យោងតាមលិខិតរបស់ក្រសួងការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា ចេញផ្សាយនៅថ្ងៃទី១៧ ខែមិថុនា ឆ្នាំ២០១៥ នេះ បានឲ្យដឹងថា ពលករខ្មែរ ចំនួន ២៣០នាក់ នៅកោះ អំបន់ (Ambon) ប្រទេសឥណ្ឌូនេស៊ី នឹងត្រឡប់មកកម្ពុជាវិញ នៅវេលាម៉ោង៦ព្រឹក ថ្ងៃទី១៨ ខែមិថុនា ឆ្នាំ២០១៥ស្អែកនេះ។
តាមការណែនាំរបស់ឯកឧត្តមឧបនាយករដ្ឋមន្រ្តី ហោ ណាំហុង រដ្ឋមន្រ្តីការបរទេស និងសហប្រតិបត្តិការអន្តរជាតិ ស្ថានទូតកម្ពុជាប្រចាំប្រទេសឥណ្ឌូណេស៊ី បានជួបធ្វើការជាមួយសម្ព័ន្ធក្រុមហ៊ុន PT. Maribu Industries Group ដែលជាក្រុមហ៊ុនតំណាងភាគីម្ចាស់ទូកនេសាទថៃ ក្នុងការរៀបចំមាតុភូមិនិវត្តន៍របស់ពលករខ្មែរ ចំនួន២៣០នាក់ ពីកោះ អំបន់ (Ambon) ។
លិខិតដដែលបានបញ្ជាក់ថា តាមការទាមទាររបស់ស្ថានទូតកម្ពុជា ក្រុមហ៊ុននេះបានជួលយន្តហោះ១គ្រឿងប្រភេទ Boeing 737-900 ER អាចផ្ទុកពលករខ្មែរចំនួន ២១៣នាក់ ដែលនឹងចេញដំណើរពីកោះ អំបន់ ប្រទេសឥណ្ឌូណេស៊ី មកដល់ភ្នំពេញ នៅថ្ងៃទី ១៨ ខែ មិថុនា ឆ្នាំ ២០១៥ វេលាម៉ោង ០៦:០០ នាទីព្រឹក ហើយចំណែកឯពលករខ្មែរ ដែលនៅសល់ចំនួន ១៧ នាក់ផ្សេងទៀត ក្រុមហ៊ុនបានរៀបចំឲ្យធ្វើដំណើរតាមជើងយន្តហោះAK 534 ពីកូឡាឡំពួរ មកដល់ភ្នំពេញ នៅថ្ងៃទី ១៨ ខែ មិថុនា ឆ្នាំ ២០១៥ វេលាម៉ោង ១៥:៥៥ នាទី ។
សូមបញ្ជាក់ថា តាមការទាមទាររបស់ស្ថានទូតកម្ពុជាប្រចាំនៅប្រទេសឥណ្ឌូនេស៊ី ក្រុមហ៊ុនបានដោះស្រាយប្រាក់បៀវត្សរ៍ ជូនពលករខ្មែរទាំង ២៣០នាក់នេះរួចហើយ៕
អត្ថបទ៖ សុភាព