Wednesday, July 15, 2015
ក្នុងរយៈពេល៣ខែ គ.ជ.ប បានពិភាក្សាកែទម្រង់អភិវឌ្ឍន៍សមត្ថភាពរបស់ខ្លួន ជាមួយភាគីអន្តរជាតិ រហូតដល់ជាង ១០លើក
គិតត្រឹមថ្ងៃច័ន្ទ ទី១៣ ខែកក្កដា ឆ្នាំ២០១៥ ពោលគឺរយៈពេល៣ខែគត់ គណៈកម្មាធិការជាតិរៀបចំការបោះឆ្នោត បានជួបជាមួយភាគីពាក់ព័ន្ធអន្តរជាតិចំនួនជាង ១០លើកដើម្បីបង្កើនសមត្ថភាព និងអភិវឌ្ឍន៍ខ្លួនឲ្យកាន់តែរឹងមាំថែមទៀត។
សេចក្តីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោតចុះថ្ងៃទី១៣ ខែកក្កដា ឆ្នាំ២០១៥ បានបញ្ជាក់ថា ក្នុងរយៈពេល៣ខែកន្លងទៅ គ.ជ.ប បានជួបជាមួយភាគីសហភាពអឺរ៉ុប រួមជាមួយភាគីជប៉ុនចំនួន ២លើក ស្តីពីជំនួយជួយដល់ គ.ជ.ប បន្ទាប់មក គ.ជ.ប បានជួបជាមួយភាគីជប៉ុន ចំនួន៣លើកទៀត ស្តីពីជំនួយរបស់ជប៉ុនជួយដល់ គ.ជ.ប និងស្តីពីអនុសាសន៍របស់ជប៉ុនលើសេចក្តីព្រាងបទបញ្ជា និងនីតិវិធីសម្រាប់ការចុះឈ្មោះបោះឆ្នោតឆ្នាំ២០១៦ ដើម្បីរៀបចំបញ្ជីបោះឆ្នោតថ្មី និងស្តីពីបច្ចេកទេសប្រព័ន្ធកុំព្យូទ័រសម្រាប់ចុះឈ្មោះបោះឆ្នោត និងគ្រប់គ្រងទិន្នន័យអ្នកបោះឆ្នោត។
ក្រៅពីនេះ គ.ជ.ប បានជួបជាមួយគណៈប្រតិភូសមាជិកសភាសហព័ន្ធអាល្លឺម៉ង់ ចំនួន១លើក ស្តីពីការកែទម្រង់ការបោះឆ្នោត និងបានជួបជាមួយភាគីក្រុមហ៊ុន SCYTL innovating Democracy ស្តីពីឧបករណ៍បម្រើការចុះបោះឆ្នោត និងការរក្សាទុកទិន្នន័យអ្នកបោះឆ្នោត។
គួរបញ្ជាក់ផងដែរថា នៅថ្ងៃសុក្រទី១៧ ខែកក្កដា ឆ្នាំ២០១៥ខាងមុខនេះ គណៈកម្មការចំពោះកិច្ច គ.ជ.ប ទទួលបន្ទុកសហការជាមួយសហភាពអឺរ៉ុប និងប្រទេសជប៉ុន លើការងាររៀបចំចុះឈ្មោះបោះឆ្នោត និងបញ្ជីបោះឆ្នោតថ្មី ដឹកនាំដោយឯកឧត្តម គួយ ប៊ុនរឿន អនុប្រធាន គ.ជ.ប និងជាប្រធានគណៈកម្មការ និងជួបជាមួយសហភាពអឺរ៉ុប ស្តីពីអនុសាសន៍របស់សហភាពអឺរ៉ុប លើសេចក្តីព្រាងបទបញ្ជា និងនីតិវិធី សម្រាប់ចុះឈ្មោះបោះឆ្នោតឆ្នាំ២០១៦ ដើម្បីរៀបចំបញ្ជីបោះឆ្នោតថ្មី៕
ដោយៈ ជា សុភ័ក្ត្រ
ស្រ្តីម្នាក់ឆ្លងទន្លេកូនភ្លោះ៤នាក់ ដំបូងគេ កើតនៅខេត្តព្រះវិហារ
