ត្រូវតែច្បាស់លាស់ឆ្លើយនឹងសំនួរ ព្រមស្បថរឺក៏អត់ បើមិនចឹងទេ គាត់ត្រូវបន្សាបរឿងហ្នឹងទៅវិញ តាមរយៈការសន្ទនាជាមួយថ្នាក់ដឹកនាំជាន់ខ្ពស់របស់គណបក្សទាំងពីរ។ ហើយគាត់ត្រូវស្រាវជ្រាវរកថាតើអ្នកណាជាអ្នកបង្កើតភ្លើងនេះឡើង៕
អត្ថបទ៖ សុភាព
អាជ្ញាធរអគ្គីសនីកម្ពុជា ចេញសេចក្តីបំភ្លឺ និងណែនាំ ចំពោះករណីមានការសង្ស័យថាមានការលួចបន្លំធ្វើឲ្យចំនួនប្រើប្រាស់អគ្គីសនីកើនឡើង
យោងតាមសេចក្តីបំភ្លឺរបស់អាជ្ញាធរអគ្គិសនីកម្ពុជា ចេញផ្សាយថ្ងៃទី ០៨ ខែមិថុនា ឆ្នាំ២០១៥បានលើកឡើងថា ដោយក្នុងរយៈពេលប៉ុន្មានខែចុងក្រោយនេះ អាជ្ញាធរអគ្គីសនីកម្ពុជាសង្កេតឃើញថា មានការតវ៉ាជាបន្តបន្ទាប់នៅតាមដំបន់មួយចំនួនក្នុងព្រះរាជាណាចក្រកម្ពុជា ទាំងក្នុងតំបន់ផ្គត់ផ្គង់របស់សហគ្រាសឯកជន ដោយប្រជាពលរដ្ឋសង្ស័យថា អ្នកផ្គត់ផ្គង់អគ្គីសនីលួចបន្លំបង្កើនតួលេខថាមពលប្រើប្រាស់របស់ខ្លួន។
ក្នុងសេចក្តីបំភ្លឺដដែលរបស់អាជ្ញាធរអគ្គីសនីកម្ពុជា បានសង្កត់ធ្ងន់ថា បរិមាណថាមពលអគ្គីសនីដែលប្រជាពលរដ្ឋប្រើប្រាស់នៅទូទាំងព្រះរាជាណាចក្រកម្ពុជា ត្រូវបានកំណត់ឲ្យវាស់ថ្លឹងដោយជញ្ជីងថ្លឹងអគ្គីសនីមួយហៅថា «នាឡិកាស្ទង់» ដែលអ្នកផ្គត់ផ្គង់ត្រូវតម្លើងនៅគល់ខ្សែដែលត្រូវផ្គត់ផ្គង់ឲ្យទីតាំងរបស់អ្នកប្រើប្រាស់នីមួយៗ។ ថាមពលអគ្គីសនីដែលអ្នកផ្គត់ផ្គង់បានផ្តល់ទៅឲ្យអ្នកប្រើប្រាស់ និងត្រូវឆ្លងកាត់ជញ្ជីងថ្លឹងអគ្គីសនីនេះ រួចត្រូវបានវាស់ និងកត់ត្រាដោយជញ្ជីងថ្លឹងនេះ។ ដូចជាជញ្ជីងថ្លឹងទំនិញដទៃទៀតដែរ ប្រសិនបើជញ្ជីងថ្លឹងអគ្គីសនីនេះត្រឹមត្រូវមានន័យថា ចំនួនអគ្គីសនីដែលអ្នកផ្គត់ផ្គង់ផ្តល់ឲ្យអ្នកប្រើប្រាស់ក៏ត្រឹមត្រូវដែរ ប៉ុន្តែ បើជញ្ជីងថ្លឹងអគ្គីសនីនេះមិនត្រឹមត្រូវទេ ចំនួនអគ្គីសនីដែលអ្នកផ្គត់ផ្គង់ផ្តល់ឲ្យអ្នកប្រើប្រាស់ក៏មិនត្រឹមត្រូវដែរ។ ដូច្នេះគេមិនអាចធ្វើការវាយតម្លៃដោយខ្លួនឯងថាចំនួនថាមពលប្រើប្រាស់ណាមួយត្រឹមត្រូវ ឬមិនត្រឹមត្រូវ ច្រើន ឬតិចជាងចំនួនពិតប្រាកដ ដោយមិនបានធ្វើការត្រួតពិនិត្យជញ្ជីងថ្លឹងអគ្គីសនីរបស់អ្នកនោះថាតើវាត្រឹមត្រូវ ឬមិនត្រឹមត្រូវឡើយ ពីព្រោះជាធម្មតាខែក្តៅការប្រើប្រាស់មានបរិមាណច្រើនជាងខែត្រជាក់។
