Wednesday, June 17, 2015
កំណត់ទូតលេខៈ ១៤១៨ កបទ.សអ/កស៊៤ របស់ក្រសួងការបរទេស និងសហប្រតិបត្តិការអន្តរជាតិ ជូនចំពោះស្ថានទូតនៃសាធារណរដ្ឋសង្គមនិយមវៀតណាម
លេខៈ ១៤១៨ កបទ.សអ/កស៊៤
ក្រសួងការបរទេស និងសហប្រតិបត្តិការអន្តរជាតិនៃព្រះរាជាណាចក្រកម្ពុជា សូមសំដែងគារវកិច្ច ជូនចំពោះស្ថានទូតនៃសាធារណរដ្ឋសង្គមនិយមវៀតណាម និងមានកិត្តិយសសូមទាញការចាប់អារម្មណ៍របស់ស្ថានទូតដូចខាងក្រោមៈ
- នៅក្នុងកំណត់ទូតរបស់ក្រសួងលេខ ១៣១៨ កបទ.សអ/កស៊៤ ចុះថ្ងៃទី ០៨ មិថុនា ២០១៥ រាជរដ្ឋាភិបាលកម្ពុជា បានស្នើសុំអោយរដ្ឋាភិបាលនៃសាធារណរដ្ឋសង្គមនិយមវៀតណាម បញ្ឈប់ការជីកដីធ្វើគ្រឹះសំរាប់ការសាងសង់ប៉ុស្តិ៍យោធានៅត្រង់ចំណុចនិយាមការ WT-06065-07703 នៅជាប់ភូមិព្រែកស្បូវ ឃុំសំពៅពូន ស្រុកកោះធំ ខេត្តកណ្តាល កម្ពុជា។
- នៅក្នុងកិច្ចប្រជុំរបស់គណៈកម្មការចំរុះព្រំដែននៃប្រទេសទាំងពីរ នៅទីក្រុងហាណូយ ថ្ងៃទី ២៤ មេសា ២០១៥ ភាគីកម្ពុជា បានស្នើសុំអោយភាគីវៀតណាមបញ្ឈប់ការសាងសង់នេះ។
- អាជ្ញាធរខេត្តកណ្តាល កម្ពុជា បានស្នើសុំអោយអាជ្ញាធរខេត្តអានយ៉ាង វៀតណាម នៅថ្ងៃទី ២១ មេសា ២០១៥ និងថ្ងៃទី ០៩ មិថុនា ២០១៥ អោយបញ្ឈប់សកម្មភាពទាំងនេះ។
- ប៉ុន្តែអាជ្ញាធរខេត្តអានយ៉ាងវៀតណាម នៅតែបន្តការសាងសង់ប៉ុស្តិ៍យោធាក្នុងទ្រង់ទ្រាយធំជាងមុន។
- អាស្រ័យហេតុនេះ រាជរដ្ឋាភិបាលកម្ពុជា ស្នើសុំសារជាថ្មីចំពោះរដ្ឋាភិបាលនៃសាធារណរដ្ឋសង្គមនិយមវៀតណាម អោយបញ្ឈប់ជាបន្ទាន់នូវសកម្មភាពទាំងនេះ រហូតដល់គណៈកម្មការចំរុះព្រំដែននៃប្រទេសទាំងពីរ បានបោះបង្គោលព្រំដែនក្នុងតំបន់នេះ ចប់ជាស្ថាពរ។
ក្រសួងការបរទេស និងសហប្រតិបត្តិការអន្តរជាតិ សូមឆ្លៀតឧកាសនេះសំដែងសារជាថ្មីចំពោះស្ថានទូត នូវការគោរពដ៏ខ្ពង់ខ្ពស់បំផុត។
ភ្នំពេញ, ថ្ងៃទី ១៧ ខែ មិថុនា ឆ្នាំ ២០១៥
គ្រួសារកុមាររងគ្រោះ ដោយលង់ទឹកស្លាប់ទាំង៣នាក់ បងប្អូន នៅស្រុកសំរោង ខេត្តតាកែវ ទទួលអំណោយ ពីកាកបាទក្រហមកម្ពុជា
