តំណាងពិសេសរបស់រាជរដ្ឋាភិបាលជប៉ុន សន្យាជួយជំរុញលើកទឹកចិត្តដល់អ្នកវិនិយោគជប៉ុនឲ្យបានកាន់តែច្រើនថែមទៀតមកកាន់កម្ពុជា ដើម្បីចូលរួមចំណែកអភិវឌ្ឍន៏សេដ្ឋកិច្ចកម្ពុជាឲ្យបានរីកចំរើន។
លើកឡើងនៅក្នុងជំនួបពិភាក្សាការងារជាមួយ ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី នៅវិមានមិត្តភាពនៃទីស្តីការគណៈរដ្ឋមន្រ្តីនារសៀលថ្ងៃទី ៣០ ខែ កក្កដា ឯកឧត្តម Masaharu Kohno តំណាងពិសេសរបស់រាជរដ្ឋាភិបាលជប៉ុនសម្រាប់តំបន់មជ្ឈឹមបូព៌ា និងអឺរ៉ុប បានអះអាងថា រដ្ឋាភិបាលជប៉ុនបានប្តេជ្ញាចិត្តក្នុងការជួយជំរុញវិនិយោគជប៉ុន ឲ្យមកកាន់កម្ពុជា ដើម្បីរួមចំណែកក្នុងការអភិវឌ្ឍន៏សេដ្ឋកិច្ចរបស់កម្ពុជាធ្វើយ៉ាងណាជួយឲ្យបាន រីកលូតលាស់ក្នុងល្បឿនមួយលឿនទៅមុខ។
ឯកឧត្តម Masaharu Kohno បានបង្ហាញពីការចាប់អារម្មណ៏មកលើសក្តានុពលយ៉ាងច្រើនរបស់កម្ពុជា ដែលក្រុមហ៊ុនជប៉ុនអាចពិនិត្យឱកាសមកបណ្តាក់ទុនវិនិយោគ ពិសេសលើវិស័យហេដ្ឋារចនាសម្ព័ន្ធ គឺជាវិស័យអាទិភាពចាំបាច់ ដែលកម្ពុជាកំពុងប្រឹងប្រែងក្នុងការអភិវឌ្ឍន៏ នាពេលសព្វថ្ងៃនេះ។
ឯកឧត្តម Masaharu Kohno មានប្រសាសន៏ថាតាមទូលេខរបស់សភាពាណិជ្ជកម្មជប៉ុន បានឲ្យដឹងថាសព្វថ្ងៃមានក្រុមហ៊ុនធំៗរបស់ជប៉ុនប្រហែល១៩១ក្រុមហ៊ុន កំពុងប្រតិបត្តិការវិនិយោគនៅក្នុង ប្រទេសកម្ពុជា ដែលជាការរួមចំណែកយ៉ាងសំខាន់ មិនត្រឹមជួយអភិវឌ្ឍន៏សេដ្ឋកិច្ចកម្ពុជាប៉ុណ្ណោះទេ ប៉ុន្តែបានផ្តល់ឱកាសការងារយ៉ាងច្រើនជូនពលរដ្ឋកម្ពុជាផងដែរ ។
ជាមួយនឹងដំណើរទស្សនកិច្ចនេះ ឯកឧត្តម បានជំរាប ឯកឧត្តម សុខ អាន ថាការដឹកនាំប្រតិភូអញ្ជើញមកកាន់កម្ពុជាពេលនេះ គឺដើម្បីមកចូលរួមក្នុងពិធីសម្ពោធក្រុមហ៊ុនរបស់ជប៉ុនថ្មីមួយទៀត នៅកម្ពុជា ហើយនៅពេលវិលត្រឡប់ទៅវិញប្រតិភូលោក នឹងខិតខំចលនាបំផុសជួយជំរុញអ្នកវិនិយោគ ជប៉ុនបន្ថែមទៀតឲ្យចូលមកកាន់កម្ពុជា។
ជាការឆ្លើយតប ឯកឧត្តម បណ្ឌិតសភាចារ្យ សុខ អាន បានថ្លែងអំណគុណចំពោះការសន្យាជួយជំរុញវិនិយោគពីជប៉ុនមកកាន់កម្ពុជា ឯកឧត្តម បានជំរាបជូនថា សព្វថ្ងៃកម្ពុជានៅមានឱកាសច្រើន សម្រាប់ការវិនិយោគពីបរទេស ហើយរាជរដ្ឋាភិបាលតែងបានផ្តល់ការលើកទឹកចិត្ត ជួយសម្របសម្រួល ដើម្បីធានាលើទំនុកចិត្ត សម្រាប់អ្នកវិនិយោគទាំងឡាយដែលចូលមកវិនិយោគ នៅក្នុងប្រទេសកម្ពុជា។
