Cambodia News

Thursday, July 3, 2014

សេចក្តីសម្រេច លេខ១៤៨/០០២/២០១៤ កបធ.ច ចុះថ្ងៃទី០២ ខែកក្កដា ឆ្នាំ២០១៤ របស់ក្រុមប្រឹក្សាធម្មធុញ្ញ

សេចក្តីសម្រេច ក្រុមប្រឹក្សាធម្មធុញ្ញ ច្បាប់ស្តីពីលក្ខន្តិកនៃចៅក្រម និងព្រះរាជអាជ្ញា ដែលរដ្ឋសភាបានអនុម័ត កាលពីថ្ងៃទី២៣ ឧសភា ២០១៤

Tuesday, July 1, 2014

មេចលនាក្រុមអាវលឿងថៃ ដែលអុកឡុកតំបន់ព្រំដែនប្រាសាទព្រះវិហារត្រូវបានដោះលែងចេញពីពន្ធនាគារ

ទណ្ឌិត វីរ៉ាក់ ស៊ូមខ្វាមឃីត

លោកវីរៈ ស៊ុមខ្វាមឃីត មេចលនាដឹកនាំក្រុមអាវលឿងថៃ ដែលបានជាប់ពន្ធនាគារក្នុងប្រទេសកម្ពុជាអស់រយៈពេលប្រមាណ៣ឆ្នាំមកនោះ ពីបទ លបចូលក្នុងទឹកដីប្រទេសកម្ពុជាខុសច្បាប់ និង ចូលក្នុងទីលានយោធាកម្ពុជា ក្នុងបំណងទុច្ចរិត និងបទប្រមូលផ្ដុំព័ត៌មានសម្ងាត់ ប៉ះពាល់ដល់សន្តិសុខជាតិកម្ពុជា នៅរសៀលថ្ងៃទី១ ខែកក្កដា ឆ្នាំ២០១៤នេះ ត្រូវបានដោះលែងអោយមានសេរីភាពវិញហើយ នេះបើតាមការបញ្ជាក់របស់លោកគុយ ប៊ុនសន អគ្គនាយកពន្ធនាគារ នៃក្រសួងមហាផ្ទៃ។

បើតាមលោក អ៊ាង សុផល្លែត ជំនួយការរបស់សម្តេចតេជោនាយករដ្ឋមន្រ្តី បានអោយដឹងថា « ការដោះលែងឲ្យ វីរៈ ស៊ុមខ្វាមឃីត អោយមានសេរីភាពនេះ គឺជាថ្នូរនឹងការដោះលែងពលករខ្មែរ ១៤នាក់ ដែលត្រូវបានអាជ្ញាធរយោធាថៃចាប់ឃាត់ខ្លួន ក្រោមបទចោទប្រកាន់ក្លែងបន្លំឯកសារ ពេលថៃចាប់បញ្ជូនមកកម្ពុជាកាលពីដើមខែមិថុនាកន្លងទៅ។

ការសម្រេចដោះលែងទណ្ឌិត វីរៈ ស៊ុមខ្វាមឃីត បានកើតមានឡើង នៅក្នុងជំនួបរវាងសម្តេចតេជោហ៊ុន សែន និងរដ្ឋមន្រ្តីក្រសួងការបរទេស ស្តីទី របស់ថៃ លោក Sihasak Phuangketkeow និងជា តំណាងមេបញ្ជាការកងទ័ពជើងគោកថៃ ប្រាយុទ្ធ ចាន់អូឆា នាវិមានសន្តិភាព ល្ងាចថ្ងៃទី០១ ខែកក្កដា ឆ្នាំ២០១៤ នេះ ។

លោក អ៊ាង សុផល្លែត បានថ្លែងប្រាប់ក្រុមអ្នកព័ត៌មាន នៅក្រោយជំនួបរបស់ សម្តេចតេជោ និងរដ្ឋមន្រ្តីក្រសួងការបរទេសថៃថា សម្តេចតេជោ ហ៊ុន សែន បានសម្រេចឲ្យ វីរៈ ស៊ុម ខ្វាមឃីត មានសេរីភាពឡើងវិញ បន្ទាប់ពីការស្នើសុំរបស់រដ្ឋមន្ត្រីក្រសួងបរទេសថៃ ក៏ដូចរដ្ឋាភិបាលយោធាថៃផងដែរ។ លោក អ៊ាង សុផល្លែត ក៏បានថ្លែងឲ្យដឹងផងដែរថា ទណ្ឌិត វីរៈ ស៊ុមខ្វាមឃីត នឹងធ្វើដំណើរត្រឡប់ទៅប្រទេសថៃវិញ នៅថ្ងៃទី០២ ខែកក្កដា ស្អែកនេះ ជាមួយនឹងគណៈប្រតិភូរបស់ថៃ ។

