យោងតាមលិខិតជូនដំណឹងរបស់ចៅក្រមស៊ើបអង្កេតសួរសាលាដំបូងរាជធានីភ្នំពេញ
ជូន ឯកឧត្តមឧបនាយករដ្ឋមន្រ្តី រដ្ឋមន្ត្រីទទួលបន្ទុកទីស្តីការគណៈរដ្ឋមន្រ្តីបានអោយដឹងថា
សាលារាជធានីភ្នំពេញ បានទទួលធ្វើចំណាត់ការលើសំណុំរឿងព្រហ្មទណ្ឌលេខ ២៤៤៤ ចុះថ្ងៃទី០២ ខែកក្កដា ឆ្នាំ២០១៥ ដែលមានជនត្រូវចោទឈ្មោះ ទេព ឃួន ហៅ ពៅ ភេទប្រុស អាយុ ៤៩ឆ្នាំ សញ្ជាតិខ្មែរ ដែលត្រូវដាក់អោយស្ថិតក្រោមការពិនិត្យមើលពីបទហិង្សាដោយចេតនា ប្រព្រឹត្តនៅចំណុចវិទ្យាល័យ ជាស៊ីម បឹងកេងកង ផ្លូវលេខ ៣៩២ ភូមិ១ សង្កាត់បឹងកេងកងទី១ ខណ្ឌចំការមន រាជធានីភ្នំពេញ កាលពីថ្ងៃទី០១ ខែកក្កដា ឆ្នាំ២០១៥ តាមបញ្ញាត្តិមាត្រា ២១៧ នៃក្រមព្រហ្មទណ្ឌ។
រាល់ការសួរចម្លើយទៅលើជនត្រូវចោទទៅតាមនីតិវិធី ជនត្រូវចោទរូបនេះបានឆ្លើយសារភាពថា ខ្លួនមានមុខរបរ និងតួនាទីជាមន្រ្តីជាប់កិច្ចសន្យានៅនាយកដ្ឋានសិទ្ធមនុស្ស និងអង្គការក្រៅរដ្ឋាភិបាលនៃទីស្តីការគណៈរដ្ឋមន្ត្រី ដូច្នេះហើយបានជាអត្តសញ្ញាណនេះត្រូវបានយកមកប្រើប្រាស់ចំពោះមុខរបរ និងតួនាទីរបស់ជនត្រូវចោទចំពោះដីការផ្សេងៗរបស់តុលាការ។ ប៉ុន្តែក្រោយបានទទួលនូវលិខិតបដិសេធលេខ ០៦ លបក ចុះថ្ងៃទី០៣ ខែកក្កដា ឆ្នាំ២០១៥ របស់គណៈរដ្ឋមន្រ្តី នៅថ្ងៃទី០៦ ខែកក្កដា ឆ្នាំ២០១៥ រួចមកដើម្បីស្វែងរកការពិត នៅថ្ងៃទី០៧ ខែកក្កដា ឆ្នាំ២០១៥ សាលាដំបូងរាជធានីភ្នំពេញ បានធ្វើការសាកសួរចម្លើយជនត្រូវចោទឈ្មោះ ទេព ឃួន បន្ថែមទៀតពាក់ព័ន្ធទៅនឹងមុខរបរ និងតូនាទីរបស់ជនត្រូវចោទនេះនៅមណ្ឌលកែប្រែទី១។
លទ្ធផលនៃការសាកសួរ ជនត្រូវចោទរូបនេះបានឆ្លើយសារភាពថា ខ្លួនមិនមែនជាមន្រ្តីក្របខណ្ឌ ឬជាមន្រ្តីជាប់កិច្ចសន្យានៃទីស្តីការគណៈរដ្ឋមន្រ្តីទេ ការពិតគឺខ្លួនមានមុខងារ និងតួនាទីជាប្រធានសមាគមសិទ្ធមនុស្សដើម្បីអភិវឌ្ឍន៍ និងថែរក្សាកុមារកំព្រា ស្ត្រីក្រីក្រ ហៅកាតថា (សមាគម កូ.ភី.អេ) ដែលមានទីតាំងនៅផ្ទះលេខ ២០ZEថ ផ្លូវសុធារស ភូមិទី២ សង្កាត់ទន្លេបាសាក់ ខណ្ឌចំការមន រាជធានីភ្នំពេញ ជាផ្ទះរបស់ជនត្រូវចោទតែម្តង។ មូលហេតុជនត្រូវចោទឆ្លើយដូច្នេះប្រាប់អជ្ញាធរមានសមត្ថកិច្ច ក៏ព្រោះតែខ្លូនមានបំណងគម្រាមដល់អ្នកនៅកន្លែងកើតហេតុ និងជនរងគ្រោះកុំអោយហ៊ានរករឿងខ្លួនតែប៉ុណ្ណោះ ពេលនេះខ្លួនព្រមទទួលកំហុសឆ្គងនេះទាំងស្រុង។
ហេតុដូច្នេះដើម្បីផលប្រយោជន៍ច្បាប់ ព្រមទាំងមានភស្តុតាងច្បាស់លាស់តាមរយៈលិខិតបដិសេធលេខ ០៦ លបក ចុះថ្ងៃទី០៣ ខែកក្កដា ឆ្នាំ២០១៥ របស់ទីស្តីការគណៈរដ្ឋមន្រ្តី និងចម្លើយសារភាពរបស់ជនត្រូវចោទកាលពីថ្ងៃទី០៧ ខែកក្កដា ឆ្នាំ២០១៥ តុលាការនឹងធ្វើការផ្លាស់ប្តូរពីមុខរបរ និងតួនាទីពិតប្រាកដរបស់ជនត្រូវចោទរូបនេះ ពីមន្រ្តីជាប់កិច្ចសន្យានៅនាយកដ្ឋានសិទ្ធមនុស្ស និងអង្គការក្រៅរដ្ឋាភិបាលនៃទីស្តីការគណៈរដ្ឋមន្ត្រី មកជាប្រធានសមាគមសិទ្ធមនុស្សដើម្បីអភិវឌ្ឍន៍ និងថែរក្សាកុមារកំព្រា ស្រ្តីក្រីក្រ ហៅកាត់ថា (សមាគម កូ.ភី.អេ)វិញ៕
