កាកបាទក្រហម កម្ពុជាបានបើកវគ្គបណ្តុះបណ្តាលគ្រូបង្គោលស្តីអំពីសុវត្ថិភាពចរាចរណ៍ និងការកសាងផែនការសុវត្ថិភាពចរាចរណ៍ថ្នាក់ឃុំដល់សិក្ខាកាមចំនួន៥២ នាក់ ដែលជានាយក នាយិកាសាខា មន្ត្រីសាខា និងមន្ត្រីអនុសាខាគោលដៅមកពីសាខាចំនួន១៣ នៃសាខាខេត្តព្រះសីហនុ កំពង់ចាម កំពង់ឆ្នាំង តាកែវ ពោធិ៍សាត់ បាត់ដំបង សៀមរាប កំពង់ធំ ស្វាយរៀង បន្ទាយមានជ័យ កំពង់ស្ពឺ កណ្តាល និងរាជធានីភ្នំពេញ។
វគ្គបណ្តុះបណ្តាលចាប់ពីថ្ងៃទី២៣ ដល់២៤ ខែកក្កដា ឆ្នាំ២០១៤ នៅសណ្ឋាគារភ្នំពេញ នេះបានប្រព្រឹត្តទៅក្រោមវត្តមានលោក សម កុសល នាយក នៃនាយកដ្ឋានធនធានមនុស្ស កាកបាទក្រហមកម្ពុជា និងមានការចូលរួមគាំទ្រពីគម្រោងសុវត្ថិភាពចរាចរណ៍ផ្លូវគោកសកល នៃមូលនិធិប្លូមបើកភីលែនត្រូភី និងអង្គការដៃគូសុវត្ថិភាពចរាចរណ៍ផ្លូវគោកសកល(GRSP)។
លោក សម កុសល បានមានប្រសាសន៍លើកឡើងថា នៅកម្ពុជាគ្រោះថ្នាក់ចរាចរ បណ្តាឆ្នាំកន្លងមកឃើញថា នៅតែជាបញ្ហាប្រឈមហើយបានប៉ះពាល់ និងជះឥទ្ធិពលដល់ ជីវភាពរស់នៅរបស់ប្រជាពលរដ្ឋ ដែលបានបាត់បង់ធនធានមនុស្ស ខាតបង់ថវិកា ទ្រព្យ សម្បត្តិ និងពេលវេលា ដែលជាឧបសគ្គមួយក្នុងចំណោមឧបសគ្គនានានាំឲ្យកិច្ចពន្លឿន ការអភិវឌ្ឍ និងកាត់បន្ថយភាពក្រីក្រមានភាពយឺតយ៉ាវ។ ជាក់ស្តែងក្នុង ឆ្នាំ២០១៣ កន្លង ទៅនេះ តាមរយៈរបាយការណ៍បឋមរបស់ប្រព័ន្ធព័ត៌មានជនរងគ្រោះ និងគ្រោះថ្នាក់ចរាចរផ្លូវគោកកម្ពុជា បានបង្ហាញថា អ្នកស្លាប់ដោយគ្រោះថ្នាក់ចរាចរមានចំនួន១ ៩៥០ នាក់ ដែលតួលេខនេះមានការថយចុះជាងឆ្នាំ២០១២ ចំនួន១៦ នាក់ ប៉ុន្តែអ្នករងរបួសធ្ងន់ធ្ងរដោយ គ្រោះថ្នាក់ចរាចរបែរជាមានការកើនឡើងជាងឆ្នាំ២០១២ ពោលគឺមានចំនួន៥ ៦៧២ នាក់ កើនឡើង៣២៣ នាក់។ បើគិតជាមធ្យមមានប្រជាពលរដ្ឋកម្ពុជាច្រើនជាង ៥នាក់ស្លាប់ និងប្រហែល១៥ នាក់ផ្សេងទៀតទទួលរងរបួសធ្ងន់ និងពិការ ដែលតួលេខនេះ ស្ថិតក្នុងកម្រិតខ្ពស់គួរឲ្យព្រួយបារម្ភ ហើយតួលេខនេះច្រើនជាងចំនួនអ្នកស្លាប់ដោយជំងឺ អេដស៍ និងគ្រោះថ្នាក់ដោយសារមីនក្រោយពេលសង្គ្រាមទៅទៀត។
លោកបានបញ្ជាក់ថា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទ ក្រហមកម្ពុជា តែងតែបានយកចិត្តទុកដាក់ខ្ពស់ចំពោះសុខទុក្ខរបស់ប្រជាជនគ្រប់មូលដ្ឋាន ពិសេសទៀតនោះគឺបញ្ហាសុខុមាលភាពរបស់ប្រជាពលរដ្ឋ និងស្ថានភាពចរាចរណ៍ ដែល មួយថ្ងៃៗ អត្រាគ្រោះថ្នាក់ អត្រាអ្នកស្លាប់ និងរបួសនៅតែបន្តកើតមានជាលំដាប់ ដែលធ្វើ ឲ្យខាតបង់ ពេលវេលា ថវិកាគ្រួសារក្នុងការថែទាំព្យាបាល និងនិយាយដោយឡែកបាន ធ្វើឲ្យខាតបង់ថវិកាជាតិជាច្រើនរយលានដុល្លារអាម៉េរិកក្នុងមួយឆ្នាំៗ។ ដោយមើលឃើញនូវ បញ្ហាប្រឈមនេះ កាកបាទក្រហមកម្ពុជាបានរៀបចំវគ្គបណ្តុះបណ្តាលនេះឡើង ក្នុងគោល បំណងឲ្យអ្នកចូលរួមទាំងអស់ទទួលបាននូវចំណេះដឹងស្តីពីសុវត្ថិភាពចរាចរណ៍ និងការ កសាងផែនការសុវត្ថិភាពចរាចរណ៍នៅថ្នាក់ឃុំ ហើយបន្ទាប់ពីបញ្ចប់វគ្គនេះទៅ អ្នកចូលរួម ទាំងអស់នឹងយកចំណេះដឹង ដែលទទួលបាន ទៅបណ្តុះបណ្តាលបន្តដល់យុវជន និងអ្នក ស្ម័គ្រចិត្តកាកបាទក្រហមនៅតាមសាខាគោលដៅរបស់ខ្លួន ព្រមទាំងកសាងផែនការ សុវត្ថិភាពចរាចរណ៍ថ្នាក់ឃុំ សង្កាត់ជាមួយអាជ្ញាធរមូលដ្ឋាន ស្របតាមគោលនយោបាយភូមិ-ឃុំមានសុវត្ថិភាព និងធានាផែនការសុវត្ថិភាពចរាចរណ៍នេះ ត្រូវបានយកអនុវត្តន៍ ដើម្បីលើក កម្ពស់ការងារសុវត្ថិភាពចរាចរណ៍នៅតាមមូលដ្ឋាន សំដៅកាត់បន្ថយចំនួនអ្នកស្លាប់ និងរង របួសដោយគ្រោះថ្នាក់ចរាចរនោះ៕
ដោយ ប៉ាល់ សុង