លោក គុយ ប៊ុនសន អគ្គនាយកពន្ធនាគារ ក្រសួងមហាផ្ទៃ បានថ្លែងឲ្យដឹងថា លោក វីរះស៊ុមខ្វាមឃីត ត្រូវបានដោះលែង ចេញពីពន្ធនាគារ នៅម៉ោងជិត៦ល្ងាចថ្ងៃទី១ ខែកក្កដា ឆ្នាំ២០១៤នេះ ។ លោក គុយ ប៊ុនសន បានបន្តទៀតថា នៅពេលចេញពីពន្ធនាគារនោះ មានមន្រ្តីស្ថានទួតថៃ មួយចំនួនទៅទទួល។

សូមរំលឹកថា សាលាដំបូងរាជធានីភ្នំពេញ កាលពីថ្ងៃទី០១ ខែកុម្ភៈ ឆ្នាំ២០១១ បានសម្រេចផ្តន្ទា ទោស លោក វីរៈ ស៊ុមខ្វាមឃីត (Veera Somkwamkid) ឲ្យជាប់ពន្ធនាគារ រយៈពេល ៨ឆ្នាំ និងផាក ពិន័យចំនួន ១,៨លានរៀល ចូលថវិការដ្ឋ ពីបទ លបចូលក្នុងទឹកដីប្រទេសកម្ពុជាខុសច្បាប់ និង ចូលក្នុងទីលានយោធាកម្ពុជា ក្នុងបំណងទុច្ចរិត និងបទប្រមូលផ្ដុំព័ត៌មានសម្ងាត់ ប៉ះពាល់ដល់សន្តិសុខជាតិ។ ក្នុងករណីនោះដែរ នាង រ៉ាទ្រី រតនាផៃប៊ូន ដែលជាអ្នករួមដំណើរជាមួយ លោក វីរ៉ាក់ ស៊ុមខ្វាមឃីត ក៏ជាប់ពន្ធនាគារផងដែរ ប៉ុន្តែ មួយរយៈក្រោយមកត្រូវបានដោះលែងវិញ ។

ការចាប់ខ្លួនក្រុមសកម្មជនអាវលឿងថៃ បានកើតមានឡើង កាលពីឆ្នាំ២០១១ ក្នុងអំឡុងគ្រាដែលប្រទេសកម្ពុជា កំពុងមានវិវាទជាមួយថៃ ក្នុងរឿង ជម្លោះព្រំដែន បង្កឡើងដោយការឈ្លានពានពីសំណាក់យោធាឈុតខ្មៅថៃ វ៉ៃលុកទន្រ្ទានរំលោភលើអធិបតេយ្យភាពរបស់កម្ពុជានៅតាមបណ្តាយព្រំដែន ជាពិសេសតំបន់ប្រាសាទព្រះវិហារ។ ខណៈ នោះ សមត្ថកិច្ចកម្ពុជា ក៏បានឃាត់ក្រុមសកម្មជនអាវលឿង និងសមាជិកសភាគណបក្សរបស់ អាប់ភីស៊ីត វេចាជីវ៉ាក់ មួយចំនួនទៀតផងដែរ តែភ្លាមៗជនទាំងអស់នោះ ត្រូវបានដោះលែងវិញអស់តាមសំណើរដ្ឋាភិបាលថៃ ដែលនៅសល់តែមេក្លោងធំជាងគេ គឺ វីរ៉ាក ស៊ុមខ្វាមឃីតនេះឯង ដែលជាប់ពន្ធនាគាររហូតមកដល់ពេលនេះមានរយៈពេលជាង៣ឆ្នាំមកហើយ។

ការធ្វើលិខិតឆ្លងដែនសម្រាប់ពលករទៅធ្វើការនៅប្រទេសថៃ គឺមិនយកលុយឡើយ និងក្រុមហ៊ុនដែលនាំពលករ ជួយបង់តម្លៃធ្វើប័ណ្ណ ១០ ដុល្លារជំនួសពលករថែមទៀត

នេះ ជាដំណឹងដ៏មានសារៈសំខាន់បំផុតសម្រាប់ពលករខ្មែរដែលនឹងត្រូវទៅធ្វើការស្របច្បាប់នៅប្រទេសថៃ គឺការធ្វើលិខិតឆ្លងដែន ដែលថា នឹងតម្រូវអោយបង់ប្រាក់៤ដុល្លារ ថ្លៃថតរូបនោះ នៅពេលនេះពលករមិនចាំបាច់ចំណាយប្រាក់៤ដុល្លារនោះឡើយ ពីព្រោះខាងភាគីក្រុមហ៊ុននឹងចេញប្រាក់អោយជំនួស នេះបើយោងតាមសេចក្តីជូនដំណឹងរបស់ក្រសួងការងារ និងបណ្តុះបណ្តាលវិជ្ជាជីវៈ ចេញផ្សាយរសៀលថ្ងៃទី១ ខែកក្កដា ឆ្នាំ២០១៤នេះ។

