Cambodia News

Monday, June 9, 2014

ម៉ម សូណង់ដូ រិះគន់ សម រង្ស៊ី និង កឹម សុខា ថាគ្មានជំហរច្បាស់លាស់ និងសកម្មភាពប្រឆាំងសព្វថ្ងៃធ្វើដើម្បីល្អមើល

លោក ម៉ម សូណង់ដូ រិះគន់មេដឹកនាំគណបក្សប្រឆាំង

យោងតាមកិច្ចសម្ភាសន៍ជាមួយThmeythmey.com កាលពីថ្ងៃទី ៨ ខែមិថុនា ឆ្នាំ២០១៤ ប្រធានសមាគមអ្នកប្រជាធិបតេយ្យ និងជាម្ចាស់ស្ថានីយ៍វិទ្យុសំបុកឃ្មុំ ដែលគេដឹងថា មាននិន្នាការគាំទ្រគណបក្សប្រឆាំងតាំងពីយូរយាណាស់មកហើយនោះ លោក ម៉ម សូណង់ដូ បានរិះគន់ដោយឥតសំចៃមាត់ និងការបញ្ជាក់ពីការអស់ជំនឿចិត្តទាំងស្រុងចំពោះ មេដឹកនាំបក្សប្រឆាំងលោក សម រង្ស៊ី នឹងលោក កឹម សុខា ដែលត្រូវបានលោក ម៉ម សូណង់ដូ ចាត់ទុកថា មេដឹកនាំបក្សប្រឆាំងទាំងពីររូបនោះ មិនមានគោលជំហរច្បាស់លាស់ក្នុងការទាមទាររកយុត្តិធម៌ជូនម្ចាស់ឆ្នោត។

លោក ម៉ម សូណង់ដូ បានរិះគន់ថា ទង្វើរបស់ លោក សម រង្ស៊ី និងកឹម សុខា បច្ចុប្បន្ន ពិតជាមិនអាចរកយុត្តិធម៌ជូនម្ចាស់ឆ្នោតបានឡើយ។

ចំណុចមួយចំនួនដែលលោកម៉ម សូណង់ដូ ថា លោកមិនពេញចិត្តនឹងសកម្មភាពរបស់មេបក្សប្រឆាំងទាំងពីរ?

ទី១‑ គឺទាក់ទងនឹងជំហរមិនច្បាស់លាស់រឿងដូរគ.ជ.ប និងទី ២‑ ពាក់ព័ន្ធនឹងការបោះឆ្នោតមុនអាណត្តិ។ លោក សូណង់ដូ និយាយថា ខ្ញុំគិតថា ផ្អែកតាមសម្មភាព លោកធំទាំងពីរនឹងមិនអាចធ្វើបានតាមការសន្យារបស់ខ្លួនជាមួយប្រជាពលរដ្ឋនោះទេ ព្រោះជំហរពួកគាត់ទន់ណាស់ ហើយគ្មានប្រាកដត្រង់ណា។ ពីមុនមកនិយាយជាមួយម្ចាស់ឆ្នោតថា ត្រូវតែរកយុត្តិធម៌ជូនពលរដ្ឋ ឲ្យបានជាមុនឲ្យបានជាដាច់ខាត តែក្រោយមកទៅនិយាយជាមួយលោក ហ៊ុន សែន ចង់បានដំណែងប្រធានរដ្ឋសភា ថែមទាំងនិយាយថា គ្មាននរណាឈ្នះ អ្នកណាចាញ់ទៀត។ បច្ចុប្បន្ន ចេះតែធ្វើឲ្យល្អមើល បោកពលរដ្ឋតែប៉ុណ្ណោះ តាមពិតទៅទន់ល្អក់ រកតែដើរចូលសភាទេ តែខ្លាចពលរដ្ឋអន់ចិត្ត ព្រោះធ្វើអ្វីអត់កើត( និយាយហើយ លោក ម៉ម សូណង់ដូ សើច ប្រមាណ ៣០ វិនាទី)។

ឆ្លើយទៅនឹងសំនួររបស់Thmeythmey ដែលសួរថា ចុះប្រសិនបើលោក ជាមេដឹកនាំគណបក្សប្រឆាំងវិញ លោកធ្វើដូចម្តេច?