នៅថ្ងៃទី១៤ ខែកក្កដា ឆ្នាំ២០១៥ នេះ គឺជាលើកដំបូងដែលស្រុកខ្មែរមានស្រ្តីឆ្លងទន្លេម្តងបានកូនដល់ទៅ ៤ នាក់ ហើយស្ត្រីជាម្ដាយ និងទារក ទារិកាទាំង៤ កំពុងសម្រាកថែទាំសុខភាពនៅមន្ទីរពេទ្យបង្អែក ១៦ មករា ខេត្តព្រះវិហារ។
ស្រ្តីដែលឆ្លងទន្លេកូនភ្លោះ ៤ នាក់ ដែលមានស្រីពីរ ប្រុសពីរនោះ មានឈ្មោះ ឆាយ សុផា អាយុ ២៤ ឆ្នាំ ដែលមានប្តី ឈ្មោះ សេម ផានិត អាយុ ២៥ ឆ្នាំ ជាគ្រូបង្រៀននៅសាសាបឋមនៅឃុំព្រឹករស្មី ស្រុករវៀង ខេត្តព្រះវិហារ។ កូនភ្លោះទាំង ៤ នាក់ស្រីពីរប្រុសពីរនេះ ជាកូនលើកទី ២ហើយ របស់គ្រួសារនេះ ប៉ុន្តែកូនលើកទីមួយនោះ ក៏បានស្លាប់ហើយបន្ទាប់ពីកើតបានប៉ុន្មានខែ។
បើយោងតាមលោក ឯក សារ៉ូ អភិបាលស្រុករវៀង ខេត្តព្រះវិហារ បានឱ្យដឹងថា នៅព្រឹកថ្ងៃទី១៤ ខែកក្កដា ឆ្នាំ២០១៥ វេលាម៉ោង ៨ ជិត ៩ នៅមណ្ឌលសុខភាពស្រុករវៀង មានស្រ្តីម្នាក់បានសម្រាលកូនមកបាន ៤ នាក់មែន។ លោក អភិបាលស្រុករូបនេះបញ្ជាក់ថា កូនភ្លោះ ៤ នាក់នោះ គេមានសុខភាពល្អទេក្នុងនោះមានស្រី២ ប្រុស២ ល្អណាស់ស្មើគ្នាល្អណាស់។
លោក គង់ បាន ប្រធានមណ្ឌលសុខភាពស្រុករវៀង ជាទីដែលកូនភ្លោះ ៤ នាក់ប្រសូតនោះបានឲ្យដឹងថា ម្តាយកូនគេនោះ មានសុខភាពល្អទេ បើទោះជាម្តាយនោះបង្កើតកូនម្តងភ្លោះ ៤ នាក់ក្តី ដោយម្តាយមានសម្ពាធឈាមធម្មតា និងកូនក៏មិនអីដែរពេលនេះ។ ដោយលោកមានការព្រួយបារម្ភពីបញ្ហាសុខភាពមាតា និងទារក ទើបលោកបានសម្រេចចិត្តបញ្ជូនទៅមន្ទីរពេទ្យបង្អែកខេត្តវិញ។ លោកក៏បានរៀបរាប់ពីទារកទាំងបួនថាកូនទី ១ កើតមកមានទម្ងន់មួយគីឡូពីរខាំ កូនទីពីរ មួយគីឡូប្រាំបីខាំ កូនទីបីទម្ងន់មួយគីឡូកន្លះ និងកូនទីបួនទម្ងន់មួយគីឡូបីខាំវិញ។
តាមការបញ្ជាក់ពីលោក សេង ទៀង ជំនួយការផ្ទាល់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានឲ្យដឹងថា គិតមកទល់ពេលនេះ គ្រួសារមានកូនភ្លោះ ៣ នាក់នៅទូទាំងប្រទេស មានប្រមាណ ២៧១ គ្រួសារ ដោយឡែកគ្រួសារដែលមានកូនភ្លោះ ៤ នាក់មិនធ្លាប់មានទេពីមុន ទើបតែមាននៅខេត្តព្រះវិហារថ្មីៗនេះ។ ក្រៅពីបង្ហាញភាពភ្ញាក់ផ្អើល