ពិធីជប់​លៀង​ថ្ងៃត្រង់​ជូន​ថ្នាក់​​ដឹក​​នាំ​ នឹង​គណៈ​ប្រតិភូ នៃបណ្តា​ប្រទេស នានាលើ​សកល លោក ដែល​​បាន​អញ្ជើញ​ចូលរួមខួប​លើកទី៥០ នៃទិវាបុណ្យ​ឯករាជ្យ​ជាតិសឹង្ហបុរី

  នៅវេលាថ្ងៃត្រង់ថ្ងៃទី៩ ខែសីហា ឆ្នាំ​២០១៥ ឯកឧត្តម តូនី តាន់ កេងយាំង ប្រធានាធិបតី នៃ សាធារណរដ្ឋសឹង្ហបុរី  បានប្រារព្ធពិធីលាងសាយភោជន៍អាហារថ្ងៃត្រង់ ជូនដល់ប្រមុខរដ្ឋ ប្រមុខរដ្ឋាភិបាល និង​គណៈប្រតិភូនៃ​បណ្តាប្រទេសនានាលើសកលលោក ដែលបានអញ្ជើញ​ចូលរួមខួបលើកទី៥០ នៃទិវាបុណ្យ​ឯករាជ្យ​ជាតិ​សឹង្ហបុរី។
នៅក្នុងពិធីផ្លូវការដែលរៀប​ចំ​ឡើងនៅវិមានអីស្តានណា(Istana) បណ្តាប្រមុខរដ្ឋ ប្រមុខ​រដ្ឋាភិ​បាល និងគណៈប្រតិភូនៃបណ្តាប្រទេសនានាលើសកលលោក ត្រូវបានស្វាគមន៍យ៉ាងស្និត​ស្នាលរ៉ាក់ទាក់​បំផុត ពីឯកឧត្តម តូនី តាន់ កេងយាំង ប្រធានាធិបតីនៃសាធារណរដ្ឋសឹង្ហបុរី។ ថ្លែងក្នុងពិធី​លាងសាយ​ភោជន៍ជាមហាកិត្តិយសនោះ ឯកឧត្តម តូនី តាន់ កេងយាំង ប្រធានា​ធិ​ប​តីនៃសាធារណរដ្ឋសឹង្ហបុរី មាន​ប្រ​សាសន៍ថ្លែងនូវការស្វាគមន៍យ៉ាងកក់ក្តៅបំផុត ថ្វាយ​និងជូនចំពោះ ព្រះករុណាស៊ុលតង់ សម្តេច ឯក​ឧត្តម លោកជំទាវ ប្រមុខរដ្ឋ ប្រមុខរដ្ឋាភិបាល និងគណៈប្រតិភូនៃបណ្តាប្រ ទេសនានាលើសកលលោក ដែល​បាន​ចំណាយនូវ​ពេល​វេលា​ដ៏មានតម្លៃបំផុត ស្តេចយាងនិងអញ្ជើញមក ចូលរួមពិធីបុណ្យខួបលើកទី៥០ នៃទិវាឯករាជ្យ​ជាតិរបស់សាធារណរដ្ឋសឹង្ហបុរី នៅលើទឹកដីនៃសាធារណ​រដ្ឋសឹង្ហបុរីដ៏ស្រស់បំព្រងនេះ។
ឯក​ឧត្តមប្រធានាធិបតីមានប្រសាសន៍បន្តថា ប្រជាជនសឹង្ហបុរីមានសេចក្តី សោមនស្ស​រីករាយ​ជាអនេក ក្នុង​ការធ្វើបដិសណ្ឋារកិច្ចយ៉ាងកក់ក្តៅបំផុត ថ្វាយនិងជូនចំពោះបណ្តាប្រមុខរដ្ឋ ប្រមុខរដ្ឋាភិបាល និងគណៈ​ប្រតិភូទាំងអស់ ដែលបានយាងនិងអញ្ជើញ​មកចូលរួមក្នុង​ពិធី​បុណ្យខួប លើកទី៥០ នៃទិវាឯករាជ្យជាតិ​របស់សាធារណរដ្ឋសឹង្ហបុរី ដែលនេះបានបង្ហាញ​ឲ្យ​ឃើញពីព្រះទ័យ​និង​ការ​យកចិត្តទុក​ ដាក់ដ៏ខ្ពង់ខ្ពស់បំផុត ពីសំណាក់ថ្នាក់ដឹកនាំទាំងអស់ ចំ​ពោះ​​បុព្វហេតុឯករាជ្យភាព និងការអភិ វឌ្ឍប្រទេសសឹង្ហបុរី​ក្នុងរយៈពេល​៥០ឆ្នាំកន្លង​ទៅ​នេះ។

សូមបញ្ជាក់ដែរថា នៅវេលាម៉ោង១៧ល្ងាច ថ្ងៃ​ដដែល​នោះ ពិធីព្យុះហាក់យាត្រាដើម្បី ប្រារព្ធ​ខួប​លើក​ទី៥០ នៃទិវាបុណ្យឯករាជ្យជាតិ របស់សាធារណរដ្ឋសឹង្ហបុរី និងប្រារព្ធធ្វើ​ឡើង​នៅវិមានជាតិ របស់​សឹង្ហបុរី៕