AKP ភ្នំពេញ ថ្ងៃទី២៣ ខែកក្កដា ឆ្នាំ២០១៤
ស្របពេល ដែលកម្ពុជាកំពុងតែធ្វើការ ផ្លាស់ប្តូរការផ្សព្វផ្សាយ ពីប្រព័ន្ធអាណាឡូកទៅប្រព័ន្ធឌីជីថលនោះ រដ្ឋមន្រ្ដីក្រសួងព័ត៌មានបានស្នើសុំដល់ស្ថានីយ ទូរទស្សន៍ទាំងអស់ ត្រូវពិចារណាលើការប្រើប្រាស់សម្ភារបច្ចេកទេសប្រកប ដោយគុណភាព និងស្របតាមលក្ខណៈ ស្ដង់ដារអន្ដរជាតិនោះ។
ក្នុងសិក្ខាសាលាស្ដីពីការបង្ហាញ ការប្រើប្រាស់សម្ភារបរិក្ខាបច្ចេកទេស របស់ក្រុមហ៊ុនសូនី កាលពីល្ងាចថ្ងៃទី២២ ខែកក្កដា ឆ្នាំ២០១៤ នៅសណ្ឋាគារ ណាហ្គាវ៉ើល ឯកឧត្តម ខៀវ កាញារីទ្ធ រដ្ឋមន្រ្ដីក្រសួងព័ត៌មាន បានមានប្រ សាសន៍ថា បច្ចុប្បន្ននេះគឺជាសម័យសកលភាវូបនីយកម្ម ដែលទាមទារឲ្យមាន ការប្រកួតប្រជែង និងជំរុញឲ្យមានគុណភាពនៅក្នុងការផ្សព្វផ្សាយតាមទូរ ទស្សន៍ ពិសេសការប្រើប្រាស់សម្ភារបច្ចេកទេសស្របតាមស្ដង់ដា ដែលការ ផ្សាយអាចប្រើប្រាស់បានទាំងនៅក្នុងស្រុក និងអន្ដរជាតិ។
ឯកឧត្តមបញ្ជាក់ថា តាមការកត់សម្គាល់ក្នុងពេលបច្ចុប្បន្ននេះ មានបណ្ដា ស្ថានីយទូរទស្សន៍មួយចំនួន ដែលមានលទ្ធភាព និងដើមទុនច្រើនកំពុងប្រើ ប្រាស់សម្ភារបច្ចេកទេសមានគុណភាពខ្ពស់ ប្រកបដោយបច្ចេកវិទ្យាទំនើប ប៉ុន្ដែក៏នៅមានស្ថានីយទូរទស្សន៍មួយចំនួន នៅមិនទាន់មានលទ្ធភាពគ្រប់គ្រាន់ ក្នុងការប្រើប្រាស់តាមលក្ខណៈស្ដង់ដាទំនើបនៅឡើយ។ ដូច្នេះនៅពេលដែល យើងប្រើប្រាស់ឧបករណ៍បច្ចេកទេស ក្នុងការផ្សាយតាមបណ្ដាស្ថានីយទូរ ទស្សន៍នៅមិនទាន់មានគុណភាព និងលក្ខណៈស្ដង់ដាត្រឹមត្រូវនោះអាចនឹងប៉ះ ពាល់ដល់ការផ្សព្វផ្សាយរបស់យើងផងដែរ។
ឯកឧត្តមបន្ដថា ការផ្សព្វផ្សាយតាមប្រព័ន្ធឌីជីថល ត្រូវទាមទារការប្រើ ប្រាស់ឧបករណ៍សម្ភារបច្ចេកទេស ដែលមានលក្ខណៈទំនើប និងមានលក្ខណៈ ស្ដង់ដាអន្ដរជាតិ ដើម្បីទាក់ទាញការចូលរួមប្រកួតប្រជែងដណ្ដើមទីផ្សារទាំង នៅក្នុងស្រុក និងការផលិតកម្មវិធី សម្រាប់នាំចេញទៅក្រៅប្រទេស ស្របទៅ តាមបរិបទនៅក្នុងតំបន់ និងពិភពលោក។
ឯកឧត្តមរដ្ឋមន្រ្ដីចាត់ទុកថា តាមរយៈការបង្ហាញសម្ភារប្រើប្រាស់របស់ ក្រុមហ៊ុនសូនីនេះ គឺជាការល្អ និងមានសារសំខាន់ ដើម្បីឲ្យអ្នកដែលទទួលខុស ត្រូវនៅតាមស្ថានីយទូរទស្សន៍នីមួយៗ អាចយល់អំពីការរីកចម្រើន និងវិវត្ដន៍ ផ្នែកបច្ចេកវិទ្យា ហើយជាការចាំបាច់ ដែលយើងត្រូវលើកគម្រោងគិតពិចារណា អំពីការផ្លាស់ប្ដូរសម្ភារបច្ចេកទេស ធ្វើយ៉ាងណាឲ្យទូរទស្សន៍មានគុណភាព និង អាចបញ្ជូនការផលិតកម្មវិធី និងរូបភាពចេញទៅកាន់ទូរទស្សន៍ផ្សេងទៀតបាន។
លោក Henry Tay នាយកក្រុមហ៊ុន SOHETO ដែលទទួលផ្ដាច់មុខការ លក់ផលិតផល SONY នៅក្នុងប្រទេសកម្ពុជាបានលើកឡើងថា នេះគឺជាការ បង្ហាញអំពីការវិវត្ដបច្ចេកវិទ្យាចុងក្រោយបំផុតរបស់ផលិតផលសូនី នៅក្នុងប្រ ទេសកម្ពុជា សម្រាប់ការប្រើប្រាស់នៅក្នុងការផ្សាយរបស់ទូរទស្សន៍ ដែលមាន ដូចជាម៉ាស៊ីនថតរូប កាមេរ៉ាវីដេអូ ម៉ិចស័រ ឧបករណ៍បច្ចេកវិទ្យាឌីជីថល ជើង កាមេរ៉ា ឧបករណ៍ សំឡេង និងប្រព័ន្ធភ្លើងនៅក្នុងស្ទីតយោបន្ទប់ផ្សាយជាដើម។
បច្ចុប្បន្ននេះ កម្ពុជាមានស្ថានីយទូរទស្សន៍សរុបចំនួន១៣ ហើយនៅពេល ដែលការផ្លាស់ប្ដូរពីប្រព័ន្ធអាណាឡូក ទៅជាការផ្សាយប្រព័ន្ធឌីជីថលឲ្យស្រប ទៅនឹងស្ដង់ដាអន្ដរជាតិ ស្ថានីយទូរទស្សន៍អាចនឹងមានការកើនឡើងរហូតដល់ ២០ប៉ុស្ដិ៍៕
ដោយ អ៊ុន រិទ្ធី