ឯកឧត្តម ឧបនាយករដ្ឋមន្ត្រី សុខ អាន បានជំរាបជូនថាក្នុងពេលកន្លងមក ឯកឧត្តម បានជំរុញឲ្យមានកិច្ចព្រមព្រៀងរបស់ក្រុមហ៊ុនជប៉ុនធំៗ ឲ្យចូលមក និយោគនៅកម្ពុជា ឯកឧត្តម សូមគាំទ្រនិងស្វាគមន៏រាល់អ្នកវិនិយោគទាំងឡាយ ពិសេសអ្នកវិនិយោគជប៉ុនធំៗ សូមអញ្ជើញមកពិនិត្យអំពីលទ្ធភាពវិនិយោគលើវិស័យជាច្រើនទៀត ដោយឯកឧត្តមបានជំរាបជូនថា សព្វថ្ងៃច្បាប់វិនិយោគនៅកម្ពុជា មានភាពអនុគ្រោះខ្លាំងសម្រាប់អ្នកវិនិយោគ ដែលអាចទាញបានផលប្រយោជន៏យ៉ាងច្រើន ពីការរកស៊ីនៅកម្ពុជា។
តាមរយៈកិច្ចសន្ទនាគ្នានេះភាគីទាំងពីរ បានបង្ហាញពីជំហរវាងរដ្ឋាភិបាលប្រទេសទាំងពីរ ក្នុងការបន្ត បង្កើនកិច្ចសហប្រតិបត្តិការគ្នាឲ្យបានកាន់តែរឹងមាំថែមទៀតទាំងវិស័យការទូត និងសេដ្ឋកិច្ចដើម្បីផលប្រយោជន៏សម្រាប់ប្រជាជនប្រទេសទាំងពីរ។
គួរបញ្ជាក់ថាកាលពី២៥ឆ្នាំមុន ឯកឧត្តម Masaharu Kohno និងឯកឧត្តមបណ្ឌិតសភាចារ្យ សុខ អាន ធ្លាប់មានទំនាក់ទំនងគ្នាយ៉ាងល្អទាំងកិច្ចការទូត និងការសម្របសម្រួលនានាទាក់ទងនិងការស្វែងរក សន្តិភាពសម្រាប់កម្ពុជា ដែលកាលនោះ ឯកឧត្តម Masaharu Kohno បានដើរតួនាទីយ៉ាងសំខាន់ ក្នុងការជួយជ្រោមជ្រែង ស្វែងរកដំណោះស្រាយសន្តិភាពជូនកម្ពុជា រហូតសម្រេចបាននូវកិច្ចព្រមព្រៀង ក្រុងប៉ារីសនាឆ្នាំ១៩៩១។
តាមរយៈនៃកិច្ចព្រមព្រៀងសន្តិភាពក្រុងប៉ារីសឆ្នាំ១៩៩១នោះហើយ ដែលធ្វើឲ្យរាជរដ្ឋាភិបាលកម្ពុជាបានបន្តការដឹកនាំរដ្ឋបាលតែមួយដើម្បីសម្របសម្រួល និងការធានាបាននូវការបង្រួមបង្រួមជាតិ សន្តិភាព និងស្ថេរភាពនយោបាយ សម្រាប់ការអភិវឌ្ឍន៏ប្រទេសកម្ពុជា។
សូមបញ្ចាក់ថា បន្ទាប់ពីបានរំលាយចោលអង្គការចាត់តាំងនយោបាយ នៃរបបកម្ពុជាប្រជាធិបតេយ្យ ខ្មែរក្រហម ដោយនយោបាយឈ្នះឈ្នះរបស់សម្តេចតេជោ ហ៊ុន សែន នាឆ្នាំ១៩៩៨ កម្ពុជាទទួល បានសន្តិភាពទាំងស្រុង ហើយតាមរយៈនៃសន្តិភាពនេះហើយ បានផ្តល់ឱកាសឲ្យកម្ពុជាធ្វើការ អភិវឌ្ឍន៏ប្រទេសជាតិខ្លួនមានការរីកចំរើនដល់សព្វថ្ងៃនេះ៕
អត្ថបទ៖ តារា