ការសម្រេចមិនយកកម្រៃថ្លៃធ្វើលិខិតឆ្លងដែនសម្រាប់ពលករខ្មែរ បានធ្វើឡើងបន្ទាប់ពីមានកិច្ចប្រជុំមួយកាលពីថ្ងៃទី៣០ ខែមិថុនា ឆ្នាំ២០១៤ រវាងក្រសួងការងារ និងបណ្តុះបណ្តាលវិជ្ជាជីវៈ ជាមួយនឹងក្រុមហ៊ុនជ្រើសរើស ពលករឯកជន ដើម្បីកាត់បន្ថយចំណាយរបស់ពលករ ដែលរៀបចំបែបបទទៅធ្វើការស្របច្បាប់នៅប្រទេសថៃ។

កិច្ចប្រជុំបានឯកភាពគ្នាថា ក្រុមហ៊ុនត្រូវទទួលបន្ទុកចំណាយជំនួសពលករ ដូចជា តម្លៃថតរូបសម្រាប់ធ្វើលិខិតឆ្លងដែនចំនួន៤ដុល្លារអាមេរិក ក្រុមហ៊ុនត្រូវបង់ដោយផ្ទាល់ទៅអោយក្រុមក្រសួងមហាផ្ទៃ ។ ចំពោះ តម្លៃប័ណ្ណពលករកម្ពុជាទៅធ្វើការនៅបរទេស ចំនួន១០ ដុល្លារអាមេរិក ក្រុមហ៊ុនត្រូវបង់ដោយផ្ទាល់ហ៊ុនមួយមានឈ្មោះថា ហាយ សីលូសិន ហូលឌីង។

ដោយឡែកពលករត្រូវទទួលបន្ទុកក្នុងការបង់តម្លៃទិដ្ឋការការងារចំនួន២០ដុល្លារអាមេរិក ឱ្យទៅស្ថានទូតថៃប្រចាំកម្ពុជាដោយផ្ទាល់ ដើម្បីបានសិទ្ធិស្របច្បាប់ក្នុងការធ្វើការងារនៅប្រទេសថៃ។

Monday, June 30, 2014

គណៈប្រឹក្សាការងារ ប្រាប់ពីលទ្ធផលនៃកិច្ចប្រជុំ ស្តីពីការកំណត់ប្រាក់ឈ្នួលថ្មី

នៅព្រឹកថ្ងៃទី ៣០ ខែមិថុនា ឆ្នាំ២០១៤នេះ ក្រសួងការនិងបណ្តុះបណ្តាលវិជ្ជាជីវៈ បានចេញសេចក្តីថ្លែងការណ៍មួយ ស្តីពី លទ្ធផលនៃកិច្ចប្រជមរបស់គណៈប្រឹក្សាការងារអាណ្តិទី៨ លើកទី៩ រវាងរដ្ឋមន្ត្រីក្រសួងការងារ ឯកឧត្តម អ៊ិត សំហេង ជាមួយតំណាងថៅកែរោងចក្រ រួមនិងតំណាងសហជីព ដែលជាលទ្ធផល បានឱ្យដឹងតាមរយៈការពិភាក្សាគ្នាលើការងារដូចខាងក្រោមៈ

១-បានបោះឆ្នោតសម្រេចអនុវត្តប្រាក់ឈ្នួលថ្មីនៅ ខែមករា ឆ្នាំ២០១៥

២-ដំណើរការបន្ត គឺគិតពីខែកក្កដា : ចាប់ផ្តើមស្រាវជ្រាវការតម្លើង ។

ក្នុងនោះ សហជីពសមាជិកLAC សម្របសម្រួលជាមួយសហព័ន្ឋសហជីពទាំងអស់ អោយមានគោលការណ៏រួម ឯភាគីនិយោជកក៏ធ្វើដូចសហជីពដែរ។ លេខាធិការដ្ឋាន LAC សម្របសម្រួលជាមួយសហជីព និងក្រសួងទាំង១៤សមាជិកជាLAC ។

នៅខែសីហា : -ភាគីសហជីពនិងនិយោជកជួបពិភាក្សាទ្វេរភាគី។

ខែកញ្ញា : -នឹងជួបពិភាក្សាត្រីភាគី

ខែតុលា : -ប្រជុំត្រីភាគីសម្រេចតម្លើងប្រាក់ឈ្នួល។

៣-ការអនុវត្តប្រាក់ឈ្នួលថ្មី
• ថ្ងៃទី១ ខែមករា ឆ្នាំ២០១៥ នឹងអនុវត្តប្រាក់ឈ្នួលថ្មី ។

សូមអានខ្លឹមសារនៃសេចក្តីថ្លែងការណ៍ទាំងស្រុង ដូចខាងក្រោមនេះ៖

The views expressed support of Laos to Vietnam in the South China Sea dispute

Friday, June 27, 2014

សាលាដំបូងរាជធានីភ្នំពេញ កោះហៅលោក សួន សេរីរដ្ឋា អោយចូលខ្លួន

លោក សួន សេរីរដ្ឋា ប្រធានចលនាអំណាចពលរដ្ឋខ្មែរ ដែលមានមូលដ្ឋាននៅសហរដ្ឋអាមេរិក និងជាជនដែលប្រឆាំងដាច់ខាតរបបរាជានិយមនៅកម្ពុជា ត្រូវបានសាលាដំបូងរាជធានីភ្នំពេញ កោះហៅអោយចូលខ្លួនបំភ្លឺ ពាក់ព័ន្ធនឹងសំណុំរឿងព្រហ្មទណ្ឌ។

