ឯកឧត្តម វ៉ា គឺមហុង បានមានប្រសាសន៍ថា «មកដល់ពេលនេះដំណើរការបោះបង្គោលព្រំដែនរវាងប្រទេសកម្ពុជា និងប្រទេសវៀតណាម គឺសំរេចបានជាង៨០% ហើយនៅសេសសល់តែជាង១០%ទៀត ដែលនៅមានភាពស្មុគស្មាញកំពុងចរចាររកដំណោះស្រាយ ដោយតម្លាភាពរវាងប្រទេសទាំងពីរ»។
គួរបញ្ជាក់ថា ការធ្វើសន្និសីទសារព័ត៌មាន របស់គណៈកម្មាធិការកិច្ចការព្រំដែន នៅថ្ងៃនេះ គឺធ្វើឡើងបន្ទាប់ពី ឯកឧត្តម អ៊ុំ សំអាន ដែលកំពុងស្ថិតនៅសហរដ្ឋអាមេរិក នៅតែបន្តធ្វើការរិះគន់ និង ញុះញង់មតិជាតិ និងអន្តរជាតិរឿងផែនទីកម្ពុជានេះ ដោយអះអាងថាផែនទី ដែលខ្លួនរកឃើញនៅសហរដ្ឋអាមេរិក ជាផែនទីត្រឹមត្រូវ តាមការពិតផែនទីនេះ គឺគណៈកម្មការកិច្ចការព្រំដែនកម្ពុជាបានទទួលតាំងពីជាង១០ឆ្នាំមកហើយ។
ឯកឧត្តមទេសរដ្ឋមន្ត្រី វ៉ា គឺមហុង បានលើកឡើងថា «ការញុះញង់របស់គណបក្សសង្គ្រោះជាតិ បានធ្វើឲ្យគេមិនទុកចិត្តរាជរដ្ឋាភិបាល ក្នុងការប្រើប្រាស់ផែនទី ហើយនេះជាការធ្វើឲ្យខូចផលប្រយោជន៍ជាតិទាំងមូល»។
ឯកឧត្តម វ៉ា គឺមហុង មានសង្កត់ធ្ងន់ថា រាជរដ្ឋាភិបាលមិនដែលលាក់លៀមរឿងផែនទីឡើយ «កន្លងមក យើងបានបង្ហាញអ្នកសារព័ត៌មានជាតិ និងអន្តរជាតិ នូវផែនទីផ្លូវការដែលរាជរដ្ឋាភិបាលកំពុងប្រើប្រាស់ ក្នុងការបោះបង្គោលព្រំដែនជាមួយវៀតណាម ហើយផែនទីទាំងនោះ គឺយើងរកបានជាង១០ឆ្នាំមកហើយ។ មិនមែនដូចការលើកឡើងប្រាសចាកពីការពិត ដូចឯកឧត្តម អ៊ុំ សំអាន បាននិយាយថា រកឃើញនៅបណ្ណាល័យសភា សហរដ្ឋអាមេរិក ជាន់ទី៥ នៅ Washington DC នោះទេ ការពិត ឯកឧត្តម វ៉ា គឺមហុង ធ្លាប់បានបញ្ជាក់ថាផែនទីហ្នឹង គណៈកម្មាធិការកិច្ចការព្រំដែន បានតំកល់ទុកនៅជាន់ទី៥ នៅអគារទីស្តីការគណៈរដ្ឋមន្ត្រីប្រទេសកម្ពុជា។ ដូច្នេះការលើកឡើង របស់ឯកឧត្តម អ៊ុំ សំអាន គ្រាន់តែជាការមួលបង្កាច់ និងចោទប្រកាន់ប្រាសចាកពីការពិតប៉ុណ្ណោះ»៕
អត្ថបទ៖ ច័ន្ទ ទេវី
