នៅថ្ងៃទី២៦ ខែមិថុនា ឆ្នាំ២០១៥នេះ សម្តេចតេជោ ហ៊ុន សែន បានផ្ញើសារលិខិតចូលរួមក្នុងឱកាសប្រារព្ធទិវាអន្តរជាតិប្រយុទ្ធប្រឆាំងគ្រឿងញៀន ដោយបានសម្តែងនូវមនោសញ្ចេតនារីករាយ និងគាំទ្រយ៉ាងពេញទំហឹងចំពោះការរៀបចំទិវាដ៏មានសារៈសំខាន់នេះ និងចំពោះឆន្ទៈបុព្វហេតុក្នុងការងារប្រយុទ្ធប្រឆាំងគ្រឿងញៀនរបស់ជនរួមជាតិ ពិសេសក្មួយៗយុវជន សិស្សានុសិស្សទាំងអស់ ដើម្បីលើកទឹកចិត្ត និងសំណូមពរឲ្យចូលរួមបន្តអនុវត្តឲ្យបានពេញលេញ និងកាន់តែសកម្មថែមទៀតក្នុងការងារប្រយុទ្ធប្រឆាំងនឹងគ្រឿងញៀន ដែលសកម្មភាពទាំងនេះស្របតាមកម្មវិធីគោលនយោបាយរបស់រាជរដ្ឋាភិបាលកម្ពុជា និងស្របតាមស្មារតីនៃមហាសន្និបាតអង្គការសហប្រជាជាតិ។
សម្រាប់ឆ្នាំ២០១៥នេះទិវានេះត្រូវបានប្រារព្ធឡើងក្រោមប្រធានបទ «ចូរធ្វើឲ្យជីវិត សហគមន៍ និងអត្តសញ្ញាណយើងគ្មានគ្រឿងញៀន» ហើយសម្រាប់ប្រទេសកម្ពុជាយើងផ្ទាល់គឺបានកំណត់យកប្រធានបទ «ចូរធ្វើឲ្យជីវិត និងសហគមន៍យើងគ្មានគ្រឿងញៀន, រួមគ្នាគាំទ្រ និងធ្វើឲ្យកាន់តែប្រសើរឡើង»។
សម្តេចតេជោ ហ៊ុន សែន បានកោតសរសើរ និងវាយតម្លៃខ្ពស់ចំពោះថ្នាក់ដឹកនាំ និងមន្ត្រីរាជការនៃអាជ្ញាធរជាតិប្រយុទ្ធប្រឆាំងគ្រឿងញៀន ក្រសួង ស្ថាប័នជាសមាជិក ក៏ដូចជាថ្នាក់ដឹកនាំ និងមន្ត្រីនៃស្ថាប័ន ព្រឹទ្ធសភា រដ្ឋសភា កាកបាទក្រហមកម្ពុជា ក្រសួង ស្ថាប័នពាក់ព័ន្ធ កងកម្លាំងអនុវត្តច្បាប់គ្រប់ប្រភេទ និងគ្រប់លំដាប់ថ្នាក់ អង្គការមនុស្សធម៌ អង្គការសង្គមស៊ីវិល អន្តរជាតិ វិស័យឯកជន និងវិស័យសាសនា ដែលកន្លងមក បានចំណាយទាំងកម្លាំងកាយ ចិត្ត ប្រាជ្ញា ស្មារតី និងថវិកាប្រកបដោយការទទួលខុសត្រូវខ្ពស់ ក្នុងការងារប្រយុទ្ធប្រឆាំងគ្រឿងញៀន ឲ្យទទួលបានលទ្ធផលគួរឲ្យកត់សម្គាល់ និងបានរួមចំណែកក្នុងការលើកកម្ពស់សុខុមាលភាពប្រជាពលរដ្ឋ សន្តិសុខ សណ្តាប់ធ្នាប់សាធារណៈ និងបង្កលក្ខណៈអំណោយផលដល់ការងារអភិវឌ្ឍន៍ប្រទេស។
សម្តេចតេជោក៍បានលើកឡើងផងដែរថា ស្របពេលនឹងភាពជោគជ័យនេះ ប្រទេសកម្ពុជាក៏នៅតែបន្តទទួលរងនូវឥទ្ធិពល និងផលប៉ះពាល់ពីការផលិត កែច្នៃ ចរាចរ និងប្រើប្រាស់គ្រឿងញៀនខុសច្បាប់នេះ។ ដើម្បីឆ្លើយតបទៅនឹងបញ្ហានេះ សម្តេចតេជោ ហ៊ុន សែន បានស្នើដល់គ្រប់ក្រសួង ស្ថាប័នរបស់រដ្ឋាភិបាល និងអំពាវនាវដល់ស្ថាប័នពាក់ព័ន្ធ វិស័យសាសនា វិស័យឯកជន អង្គការដៃគូជាតិ អន្តរជាតិ ព្រមទាំងជនរួមជាតិទាំងអស់ដូចខាងជាសូមឲ្យជនរួមជាតិទាំងអស់ចាត់ទុកបញ្ហាគ្រឿងញៀនគឺជាបញ្ហារបស់ជនរួមជាតិទាំងអស់គ្នា និងសូមឲ្យអាជ្ញាធរគ្រប់លំដាប់ថ្នាក់ និងសហគមន៍ ត្រូវយកចិត្តទុកដាក់ធ្វើការផ្សព្វផ្សាយអប់រំឲ្យប្រជាពលរដ្ឋក្នុងមូលដ្ឋាន និងសហគមន៍ ឲ្យយល់ដឹងពីផលប៉ះពាល់ និងគ្រោះថ្នាក់នៃគ្រឿងញៀន។
ក្រៅពីនេះសម្តេចក៏បានអំពាវនាវឲ្យ គណៈកម្មាធិការត្រួតពិនិត្យគ្រឿងញៀនរាជធានីខេត្ត និងសមត្ថកិច្ចគ្រប់លំដាប់ថ្នាក់ត្រូវបន្តពង្រឹងយន្តការ និងអនុវត្តផែនការត្រួតពិនិត្យគ្រឿងញៀន ឲ្យឆ្លើយតបប្រកបដោយប្រសិទ្ធភាពទៅនឹងស្ថានភាពជាក់ស្តែង ក្នុងរាជធានី និងខេត្តនីមួយៗ និងក្រសួង ស្ថាប័នពាក់ព័ន្ធ អង្គការសង្គមស៊ីវិលជាតិ-អន្តរជាតិ និងម្ចាស់ជំនួយនានា វិស័យឯកជន និងវិស័យសាសនា សូមបន្តយកចិត្តទុកដាក់ជួយផ្សព្វផ្សាយអប់រំផលប៉ះពាល់ និងគ្រោះថ្នាក់គ្រឿងញៀនដល់ប្រជាជនទូទៅទាំងអស់។
លើសពីនេះ កងកម្លាំងអនុវត្តច្បាប់គ្រប់ប្រភេទ ត្រូវបន្តពង្រឹង និងលើកកម្ពស់ប្រសិទ្ធភាពការងារ ដោយបន្តធ្វើការស្រាវជ្រាវ ស៊ើបអង្កេត និងបង្ក្រាបរាល់បទល្មើសពាក់ព័ន្ធនឹងគ្រឿងញៀន ដើម្បីផ្តន្ទាទោសទៅតាមនិតិវិធីច្បាប់ និង ក្រសួងសុខាភិបាល ក្រសួងសង្គមកិច្ចអតីតយុទ្ធជន និងយុវនិតិសម្បទា ត្រូវបង្កើនការទទួលខុសត្រូវខ្ពស់ដើម្បីអនុវត្តឲ្យមានប្រសិទ្ធភាពនូវការផ្តល់សេវាព្យាបាល និងស្តារនិតិសម្បទាអ្នកគ្រឿងញៀន។
ជាមួយគ្នានេះ ស្ថានីយវិទ្យុ ទូរទស្សន៍ ប្រព័ន្ធផ្សព្វផ្សាយនានា សិល្បករ ម្ចាស់សណ្ឋាគារ ផ្ទះសំណាក់ ភោជនីយដ្ឋាន ក្លឹបកម្សាន្ត ក្រុមហ៊ុន រោងចក្រ សហគ្រាស។ល។ សូមបន្តធ្វើសកម្មភាពផ្សព្វផ្សាយអប់រំឲ្យបានកាន់តែផុសផុលថែមទៀតដើម្បីឲ្យប្រជាជន ជាពិសេសយុវជនយល់ដឹង ចេះការពារខ្លួន និងចូលចំណែកក្នុងការការពារសហគមន៍ពីផលប៉ះពាល់ និងគ្រោះថ្នាក់ដែលបណ្តាលមកពីគ្រឿងញៀន។
សម្តេចក៏បានផ្តាំផ្ញើ ចំពោះក្មួយៗដែលមិនទាន់ប៉ះពាល់គ្រឿងញៀន សូមចេះការពារខ្លួន កុំឲ្យធ្លាក់ខ្លួនប្រើប្រាស់គ្រឿងញៀន និងត្រូវចេះជួយអប់រំមិត្តភក្តិឲ្យជៀសផុតពីគ្រឿងញៀន និងធ្វើជាជនបង្គោលក្នុងការប្រយុទ្ធប្រឆាំងគ្រឿងញៀន និងអំពាវនាវដល់ដៃគូអន្តរជាតិ បណ្តាប្រទេសជាមិត្ត និងប្រទេសជិតខាងទាំងអស់ សូមបន្តចូលរួមគាំទ្រ និងឧបត្ថម្ភដល់ការងារប្រយុទ្ធប្រឆាំងគ្រឿងញៀននេះ។