ប្រធាននាយកដ្ឋានគ្រប់គ្រងគ្រោះមហន្តរាយ កាកបាទក្រហមកម្ពុជា លោក អ៊ុយ សំអាត នៅថ្ងៃទី១៧ ខែមិថុនា ឆ្នាំ២០១៥នេះបាននាំយកអំណោយ ជាគ្រឿងឧបភោគ បរិភោគ និងថវិកា ៣លានរៀលទៅឧបត្ថម្ភ និងចូលរួមរំលែកមរណទុក្ខ ជូនក្រុមគ្រួសារក្រីក្រមួយនៅស្រុកសំរោង ខេត្តតាកែវ ដែលជួបគ្រោះអកុសលកូនស្រីទាំង៣នាក់ បានលង់ទឹកប្រឡាយស្លាប់ព្រមគ្នា។
លោក អ៊ុយ សំអាត បានលើកឡើងថា ក្រោយទទួលដំណឹងដ៏ក្រៀមក្រំនេះ សម្តេចគត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់តាំងភ្លាមៗឲ្យរូបលោក និងមន្រ្តីកាកបាទក្រហមកម្ពុជា នាំយកអំណោយមនុស្សធម៌របស់កាកបាទក្រហមកម្ពុជា ទៅចែកជូនដល់ក្រុមគ្រួសារសព ដើម្បីរំលែកទុក្ខលំបាកមួយចំនួន។ អំណោយដែលចែកជូនគ្រួសារសពនាពេលនេះរួមមាន៖ អង្ករ១០០ គីឡូក្រាម មី៥កេស ត្រីខ ៥០កំប៉ុង ទឹកក្រូច ៥កេស ទឹកបរិសុទ្ធ ៥កេស និងថវិកា ៣លានរៀល។
គួរបញ្ជាក់ថា ហេតុការណ៍ ដ៏គួរឲ្យសោកសង្រេងនេះ បានកើតឡើងនាវេលាម៉ោងប្រមាណជិត ៦ ល្ងាច ថ្ងៃទី១៥ ខែមិថុនា ឆ្នាំ២០១៥ ស្ថិតនៅចំណុចប្រឡាយទឹកទួលក្បាលសែន ក្នុងភូមិសំរោង ឃុំទ្រា ស្រុកសំរោង ខេត្តតាកែវ ដោយកូនស្រីតូចៗ ចំនួន៣នាក់ ទី១- ឈ្មោះ ស៊ន រក្សា អាយុ ១១ឆ្នាំ, ទី២- ឈ្មោះ ស៊ន លីនដា អាយុ ៧ឆ្មាំ និង ទី៣- ឈ្មោះ ស៊ន ម៉ារី អាយុ ៥ឆ្នាំ បានលង់ទឹកប្រឡាយស្លាប់ព្រមគ្នា នៅពេលដែលពួកគេនាំគ្នាទៅងួតទឹកក្នុងប្រឡាយ ខណៈឪជាប់រវល់តែរកក្តាមនៅឯស្រែ ហើយបណ្តោយឲ្យកូនៗដើរត្រឡប់មកផ្ទះមុន។
លោក នៅ ធា អាយុ ៣៦ឆ្នាំ មុខរបធ្វើស្រែ និងអ្នកស្រី លន ស អាយុ ៣៥ឆ្នាំ ជាឪពុកម្តាយកុមារីរងគ្រៅទាំង៣បានឲ្យដឹងថា នៅមុនពេលកើត ហេតុ កូនស្រីទាំង៣នាក់របស់គាត់ បានតាមពួកគាត់ទៅរកក្ដាម នៅតាមភ្លឺស្រែ។ ក្រោយមកគាត់បានឱ្យពួកគេត្រឡប់ ទៅផ្ទះវិញ ។ លុះពេលគាត់ត្រឡប់មកផ្ទះវិញមិនឃើញកូនក៏នាំគ្នាដើររក តែរកមិនឃើញ ។ ដោយមានការសង្ស័យ ក៏បាននាំគ្នាទៅរកមើលក្នុងប្រឡាយ ខាងលើ ទើបប្រទះឃើញកូនលង់ទឹក ស្លាប់ទាំងបីនាក់ ទើបស្រែកឆោរឡោ ធ្វើឲ្យមានការភ្ញាក់ផ្អើលតែម្តង៕
អត្ថបទ៖ សុភាព