យោងតាមដីកាកោះឱ្យចូលរួមសវនាការ ចេញដោយ លោក មាស ច័ន្ទពិសិដ្ឋ តំណាងអយ្យការអមសាលាដំបូងរាជធានីភ្នំពេញ ចុះថ្ងៃទី ១៧ ខែមិថុនា ឆ្នាំ២០១៤ បានបង្គាប់ឱ្យ លោក សួន សេរីរដ្ឋា អាយុ៤៤ឆ្នាំ ជាតិខ្មែរ ទីកន្លែងកំណើត នៅឃុំខ្នាចរមាស ស្រុកបវិល ខេត្ត បាត់ដំបង ឱ្យចូលទៅកាន់ សាលាដំបូងរាជធានីភ្នំពេញ សាលសវនាការទី២ នៅថ្ងៃទី៩ ខែកក្កដា ឆ្នាំ២០១៤ វេលាម៉ោង២រសៀល ដើម្បីឆ្លើយដោះសារពីការចោទប្រកាន់មកលើខ្លួន ជាប់ចោទពីបទ ញុះញង់ឱ្យប្រព្រឹត្តបទឧក្រិដ្ឋជាអាទិ៍ ប្រព្រឹត្តនៅរាជធានីភ្នំពេញ កាលពីថ្ងៃទី ១៤ ខែសីហា ឆ្នាំ២០១៣ បទល្មើសមានចែងឱ្យផ្តន្ទាទោសតាមមាត្រា ៤៩៥ នៃក្រមព្រហ្មទណ្ឌ។

ដីកាកោះ ក៏បានបញ្ជាក់ផងដែរថា សាម៉ីខ្លួនត្រូវចូលមកតាមដីកាកោះនេះឱ្យបានទាន់ពេលវេលា និងយកលិខិតផ្សេងៗ ទាក់ទងនឹងរឿងខាងលើមកជាមួយផងដែរ ប្រសិនបើមាន។

គួររំលឹកផងដែរថា លោក សួន សេរីរដ្ឋា ប្រធានអំណាចពលរដ្ឋខ្មែរ ធ្លាប់ត្រូវបានជាប់ពាក់ព័ន្ធក្នុងសកម្មភាពជាបទល្មើសនានា កាលពីពេលកន្លងមក ដែលគេសង្ស័យថា ពាក់ព័ន្ធនឹងចលនា CFF បង្កើតកម្លាំងប្រដាប់អាវុធ ដោយសហការជាមួយក្រុមប្រឆាំង ក្នុងការប៉ុនប៉ងទម្លាក់រាជរដ្ឋាភិបាលកម្ពុជា។ លោក សួន សេរីរដ្ឋា ក៏ធ្លាប់បានយកទឹកដីប្រទេសថៃ សហការជាក្រុមអាវលឿង ក្នុងការរិះគន់ ជេរប្រមាថមកលើរាជរដ្ឋាភិបាល ក្នុងពេលដែលរាជរដ្ឋាភិបាល កំពុងខំប្រឹងទប់ស្កាត់គ្រប់រូបភាពនៃការបំពានពីសំណាក់យោធាថៃ រំលោភទន្ទ្រានព្រំដែនខ្មែរ និងបាញ់បំផ្លាញប្រាសាទព្រះវិហារ កាលពីពេលកន្លងមក។ ម៉្យាងវិញទៀត សួន សេរីរដ្ឋា ក៏ជាជនជ្រុលនិយម១រូប ដែលជានិច្ចកាល តែងតែផ្តល់កិច្ចសម្ភាសន៍ និងបញ្ចេញមតិរិះគន់ ជេរប្រមាថយ៉ាងធ្ងន់ធ្ងរមកលើស្ថាប័នព្រះមហាក្សត្រ ជាពិសេស គឺរិះគន់ទៅលើ អតីតព្រះមហាក្សត្រកម្ពុជា សម្តេចព្រះនរោត្តម សីហនុ ព្រះបរមរតនកោដ្ឋ ដែលពលរដ្ឋកម្ពុជាគោរពស្រឡាញ់បំផុត។

បន្ទាប់ពីមានដីកាកោះ ភ្លាមៗគេដឹងថា លោក សួន សេរីរដ្ឋា បានផ្ញើលិខិត១ច្បាប់ ចុះថ្ងៃទី ២៥ ខែមិថុនា ឆ្នាំ២០១៤ ដើម្បីសុំអន្តរាគមន៍ពីស្ថានទូតសហរដ្ឋអាមេរិក ក្នុងឋានៈគេជាខ្មែរសញ្ជាតិអាមេរិ កាំង១រូបដែរនោះ ដោយប្រាប់ដំណឹងថា លោកបានរកមេធាវី១រូប ដើម្បីការពារខ្លួន គឺលោកមេធាវី សុខ សំអឿន ក្នុងនោះលោក សួន សេរីរដ្ឋា ក៏បានជម្រាបជូនទូតអាមេរិកលើបញ្ហាមួយចំនួនផងដែរ ក្នុងនោះ លោកបញ្ជាក់ថា លោកមិនបានពាក់ព័ន្ធនឹងអំពើភេរវកម្មណាមួយឡើយ ហើយលោកនឹងនាំយកឯកសារនានាដើម្បីចូលទៅតុលាការ តាមកាលបរិច្ឆេទ នាថ្ងៃទី ៩ ខែកក្កដា ឆ្នាំ២០១៤ ។

គេនៅមិនទាន់ដឹងថា តើការប្រកាសរបស់លោក សួនសេរីរដ្ឋា ថានឹងចូលខ្លួននៅចំពោះមុខសវនាការនោះ តើពិតជាលោកនឹងបង្ហាញវត្តមានដែរ ឬក៏ប្រែក្រឡាស់យ៉ាងណាវិញនៅឡើយទេ៕
ខាងក្រោមនេះ ជាដីកាកោះអោយចូលបំភ្លឺ៖

By: Cambodia News

Thursday, June 26, 2014

សម្តេចតេជោ ហ៊ុន សែន សំនូមពរដល់មេដឹកនាំថៃ ត្រូវធ្វើសកម្មភាពប្រកបដោយមនុស្សធម៌ ចំពោះពលករខ្មែរ ដែលកំពុងធ្វើការនៅប្រទេសថៃ

នៅក្នុងឱកាសអញ្ជើញចូលរួមជាអធិបតីភាពទិវាប្រយុទ្ធប្រឆាំងគ្រឿងញៀន នាព្រឹកថ្ងៃទី២៦ ខែមិថុនា ឆ្នាំ២០១៤នេះ សម្ដេចតេជោ ហ៊ុន សែន នាយករដ្ឋមន្ដ្រីកម្ពុជា បានថ្លែងជុំវិញការបញ្ជូនពលករពីសំណាក់អាជ្ញាធរថៃ ដោយបញ្ជាក់ថា បញ្ហានេះកើតឡើងដោយសារតែរដ្ឋាភិបាល ថៃ ចង់ទប់ស្កាត់អំពើជួញដូរមនុស្សនិងតម្រូវឱ្យ ពលករធ្វើការដោយស្របច្បាប់ នៅក្នុងប្រទេសរបស់ខ្លួន ។
មានប្រសាសន៍ដូច្នេះ បន្ទាប់ពីសម្តេចតេជោ បានទទួលលិខិតឆ្លើយតបចំនួនពីរ ពីលោក ប្រាយុទ្ធ ច័ន្ទអូឆា មេដឹកនាំថៃបច្ចុប្បន្ន ដែលបានផ្ញើជូនសម្តេច បកស្រាយអំពី មូលហេតុនៃការបញ្ចូនពលករខ្មែរត្រឡប់មកកាន់ប្រទេសកម្ពុជាវិញ។

សម្ដេចតេជោ ហ៊ុន សែន បានមានប្រសាសន៍ថា ជុំវិញការចាប់បញ្ជូនពលករខ្មែរ មកកាន់ប្រទេសកម្ពុជាវិញនាពេលនេះ លោកប្រាយុទ្ធចាន់អូឆា បានផ្ញើលិខិតពីរច្បាប់មកសម្ដេចនាយករដ្ឋមន្ដ្រី ដោយគាត់សុំធានាជាថ្មី ចំពោះការបញ្ជូនពលករនេះ គឺថៃ មិនចង់ធ្វើ នោះឡើយ ប៉ុន្ដែជាការទប់ស្កាត់ការជួញដូរ មនុស្ស ការកេងកម្លាំងពលកម្ម និងតម្រូវឱ្យ ពលករទាំងអស់បម្រើការងារនៅប្រទេសថៃ ដោយស្របច្បាប់ ។

សម្តេចបានបន្តថា ចំពោះការលើកឡើងរបស់មេដឹកនាំថៃរូបនេះ សម្តេច បានយល់ព្រមនឹងលើកឡើងពីកិច្ចសហប្រតិបត្ដិការបន្ដទៀត ប៉ុន្ដែសម្ដេចក៏ស្នើឱ្យរដ្ឋាភិបាលថៃ ត្រូវធ្វើ សកម្មភាពប្រកបដោយមនុស្សធម៌ ចំពោះ ពលករខ្មែរ ដែលកំពុងបន្ដនៅធ្វើការនៅប្រទេសថៃ ទាំងស្របច្បាប់ និងខុសច្បាប់ ។

