ការជំរុញវិស័យពាណិជ្ជកម្ម
ការវិនិយោគ
រវាងប្រទេសទំាងពីរឲ្យមានកំណើនខ្ពស់ ជាប្រធានបទសំខាន់ ដែលសម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា និង ឯកឧត្តម ឡាស្លូ កូវើ (
László KÖVÉR) ប្រធានរដ្ឋសភា នៃប្រទេសហុងគ្រី
លើកមកជជែកគ្នា នៅក្នុងជំនួបទ្វេភាគី ដែលបានធ្វើឡើងនៅព្រឹកថ្ងៃអង្គារ ទី០៣ ខែវិច្ឆិកា ឆ្នាំ២០១៥នេះ នៅវិមានរដ្ឋសភា ខណៈដែល ឯកឧត្តម ឡាស្លូ កូវើ បានដឹកនាំគណៈប្រតិភូជាន់ខ្ពស់រដ្ឋសភា ប្រទេសហុងគ្រី
មកបំពេញទស្សនកិច្ចផ្លូវការ និងមិត្តភាព នៅព្រះរាជាណាចក្រកម្ពុជា
។
គណៈប្រតិភូជាន់ខ្ពស់ រដ្ឋសភាប្រទេសហុងគ្រី ដឹកនាំដោយ ឯកឧត្តម ឡាស្លូ
កូវើ អញ្ជើញមកបំពេញទស្សនកិច្ចជាផ្លូវការ
និងជាមិត្តភាព នៅព្រះរាជាណាចក្រកម្ពុជា រយៈពេល ៥ថ្ងៃ ចាប់ពីថ្ងៃទី០៣ ដល់ថ្ងៃទី០៤ ខែវិច្ឆិកា ឆ្នាំ២០១៥ នៅរាជធានីភ្នំពេញ និងចាប់ពីថ្ងៃទី០៦ ដល់ថ្ងៃទី០៨
ខែវិច្ឆិកា
ឆ្នាំ២០១៥ នៅខេត្តសៀមរាប។ នៅក្នុងជំនួបពិភាក្សាការងារជាមួយសម្តេចអគ្គមហាពញាចក្រី ហេង
សំរិន ឯកឧត្តមប្រធានគណៈប្រតិភូ បានលើកឡើងថា ចាប់ពីឆ្នាំ២០១០មក គោលនយោបាយសេដ្ឋកិច្ចរបស់ប្រទេសហុងគ្រី
បានបាញ់ឆ្ពោះមកទិសខាងកើតគឺតំបន់អាស៊ីអាគ្នេយ៍នេះ ដោយក្នុងនោះមានប្រទេសកម្ពុជាមួយដែរ។
កម្ពុជាជាមិត្តរបស់ហុងគ្រី
និងដោយកម្ពុជាមានសក្តានុពល កម្ពុជាបានក្លាយជាគោលដៅសេដ្ឋកិច្ចមួយរបស់ប្រទេសហុងគ្រី។ ឯកឧត្តមប្រធានរដ្ឋសភា បានលើកឡើងថា ដើម្បីជំរុញការ វិនិយោគកម្ពុជា និងហុងគ្រីឲ្យកើនឡើង
នៅក្នុងខែវិច្ឆិកា ឆ្នាំ២០១៥នេះ រដ្ឋមន្រ្តីក្រសួងការបរទេសនៃប្រទេសហុងគ្រី
នឹងមកបំពេញទស្សនកិច្ច នៅកម្ពុជា។ នៅពេលនោះ កិច្ចការជាច្រើននិងត្រូវជជែករវាងមន្រ្តីជំនាញនៃប្រទេសទំាងពីរ ដើម្បីធ្វើយ៉ាងណាជំរុញទំហំពាណិជ្ជកម្ម
និងការវិយោគឲ្យមានកំណើនឡើង។ បើតាមឯកឧត្តមប្រធានគណៈប្រតិភូនៅពេលនោះសមាគមវិនិយោគ
ហុងគ្រី កម្ពុជា ក៏ទំនងត្រូវបង្កើតឡើង នៅរាជធានីភ្នំពេញ ទៀតផង។
ការលើកឡើងរបស់ឯកឧត្តមប្រធានរដ្ឋសភា នៃប្រទេសហុងគ្រី បែបនេះ
ស្របពេលដែលសម្តេចប្រធានរដ្ឋសភាកម្ពុជា បានស្នើដល់ភាគីហុងគ្រី ជំរុញអ្នកវិនិយោគទុនហុងគ្រី
មកបណ្តាក់ទុននៅកម្ពុជាឲ្យបានច្រើន និងជួយផ្សព្វផ្សាយដល់ប្រជាពលរដ្ឋហុងគ្រីពីសក្តានុពលទេសចរណ៍កម្ពុជា ដើម្បីជាការទាក់ទាញប្រជាពលរដ្ឋហុងគ្រី ធ្វើដំណើរទេសចរណ៍ មកទស្សនាទឹកដីអង្គរ ឲ្យបានច្រើន ។
ជាមួយគ្នានេះ សម្តេចប្រធានរដ្ឋសភា ក៏បានលើកឡើងពីចំណងមិត្តភាពកម្ពុជា