អាជ្ញាធរអគ្គិសនី បានបន្ថែមទៀតថា ក្នុងករណីអ្នកប្រើប្រាស់អគ្គិសនីណាមួយសង្ស័យថា ជញ្ជឹងថ្លឹងអគ្គិសនីរបស់ខ្លួនដើរលឿនបណ្តាលឲ្យខ្លួនត្រូវបង់ប្រាក់អស់ច្រើន អ្នកនោះអាចទំនាក់ទំនងជាមួយអាជ្ញាធរមូលដ្ឋាន ឃុំ សង្កាត់របស់ខ្លួន ឬទំនាក់ទំនងជាមួយមន្ទីររ៉ែ និងថាមពល រាជធានី/ខេត្ត ដើម្បីអោយអាជ្ញាធរអគ្គិសនីកម្ពុជាដែលជាអាជ្ញាកណ្តាលចុះទៅត្រួតពិនិត្យ ភាពត្រឹមត្រូវនៃការថ្លឹងអគ្គិសនីរបស់ខ្លួនបាន។ សូមជម្រាបជូនថា អាជ្ញាធរអគ្គិសនីកម្ពុជាមានបរិធានចល័ត ដែលទទួលស្គាល់ដោយមន្ទីរពិសោធន៍អន្តរជាតិសម្រាប់ត្រួតពិនិត្យដឹងថា ជញ្ជីងថ្លឹងអគ្គិសនីនីមួយៗ ដើរត្រឹមត្រូវ ដើរយឺត ឬលឿន ក្នុងកម្រិតប៉ុន្មាន% ដែលអាចកាត់សេចក្តីឲ្យសងនូវអ្វីដែលបានកត់ត្រាលើសឬខ្វះ ។ ការត្រួតពិនិត្យផ្ទៀងផ្ទាត់របស់អាជ្ញាធរអគ្គិសនីកម្ពុជានេះ មិនគិតថ្លៃទេ និងអាចធ្វើការត្រួតពិនិត្យទាំងក្នុងតំបន់ផ្គត់ផ្គង់របស់សហគ្រាសរដ្ឋគឺ អគ្គិសនីកម្ពុជា និងទាំងក្នុងតំបន់ផ្គត់ផ្គង់របស់សហគ្រាសឯកជនទូទាំងព្រះរាជាណាចក្រកម្ពុជា។ ជាមួយគ្នានេះ ប្រសិនបើអ្នកប្រើប្រាស់ណាមួយ នៅតែមិនទុកចិត្តការត្រួតពិនិត្យឯករាជ្យរបស់អាជ្ញាធរអគ្គិសនីកម្ពុជា យោងតាមបទប្បញ្ញាតិ្តស្តីពីលក្ខខណ្ឌទូទៅក្នុងការផ្គត់ផ្គង់អគ្គិសនីក្នុងព្រះរាជាណាចក្រកម្ពុជា អ្នកនៅមានសិទ្ធិស្នើសុំបញ្ជូន ”នាឡិកាស្ទង់” របស់ខ្លួននៅមន្ទីរពិសោធន៍ផ្ទៀងផ្ទាត់នាឡិការស្ទង់នៅប្រទេសណាមួយ ដើម្បីឲ្យគេពិនិត្យរកយុត្តិធម៌បាន៕
អត្ថបទ៖សុភាព
ក្រុមការងារថ្នាក់ជាតិចុះជួបប្រជាពលរដ្ឋរងគ្រោះដោយខ្យល់កន្ត្រាក់ បាក់រលំផ្ទះនៅភូមិកញ្ចាង
ដោយអនុវត្តតាមពាក្យស្លោក ទុក្ខលំបាករបស់ប្រជាពលរដ្ឋ គឺជាក្តីកង្វល់របស់រាជរដ្ឋាភិបាល នៅព្រឹកថ្ងៃទី ០៩ ខែមិថុនា ឆ្នាំ ២០១៥ ក្រុមការងារថ្នាក់ជាតិ ចុះជួយឃុំកុមាររាជា ដឹកនាំដោយឯកឧត្តម សៅ សុភៈ ក្រុមការងារ និងមានការចូលរួមពីសម្ព័ន្ធយុវជនកម្ពុជា នៅក្នុងមូលដ្ឋានផងដែរ បានចុះទៅពិនិត្យទីតាំងជាក់ស្តែងរបស់ប្រជាពលរដ្ឋរងគ្រោះ ដោយសារខ្យល់កន្ត្រាក់កាលពីថ្ងៃទី ០៧ ខែមិថុនា ឆ្នាំ ២០១៥ កន្លងទៅនេះ ដែលមានការដួលរលំផ្ទះប្រជាពលរដ្ឋចំនួនពីរខ្នង ក្នុងនោះមានគ្រួសារលោក ណេន ព្រឿង គ្រួសារលោកស្រី អ៊ឹម កញ្ញា អាយុ៤៣ ឆ្នាំ ដែលជាស្រ្តីមេម៉ាយកូនពីរនៅក្នុងបន្ទុក នៅភូមិកញ្ចាង ឃុំកុមាររាជា ស្រុកបាទី ខេត្តតាកែវ ។
