ឯកឧត្តម ហ៊ុន ម៉ានី កូនប្រុសសម្តេចតេជោ ហ៊ុន សែន ទទួលបានពានរង្វាន់ The Gusi Peace Prize ក្នុងចំណោមជនល្បីៗ១៩នាក់លើពិភពលោក

យោងតាមគេហទំព័រ The Gusi Peace Prize ដែលបានបង្ហោះផ្សាយក្នុងពេលថ្មីៗនេះ បានបង្ហាញថា កូនប្រុសសម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា គឺឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា ទទួលបានពានរង្វាន់ The Gusi Peace Prize ក្នុងចំណោមជនល្បីៗចំនួន១៩នាក់ លើពិភពលោក ហើយពិធីចែករង្វាន់នេះ នឹងត្រូវធ្វើឡើងនៅថ្ងៃទី២៥ ខែវិច្ឆិកា ឆ្នាំ២០១៥ នៅទីក្រុងម៉ានីល ប្រទេសហ្វីលីពីនដែលឯកឧត្តម ហ៊ុន ម៉ានី ឈ្នះលើផ្នែក Youth Leadership and Humanitarianism and Advocate of Cultural Heritage។

ពានរង្វាន់ The Gusi Peace Prize គឺកើតចេញពីមូលនិធិ Gusi Peace Prize ដែលមានមូលដ្ឋាននៅក្នុងទីក្រុងម៉ានីល ប្រទេសហ្វីលីពីន ហើយជនល្បីៗដែលទទួលពានរង្វាន់ចំនួន១៨នាក់ផ្សេងទៀត មានមកពីអាល្លឺម៉ង់ អូស្ត្រាលី បង់ក្លាដែស បេឡារុស ចិន ឆេក អូទ្រីស ជប៉ុន កាហ្សាក់ស្ថាន គៀកហ្ស៊ីសស្ថាន ហូឡង់ ហ្វីលីពីន ព័រទុយហ្គាល់ កាតា រុស្ស៊ី អ៊ុយក្រែន និងសហរដ្ឋអាមេរិក។

ជ័យលាភីក្នុងចំណោមទាំង១៩នាក់នោះមាន លោក Stanislav Shushkevich អតីតប្រធានាធិបតី BELARUS, លោក Akskar Akayev អតីតប្រធានាធិបតី Kyrgyztan លោក Antonio Eanes អតីតប្រធានាធិបតី Portugal  និងថ្នាក់ដឹកនាំសំខាន់ជាច្រើនទៀត ហើយឯកឧត្តម ហ៊ុន ម៉ានី ដែលជាតំណាងរាស្រ្តរបស់គណបក្សប្រជាជនកម្ពុជា គឺជាឥស្សរជនទី១ របស់កម្ពុជា ដែលបានឈ្នះពានរង្វាន់នេះក្នុងចំណោមឥស្សរជនចំនួន១៨នាក់ លើពិភពលោក ដែលឈ្នះពាន Gusi Peace Prize៕