ស្ថានទូតកម្ពុជាប្រចាំប្រទេសកូរ៉េ ប្រាប់ពលករ ពលការិនីពីការមិនយកកម្រៃសេវាសម្រាប់ការបញ្ជាក់លិខិតនានា

AKP ភ្នំពេញ ថ្ងៃទី២៦ ខែកក្កដា ឆ្នាំ២០១៤

        ស្ថានទូតព្រះរាជាណាចក្រកម្ពុជាប្រចាំសាធារណរដ្ឋកូរ៉េ បាននិយាយថា ពលករ ពលការិនី និងប្រជាពលរដ្ឋកម្ពុជា ដែលកំពុងរស់នៅសាធារណរដ្ឋកូរ៉េ ទាំងអស់នឹងមិនត្រូវយកកម្រៃសេវា ទៅលើការបញ្ជាក់លើលិខិតនានានោះ ឡើយ។

យោងតាមសេចក្ដីជូនដំណឹង ដែលចុះហត្ថលេខាដោយឯកឧត្ដម ស៊ុត ឌី ណា ឯកអគ្គរាជទូតកម្ពុជាប្រចាំសាធារណរដ្ឋកូរ៉េ កាលថ្ងៃទី១៦ ខែកក្កដា ឆ្នាំ ២០១៤ បានឲ្យដឹងថា យោងសេចក្ដីសម្រេចរបស់រាជរដ្ឋាភិបាល និងក្រសួងការ បរទេស និងសហប្រតិបត្តិការអន្តរជាតិ លិខិតលេខ១៨៥៨ កបទ.សអ/ច្បក៦ ចុះថ្ងៃទី០៣ ខែមីនា ឆ្នាំ២០១៤ ស្ថានទូតនៃព្រះរាជាណាចក្រកម្ពុជា ប្រចាំសាធា រណរដ្ឋកូរ៉េ នឹងធ្វើការបញ្ជាក់លិខិតបទដ្ឋាននានា ដូចជាលិខិតអាត្រានុកូលដ្ឋាន ជាដើម ពន្យាសុពលភាពលិខិតឆ្លងដែន មិនតម្រូវឲ្យពលករ ពលការនី និងប្រជា ពលរដ្ឋកម្ពុជា ដែលកំពុងរស់នៅក្នុងសាធារណរដ្ឋកូរ៉េ ធ្វើការបង់ប្រាក់លើថ្លៃ សេវាកម្មឡើយ។

ជាថ្មីម្ដងទៀត ខ្ញុំសូមឲ្យពលករ ពលការិនី និងប្រជាពលរដ្ឋកម្ពុជាទាំងអស់ ដែលកំពុងរស់នៅសាធារណរដ្ឋកូរ៉េ មេត្តាចូលរួមសហការជាមួយស្ថានទូត នៃ ព្រះរាជាណាចក្រកម្ពុជាប្រចាំសាធារណរដ្ឋកូរ៉េ ដើម្បីបំបាត់អំពើមិនប្រក្រតី ផ្សេងៗ ដែលអាចនាំឲ្យមានការប៉ះពាល់ដល់ផលប្រយោជន៍ និងកិត្យានុភាព របស់ស្ថានទូតនៃព្រះរាជាណាចក្រកម្ពុជា៕

ដោយ ជឹម ណារី