បន្ទាប់ពីមានការចាប់ខ្លួន សកម្មជនគណបក្សសង្គ្រោះជាតិ២រូប កាលពីថ្ងៃទី ០៤ ខែសីហា ឆ្នាំ២០១៥ ពាក់ព័ន្ធនឹងអំពើហិង្សាដែលកើតឡើង នៅកំឡុង ខែកក្កដា ឆ្នាំ២០១៤កន្លងមក ឯកឧត្តម អ៊ូ ច័ន្ទឬទ្ធិ មន្ត្រីជាន់ខ្ពស់គណបក្សសង្គ្រោះជាតិបានលើកឡើងថា ការចាប់ខ្លួនរបស់តុលាការគឺជារឿងនយោបាយ។ ឆ្លើយតប និងការលើកឡើងនេះ ឯកឧត្តម គឹម សន្តិភាព អ្នកនាំពាក្យក្រសួងយុត្តិធម៌ បានប្រាប់បណ្តាញព័ត៌មាន GNN នៅថ្ងៃទី ០៥ ខែសីហា ឆ្នាំ២០១៥ ថាដំណើការលើសំណុំរឿងក្តីនេះ គឺជារឿងព្រហ្មទណ្ឌសុទ្ធសាធ និងស្នើកុំឲ្យអ្នកនយោបាយទាញសំណុំរឿងនេះមកជារឿងនយោបាយអី។
ឯកឧត្តម គឹម សន្តិភាព បានមានប្រសាសន៍ថា «តុលាការបានដំណើរការលើសំណុំរឿងក្តីនេះតាំងពីខែកក្កដា ឆ្នាំ២០១៤ រហូតមកដល់ពេលនេះ គឺរយៈពេលជិតមួយឆ្នាំមកហើយ ដែលរឿងក្តីនេះកំពុងតែសិក្សាអំពីចំណាត់ការដែលស្ថិតក្នុងដៃតុលាការហើយ ជាធម្មតាចំណាត់ការនីមួយៗក្នុងរឿងព្រហ្មទណ្ឌគឺពិបាក និងស្មុគស្មាញបំផុត»។
ឯកឧត្តមបន្តថា តុលាការមានអាណត្តិរបស់គាត់មួយ ដែលឈរលើក្រមព្រហ្មទណ្ឌហើយសំណុំរឿងព្រហ្មទណ្ឌនេះយើងអាចមើលតាមសកម្មភាពថាជារឿងហិង្សាមួយ ដែលកើតមានឡើងនៅក្បែរទីលានប្រជាធិបតេយ្យ។ សកម្មភាពហិង្សាទាំងនោះ វាជារឿងព្រហ្មទណ្ឌ មិនមែនជារឿងនយោបាយទេ ហើយក៏មិនមានអ្នកនយោបាយណាមួយទៅដាក់សម្ពាធសង្កត់ទៅលើស្ថាប័នតុលាការដែរ ពីព្រោះសំណុំរឿងនេះគេបង្កតាំងពីខែ កក្កដា ឆ្នាំ២០១៤មក។
ឯកឧត្តម គឹម សន្តិភាព បានបញ្ចេញនូវទស្សនៈផ្ទាល់ខ្លួនថាប «ខ្ញុំយល់ថាអ្វីៗដែលជារឿងរបស់ស្ថាប័នតុលាការ គួរទុកឲ្យតុលាការជាអ្នកសម្រេច យើងមិនគួរណាលូកម៉ាត់ ទិទៀនអំពីដំណើរការរបស់តុលាការ រឺក៏ទាញហេតុផលនេះហេតុផលនោះ ឲ្យពាក់ព័ន្ធនឹងរឿងនយោបាយទេ ។ ខ្ញុំគិតថាអ្នកពាក់ព័ន្ធជាមួយនឹងសំណុំរឿងនេះគួរតែខិតខំរកសក្ខីកម្មបន្ថែម។ ឯកឧត្តមបានបន្ថែមថា ខ្ញុំសូមបញ្ជាក់ថាក្នុងដំណាក់កាលស៊ើបសួរនេះគឺចៅក្រមស៊ើបសួរ គាត់មានកាតព្វកិច្ចក្នុងការស៊ើប និងរកភ័ស្តុតាងដាក់បន្ទុកថែម និងរកភ័ស្តុតាងដោះបន្ទុកផង។ ដូច្នេះភាគីណាដែលពាក់ព័ន្ធនឹងសំណុំរឿងនេះ សូមបញ្ជូនភ័ស្តុតាងទៅកាន់ចៅក្រមស៊ើបសួរចុះដើម្បីឲ្យចៅក្រមស៊ើបសួររៀបចំដំណើរនីតិវិធីបន្តទៀត»៕
អត្ថបទ៖ សុភាព
