ឯកឧត្តម វ៉ា គឹមហុង ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានគណៈកម្មាធិការកិច្ចការព្រំដែន បានមានប្រសាសន៍នៅក្នុងកម្មវិធីតុមូលនៅ ទីស្តីការគណៈមន្ត្រីកាលពីថ្ងៃទី២២ ខែកក្កដា ឆ្នាំ២០១៥ បានពន្យល់អំពីផែនទីបោនខ្នាត ១/១០០,០០០ បោះពុម្ពដោយក្រុម ភូមិសាស្រ្តឥណ្ឌូចិន នៅខែមករា ឆ្នាំ១៩៥២ ដោយបញ្ជាក់ថាផែនទីនេះមានខ្នាតធំល្មមដើម្បីនឹងធ្វើកិច្ចការងារព្រំដែន ព្រោះវាមិនតូចមិនធំ ហើយជាផែនទី ដែលបារាំងបានបន្សល់ទុកតាំងពីបារាំងគ្រប់គ្រងឥណ្ឌូចិនមកម្លេះ សម្រាប់ធ្វើកិច្ចការព្រំដែនជាមួយប្រទេសជិតខាង ព្រោះកិច្ចការព្រំដែនមិនមែនធ្វើតែយើងម្ខាងទេ។
ឯកឧត្តមទេសរដ្ឋមន្ត្រីបានបន្តថាយើងជ្រើសរើសផែនទីក៏ត្រូវមានការឯកភាពពីប្រទេសជិតខាងផងដែរ ដូច្នេះយើងជាមួយវៀតណាម ជ្រើសរើសផែនទីបោនខ្នាត ១/១០០,០០០ ហើយឯកឧត្តមក៏បានបញ្ជាក់ថែមទៀតថាមួយចុងប៊ិចនៅលើផែនទីគឺស្មើនឹង ១០០ម៉ែត្រនៅលើដីជាក់ស្តែង ។
ឯកឧត្តមបានមានប្រសាសន៍បន្ថែមទៀតថា ផែនទីដែលរដ្ឋាភិបាលប្រើប្រាស់គឺវាត្រឹមត្រូវបំផុត ឯកឧត្តមក៏បានគូសបញ្ជាក់ទៀតថា ក្រុមកិច្ចការព្រំដែនធ្វើការយ៉ាងយកចិត្តទុកដាក់ជាទីបំផុត ប្រសិនបើការវាស់វែងនោះមានការលំអៀងតែ២ចុងប៊ិច ស្មើនឹង២០០ម៉ែត្រ នៅលើដីជាក់ស្តែង។
ឯកឧត្តមបានបន្ថែមទៀតថា ផែនទីដែលសម្តេចរកឃើញគឺជាដុំមាសមួយ ជាកេរ្តិ៍ដែលបានថែរក្សារហូតដល់សព្វថ្ងៃ ទោះវាទ្រុដទ្រោមណាស់ហើយ។ ឯកឧត្តមបានបន្ថែមទៀតថា ពាក្យថាបោនគឺជាផែនទីដែលអ្នកបច្ចេកទេសបង្កើតជាប្រព័ន្ធ រឺជាតំណាងមានរាងជាសាជី ហើយឯកឧត្តមមានប្រសាសន៍បន្តទៀតថា កិច្ចព្រមព្រៀងសន្ធិសញ្ញាឆ្នាំ១៩៨២ ក៏ដូចជាសន្ធិសញ្ញាឆ្នាំ១៩៨៣ ស្តីពីគោលការណ៍ស្រាយបញ្ហាព្រំដែនជាមួយ កម្ពុជា-វៀតណាម ហើយសន្ធិសញ្ញាឆ្នាំ១៩៨៥ ស្តីពីការកំណត់ព្រំដែនរដ្ឋរវាងប្រទេសទាំងពីរហើយសន្ធិសញ្ញាបំពេញបន្ថែមឆ្នាំ២០០៥យោងទៅលើតែផែនទីបោនខ្នាត ១/១០០,០០០ ដែលបោះពុម្ពដោយក្រុម ភូមិសាស្រ្តឥណ្ឌូចិន នេះដែលហៅថាជាគោលការណ៍ព្រំដែនមិនកែប្រែ។ ហើយឯកឧត្តមបានមានប្រសាសន៍ទៀតថា សម្តេចតេជោ ហ៊ុន សែន មានប្រសាសន៍ថាអត់មានផែនទីអ្វីក្រៅពីផែនទីបោននេះទេ ដែលរាជរដ្ឋាភិបាលបានប្រើតាំងពីសម័យមុនមកដល់សព្វថ្ងៃនេះគឺនៅតែប្រើផែនទីបោនខ្នាត១/១០០,០០០៕