Wednesday, June 25, 2014

លោកស្រីមូរ សុខហួរ ត្រូវបានអ្នកកាសែតបរទេស២នាក់ព្រួតវ៉ៃ របួសយ៉ាងធ្ងន់ធ្ងរ

លោកស្រីមូរ សុខហួរ
តំណាងរាស្ត្រគណបក្សសង្គ្រោះជាតិ

លោកស្រី មូរ សុខហួរ ជួបគ្រោះម្តងទៀត ដោយរងនូវការស្តីបន្ទោសខ្លាំងៗពីអ្នកសារព័ត៌មាន រ៉យទ័រ លោកប្រាក់ ចន្ធុល បានរិះគន់ចំៗទៅលើទង្វើបោកប្រាស់សាធារណៈមតិ ដែលបង្កើតឡើងដោយគណបក្សសង្គ្រោះ ជាតិ ក្នុងនោះ លោកស្រីមូរ សុខហួរ មិនអាចមានហេតុផលជាក់លាក់ ច្បាស់លាស់ណាមួយ ដើម្បីការពារខ្លួនបានឡើយ។ មិនត្រឹមតែប៉ុណ្ណោះ លោកស្រីថែមទាំងត្រូវបាន អ្នកនិពន្ធឯករាជ្យ លោក Allen Myers ផ្តល់ដំបូន្មានជូនលោកស្រីសម្រាប់អោយលាងខួរក្បាល និងបញ្ឈប់ការភូតភរតទៅទៀត!

ខាងក្រោមនេះ ជាអត្ថបទទាំងស្រុងរបស់ លោក Allen Myers

មេដឹកនាំគណបក្សសង្រ្គោះជាតិ ចាំបាច់ត្រូវស្វែងយល់ពីការពិត

ដោយ៖ Allen Myers

ចុះផ្សាយនៅក្នុងសារព័ត៌មាន The Cambodia Daily នៅថ្ងៃទី១៧ ខែមិថុនា ឆ្នាំ២០១៤ អត្ថបទរបស់ លោកស្រី មូរ សុខហួរ ដែលជាអ្នកនយោបាយមួយរូបក្នុងគណបក្សសង្រ្គោះជាតិ បានជំទាស់យ៉ាងខ្លាំងទៅនឹងអត្ថបទរបស់លោក ប្រាក់ ចាន់ធុល ដែលបានចុះផ្សាយនៅគេហទំព័រ Reuters កាលពីថ្ងៃទី១១ ខែមិថុនា ឆ្នាំ២០១៤។

អត្ថបទរបស់លោក ប្រាក់ ចាន់ធុល មានខ្លឹមសារយ៉ាងនេះថា យុទ្ធនាការរបស់គណបក្សសង្រ្គោះជាតិ ដើម្បីធ្វើឲ្យក្រឡាប់ចាក់ការបោះឆ្នោតជ្រើសតាំងតំណាងរាស្ត្រ កាលពីខែកក្កដាឆ្នាំទៅមិញ ហាក់ដូចជាអស់ថាមពលទៅហើយ។ លោកស្រី មូរ សុខហួរ បានឆ្លើយតបថា៖ មិនមែនអញ្ចឹងទេ សូមក្រឡេកមើលតើហេតុអ្វីបានជាអ្វីៗវាប្រែប្រួល ដូចជាកម្មករកំពុងស្វះស្វែងរកប្រាក់ឈ្នួលខ្ពស់ជាងមុន «ហើយមានចលនាអ្នកមូលដ្ឋាន និងយុវជន ដើម្បីការផ្លាស់ប្តូរ» ប្រជាជនកំពុងប្រើប្រាស់ប្រព័ន្ធផ្សព្វផ្សាយសង្គម ព្រះសង្ឃកំពុងកសាងបណ្តាញដើម្បីថែរក្សាដែលគេឲ្យឈ្មោះថា ដើម្បីរក្សាតម្លៃព្រះពុទ្ធសាសនារបស់យើង។

លោកស្រី មូរ សុខហួរ ដូចមេដឹកនាំគណបក្សសង្រ្គោះជាតិមួយចំនួនទៀត ហាក់ដូចជាបានធ្លាក់ចូលក្នុងអន្ទាក់ខ្លួនឯង ដោយកំពុងជឿជាក់លើការឃោសនាបោកប្រាស់របស់ខ្លួន។

នៅក្នុងការបោះឆ្នោតឆ្នាំកន្លងទៅនេះ គណបក្សសង្រ្គោះជាតិ បានប្រើប្រាស់ពាក្យស្លោកយ៉ាងមមើមមាយដែលខ្លួនគិតឃើញនោះ គឺ «ដូរ-ដូរ-ដូរ» ដើម្បីឈ្នះសន្លឹកឆ្នោតពីប្រជាជនដែលយល់ខុសគ្នាអំពីពាក្យស្លោកនេះ ដែលពាក្យស្លោកនេះគ្មានអ្វីដែលជាមូលដ្ឋានច្បាស់លាស់។ ឥឡូវនេះ ពួកមេដឹកនាំទាំងនោះហាក់ដូចជាជឿជាក់លើខ្លួនឯងថា ប្រសិនបើអ្វីៗនៅក្នុងប្រទេសកម្ពុជាផ្លាស់ប្តូរ គណបក្សសង្រ្គោះជាតិគឺជាអ្នកដែលធ្វើឱ្យមានការផ្លាស់ប្តូរ និងជាអ្នកទទួលផលពីការផ្លាស់ប្តូរនោះ។

