Cambodia News: កិច្ចប្រជុំរកដំណោះស្រាយ លើបញ្ហានយោបាយ ចាប់ផ្តើមហើយ

Tuesday, July 22, 2014

កិច្ចប្រជុំរកដំណោះស្រាយ លើបញ្ហានយោបាយ ចាប់ផ្តើមហើយ

ភ្នំពេញ៖ វិបត្តិនយោបាយនៅកម្ពុជា ដែលបានជាប់គាំង អស់រយៈពេល ជិតមួយ ឆ្នាំកន្លង មកនេះ នៅវេលាម៉ោង ៩ ព្រឹកថ្ងៃទី២២ ខែកក្កដា ឆ្នាំ២០១៤ ប្រមុខដឹកនាំកំពូលនៃ គណបក្សមានទំនាស់ ទាំងពីរ សម្តេចតេជោ ហ៊ុន សែន នាយករដ្ឋមន្រ្តី នៃព្រះរាជា ណាចក្រកម្ពុជា និងជាអនុប្រធានគណបក្ស ប្រជាជនកម្ពុជា លោក សម រង្ស៊ី ប្រធានគណ បក្សសង្រ្គោះជាតិ និងលោក កឹម សុខា រួមនឹងក្រុម ការងារជាច្រើននាក់ ផ្សេងទៀត បានបើកកិច្ចប្រជុំ តទល់មុខគ្នាហើយ ដើម្បីបញ្ចប់នូវ ការខ្វែងគំនិត ទាំងឡាយ។

សូមបញ្ជាក់ថា ជំនួប ថ្នាក់ដឹកនាំកំពូលនៃ គណបក្សនយោបាយទាំងពីរ ធ្លាប់បានជួបពិភាក្សាគ្នា រួចម្តងមកហើយ កាលពីខែកញ្ញា ឆ្នាំ២០១៣ តែជំនួបលើកនោះ ទទួលបានផ្លែផ្កាជាច្រើន តែមិនទាន់សម្រេចបាន លទ្ធផលត្រូវចិត្តគ្នា ១០០ភាគរយនោះទេ។

នៅក្នុងជំនួបថ្នាក់ដឹកនាំ កំពូលលើកទីពីរនេះ ថ្នាក់ដឹកនាំបក្ស នយោបាយទាំងពីរ សុទ្ធតែបានប្តេជ្ញា ចិត្តខ្ពស់ឈរក្នុង ស្មារតីបង្រួបបង្រួមជាតិ បញ្ចប់នូវបញ្ហាខ្វែង គំនិតទាំងអស់ ដើម្បីស្វែងរក ឧត្តមប្រយោជន៍ ជូនប្រទេសជាតិ និងប្រជាជន។

ជាមួយនឹងការប្តេជ្ញាចិត្ត ប្រកបដោយឆន្ទៈមោះមុតរបស់ ថ្នាក់ដឹកនាំកំពូលគណបក្ស នយោបាយទាំងពីរ បានធ្វើឲ្យប្រជាពលរដ្ឋ ជាម្ចាស់ឆ្នោតសម្តែងការសាទរ និងផ្តល់នូវក្តីសង្ឃឹមជាខ្លាំងថា កិច្ចប្រជុំនឹងទទួលបាននូវផ្លែផ្កាល្អ ប្រសើរ បញ្ចប់ការខ្វែងគំនិតគ្នាទាំងឡាយ រួមគ្នាស្វែងរកឧត្តមប្រយោជន៍ ជូនប្រជាពលរដ្ឋខ្មែរទូទាំងប្រទេស៕

Tuesday, 22 July 2014 09:28 ដោយ៖ ដើមអម្ពិល (DAP), ID-009