មន្ត្រីអង្គការសិទ្ធិមនុស្សអង្គការសហប្រជាជាតិប្រចាំកម្ពុជាលើកឡើងថា ច្បាប់របស់អ្នកធ្វើរបាយការណ៏គឺធ្វើយ៉ាងណាមិនឲ្យមានការប៉ះពាល់ដល់អធិបតេយ្យភាព និងបូរណភាពទឹកដីនៃបណ្តាប្រទេសណាមួយឡើយហើយក្នុងបេសកកម្មក នៅកម្ពុជាពេលនេះលោកជំទាវនឹងខិតខំមិនធ្វើអ្វីឲ្យប៉ះពាល់អ្វីកម្ពុជានោះដែរ។
ប្រមុខរាជរដ្ឋាភិបាលកម្ពុជាសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានមានប្រសាសន៍ទៅកាន់អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកសិទ្ធិមនុស្សនៅកម្ពុជា សូមពិនិត្យមើលកុំឱ្យមានការរើសអើងទៅលើបញ្ហាជាតិសាសន៍នៅក្នុងប្រទេសកម្ពុជា។
សម្តេចតេជោ មានប្រសាសន៍លើកឡើងបែបនេះ ក្នុងខណៈដែលសម្តេចតេជោ បានអនុញ្ញាតឱ្យលោកជំទាវរ៉ូណា ស្មីត (Rohna smeth) អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា ចូលជួបសំដែងការគួរសម នៅវិមានសន្តិភាព នាព្រឹកថ្ងៃទី២១ ខែកញ្ញា ឆ្នំា២០១៥។
លោកជំទាវ RHONASMITH អ្នករាយការណ៏ពិសេសអង្គការសហប្រជាជាតិប្រចាំកម្ពុជាទទួលបន្ទុកសិទ្ធិមនុស្ស បានលើកឡើងនៅក្នុងជំនួបជាមួយ សម្តេចតេជោ ហ៊ុន សែន នាយករដ្ឋមន្ត្រី ថា លោកជំទាវ នឹងខិតខំធ្វើការងារជាមួយស្ថាប័ន និងបុគ្គលពាក់ព័ន្ធទាំងអស់ ក្នុងការប្រមូលឲ្យបានគ្រប់សព្វនូវភស្តុតាងជាក់លាក់ទាំងឡាយដើម្បីធ្វើការសន្និដ្ឋាននៅក្នុងរបាយការណ៏របស់លោកជំទាវ គឺមិនឲ្យមានការខ្វះខាតអ្វីឡើយ។
លោកជំទាវ បានគូសបញ្ជាក់ថា កន្លងមកកម្ពុជាជាប្រទេសមួយដែលនាំមុខគេនៅក្នុងបណ្តាប្រទេសអាស៊ាន ក្នុងការចុះហត្ថលេខាលើសន្ធិសញ្ញាពាក់ព័ន្ធនឹងការការពារការលើកស្ទួយសិទ្ធិមនុស្ស ហើយក្នុងពេលបច្ចុប្បន្ននេះកម្ពុជាក៏នៅតែបន្តនាំមុខគេដដែល។ ជាមួយគ្នានេះលោកជំទាវបានសន្យាថានឹងប្រឹងប្រែងធ្វើការជុំវិញករណីសិទ្ធិមនុស្សឲ្យអស់ពីសមត្ថភាព ដើម្បីការពារ និងលើកស្ទួយសិទ្ធិមនុស្សនៅកម្ពុជាដោយធ្វើយ៉ាងណាមិនឲ្យមានការប៉ះពាល់ទៅដល់អធិបតេយ្យភាព និងបូរណភាពទឹកដីរបស់កម្ពុជាឡើយ។
ជាការឆ្លើយតបសម្តេចតេជោហ៊ុន សែន មានប្រសាសន៏ថា បញ្ហាសិទ្ធិមនុស្ស គឺជាបញ្ហាកញ្ចប់មួយដែលយើងទាំងអស់គ្នាបានយល់ដឹងរួចមកហើយ មានសិទ្ធិក្នុងការរស់នៅ សិទ្ធិក្នុងការទទួលបានការសិក្សា សិទ្ធិក្នុងការទទួលបានម្ហូបអាហារ រួមទាំងសិទ្ធិដទៃៗជាច្រើនទៀត ដែលបញ្ហាទាំងនេះគប្បីណាយើងធ្វើការងាររួមគ្នា ដើម្បីផលប្រយោជន៏ប្រជាជនកម្ពុជាទាំងមូល។ សម្តេចក៏បានស្នើឲ្យលោកជំទាវជួយពិនិត្យមើលលើការរើសអើងបញ្ហាជាតិសាសន៏នៅក្នុងព្រះរាជាណាចក្រកម្ពុជាផងដែរ។
ជាមួយគ្នានេះ សម្តេចក៏បានលើកឡើងដែរថា យើងតែងមានចំណុចខុសគ្នាពីករណីមួយទៅករណីមួយ ប៉ុន្តែនោះ គឺជាបញ្ហាដំណើរការនៃលទ្ធិប្រជាធិបតេយ្យ និងដំណើរការនៃជីវិត ដូច្នេះរាល់ចំណុចដែលមិនស្របគ្នាពាក់ពន្ធ័នឹងសិទ្ធិទាំងឡាយ គួរគប្បីយើងខិតខំស្វែងរកវិធីដើម្បីបំព្រួញនូវភាពខុសគ្នានេះឲ្យមានភាពល្អទាំងអស់គ្នា៕