ក្នុងន័យនេះ មេដឹកនាំគណបក្សសង្រ្គោះជាតិត្រូវស្វែងយល់ឲ្យបានហ្មត់ចត់ជាទីបំផុត នូវអ្វីដែលជាការពិតនោះ។ សភាពការណ៍អ្វីៗប្រែប្រួលគ្រប់ពេលវេលា មិនថាឡើយពីកិច្ចខិតខំប្រឹងប្រែង ឬចេតនារបស់គណបក្សសង្រ្គោះជាតិនោះឡើយ។ ឧទាហរណ៍ដូចជា ទោះបីជាគ្មានក្រុមអ្នកនយោបាយញុះញង់ក៏ដោយ ក៏ពួកកម្មករគេនៅតែទាមទារប្រាក់ខែរបស់ពួកគេឲ្យបានកើនឡើង ព្រោះជីវភាពរបស់ពួកគេដែលខ្វះខាត។ ឧទាហរណ៍មួយទៀត ប្រជាជន ជាពិសេសយុវជន កំពុងតែរំភើបនឹងការប្រើប្រាស់បណ្តាញព័ត៌មានសង្គមជុំវិញពិភពលោក ដូច្នេះ គេមិនត្រូវការជំរុញការលើកទឹកចិត្តពីគណបក្សសង្រ្គោះជាតិ ដើម្បីចូលរួមលេង ហ្វេសប៊ុក (Facebook) ឬ ទ្វីតទើរ (Twitter) នោះទេ។ ព្រះសង្ឃខ្មែរ បាន និងកំពុងខិតខំថែរក្សាតម្លៃព្រះពុទ្ធសាសនារយៈពេលជាច្រើនសតវត្សរ៍មកហើយ ហើយនឹងប្រាកដជាបន្តធ្វើដូច្នេះទៅមុខទៀត ទោះជាលទ្ធផលនៃការបោះឆ្នោតនាពេលអនាគតយ៉ាងណាក៏ដោយ អញ្ចឹង «ដូរ-ដូរ-ដូរ» នេះ វាគ្មានន័យអ្វីទាំងអស់។

ខ្ញុំមិនដឹងថាតើ លោកស្រី មូរ សុខហួរ ដែលនិយាយថា «មូលដ្ឋានចលនាប្រជាជន និងយុវជន ដើម្បីការផ្លាស់ប្តូរ» មិនដឹងថា ជាសំអាងលើអ្វីនោះទេ។ ខ្ញុំសង្ឃឹមថា គាត់មិនបាននិយាយសំដៅទៅលើអ្នកគាំទ្រគណបក្សសង្រ្គោះជាតិ កាលពីសម័យបាតុកម្មពីឆ្នាំទៅមិញ ដែលពួកគេនាំគ្នាស្រែក «ដូរ-ដូរ-ដូរ» ដែលកាលណោះជាបាតុកម្មបះបោរ ចូលលួចប្លន់ហាងទំនិញ ដែលពួកគេគិតថា ហាងទាំងនោះ មានម្ចាស់សុទ្ធតែជា «យួន» ទាំងអស់។

គួរឲ្យសោកស្ដាយណាស់ ការបោកប្រាស់ខ្លួនឯង តែងតែជាលក្ខណៈដ៏សំខាន់នៃនយោបាយរបស់លោក សម រង្ស៊ី និងគូកនជំនិតរបស់ខ្លួន។ ការអះអាងជ្រាំដែលៗថា ក្រុមប្រឆាំង «ពិតជា» បានឈ្នះការបោះឆ្នោតឆ្នាំ២០១៣ នោះ មិនមែនទើបតែប្រឌិតឡើងកាលសម័យបោះឆ្នោតខែកក្កដាឆ្នាំទៅមិញនោះទេ ប៉ុន្តែការអះអាងនេះ គឺជាពាក្យជ្រាំដែលតាំងពីសម័យបោះឆ្នោតមុនៗមក។