ហុងគ្រី ដែលមានតំាងពីឆ្នាំ១៩៦៣មក ប៉ុន្តែបានកាត់ផ្តាច់ទៅវិញ
នៅឆ្នាំ១៩៧៥ ពេលដែលកម្ពុជាបានធ្លាក់ក្នុងកម្ពុជាប្រជាធិបតេយ្យ ដែលដឹកនាំដោយ ប៉ុល ពត។
ក្រោយថ្ងៃរំដោះ៧មករា ឆ្នាំ១៩៧៩ ចំណងការទូត រវាងប្រទេសទំាងពីរបានកើតឡើងវិញនិងបានរឹងមាំ
ជាលំដាប់។
សម្តេចអគ្គមហាពញាចក្រី ហេង
សំរិន បានចាត់ទុកប្រទេសហុងគ្រី ជាមិត្តកម្ពុជានៅគ្រប់កាលៈទេសៈ។
ហុងគ្រីបានជួយកម្ពុជានៅគ្រាដែលកម្ពុជាងើបពីសង្រ្គាម
និងដែលត្រូវហ៊ុមព័ទ្ធសេដ្ឋកិច្ច
ដោយប្រទេសលោកខាងលិច។
ហុងគ្រីបានជួយស្វែងរកសន្តិភាពជូនប្រទេសកម្ពុជារហូតបង្កើតបានកិច្ចព្រមព្រៀងទីក្រុងបារីសឆ្នាំ១៩៩១។
លើសពីនេះក្នុងចំណោមកងកម្លំាងរក្សាសន្តិភាពរបស់អង្គការសហប្រជាជាតិចូលមករៀបចំការបោះឆ្នោតនៅកម្ពុជាក្នុងឆ្នាំ១៩៩៣
ក៏មានកងកម្លំាងប្រទេសហុងគ្រីដែរ។
សម្តេចប្រធានរដ្ឋសភាបានលើកឡើងថានៅក្នុងពេលបច្ចុប្បន្ននេះ រាជរដ្ឋាភិបាលកម្ពុជា បានខិតខំជាខ្លំាងក្នុងការអភិវឌ្ឍប្រទេសជាតិ
ជាក់ស្តែងរយៈពេលចុងក្រោយនេះកម្ពុជាមានកំណើនសេដ្ឋកិច្ចជាមធ្យម៧%។ អត្រាប្រាក់ចំណូលរបស់ប្រជាពលរដ្ឋខ្មែរ ជាមធ្យមនៅក្នុងឆ្នាំ២០១៤មានប្រមាណ
១១៣០ដុល្លារ ក្នុង១នាក់។
“រដ្ឋសភាកម្ពុជា សូមគំាទ្រជានិច្ច រាល់កិច្ចសហប្រតិបត្តិការ រវាងប្រទេសទំាងពីរ និងសូមឲ្យរដ្ឋាភិបាលកម្ពុជា
ហុងគ្រី បង្កើតកិច្ចសហប្រតិបត្តិការខាងពាណិជ្ជកម្ម និងទេសចរណ៍ បន្ថែមទៀត”
នេះជាប្រសាសន៍សង្កត់ធ្ងន់ របស់សម្តេចអគ្គមហាពញាចក្រី
ហេងសំរិន។
ចំពោះទំនាក់ទំនងរដ្ឋសភាប្រទេសទំាងពីរវិញ
សម្តេចប្រធានរដ្ឋសភា
បានស្នើសុំដល់ថ្នាក់ដឹកនាំរដ្ឋសភាហុងគ្រី ពិនិត្យលទ្ធភាព ដើម្បីបង្កើនកិច្ចសហប្រតិបត្តិការទំាងទ្វេភាគីនិងពហុភាគ្រី រវាងរដ្ឋសភាប្រទេសទំាងពីរ។ ការលើកឡើងរបស់សម្តេច
បែបនេះបានទទួលការគំាទ្រ
ពីឯកឧត្តមប្រធានរដ្ឋសភា ប្រទេសហុងគ្រី។
ឆ្លើយតប នៅក្នុងការទំនាក់ទំនង កិច្ចសហប្រតិបត្តិការ រវាងរដ្ឋសភាទំាងពីរប្រទេសនេះ ឯកឧត្តម ឡាស្លូ
កូវើ បានលើកឡើងថាកន្លងមកអនុប្រធានរដ្ឋសភាប្រទេសហុងគ្រី
ធ្លាប់បានមកបំពេញទស្សនកិច្ចនៅព្រះរាជាណាចក្រកម្ពុជា ហើយប្រធានរដ្ឋសភាកម្ពុជា
ក៏ធ្លាប់បានបំពេញទស្សនកិច្ចនៅប្រទេសហុងគ្រី
ដែរ។ ជាថ្មីម្តងទៀត
ឯកឧត្តម សូមគោរពអញ្ជើញសម្តេចប្រធានរដ្ឋសភា ដឹកនាំគណៈប្រតិភូរដ្ឋសភា កម្ពុជា ទៅបំពេញទស្សនកិច្ចផ្លូវការ
និងមិត្តភាពនៅប្រទេសហុងគ្រី តាមពេលវេលាសមស្របណាមួយ។