ឯកឧត្តម សៅ សុភៈ បានពាំនាំនូវប្រសាសន៍ផ្តាំផ្ញើ សួរសុខទុក្ខរបស់ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី និងជាប្រធានក្រុមការងារថ្នាក់ជាតិចុះជួយខេត្តតាកែវ ប្រសាសន៍ផ្តាំផ្ញើសួរសុខទុក្ខរបស់ឯកឧត្តម សុខ សូកាន អ្នកតំណាងរាស្ត្រមណ្ឌលតាកែវ និងប្រសាសន៍ផ្តាំផ្ញើសួរសុខទុក្ខរបស់ឯកឧត្តម ស្វាយ ស៊ីថា រដ្ឋលេខាធិការ ប្រធានអង្គភាពព័ត៌មាន និងប្រតិកម្មរហ័ស នៃទីស្តីការគណៈរដ្ឋមន្រ្តី និងជាប្រធានក្រុមការងារថ្នាក់ជាតិចុះមូលដ្ឋាន ឃុំកុមាររាជា ។
ឯកឧត្តម សៅ សុភៈ បានចូលរួមសោកស្តាយដែលឃើញប្រជាពលរដ្ឋកំពុងជួបទុក្ខលំបាកដោយ
ឯកឧត្តមចាត់ទុកថាទុក្ខលំបាកនេះ ជាក្តីកង្វល់របស់រាជរដ្ឋាភិបាល ដែលគណបក្សប្រជាជនកម្ពុជា តែងតែយកចិត្តទុកដាក់ និងគិតគូរដល់ជីវភាពរស់នៅប្រចាំថ្ងៃ របស់បងប្អូន។ ឯកឧត្តម ក៏បានបន្តទៀតថា ពេលនេះជារដូវវស្សាដែលតែងតែមានភ្ញៀងធ្លាក់ ផ្គរ រន្ទះ លាយទ្បំ និងខ្យល់កន្រ្តាក់ជាញឹកញាប់ ដូច្នេះសូមបងប្អូនមានការប្រុងប្រយ័ត្នផងនៅពេលមានភ្ញៀងខ្យល់ម្តងៗ សូមរត់ទៅជ្រកទីកន្លែងមានសុវត្ថិភាពជាបន្ទាន់ដើម្បីការពារកុំឲ្យមានគ្រោះថ្នាក់រហូតបាត់បង់ជីវិតដោយប្រការណាមួយ។ ក្នុងកាសជួប សំណេះ សំណាលសួរសុខទុក្ខនេះដែរក្រុមការងារក៏បានជូនថវិកាឧបត្តម្ភ ដើម្បីសម្រួលដោះស្រាយជីវភាពជាបណ្តោះអាសន្នជូនប្រជាពលរដ្ឋក្នុងមួយគ្រួសារ១៥ម៉ឺនរៀល និងទទួលយកសំណូមពររបស់ប្រជាពលរដ្ឋ ដែលស្នើរឲ្យក្រុមការងារថ្នាក់ជាតិជួយជួសជុល សង់ផ្ទះថ្មីជូនពួកគាត់។
ឯកឧត្តម សៅ សុភៈ បានបញ្ជាក់ជូនប្រជាពលរដ្ឋថា ក្រុមការងារថ្នាក់ជាតិចុះជួយឃុំកុមាររាជាដឹកនាំដោយឯកឧត្តម ស្វាយ ស៊ីថា និងឯកឧត្តម សុខ សូកាន អ្នកតំណាងរាស្រ្តមណ្ឌល ខេត្តតាកែវ និងជួយសង់ផ្ទះថ្មីជូនដល់ពួកគាត់ក្នុងពេលឆាប់ៗខាងមុខនេះ ដើម្បីចូលរួមដោះស្រាយទុក្ខលំបាករបស់ប្រជាពលរដ្ឋទាំងនោះ។ ប្រជាពលរដ្ឋមានសេចក្តីត្រេកអររីករាយនូវការយកចិត្តទុក្ខដាក់របស់ក្រុមការងារថ្នាក់ជាតិដែលបានជួយសម្រួលទុក្ខលំបាករបស់ពួកគាត់ ទាន់សភាពការណ៍។
នេះជាការយកចិត្តទុកដាក់ខ្ពស់បំផុតកើតចេញពីអ្នកតំណាងរាស្រ្ត នៃគណបក្សប្រជាជនកម្ពុជា ក្រុមការងារថ្នាក់កណ្តាលជាតិ រួមទាំងសម្ព័ន្ធយុវជនកម្ពុជា ក៏ដូចជាមន្ត្រីមូលដ្ឋានក្នុងកិច្ចខិតខំប្រឹងប្រែងអស់ពីកំលាំងកាយកំលាំងចិត្ត ដោះស្រាយរាល់ទុក្ខលំបាកជូនដល់ប្រជាពលរដ្ឋដោយឥតប្រកាន់និន្នាការនយោបាយណាទាំងអស់ ៕
Subscribe to:
Posts (Atom)