យោងតាមលិខិតថ្លែងអំណរគុណរបស់គណៈដឹកនាំជាន់ខ្ពស់នៃសាសនាឥស្លាមកម្ពុជា ចុះថ្ងៃទី ១២ ខែកក្កដា ឆ្នាំ២០១៥ ដោយលោក មហាំម៉ាត់ស៊េន នូរុទ្ធីន ប្រធានគណៈអ៊ីម៉ាំឥស្លាមរាជធានីភ្នំពេញ បានឲ្យដឹងថា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានសម្រេចជាគោលការណ៍ ដើម្បីបញ្ចូលគ្រូបង្រៀនខ្មែរឥស្លាមចំនួនប្រមាណ ១,៥០០នាក់ ទៅក្នុងក្របខណ្ឌគ្រូបង្រៀន នៃក្រសួងអប់រំ យុវជន និងកីឡា និងបានអនុញ្ញាតឲ្យបុរសពាក់កាតឹប និងស្រ្តីឥស្លាមទទូរក្បាល ធ្វើលិខិតឆ្លងដែន អត្តសញ្ញាណប័ណ្ណ ឬថតរូប សម្រាប់ឯកសាររដ្ឋបាលផ្សេងៗ បើសិនជាបងប្អូនចង់គ្របក្បាល។ ការសម្រេចរបស់សម្តេចតេជោ ហ៊ុន សែន បានធ្វើឡើងកាលពីថ្ងៃទី ២៩ ខែមិថុនា ឆ្នាំ២០១៥កន្លងទៅ។
គណៈអ៊ីម៉ាំនៃសាសនាឥស្លាមកម្ពុជា បានចាត់ទុកសម្តេចតេជោ ហ៊ុន សែន ជាវីរៈបុរសកម្ពុជា ដែលមានក្តីសណ្តោសប្រណីដល់សាសនិកនានានៅក្នុងប្រទេសកម្ពុជា ដែលមានពុទ្ធសាសនាជាសាសនារបស់រដ្ឋ តែបានបើកទូលាយនូវសេរីភាពគោរពជំនឿ និងប្រណិប័តន៍សាសនាដល់សាសនាដ៏ទៃ ជាពិសេសដល់សាសនាឥស្លាម ដោយរាជរដ្ឋាភិបាលកម្ពុជាបានយកចិត្តទុកដាក់ ស្រឡាញ់ ការពារនិងផ្តល់នូវគោលការណ៍ជាច្រើនដែលនាំឲ្យសាសនិកឥស្លាមរស់នៅប្រកបដោយមោទនភាព និងសុខដុមនីយកម្មបំផុត៕