និងសរសើរថា កូនភ្លោះ ៤ នាក់នេះល្អណាស់ មានស្រីពីរ ប្រុសពីរនោះ លោក សេង ទៀង បានបញ្ជាក់ថា កន្លងមកកូនភ្លោះ៣នាក់ ទទួលបានការឧបត្ថម្ភពីសម្តេចនាយករដ្ឋមន្រ្តី ចំនួន ៣ លានរៀល និងមិនហៅថាកូនសម្តេចទេ ឥឡូវដូចជាដាក់ថាចៅសម្តេចវិញ។ តែដោយឡែកជាលើកទីមួយហើយដែលមានកូនភ្លោះ ៤ នេះ លោកមិនទាន់ដឹងថា សម្តេចលោកប្រទានប៉ុន្មាននោះទេ ដោយលោកបានប្រាប់ថាចាំមើលលោកចុះទៅជួបសិន។
អត្ថបទៈ តាំង ថៃហេង
ក្រុមប្រឹក្សាសហជីពជាតិកម្ពុជា របស់លោក សោម អូន បានស្នើ៤ចំណុចធំៗ ឲ្យមានការកែសម្រួល ពាក់ព័ន្ធទៅនឹងសេចក្តីព្រាងច្បាប់ស្តីពីសហជីព
ការចូលរួមក្នុងគោលបំណង សម្រួលការងារមួយចំនួន របស់សហជីពទាក់ទិននឹងសេចក្តីព្រាងច្បាប់ សហជីពនេះ លោក សោម អូន ប្រធានក្រុមប្រឹក្សា សហជីពជាតិកម្ពុជា ហៅកាត់ថា «CCNU» បានសរ សេរនៅក្នុងAccount Facebook ផ្ទាល់ខ្លួន របស់លោកដែលត្រូវបានផ្សព្វផ្សាយនៅថ្ងៃទី១៥ ខែកក្កដា ឆ្នាំ២០១៥ថា “យើងស្វាគមន៍” ឲ្យមានច្បាប់សហជីព ដែលអន្តរក្រសួងរបស់រាជរដ្ឋាភិបាល កំពុងតែ ដំណើរការពិភាក្សាហើយសង្ឃឹមថាមិនយូរមិនឆាប់នឹងត្រូវបានរដ្ឋសភាអនុម័ត នៅពេលខាងមុខនេះ ។
លោកបានបញ្ជាក់ថា សមាជិកក្រុមប្រឹក្សាភិបាល CCNU ដែលមានសមាជិក ចំនួន៦៥សហព័ន្ធ សហជីព បានឯកភាពគ្នា និងបានធ្វើលិខិតស្នើជូន យោបល់ទៅក្រសួងការងារ និងបណ្តុះបណ្តាលវិជ្ជាជីវះរួចហើយ នូវកង្វល់ធំៗ របស់ខ្លួនចំនួន៤ចំណុច ទី១- ស្នើសុំឲ្យកែសម្រួល ចំនួនភាគរយនៃការបង្កើតសហជីពមូលដ្ឋានពី ២០%មកត្រឹមចំនួនតិចបំផុត ឫកំណត់ចំនួនជាក់លាក់ ណាមួយនៅក្នុងចន្លោះពី ១០នាក់ ទៅ២០នាក់ នៃកម្មកររោងចក្រមួយ ដែលយើងអាចមានសិទ្ឋិបង្កើត សហជីពបាន ដោយកុំគិតជា ចំនួន ភាគរយ ពីព្រោះការកំណត់ ចំនួន២០% វាជាតួរលេខខ្ពស់មួយនឹងធ្វើឲ្យពិបាកដល់ការបង្កើត សហជីព នៅរោងចក្រ សហគ្រាស ក្នុងគោលដៅការពារសិទ្ឋិ និងផលប្រយោជន៍ របស់កម្មករ ទី២- ស្នើសុំបន្ទាប់ពីច្បាប់នេះ ត្រូវបានរដ្ឋសភាអនុម័ត គឺមិនត្រូវតម្រូវឲ្យសហព័ន្ធសហជីព ឫ សហជីពមូលដ្ឋាន