ពលករខ្មែរចំនួន ២៣០នាក់ នឹងត្រឡប់មកកាន់កម្ពុជាវិញ បន្ទាប់ពីជាប់ក្នុងទូកនេសាទថៃនៅ ឥណ្ឌូនេស៊ី
យោងតាមលិខិតរបស់ក្រសួងការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា ចេញផ្សាយនៅថ្ងៃទី១៧ ខែមិថុនា ឆ្នាំ២០១៥ នេះ បានឲ្យដឹងថា ពលករខ្មែរ ចំនួន ២៣០នាក់ នៅកោះ អំបន់ (Ambon) ប្រទេសឥណ្ឌូនេស៊ី នឹងត្រឡប់មកកម្ពុជាវិញ នៅវេលាម៉ោង៦ព្រឹក ថ្ងៃទី១៨ ខែមិថុនា ឆ្នាំ២០១៥ស្អែកនេះ។
តាមការណែនាំរបស់ឯកឧត្តមឧបនាយករដ្ឋមន្រ្តី ហោ ណាំហុង រដ្ឋមន្រ្តីការបរទេស និងសហប្រតិបត្តិការអន្តរជាតិ ស្ថានទូតកម្ពុជាប្រចាំប្រទេសឥណ្ឌូណេស៊ី បានជួបធ្វើការជាមួយសម្ព័ន្ធក្រុមហ៊ុន PT. Maribu Industries Group ដែលជាក្រុមហ៊ុនតំណាងភាគីម្ចាស់ទូកនេសាទថៃ ក្នុងការរៀបចំមាតុភូមិនិវត្តន៍របស់ពលករខ្មែរ ចំនួន២៣០នាក់ ពីកោះ អំបន់ (Ambon) ។
លិខិតដដែលបានបញ្ជាក់ថា តាមការទាមទាររបស់ស្ថានទូតកម្ពុជា ក្រុមហ៊ុននេះបានជួលយន្តហោះ១គ្រឿងប្រភេទ Boeing 737-900 ER អាចផ្ទុកពលករខ្មែរចំនួន ២១៣នាក់ ដែលនឹងចេញដំណើរពីកោះ អំបន់ ប្រទេសឥណ្ឌូណេស៊ី មកដល់ភ្នំពេញ នៅថ្ងៃទី ១៨ ខែ មិថុនា ឆ្នាំ ២០១៥ វេលាម៉ោង ០៦:០០ នាទីព្រឹក ហើយចំណែកឯពលករខ្មែរ ដែលនៅសល់ចំនួន ១៧ នាក់ផ្សេងទៀត ក្រុមហ៊ុនបានរៀបចំឲ្យធ្វើដំណើរតាមជើងយន្តហោះAK 534 ពីកូឡាឡំពួរ មកដល់ភ្នំពេញ នៅថ្ងៃទី ១៨ ខែ មិថុនា ឆ្នាំ ២០១៥ វេលាម៉ោង ១៥:៥៥ នាទី ។
សូមបញ្ជាក់ថា តាមការទាមទាររបស់ស្ថានទូតកម្ពុជាប្រចាំនៅប្រទេសឥណ្ឌូនេស៊ី ក្រុមហ៊ុនបានដោះស្រាយប្រាក់បៀវត្សរ៍ ជូនពលករខ្មែរទាំង ២៣០នាក់នេះរួចហើយ៕
អត្ថបទ៖ សុភាព
សម្តេចតេជោ អញ្ជើញពិនិត្យដំណើរការនៃការសាងសង់មេន បូជាសពសម្តេចអគ្គមហាធម្ម ពោធិសាល ជា ស៊ីម នៅមុខវត្តបុទុមវតី
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និង អនុប្រធានគណៈកម្មាធិការរៀបចំពិធីបុណ្យសព បានអញ្ជើញត្រួតពិនិត្យទីតាំង សាងសង់មេនបូជាសពសម្តេចអគ្គមហាធម្មពោធិសាល ជា ស៊ីម ប្រធានព្រឹទ្ធសភាជាតិ នៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា ដែលមានទីតាំងស្ថិតនៅមុខវត្តបុទុមវតី ខណ្ឌដូនពេញ រាជធានីភ្នំពេញ នៅរសៀលថ្ងៃទី១៥ ខែមិថុនា ។
