ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រីរដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាប្រធានគណៈកម្មការជាតិយូណេស្កូកម្ពុជា បានមានប្រសាសន៍នៅក្នុងកិច្ចសម្ភាសន៍ នៅថ្ងៃទី ០៦ ខែកញ្ញា ឆ្នាំ២០១៥ នៅក្នុងសម័យប្រជុំបច្ចេកទេសលើកទី១ ICC ព្រះវិហារ ប្រារព្ធធ្វើនៅខេត្ត សៀមរាប ថា «កាលពី២០ឆ្នាំមុន នៅទីនេះ (សៀមរាប) គឺដូចជានៅព្រះវិហារឥឡូវចឹង ដូច្នេះហើយយើងប្រជុំ ICCព្រះវិហារនេះ គឺយើងមានសុទិដ្ឋិនិយមថា យើងនឹងធ្វើការអភិរក្សជួសជុលប្រាសាទដោយជោគជ័យ ហើយយើងនឹងធ្វើការអភិវឌ្ឍន៍តំបន់នេះ (ព្រះវិហារ) ឲ្យបានជោគជ័យដូចដែលយើងបានធ្វើជាមួយសៀមរាបកាលពី២០ឆ្នាំមុនចឹងដែរ»។
គួរបញ្ជាក់ថា នៅថ្ងៃទី ០៦ ខែកញ្ញា ២០១៥ គណៈកម្មាធិការសម្របសម្រួលអន្តរជាតិ សម្រាប់ការអភិរក្ស និងការលើកតម្លៃប្រាសាទព្រះវិហារ បានរៀបចំសម័យប្រជុំបច្ចេកទេសលើកទី១ ដែលដឹកនាំដោយតំណាងប្រទេសចិន និងប្រទេសឥណ្ឌា ដែលសម័យប្រជុំនេះ ត្រូវបាន ឯកឧត្តមបណ្ឌិតសភាចារ្យ សុខ អាន បញ្ជាក់ថា បានបង្ហាញពីអត្ថន័យថា ចាត់តាំងពីសម័យប្រជុំបើក ICC ព្រះវិហារ នៅខែធ្នូ ឆ្នាំ២០១៤មក ខាងជំនាញការបច្ចេកទេសវប្បធម៌ បានធ្វើការសិក្សាជាលក្ខណៈបច្ចេកទេស អំពីប្រាសាទព្រះវិហារ ដូចជា ធ្វើការប្រៀបធៀបឬសប្រាសាទព្រះវិហារ និងឬសប្រាសាទអង្គរ, ស្វែងយល់អំពីបញ្ហាបច្ចេកទេស ដែលជាមូលដ្ឋាននៃការអភិរក្សជួសជុលប្រាសាទ។ ដូច្នេះការប្រជុំលើកនេះគឺជាសម័យប្រជុំបច្ចេកទេស មានន័យថាជាសម័យប្រជុំ ស្វែងយល់ពីបច្ចេកទេសសំរាប់អភិរក្ស និងសំរាប់អភិវឌ្ឍន៍ប្រកបដោយចីរភាព។
គួររំលឹកថា កាលពីចុងឆ្នាំ២០១៤កន្លងទៅ កម្ពុជាបានរៀបចំសម័យប្រជុំបើក ICC ព្រះវិហារ ហើយពេលនោះគឺជាសម័យប្រជុំមួយដ៏ជោគជ័យ ដែលគេហៅថា ជាការប្រជុំក្នុងដំណើរការកសាងសន្តិភាពក្នុងតំបន់ និងជាការផ្លាស់ប្តូរសហប្រតិបត្តិការក្នុងវិស័យវប្បធម៌ រួមទាំងបង្ហាញឲ្យឃើញថា ដំណើរការរៀបចំ ICC ព្រះវិហារ ដំណើរការទៅដោយរលូន ហើយសមស្របទៅតាមគោលដៅ នៃកិច្ចសហប្រតិបត្តិការខាងវប្បធម៌បេតិកភណ្ឌ។
ក្នុងនាមជាប្រធានគណៈកម្មការជាតិយូណេស្កូកម្ពុជា ឯកឧត្តមបណ្ឌិតសភាចារ្យ សុខ អាន បានលើកឡើងថា«បើនិយាយអំពីសមាសភាពនៃការចូលរួមប្រជុំលើកនេះ យើងឃើញថា ផ្នែកសហប្រធានគឺឯកឧត្តម Hao Ping គឺជាប្រធាន General Conference របស់យូណេស្កូផង ហើយឯកឧត្តម បានឆ្លៀតអញ្ជើញមកជាតំណាងសាធារណរដ្ឋប្រជាមានិតចិនផង ជាតំណាងយូណេស្កូផង។ ក្រៅពីនេះក៏មានឯកឧត្តមសហប្រធានទាំងពីរ គឺឯកឧត្តមតំណាងអគ្គនាយកនៃ ASI ឯកឧត្តមជាអគ្គលេខានៃគណៈកម្មការយូណេស្កូ-ចិន នៅក្នុងនាមជាសហប្រធាន, ឯកឧត្តមឯកអគ្គរាជទូតថៃ ឯកឧត្តមតំណាងស្ថានទូតសហរដ្ឋអាមេរិក និង ឯកអគ្គរដ្ឋទូតមួយចំនួនទៀត»។ ការផ្តល់កិត្តិយសអញ្ជើញចូលរួមនេះ ជាចំណុចល្អមួយ ដែលផ្តល់ការលើកទឹកចិត្ត ក្នុងកិច្ចដំណើរការនៃប្រាសាទព្រះវិហារនេះ។ ជាក់ស្តែងនៅក្នុងសម័យប្រជុំទាំងមូល គឺសមាសភាពចូលរួមត្រូវបានកត់សំគាល់ថា មានការជជែកគ្នាយ៉ាងសកម្មក្នុងដំណើរការការងារនេះ ដែលធ្វើកម្ពុជាមានសុទិដ្ឋិនិយមថា យើងនឹងអាចជោគជ័យក្នុងដំណើរការអភិរក្ស ជួសជុលប្រាសាទ និងអភិវឌ្ឍតំបន់នេះផងដែរ៕