ដែលបានចុះ បញ្ជីការួចហើយនោះ ត្រូវចុះបញ្ជីការ ឡើងវិញនោះទេ ដែលនាំឲ្យបង្កើតនូវការលំបាក និងស្មុគ្រស្មាញ ដល់ការរៀបចំបែបបទ ចុះបញ្ជីការជាថ្មី និងត្រូវចំណាយពេលវេលា និងថវិកា ទី៣- ស្នើសុំឲ្យរក្សាចំណុចកាត់ប្រាក់ ភាគទានសមាជិកសហជីពចំនួន១%នៃប្រាក់ខែកម្មករ ដើម្បីឲ្យសហជីព ធានាបាននូវនិរន្តរភាពការងារ និងសេដ្ឋកិច្ចក្នុងការទ្រទ្រង់ ដំណើរការសកម្មភាពរបស់ខ្លូន ទី៤- ស្នើសុំមុននឹងសេចក្តីព្រាងច្បាប់ សហជីពនេះបញ្ជូនទៅសមាជិកក្រុមប្រឹក្សាអ្នកច្បាប់គណៈរដ្ឋមន្ត្រី សូមរៀបចំសិក្ខាសាលាត្រីភាគីថ្នាក់ជាតិ យ៉ាងហោចណាស់ឲ្យបាន២ដង ដើម្បីផ្តល់ឱកាស ចុងក្រោយដល់ភាគីពាក់ព័ន្ធ ទាំងអស់ផ្តល់យោបល់ ដើម្បីឲ្យច្បាប់នេះក្លាយទៅជាច្បាប់មួយមានតម្លាព សម្រាប់ភាគីអនុវត្ត និងអនុវត្តដោយរលូតសម្រាប់ទៅ អនាគតបន្ទាប់ពីរដ្ឋសភាអនម័ត។
លោក សោម អូន បានបន្ថែមទៀតថា ចំណុចដែលភាគីសហជីពបារម្មណ៍ជាងគេ គឺការកំណត់ចំនួន២០% នៃកម្មករសរុបក្នុងមួយរោងចក្រ ទើបអាចបង្កើតសហជីព ។ ឧទាហរណ៍ បើសិនជារោងចក្រ មួយមានកម្មករ២០០០នាក់ ទាល់មានសមាជិក៤០០នាក់ ជាមុនសិនទើបអាចបង្កើតសហជីពបាន ។ យើងអាចដាក់ជាសំនួរថា បើមិនទាន់មានរចនាសម្ព័ន្ឋ សហជីពផង តើបានសមាជិកពីណា រហូតដល់៤០០នាក់នោះ? ។
លោកសង្ឃឹមថា ចំណុចនេះ គួតែធ្វើការកែសម្រួលដោយពុំចាំបាច់ កំណត់ចំនួនភាគរយនោះទេ ហើយអាចកំណត់ចំនួនជាក់លាក់ ក្នុងចន្លោះពី១០ទៅ២០នាក់បានហើយ ដើម្បីឲ្យកម្មករមានសិទ្ឋិបង្កើត សហជីពនៅក្នុងរោងចក្រសហគ្រាសមួយ៕
អត្ថបទៈ តាំង ថៃហេង
ធនាគារអភិវឌ្ឍអាស៊ី ផ្តល់ប្រាក់កម្ចី ជាង១៨លានដុល្លារ សម្រាប់អភិវឌ្ឍហេដ្ឋា រចនាសម្ព័ន្ធនៅ តំបន់ឆ្នេរនៅកម្ពុជា
ក្រសួងទេសចរណ៍កម្ពុជា កាលពីម្សិលមិញ បានចាប់ផ្តើមពិភាក្សាជាមួយនឹង ធនាគារអភិវឌ្ឍអាស៊ី (ADB)លើគម្រោងអភិវឌ្ឍហេដ្ឋារចនាសម្ព័ន្ធ នៅបណ្តាខេត្តចំនួន៣ ជាប់មាត់សមុទ្ររបស់កម្ពុជា។ គម្រោងនេះ មានទឹកប្រាក់ប្រមាណ ១៨, ៧៧លានដុល្លារ ដែលនឹងអភិវឌ្ឍហេដ្ឋារចនាសម្ព័ន្ធ នៅខេត្តកោះកុង កំពត និងខេត្តកែប ឱ្យកាន់តែប្រសើរឡើង។