នៅក្នុងឱកាសនៃការអញ្ជើញចុះត្រួតពិនិត្យដល់ទីកន្លែង នៃការសាងសង់មេនបូជាសពសម្តេចអគ្គមហាធម្មពោធិសាល ជា ស៊ីម សម្តេចតេជោនាយករដ្ឋមន្រ្តី បានពិនិត្យយ៉ាងយកចិត្តទុកដាក់ទៅលើគំរោងប្លង់មេ ដែលរៀបចំរចនាដោយក្រុមហ៊ុនសំណង់។ តាមរយៈនោះដែរសម្តេចតេជោនាយករដ្ឋមន្រ្តី បានស្នើដល់ក្រុមហ៊ុនសំណង់ត្រូវយកចិត្តទុកដាក់រៀបចំ កសាងមេនបូជាសពស្របតាមរចនាបទខ្មែរ និងមានលក្ខណៈបច្ចេកទេសរឹងមាំ។ ជាមួយគ្នានេះសម្តេចតេជោនាយករដ្ឋមន្រ្តី បានដាក់នូវវិធានការមុតមាំ ដល់ក្រុមហ៊ុនសាងសង់ធ្វើយ៉ាងណា ខិតខំសាងសង់មេនបូជាសពសម្តេចអគ្គមហាធម្មពោធិសាល ជា ស៊ីម ឲ្យបានហើយរួចរាល់ទៅតាមពេលវេលាដែលបានគ្រោងទុក ពិសេសត្រូវរៀបចំកសាងនូវសោភណភាពឲ្យមានលក្ខណៈស្របបំព្រង និងប្រកបទៅដោយការទាក់ទាញ សក្តិសមទៅនឹងកត្តិនាមដ៏ឧត្តង្គឧត្តមរបស់សម្តេចអគ្គមហាធម្មពោធិសាល ជា ស៊ីម ដែលក្នុងមួយជីវិតរបស់សម្តេច សម្តេចបានបូជានូវកម្លាំងកាយ កម្លាំងចិត្ត ប្រាជ្ញាស្មារតី បូជាសាច់ស្រស់ ឈាមស្រស់ ក្នុងការបំរើជាតិ សាសនា ព្រះមហាក្សត្ររហូតដល់ដំណាក់កាលចុងក្រោយដែលគ្មានការវិលត្រឡប់វិញបាននោះ។
សូម បញ្ជាក់ដែរថា មេនបូជាសពសម្តេចអគ្គមហាធម្មពោធិសាល ជា ស៊ីម ត្រូវបានក្រុមហ៊ុនសំណង់ បានខិតខំកសាងយ៉ាងសំរិតសំរាំង ស្របទៅតាមស្តង់ដានិងរចនាបទខ្មែរ ពិសេសការសាងសង់នូវសោភណភាពនៅ ជុំវិញបរិវេណនៃទីកន្លែងបូជាសព តាមរយៈការតុបតែងភ្លើងពណ៌ផ្កាភ្ញីផ្សេងៗ។ បើតាមការអះអាងពីក្រុមហ៊ុនសាងសង់បានឲ្យដឹងថា មេនបូជាសពដែលបានសាងសង់រយៈពេលជិត១សប្តាហ៍មកនេះ រាល់សំណង់ដែលជាផ្នែករឹងស្ទើរតែបញ្ចប់ការងារសាងសង់រួចរាល់ហើយ នៅឡើយតែការតុបតែងលំអនិងការកែសំរួលនៅតាមបណ្តាផ្នែកមួយចំនួន នៃទីតាំងបូជាសពទាំងមូល។ តំណាងក្រុមហ៊ុនក៏បានបញ្ជាក់ដែរថា រាល់សំណង់ទាំងអស់នៃការដ្ឋានសាងសង់មេនបូជាសព សម្តេចអគ្គមហាធម្មពោធិសាល