នៅថ្ងៃថ្ងៃទី៣ ខែកក្កដា ឆ្នាំ២០១៥ បណ្តាមេដឹកនាំប្រមុខរដ្ឋ ប្រមុខរដ្ឋាភិបាល នៃប្រទេសមេគង្គ បានអញ្ជើញចូលរួមក្នុងពិធីទទួលទានអាហារការងារថ្ងៃត្រង់ជាមួយនឹង ឯកឧត្តម លោកជំទាវ សមាជិកសភានៃសមាគមសភាមេគង្គ‑ ជប៉ុន ដែលទើបនិងបង្កើតឡើងថ្មី។
ក្នុងពិធីទទួលទានអាហារងារថ្ងៃត្រង់នេះ ប្រធានសមាគមសភាមេគង្គ‑ជប៉ុន មានប្រសាសន៍ទៅកាន់មេដឹកនាំនៃប្រទេសមេគង្គថា មកដល់ពេលនេះសមាគមសភាមេគង្គ‑ ជប៉ុន ទើបតែបង្កើតឡើងដែលមានសមាជិកសភាចំនួន៥០រូប និងជាទិសដៅសមាគមនេះនឹងពង្រីកសមាជិករបស់ខ្លួនពីចំនួន១០០នាក់រហូតដល់២០០នាក់។
លោកប្រធានសមាគមមានប្រសាសន៍បន្តថា សមាគមនេះ ត្រូវបានបង្កើតឡើងក្នុងឱកាសនៃកិច្ចប្រជុំកំពូលមេគង្គ‑ជប៉ុន លើកទី៧នេះ និងមានមូលហេតុចំបងនៃការបង្កើតសមាគមនេះឡើង គឺដោយសារតែតំបន់មេគង្គទាំងមូលមានកំណើនខ្លាំង និងដោយសារបណ្តាប្រទេសនៅក្នុងតំបន់មេគង្គនេះ មានទំនាក់ទំនងល្អជាមួយប្រទេសជប៉ុន ហើយ ជប៉ុនក៏ចង់មានទំនាក់ទំនងល្អជាមួយនិងប្រទេសមេគង្គផងដែរ ។ ក្នុងន័យនេះ លោកប្រធានមានប្រសាសន៍ ដោយសេចក្តីសង្ឃឹមថា ការបង្កើតនូវសមាគមនេះឡើងនឹងពង្រឹងមិត្តភាព ពង្រីកកិច្ចសហការរវាងប្រទេសជប៉ុន ជាមួយនិងបណ្តាប្រទេសមេគង្គ។
ដោយឡែកនៅក្នុងបទអន្តរាគមន៍របស់ថ្នាក់ដឹកនាំជប៉ុន ដែលជាតំណាងរាស្រ្តមកពីគណបក្សប្រជាជិបតេយ្យសេរី បានស្នើដល់បណ្តាប្រទេសមេគង្គ គាំទ្រក្នុងការកំណត់យកថ្ងៃទី៥ ខែវិច្ឆិកា ដែលជាថ្ងៃដែលពិភពលោកទទួលស្គាល់នូវរលកយក្សស៊ូណាមី។ ជាមួយគ្នានេះឯកឧត្តមអ្នកតំណាងបានផ្តល់នូវសេចក្តីសង្ឃឹមថា អ្នកតំណាងរាស្រ្តរបស់ជប៉ុន នឹងចូលរួមចំណែកដោះស្រាយបញ្ហាដែលកើតមានឡើងនៅក្នុងតំបន់មេគង្គ ពិសេស គឺនៅពេលមានតំរូវការយើងនឹងក្លាយទៅ ជាមិត្តពិតប្រាកដ។
ក្នុងជំនួបពិភាក្សានោះដែរ មេដឹកនាំនៃប្រទេសមេគង្គ ក្នុងនោះសម្តេចតេជោនាយករដ្ឋមន្រ្តី មានប្រសាសន៍ថា ប្រជាពលរដ្ឋរស់នៅតាមដងទន្លេមេគង្គទទួលទានទឹក ពីប្រភពតែមួយ គឺទឹកទន្លេមេគង្គ។ សម្តេចតេជោបន្តថា ការជួបគ្នានៅថ្ងៃនេះគឺជាព្រឹត្តិការប្រវត្តិសាស្រ្តថ្មីមួយទៀត សម្រាប់ស្ថាប័ន និតិបញ្ញាត្តិ និងស្ថាប័ននិតិប្រតិបត្តិអាចប្រាស្រ័យទាក់ទងគ្នាយ៉ាងជិតស្និត ហើយការបង្កើតនូវសមាគមនេះឡើង គឺឆ្លុះបញ្ចាំងពីការប្តេជ្ញាចិត្តក្នុងការគាំទ្រគ្នាទៅវិញទៅមក។ ដូចគ្នានឹងបណ្តាមេដឹកនាំកម្ពុជា មេដឹកនាំនៃប្រទេសឡាវ មីយ៉ាន់ម៉ារ ថៃ និងវៀតណាម ក៏បានធ្វើការសុន្ទរកថាពីការទទួលស្វាគមន៍ចំពោះគំនិតនៃការបង្កើតសមាគមសភាមេគង្គ ជប៉ុន នេះឡើង ដែលនឹងរួមចំណែកយ៉ាងសំខាន់ ក្នុងការពង្រឹង ទំនាក់ទំនងកិច្ចសហប្រតិបត្តិការលើគ្រប់ផ្នែកទាំងអស់ នៃប្រទេសមេគង្គ ជាមួយនិងប្រទេសជប៉ុន ពិសេស ការផ្លាស់ប្តូរបទពិសោធន៍ពីគ្នាទីវិញទៅមក ជុំវិញស្ថាប័នសភានៃប្រទេសមេគង្គ ជាមួយនិងប្រទេសជប៉ុន។