លោក ទិត ចន្ថា រដ្ឋលេខាធិការក្រសួងទេសចរណ៍ និងជានាយកគម្រោងអភិវឌ្ឍន៍ហេដ្ឋារចនាសម្ព័ន្ធទេសចរណ៍ សម្រាប់កំណើនប្រកបដោយបរិយាប័ណ ក្នុងតំបន់មេគង្គ បានឱ្យដឹងថា គម្រោងនេះ មានដូចជាអភិវឌ្ឍកំពង់ផែទេសចរណ៍នៅខេត្តកំពត ការធ្វើឱ្យប្រសើរឡើង ផ្នែកបរិស្ថាននៅតំបន់ផ្សារក្រោម ក្នុងខេត្តកែបជាដើម ហើយថាក្នុងគម្រោងទាំងមូលអាច ស្រូបយកកម្លាំងពលកម្ម យ៉ាងហោចណាស់ ក៏ជាង៥០០០នាក់ មកបំរើការងារ ហើយពលរដ្ឋនៅក្នុងសហគមន៍ក្នុងតំបន់នេះ ក៏នឹង ទទួលបានផលយ៉ាងក្រាសក្រែលពីវិស័យទេសចរណ៍ផងដែរ។
បើយោងតាម ឯកឧត្តម ថោង ខុន រដ្ឋមន្រ្តីក្រសួងទេសចរណ៍ បានមានប្រសាសន៍ថា រាល់ហេដ្ឋារចនា សម្ព័ន្ធដែលបង្កើតឡើងទាំងអស់ ត្រូវតែធានានូវកម្រិតស្តង់ដាអន្តរជាតិ ព្រោះថាការកំណត់បែបនេះ វាជាប្រព័ន្ធដែលអាចស្រូបយកភ្ញៀវទេសចរណ៍ ជាតិនិងអន្តរជាតិ មកពីប្រទេសនានានៅលើពិភពលោកតាមច្រកផ្លូវទឹកឱ្យបានតាមគម្រោងផែនការ៕
អត្ថបទៈ តាំង ថៃហេង
ឧត្តមក្រុមប្រឹក្សានៃអង្គចៅក្រម ប្រកាសបើកសម័យប្រជុំ នៅថ្ងៃទី១៧ ខែកក្កដា ខាងមុខក្រោម អធិបតីភាពព្រះមហាក្សត្រ
ឧត្តមក្រុមប្រឹក្សានៃអង្គចៅក្រមបានឲ្យដឹងថា នៅថ្ងៃសុក្រ ទី១៧ ខែកក្កដា ឆ្នាំ២០១៥ វេលាម៉ោង ១០:០០នាទីព្រឹក ខាងមុខនេះ នៅព្រះបរមរាជវាំង ឧត្តមក្រុមប្រឹក្សានៃអង្គចៅក្រម នឹងបើកសម័យប្រជុំពេញអង្គលើកទី២៦ ក្រោមព្រះរាជាធិបតីដ៏ខ្ពង់ខ្ពស់ ព្រះករុណាជាអម្ចាស់ជីវិតលើត្បូង ជាទីគោរពសក្ការៈដ៏ខ្ពង់ខ្ពស់បំផុត ព្រះប្រធានឧត្តមក្រុមប្រឹក្សានៃអង្គចៅក្រម ដើម្បីពិនិត្យ ពិភាក្សា និងអនុម័ត លើរបៀបវារៈចំនួន ០៩ រួមមានដូចតទៅ៖ ១-របាយការណ៍ ស្តីពីសកម្មភាពការងាររបស់ឧត្តមក្រុមប្រឹក្សានៃអង្គចៅក្រម អង្គការ តុលាការ និងអង្គការ និងអង្គការអយ្យការនៃព្រះរាជាណាចក្រកម្ពុជា ប្រចាំឆ្នំា២០១៤ ២-របាយការណ៍ ស្តីពីសកម្មភាពការងាររបស់សមាជិកឧត្តមក្រុមប្រឹក្សានៃអង្គចៅក្រមចន្លោះសម័យប្រជុំលើកទី២៦ ៣-ពិនិត្យ និងសម្រេច