កាលពីវេលាម៉ោង៨ព្រឹក ថ្ងៃទី២២ ខែមិថុនា ឆ្នាំ២០១៥នេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីកម្ពុជា បានដឹកនាំគណៈប្រតិភូ ទៅចូលរួមកិច្ចប្រជុំកំពូលយុទ្ធសាស្រ្ត កិច្ចសហប្រតិបត្តិការសេដ្ឋកិច្ច អាយ៉េយ៉ាវ៉ាឌី-ចៅប្រាយ៉ា-មេគង្គលើកទី៦ តាមការអញ្ជើញរបស់ឯកឧត្តម ថេន សេន (U THEIN SEIN) ប្រធានាធិបតី នៃសាធារណរដ្ឋ សហភាពមីយ៉ាន់ម៉ារ ដែលនឹងប្រព្រឹត្តទៅចាប់ពីថ្ងៃទី ២២ ដល់ថ្ងៃទី២៣ ខែមិថុនា ឆ្នាំ ២០១៥ នៅរដ្ឋធានី ណៃពីដោ នៃប្រទេសមីយ៉ាន់ម៉ារ ។
គណៈប្រតិភូអមដំណើរសម្តេចតេជោនាយករដ្ឋមន្រ្តី រួមមាន ឯកឧត្តមឧបនាយករដ្ឋមន្រ្តី ហោ ណាំហុង, ឯកឧត្តម ថោង ខុន រដ្ឋមន្រ្តីក្រសួងទេសចរណ៍ ឯកឧត្តម សាយ សំអាល់ រដ្ឋមន្រ្តីក្រសួងបរិស្ថាន និងសមាជិករាជរដ្ឋាភិបាលដទៃទៀត។
យោងសេចក្តីជូនព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ បានឲ្យដឹងថា តាមការរំពឹងទុក នៅទីបញ្ចប់នៃកិច្ចប្រជុំកំពូលនេះ ឯកសារមួយចំនួននឹងត្រូវបានអនុម័ត ក្នុងនោះរួមមាន សេចក្តីថ្លែងការណ៍រួម នៃកិច្ចប្រជុំកំពូលលើកទី៧ កម្ពុជា ឡាវ មីយ៉ានម៉ារ និងវៀតណាម សេចក្តីថ្លែងការណ៍រដ្ឋធានីណៃពីដោ នៃកិច្ចប្រជុំកំពូល ស្តីពីយុទ្ធសាស្ត្រកិច្ចសហប្រតិបត្តិការសេដ្ឋកិច្ច អាយ៉េយ៉ាវ៉ាឌី ចៅប្រាយ៉ា មេគង្គ លើកទី៦ និងផែនការសកម្មភាព នៃតុទ្ធសាស្ត្រកិច្ចសហប្រតិបត្តិការសេដ្ឋកិច្ច អាយ៉េយ៉ាវ៉ាឌី ចៅប្រាយ៉ា មេគង្គ ។
