ឯកឧត្តម Chui Sai On ប្រធានប្រតិបត្តិរដ្ឋបាលពិសេសម៉ាកាវ មានប្រសាសន៍ថា បើទោះបីជាប្រទេសយើងទាំងពីរកម្ពុជា-ចិន បានភ្ជាប់ទំនាក់ទំនងការទូតជាមួយគ្នា ចាប់តាំងពីឆ្នាំ១៩៥៨ក៏ពិតមែន ប៉ុន្តែតំបន់ពិសេសម៉ាកាវ ពុំដែលបានទទួលថ្នាក់ដឹកនាំរាជរដ្ឋាភិបាលនៃប្រទេសកម្ពុជា អញ្ជើញមកបំពេញទស្សនកិច្ច នៅតំបន់ពិសេសម៉ាកាវនោះទេ ទើបតែពេលនេះមានតែ សម្តេចតេជោនាយករដ្ឋមន្រ្តី និងសម្តេចកិត្តិព្រឹទ្ធបណ្ឌិត អញ្ជើញមកតំបន់ពិសេសម៉ាកាវ។ ឯកឧត្តមប្រធានមានប្រសាសន៍បន្តថា តាមរយៈដំណើរទស្សនកិច្ចរបស់ សម្តេចតេជោ មកកាន់តំបន់ពិសេសម៉ាកាវនៅពេលនេះ នឹងបន្តជំរុញទំនាក់ទំនងកិច្ចសហប្រតិបត្តិការរវាងកម្ពុជា-ម៉ាកាវ ក៏ដូចជាកម្ពុជា-ចិន ឲ្យកាន់តែរឹងមាំទ្វេឡើងមួយកំរិតថ្មីថែមទៀត ពិសេសលើទំនាក់ទំនងក្នុងវិស័យសេដ្ឋកិច្ច ពាណិជ្ជកម្ម ទេសចរណ៍ និងវប្បធម៌ នៃប្រទេសនិងតំបន់ទាំងពីរ។
ជាការឆ្លើយតប សម្តេចតេជោនាយករដ្ឋមន្រ្តី មានប្រសាសន៍ថា ថ្វីត្បិតតែពេលនេះគឺជាដំណើរទស្សនកិច្ច លើកទី១ក៏ពិតមែន ប៉ុន្តែកាលពីឆ្នាំ១៩៩៦ សម្តេច ធ្លាប់បានអញ្ជើញទៅធ្វើទស្សនកិច្ច និងស្នាក់នៅក្នុងតំបន់សេដ្ឋកិច្ចពិសេស ជួហាយ ដែលនៅមិនឆ្ងាយពីម៉ាកាវ ហើយដែលនៅពេលនោះ ម៉ាកាវមិនទាន់បានវិលត្រឡប់មកស្ថិតក្រោមការគ្រប់គ្រង របស់រដ្ឋាភិបាលទីក្រុងប៉េកាំងនៅឡើយទេ។ សម្តេចតេជោ បន្តថា ឥឡូវនេះតំបន់ពិសេសម៉ាកាវបានវិលត្រឡប់មកកាន់ប្រទេសចិនវិញ ដូចនេះទំនាក់ទំនងរវាងកម្ពុជា និងម៉ាកាវ នឹងឈានទៅកាន់ការពង្រឹងទំនាក់ទំនងនៃប្រទេសកម្ពុជា និងម៉ាកាវ ឲ្យឈានដល់ចំណុចកំពូលថ្មីមួយទៀតជាមួយគ្នា។ សម្តេចតេជោនាយករដ្ឋមន្រ្តី មានប្រសាសន៍បន្តថា កម្ពុជាចង់ឃើញទំនាក់ទំនង រវាងកម្ពុជា និងម៉ាកាវកាន់តែរីកធំធាត់ ពិសេសការអនុវត្តនូវចក្ខុវិស័យ ផ្លូវសូត្រសមុទ្រ ដែលជាគំនិតផ្តួចផ្តើម របស់ឯកឧត្តម ស៊ី ជិនពីង ប្រធានាធិបតីចិន ដែលពាក់ព័ន្ធរវាងកម្ពុជា-ម៉ាកាវ និងរវាងកម្ពុជា ជាមួយនិងប្រទេសចិន។
ក្នុងជំនួបពិភាក្សាគ្នានោះដែរ សម្តេចតេជោនាយករដ្ឋមន្រ្តី និងឯកឧត្តម Chui Sai On បានធ្វើការពិភាក្សាគ្នា យ៉ាងយកចិត្តទុកដាក់ ក្នុងការពង្រឹង និងពង្រីកលើកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម វិនិយោគ ទេសចរណ៍ និងវប្បធម៌ ពោលគឺធ្វើយ៉ាងណាឲ្យទំហំពាណិជ្ជកម្ម នៃប្រទេសទាំងពីរ កម្ពុជា-ចិន កើនដល់៥ពាន់លានដុល្លានៅឆ្នាំ២០១៧ ដែលក្នុងនោះម៉ាកាវគឺជាចំណែកដ៏ធំមួយ ក្នុងការចូលរួមចំណែកដល់ការជំរុញកំណើន នៃទំហំពាណិជ្ជកម្ម របស់ប្រទេសទាំងពីរ។ ក្នុងជំនួបពិភាក្សាគ្នានោះដែរ ថ្នាក់ដឹកនាំទាំងពីរក៏បានពិភាក្សារួមគ្នា ក្នុងជំរុញឲ្យមានការហោះហើរត្រង់ពីម៉ាកាវ ទៅកាន់រាជធានីភ្នំពេញ ខេត្តសៀមរាប ពិសេសការជួយទិញកសិផលអង្ករពីកម្ពុជា មកកាន់ទីផ្សារម៉ាកាវ៕