អំពីការផ្លាស់ប្តូរចៅក្រមនៃឧត្តមក្រុមប្រឹក្សានៃអង្គចៅក្រម និងសមាសភាពនៃក្រុមអធិការកិច្ចនៃឧត្តមក្រុមប្រឹក្សានៃអង្គចៅក្រម ៤-ពិនិត្យ និងសម្រេច អំពីការបែងចែកជំនាញ និងទីកន្លែងបំពេញការងារសម្រាប់សិស្សចៅក្រមជំនាន់ទី៦ សាលាភូមិន្ទចៅក្រមនៃរាជបណ្ឌិតសភាវិជ្ជាជីវៈតុលាការ ៥-ពិនិត្យ និងសម្រេច អំពីការផ្លាស់ប្តូរចៅក្រម តាមវេនបួនឆ្នាំម្តង សម្រាប់ឆ្នាំ២០១៤ ៦-ពិនិត្យ និងសម្រេច អំពីការតែងតាំង ប្រធាន អនុប្រធាន សាលាជម្រះក្តីមួយចំនួន ៧-ពិគ្រោះយោបល់លើសំណើតែងតាំង ផ្លាស់ប្តូរ និងផ្ទេរភារៈកិច្ច ព្រះរាជអាជ្ញាមួយចំនួន ៨-ពិនិត្យ និងសម្រេច លើសំណើសុំអនុញ្ញាតច្បាប់សម្រាករយៈពេល ០១ឆ្នាំរបស់លោក យូ ប៊ុនណា ចៅក្រមសាលាឧទ្ធរណ៍ ចេញទៅបន្តការសិក្សា និងទី៩-និយាយអំពីបញ្ហាផ្សេងៗមួយចំនួន។
របៀបវារៈសំខាន់ៗ៥ ត្រូវបានព្រឹទ្ធសភាជាតិ លើកយកមកពិភាក្សានៅថ្ងៃទី១៥ ខែកក្កដានេះ
នៅថ្ងៃទី ១៥ ខែកក្កដា ឆ្នាំ២០១៥ នេះ ព្រឹទ្ធសភាជាតិនៃព្រះរាជាណាចក្រកម្ពុជា បានបើកកិច្ចប្រជុំគណៈកម្មាធិការអចិន្រ្តៃយ៍ព្រឹទ្ធសភា ក្រោមអធិបតីភាពដ៏ខ្ពង់ខ្ពស់ របស់សម្តេចវិបុលសេនាភក្តី សាយ ជុំ ប្រធានព្រឹទ្ធសភា នៃព្រះរាជាណាចក្រកម្ពុជា លើរបៀបវារៈសំខាន់ៗចំនួន៥ ដែលក្នុងនោះសេចក្តីព្រាងច្បាប់ ស្តីពីសមាគម និងអង្គការមិនមែនរដ្ឋាភិបាល ក៏ត្រូវបានលើកមកពិភាក្សាផងដែរ។
របៀបវារៈទាំង៥ដែលត្រូវបានព្រឹទ្ធសភាលើកមកពិភាក្សាថ្ងៃនេះរួមមាន៖ ទី១-ការជ្រើសរើស បំពេញសមាជិកគណៈកម្មការអប់រំ យុវជន និងកីឡា ធម្មការ សាសនា វប្បធម៌ វិចិត្រសិល្បៈ និងទេសចរណ៍នៃព្រឹទ្ធសភា, ទី២-ពិនិត្យ និងសម្រេចលើសំណើរបស់គណៈកម្មការទី២ព្រឹទ្ធសភា សុំដាក់សេចក្តីព្រាងច្បាប់ ស្តីពីការទូទាត់ថវិកាទូទៅរបស់រដ្ឋ សម្រាប់ការគ្រប់គ្រងឆ្នាំ២០១៣ ទៅក្នុងរបៀបវារៈសម័យប្រជុំលើកទី៧ព្រឹទ្ធសភានីតិកាលទី៣, ទី៣-ពិនិត្យ និងសម្រេចលើសំណើរបស់គណៈកម្មការទី៦ព្រឹទ្ធសភា សុំដាក់សេចក្តីស្នើច្បាប់ស្តីពីភតិសន្យាពិសេស ទៅក្នុងរបៀបវារៈសម័យប្រជុំលើកទី៧ព្រឹទ្ធសភា នីតិកាលទី៣, ទី៤-ពិនិត្យសំណើរបស់រដ្ឋសភាសុំពិនិត្យ និងឲ្យយោបល់លើសេចក្តីព្រាងច្បាប់ ស្តីពី សមាគម និងអង្គការមិនមែនរដ្ឋាភិបាល និង ទី៥-កំណត់កាលបរិច្ឆេទ និងរបៀបវារៈបន្តសម័យប្រជុំលើកទី៧។