បន្ទាប់មកនៅវេលាថ្ងៃត្រង់នោះដែរ បណ្តាមេដឹកនាំនៃប្រទេសមេគង្គទាំងប្រាំ គឺព្រះរាជាណាចក្រកម្ពុជា សាធារណរដ្ឋប្រជាធិបតេយ្យប្រជាមានិតឡាវ សាធារណរដ្ឋសហភាពមីយ៉ាន់ម៉ារ រាជាណាចក្រថៃ និងសាធារណរដ្ឋសង្គមនិយមវៀតណាម បានអញ្ជើញចូលរួមក្នុងពិធីបើកវេទិកាសេដ្ឋកិច្ច ដែលរៀបចំដោយក្រសួងសេដ្ឋកិច្ច ពាណិជ្ជកម្ម និងឧស្សាហកម្មជប៉ុន មជ្ឈមណ្ឌលអាស៊ាន-ជប៉ុន វិទ្យាស្ថានស្រាវជ្រាវសេដ្ឋកិច្ច និងអាស៊ីខាងកើត និងអង្គការពាណិជ្ជកម្មក្រៅប្រទេសជប៉ុន (JETRO)។
ក្នុងវេទិកាដ៏មាន សារៈសំខាន់នោះ មេដឹកនាំនៃប្រទេសជប៉ុន បានគូសបញ្ជាក់ពីគោលបំណងនិងតួនាទីស្នូលនៃការអភិវឌ្ឍក្នុងតំបន់ទន្លេមេគង្គ ។ តាមរយៈនេះជប៉ុនបានចាត់ទុកបណ្តាប្រទេសទន្លេមេគង្គ គឺជាគ្រូសារតែមួយ តាមរយៈ នេះយើងនិងខិតខំប្រឹងប្រែងក្នុងការតភ្ជាប់នៃប្រទេសមេគង្គ ជាមួយនិងប្រទេសជប៉ុន។ ក្នុងវេទិកានោះដែរ មេដឹកនាំជប៉ុន បានចាត់ទុកថាតំបន់មេគង្គគឺជាតំបនមួយដែលមានសក្តានុពលខ្ពស់ ពិសេសទៅទៀតនោះ តំបន់មេគង្គគឺជាតំបន់ដែលមានសក្តានុពលខ្ពស់បំផុត ក្នុងផលិតដ៏សំខាន់របស់ពិភពលោក។ តាមរយៈវេទិកានោះដែរ បណ្តាមេដឹកនាំសេដ្ឋកិច្ចជប៉ុន បានគូសបញ្ជាក់ដែរថា ជប៉ុននិងខិតខំប្រឹងប្រែងក្នុងការបណ្តាទុន នៅក្នុងបណ្តាប្រទេសមេគង្គបន្ថែមទៀត។
ដោយសារតែវេទិកានេះ គឺជាវេទិកាសេដ្ឋកិច្ចលើកដំបូង មេដឹកនាំនៃប្រទេសមេគង្គ និងអ្នកសេដ្ឋកិច្ចរបស់ជប៉ុន បានចាត់ទុកថា គឺជាវេទិកាដ៏មានសារៈសំខាន់ ដែលតាមរយៈនេះ មេដឹកនាំទាំងអស់ បានធ្វើសុន្ទរកថាគន្លឹៈពីសក្តានុពលនៃប្រទេសរៀងៗខ្លួន ក្នុងការទាក់ទាញអ្នកវិនិយោគជប៉ុនរបស់ជប៉ុន ទៅបណ្តាទុនក្នុងប្រទេសមេគង្គ។
បន្ទាប់ពីសុន្ទរកថារបស់សម្តេចតេជោនាយករដ្ឋមន្រ្តី ឯកឧត្តមនាយករដ្ឋមន្រ្តីឡាវ ថងស៊ីន ថាំម៉ាវង្ស ឯកឧត្តមប្រធានាធិបតីនៃសាធារណរដ្ឋសហភាពមីយ៉ាន់ម៉ារ ថេន សេន ឯកឧត្តមឧត្តមសេនីយ៍នាយករដ្ឋមន្រ្តីថៃ ប្រាយុទ្ធ ចាន់អូចារ និងឯកឧត្តមនាយករដ្ឋមន្រ្តីវៀតណាម ង្វៀន តាន់យ៉ុង បានធ្វើសុន្ទរកថាគន្លឹៈ ក្នុងវេទិកាដ៏មានសារៈសំខាន់នោះ ដើម្បីធ្វើការទាក់ទាញអ្នកវិនិយោគទុនជប៉ុន ទៅបណ្តាក់ទុនក្នុងប្រទេស រៀងៗខ្លួន៕