អ្វីដែលខុសប្លែកនៅឆ្នាំ២០១៣ នោះ គឺមានពីរចំណុច។ ទីមួយ គឺក្រុមប្រឆាំង ដែលបានរួបរួមគ្នាជាលើកដំបូងនោះ គឺក្រុមប្រឆាំងបានទទួលអាសនៈច្រើនជាងពេលមុនៗ។ ចំណុចប្លែកទី២ គឺមេដឹកនាំគណបក្សប្រឆាំងបានធ្វើការអះអាងជាក់លាក់ថា៖ គណបក្សសង្រ្គោះជាតិពិតជាឈ្នះបាន៦៣អាសនៈ ដែលពួកនេះអះអាងថាបានទទួល ៨អាសនៈ បន្ថែមពីលើ៥៥អាសនៈដែលពួកគេបានទទួលជាផ្លូវការ។ មិនដូចការអះអាងកាលពីបោះឆ្នោតមុនៗ ដែលតែងតែថាផ្នែកនេះមិនយុត្តិធម៌ ផ្នែកនោះមិនយុត្តិធម៌។ ជាការពិតណាស់ ការអះអាងអំពីអាសនៈ៨បន្ថែមនេះ វាងាយស្រួលផ្ទៀងផ្ទាត់ណាស់។ អ្វីដែលចាំបាច់នោះ គឺមេដឹកនាំគណបក្សសង្រ្គោះជាតិចេះពិចារណាឲ្យបានច្បាស់លាស់បន្តិច គឺថា៖ «ក្នុងខេត្ត(ក) គ.ជ.ប. កំណត់ត្រាបានបង្ហាញថា ពួកគេទទួលបាន x សំលេង ហើយគណបក្សប្រជាជនកម្ពុជាទទួលបាន y សំលេង ប៉ុន្តែតួលេខនេះខុស។ ចំនួនសរុបពិតប្រាកដនោះគឺ x+a និង y-b។» អញ្ចឹងគេ អាចមានលទ្ធភាពត្រឡប់ទៅមើលឯកសារជាក់ស្តែង អាចថាមានការរាប់ឡើងវិញ ឬត្រួតពិនិត្យការបូកសរុបនៅតាមថ្នាក់ឃុំ ឬខេត្ត ដើម្បីដឹងថាតើ គ.ជ.ប. ត្រូវ ឬគណបក្សសង្រ្គោះជាតិត្រូវ? ។

ប៉ុន្តែ មេដឹកនាំគណបក្សសង្រ្គោះជាតិ មិនដែលបានផ្តល់តួលេខម្ដងណាឡើយ ដើម្បីគាំទ្រការអះអាងរបស់ខ្លួន។ មូលហេតុវាមិនពិបាករកនោះទេ។ ជាការពិតគឺថា ការអះអាងរបស់ពួកគេនេះ គឺវាមិនពិត ហើយគេនឹងឃើញលើគោក ប្រសិនបើពួកគេនេះហ៊ានផ្ដល់តួលេខជាក់លាក់នោះ។ ព្រោះថា នៅគ្រប់ដំណាក់កាលនៃការបូកសរុបសំលេងឆ្នោត តាំងពីរាប់នៅស្ថានីយបោះឆ្នោត រហូតដល់បូកសរុបនៅថ្នាក់ខេត្ត តំណាងរបស់គណបក្សសង្រ្គោះជាតិ មានវត្តមាន និងបានចុះហត្ថលេខាជារៀងរហូតលើឯកសារទាំងអស់ ដែលបញ្ជាក់ថាតួលេខ វាត្រឹមត្រូវមិនលំអៀង។

ប៉ុន្តែ មេដឹកនាំគណបក្សសង្រ្គោះជាតិ នៅតែបន្តត្រុកៗធ្វើជាមិនដឹង។ ព្រោះការដែលទទួលស្គាល់ថា «ពួកខ្លួនមិនបានឈ្នះឆ្នោតនោះ» គឺដូចជាទទួលស្គាល់ថា ពួកគេបាននិងកំពុងធ្វើបាតុកម្មក្នុងកិច្ចប្រឹងប្រែងដើម្បីធ្វើឲ្យក្រឡាប់ចាក់នូវជម្រើសដ៏ច្បាស់លាស់របស់ប្រជាពលរដ្ឋភាគច្រើនដែលគេបោះឆ្នោតឲ្យគណបក្សប្រជាជនកម្ពុជា។

លោកស្រី មូរ សុខហួរ សរសេរថា «ប្រជាជនបានសម្តែងមតិហើយ។ ហើយយើងត្រូវនាំគ្នាគោរពការសម្តែងមតិរបស់ពួកគេ»។ ពិតប្រាកដណាស់ គ្រប់គ្នាត្រូវតែគោរពមតិប្រជាពលរដ្ឋ។ ប្រជាពលរដ្ឋជាច្រើនបានបោះឆ្នោតឲ្យគណបក្សសង្រ្គោះជាតិ ហើយប្រជាជនភាគច្រើនបានបោះឆ្នោតឲ្យគណបក្សប្រជាជនកម្ពុជា។ ប្រសិនបើមេដឹកនាំគណបក្សសង្រ្គោះជាតិ បែរមកទទួលស្គាល់ចំណុចខាងលើនេះ ហើយអ្វីដែលគេនាំគ្នាអះអាងថាពួកគេពិតជាគាំទ្រប្រជាធិបតេយ្យមែននោះ ពួកគេអាចនឹងមានសំណាងល្អ ដោយពួកគេបានបង្ហាញគេឯងឲ្យយល់ថា ពួកគេធ្វើអ្វីហ្មត់ចត់ លែងមានមារយាទពុតត្បុតទៀតហើយ។

By: Cambodia News