ក្នុងចំណោមបេតិកភណ្ឌពិភពលោកដ៏អស្ចារ្យជាច្រើននៅលើសកលលោក គឺប្រាសាទអង្គរវត្ត របស់កម្ពុជាត្រូវបានស្រង់ស្ថិតិជុំវិញពិភពលោក រួចលទ្ធផលបង្ហាញថាប្រាសាទអង្គរវត្តរបស់ខ្មែរយើងជាប់លំដាប់ថ្នាក់លេខ១។
ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានថ្លែងថា អង្គរកំពុងតែឈានឡើងល្បីល្បាញខ្លាំងណាស់ ភាពល្បីល្បាញនេះកត្តាចម្បងគឺដោយសារកិច្ចសហប្រតិបត្តិការអន្តរជាតិ និងអ្នកជំនាញដែលគេមកកាន់ប្រទេសកម្ពុជាគេតែងតែលើកសសើរប្រាសាទអង្គរ ដូច្នេះយន្តការធំៗមួយចំនួនរបស់សកលលោកបានធ្វើចំណាត់ថ្នាក់ ហើយបានចាត់ទុកថាអង្គរគឺជារមណីយដ្ឋាន ជាបេតិកភណ្ឌពិភពលោកមួយដែលសម្មតថាជាប់លេខ១ នៅលើពិភពលោក។
ឯកឧត្តមបណ្ឌិតសភាចារ្យ សុខ អាន បានបន្ថែមទៀតថា ប្រាសាទអង្គរវត្ត ត្រូវបានជាប់លំដាប់ថ្នាក់លេខមួយក្នុងការទាក់ទាញចិត្តភ្ញៀវទេសចរណ៍ឲ្យគេជ្រើសរើសចង់មកទស្សនា ព្រោះគេបានធ្វើការសិក្សាស្ទង់មតិភ្ញៀវទេសចរណ៍នៅទូទាំងពិភពលោក ថាបើសិនជាមានឱកាសបានទៅទេសចរណ៍ តើអ្នកទេសចរណ៍ទាំងនោះចង់ទៅទីណា? ដូច្នេះស្ថិតិទេសចរណ៍ដែលគេចង់មកទស្សនាអង្គរវត្ត គឺច្រើនជាងគេក្នុងចំណោមកន្លែងដ៏ទៃទៀត នេះជាហេតុដែលធ្វើឲ្យប្រាសាទអង្គរវត្តជាប់លេខ១។
ក្រៅពីនេះ ឯកឧត្តមបណ្ឌិតសភាចារ្យ សុខ អាន បានបញ្ជាក់ថា ប្រាសាទមួយដែលគេចោះភ្នំធ្វើនៅប្រទេស ប៉េរ៊ូ ដែលគេហៅថា ប្រាសាទម៉ាឈូពីឈូ ប្រាសាទនោះគឺចម្លែកព្រោះគេចោះភ្នំសង់ប្រាសាទនោះ ដែលប្រាសាទនោះត្រូវបានជាប់លំដាប់ថ្នាក់លេខ២ ជាងនេះទៅទៀតប្រាសាទ តាស្មាហាល់ របស់ប្រទេសឥណ្ឌា គឺជាប់លំដាប់ថ្នាក់លេខ៣ តែប៉ុណ្ណោះ សូម្បីទីតាំងដែលយើងស្គាល់ថាអស្ចារ្យនោះក៏ចាញ់អង្គរវត្តរបស់ខ្មែរយើងដែរ ដូច្នេះយើងឃើញថា កាលណារបស់អ្វីមួយដែលជោគជ័យខ្លាំង គឺប្រាកដជាមានការចង់ធ្វើតាមហើយ។ ហេតុដូចនេះ ទើបប្រទេសឥណ្ឌាមានបំណងចង់ចម្លងប្រាសាទអង្គរវត្តដើម្បីសាងសង់ប្រាសាទដ៏ល្បីល្បាញនេះនៅប្រទេសគេ ប៉ុន្តែឯកឧត្តម ឯបនាយករដ្ឋមន្ត្រី សុខ អាន បានបញ្ជាក់ថា កម្ពុជាមិនអនុញ្ញាតិឲ្យប្រទេសឥណ្ឌាសាងសង់ប្រាសាទអង្គរវត្តនៅលើទឹកដីប្រទេសឥណ្ឌានោះឡើយ។
អត្ថបទដោយ៖ ជា សុភ័ក្ត្រ