ជា ស៊ីម នឹងបញ្ចប់ទៅតាមពេលវេលាដែលបានគ្រោងទុក។ សូមបញ្ជាក់ដែរថា សម្តេចអគ្គមហាធម្មពោធិសាល ជា ស៊ីម ប្រធានព្រឹទ្ធសភានិងជាប្រធានគណបក្សប្រជាជនកម្ពុជា បានទទួលមរណភាពកាលពីវេលាម៉ោង៣និង៤៥នាទី រសៀលថ្ងៃទី៨មិថុនាឆ្នាំ២០១៥ ក្នុងជន្មាយុ៨៣ឆ្នាំ ដោយរោគាពាធ។
សពសម្តេចអគ្គមហាធម្មពោធិសាល ជា ស៊ីម បានប្រារព្ធតម្កល់ធ្វើបុណ្យតាមប្រពៃណីជាតិ និងត្រូវបានអនុញ្ញាតឲ្យគណៈប្រតិភូជាន់ខ្ពស់ជាតិ អន្តរជាតិ ចូលគោរពវិញ្ញាណក្ខន្ធពីថ្ងៃទី១០ ខែមិថុនា រហូតដល់ថ្ងៃទី១៩ ខែមិថុនា ជាមួយគ្នានេះ រាជរដ្ឋាភិបាលកម្ពុជា បានចេញនូវអនុក្រិតដោយកំណត់យកថ្ងៃទី១៩មិថុនា ជាថ្ងៃបុណ្យកាន់ទុក្ខជាផ្លូវការ ចំពោះសពរបស់សម្តេចអគ្គមហាធម្មពោធិសាល ជា ស៊ីម ប្រធានព្រឹទ្ធសភា និងជាប្រធានគណបក្សប្រជាជនកម្ពុជា។ សូមបញ្ជាក់ដែរថា សពសម្តេចអគ្គមហាធម្មពោធិសាល ជា ស៊ីម នឹងប្រារព្ធពិធីដង្ហែ ចាកចេញពីភូមិគ្រឹៈចំការមន មកប្រារព្ធពិធីបូជាសពជាផ្លូវការនៅថ្ងៃទី១៩ ខែមិថុនាឆ្នាំ២០១៥ នៅសួន ឧទ្យានមុខវត្តបុទុមវតី រាជធានីភ្នំពេញ។
ក្នុងការសាងសង់មេនបូជាសព និងទីតាំងនៃកន្លែងប្រារព្ធពិធីបូជាសព សម្តេចអគ្គមហាធម្មពោធិសាល ជា ស៊ីម រហូតមកដល់ពេលនេះ ជិតបញ្ចប់ការសាងសង់១០០%ហើយ។
សូមបញ្ជាក់ដែរថា ក្នុងសារលិខិតរបស់សម្តេចអគ្គមហាសេនាបតីតេជោ ហ៊ុន សែន ប្រមុខនៃរាជរដ្ឋាភិបាលកម្ពុជា ដែលបានធ្វើឡើងកាលពីថ្ងៃទី៨មិថុនា បានចាត់ទុកថា មរណភាពរបស់សម្តេចអគ្គមហាធម្មពោធិសាល ជា ស៊ីម ប្រធានព្រឹទ្ធសភា និងជាប្រធានគណបក្សប្រជាជនកម្ពុជា គឺជាការបាត់បង់ដ៏ធំធេងរបស់សង្គមជាតិកម្ពុជាទាំងមូល។ សម្តេចតេជោមានជំនឿយ៉ាងមុតមាំថា ប្រជាជនកម្ពុជាគ្រប់រូបនឹងចងចាំជានិច្ច នៅក្នុងក្រអៅបេះដូង នូវគុណូបការៈដ៏ប្រពៃថ្លៃថ្លារបស់សម្តេចចំពោះជាតិ សាសនា ព្រះមហាក្សត្រ និងមាតុភូមិជាទីស្នេហា នៃយើង ដែលនេះគឺជាគំរូវីរភាពដ៏ឧត្តុង្គឧត្តមបំផុត សម្រាប់ប្រជាជាតិខ្មែរទាំងមូលចងចាំមិនអាចបំភ្លេចបាន ៕
Subscribe to:
Posts (Atom)