AKP ភ្នំពេញ ថ្ងៃទី២៤ ខែកក្កដា ឆ្នាំ២០១៤ កិច្ចព្រមព្រៀងស្ដីពីកិច្ចសហប្រតិបត្តិការហិរញ្ញវត្ថុ ឆ្នាំ២០១៣ និងកិច្ចព្រម ព្រៀងស្ដីពីកិច្ចសហប្រតិបត្តិការបច្ចេកទេស ឆ្នាំ២០១៣ ដែលមានទឹកប្រាក់ចំនួន៦៤លានដុល្លារ អាម៉េរិកសម្រាប់អនុវត្តន៍វិស័យជាអាទិភាពចំនួន០៣ នៅកម្ពុជា ត្រូវបានចុះហត្ថលេខាដោយឯកឧត្ដម គាត ឈន់ ឧបនាយករដ្ឋមន្ត្រីប្រចាំការ អនុប្រធានទី១ ក្រុមប្រឹក្សាអភិវឌ្ឍន៍កម្ពុជា និងឯកឧត្ដម Joachim Baron Von Marcshall ឯកអគ្គរដ្ឋទូតអាល្លឺម៉ង់ប្រចាំកម្ពុជា នាព្រឹកថ្ងៃទី២៣ ខែកក្កដា ឆ្នាំ ២០១៤ នៅក្រុមប្រឹក្សា អភិវឌ្ឍន៍កម្ពុជា។
កិច្ចព្រមព្រៀងទាំងពីរ ដែលបានចុះហត្ថលេខានេះមានហិរញ្ញប្បទាន សរុប៤៧,០៥ លានអឺរ៉ូ សមមូលនឹង៦៤ លានដុល្លារអាម៉េរិក សម្រាប់គាំទ្រដល់ការអនុវត្តគម្រោងក្នុងវិស័យអាទិភាពទាំងបី នៃកិច្ចសហប្រតិបត្តិការទ្វេភាគី កម្ពុជា-អាល្លឺម៉ង់ ដែលរួមមានវិស័យសុខាភិបាល វិស័យអភិវឌ្ឍន៍ជនបទ និង អភិបាលកិច្ច (ដូចជាយេនឌ័រ កំណែទម្រង់រដ្ឋបាល និងការអភិវឌ្ឍតាមបែបប្រ ជាធិតេយ្យថ្នាក់ក្រោមជាតិ) ដែលសុទ្ធសឹងជាវិស័យអាទិភាពរបស់រាជរដ្ឋាភិ បាលកម្ពុជា ក្នុងការអនុវត្តឲ្យបានសម្រេចនូវកិច្ចអភិវឌ្ឍសង្គម-សេដ្ឋកិច្ចកម្ពុជា ប្រកបដោយចីរភាព បរិយាប័ន្ន និងសមធម៌ ដូចមានកំណត់ក្នុងយុទ្ធសាស្ត្រចតុ កោណដំណាក់កាលទី៣។ ការចុះហត្ថលេខាលើកិច្ចព្រមព្រៀងទាំង២ នេះក៏ ជាការអនុវត្តលទ្ធផលនៃកិច្ចចរចាកម្ពុជា-អាល្លឺម៉ង់ នាថ្ងៃទី៣-៤ ខែធ្នូ ឆ្នាំ២០១៣ នៅរាជធានីភ្នំពេញផងដែរ។
រដ្ឋាភិបាល នៃសាធារណរដ្ឋអាល្លឺម៉ង់បានផ្ដល់ហិរញ្ញប្បទានឥតសំណង សរុបប្រមាណ៤៣២ លានដុល្លារអាម៉េរិក។ ហិរញ្ញប្បទាននេះមិនតំណាងឲ្យទំហំហិរញ្ញប្បទានទាំងអស់របស់រដ្ឋាភិបាល និងប្រជាជនអាល្លឺម៉ង់នោះឡើយ ព្រោះថាអាល្លឺម៉ង់បានផ្ដល់ធនធានដល់សហគមន៍អឺរ៉ុប ដែលមានប្រមាណ២០% នៃធនធានសរុបរបស់សហគមន៍អឺរ៉ុប និងបានផ្ដល់ដល់ស្ថាប័នហិរញ្ញវត្ថុ អន្តរជាតិ និងស្ថាប័នពហុភាគីជាច្រើនទៀត ដូចជា ធនាគារពិភពលោក ធនាគារ អភិវឌ្ឍន៍អាស៊ី និងអង្គការសហប្រជាជាតិជាដើម។ លើសពីនេះ អាល្លឺម៉ង់បាន និងកំពុងអនុវត្តន៍កម្មវិធីថ្នាក់តំបន់ និងកិច្ចសហប្រតិបត្តិការត្រីកោណជាច្រើន ទៀត។
ហិរញ្ញប្បទានទាំងនេះបានបំពេញបន្ថែមឲ្យហិរញ្ញប្បទាន ដែលបានផ្ដល់ ក្នុងក្របខ័ណ្ឌ នៃកិច្ចសហប្រតិបត្តិការ ទ្វេភាគីកម្ពុជា-អាល្លឺម៉ង់ផងដែរ៕
ដោយ ជឹម ណារី