យោងតាមសេចក្តីជូនដំណឹងស្តីពីលទ្ធផល នៃកិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភា ដែលចេញផ្សាយនៅរសៀលថ្ងៃនេះ ដែលចុះហត្ថលេខាដោយ ឯកឧត្តម អ៊ុំ សារឹទ្ធ អគ្គលេខាធិការព្រឹទ្ធសភា បានឲ្យដឹងថា បន្ទាប់ពីបានពិនិត្យ និងពិភាក្សារួចមក គណៈកម្មាធិការអចិន្ត្រៃយ៍ព្រឹទ្ធសភា បានកំណត់យកថ្ងៃសុក្រ ទី១៧ ខែកក្កដា ឆ្នាំ២០១៥ វេលាម៉ោង ៨:០០ព្រឹក បើកសម័យប្រជុំលើកទី៧ ព្រឹទ្ធសភា នីតិកាលទី៣ ដែលមានរបៀបដូចជា៖ ១. ការបោះឆ្នោតជ្រើសរើសបំពេញសមាជិកគណៈកម្មការអប់រំ យុវជន កីឡា ធម្មការ សាសនា វប្បធម៌ វិចិត្រសិល្បៈ និងទេសចរណ៍ នៃព្រឹទ្ធសភា, ២. ពិនិត្យ និងឲ្យយោបល់លើសេចក្តីព្រាងច្បាប់ ស្តីពីការទូទាត់ថវិកាទូទៅរបស់រដ្ឋ សម្រាប់ការគ្រប់គ្រងឆ្នាំ២០១៣ និង ៣.ពិនិត្យ និងឲ្យយោបល់លើសេចក្តីស្នើច្បាប់ ស្តីពីភតិសន្យាពិសេស៕
អត្ថបទ៖ ច័ន្ទ ទេវី
រដ្ឋសភាជម្រាបជូន តំណាងរាស្រ្ត គណបក្ស សង្គ្រោះជាតិ អំពី ការស្នើសុំរាជរដ្ឋាភិបាល ផ្អាកការបោះបង្គោលព្រំដែន ជាមួយវៀតណាម
យោងតាមលិខិតរបស់ អគ្គលេខាធិការដ្ឋានរដ្ឋសភា ចុះថ្ងៃទី១៤ ខែកក្កដា ឆ្នាំ២០១៥ រដ្ឋសភាជាតិនៃព្រះរាជាណាចក្រកម្ពុជា បានបញ្ជាក់ថា កិច្ចការបោះបង្គោលព្រំដែន រដ្ឋសភាបានសម្រេចអនុម័តប្រគល់ជូនរាជរដ្ឋាភិបាល បង្គើតគណៈកម្មាធិការជាតិព្រំដែន ដើម្បីឲ្យទទួលខុសត្រូវលើកិច្ចការនេះរួចហើយ។
ដូច្នេះចំពោះសំណូមពរ ររបស់តំណាងរាស្ត្រគណបក្សសង្គ្រោះជាតិ ដែលស្នើសុំរាជរដ្ឋាភិបាលផ្អាកការបោះបង្គោលព្រំដែន ជាមួយវៀតណាមរហូតដល់ក្រោយការបោះឆ្នោតជាតិ ឆ្នាំ២០១៨ តាមរយៈរដ្ឋសភាជាតិនោះ សម្តេចអគ្គមហាពញាចក្រី ហេង សំរិន ប្រធានរដ្ឋសភា ពុំចុះហត្ថលេខាតាមសំណូមពរនេះនោះទេ៕
អត្ថបទ៖ ច័ន្ទ ទេវី
Subscribe to:
Posts (Atom)