លោក ម៉ម សូណង់ដូ៖ បើខ្ញុំវិញ ជំហររបស់ខ្ញុំត្រូវតែរឹងប៉ឹង ច្បាស់ មិនអាចទន់ជ្រាយបានទេ ពោលគឺទាមទារឲ្យបោះឆ្នោតមុនអាណត្តិ ដូរគ.ជ.ប ត្រូវតែធ្វើឲ្យបាន។ បើចរចាគ្នាមិនត្រូវ គឺដឹកនាំពលរដ្ឋធ្វើបាតុកម្មទាល់តែ បានជោគជ័យ ហើយខ្ញុំធ្លាប់និយាយហើយថា បើម៉ម សូណង់ដូ ដឹកនាំធ្វើបាតុកម្ម ម៉ម សូណង់ដូ ត្រូវដើរមុខគេ ហើយត្រៀមក្តារម្ឈូសទុក។ ព្រោះយើងចង់រកយុត្តិធម៌ជូនពលរដ្ឋ។ មិនមែនដូចរបៀបលោកធំទាំងពីរ កឹម សុខា សម រង្ស៊ី ខ្លាច រកតែរត់រួចខ្លួន។ និយាយដល់ចំណុចនឹងខ្ញុំនឹងឃើញដល់បន្ទូលរបស់ទ្រង់ រណឬទ្ធិ ដែលនិយាយកាលពីពេលថ្មីៗថា បើលោកជាមេគណបក្សសង្គ្រោះជាតិ លោកនឹងចូលសភា ព្រោះចរិតរបស់សម រង្ស៊ី នឹងកឹម សុខា មុននឹងក្រោយគង់តែចូលដដែលនឹង។ ខ្ញុំគាំទ្រគំនិតរបស់ទ្រង់ ព្រោះ រណឬទ្ធិ ស្គាល់ សម រង្ស៊ី កឹម សុខា ច្បាស់ ព្រោះទន់ដូចគ្នា និងគេប្រើបានដូចគ្នា។

ពេលនេះ ខ្ញុំអស់ជំនឿ ខ្ញុំគិតថា ជំហរបក្សប្រឆាំងមិនខុសពី ហ្វ៊ុន ស៊ិនប៉ិច ពីមុនឡើយ។

ប្រភព៖ ពីthmeythey.com

Friday, June 6, 2014

មន្ត្រីជាន់ខ្ពស់រាជរដ្ឋាភិបាល ឯកឧត្តម កែវ រ៉េមី ប្រតិកម្មទៅនឹងនយោបាយបោកប្រាស់ និងការដុតកំហឹងជាតិសាសន៍ របស់មេដឹកនាំគណបក្សសង្គ្រោះជាតិពាក់ព័ន្ធនឹងបញ្ហាខ្មែរក្រោម

ឯកឧត្តម កែវ រ៉េមី ថ្លែងក្នុងសន្និសីទកាសែត
នៅទីស្តីការគណៈរដ្ឋមន្ត្រី ថ្ងៃទី៦ មិថុនា ២០១៤

រាជរដ្ឋាភិបាល តាមរយៈឯកឧត្តម កែវ រ៉េមី រដ្ឋលេខាធិការ និងជាអនុប្រធានអង្គភាពព័ត៌មាន និងប្រតិកម្មរហ័ស នៃទីស្តីការគណៈរដ្ឋមន្ត្រី បានប្រកាសក្នុងសន្និសីទកាសែត នាព្រឹកថ្ងៃទី៦មិថុនាឆ្នាំ២០១៤នេះថា បើទោះបីជាពេលនេះ លោកសមរង្ស៊ី និងលោកកឹមសុខា មេដឹកនាំគណបក្សប្រឆាំង បាន និងកំពុងបន្តយុទ្ធនាការ ឃោសនាមួលបង្កាច់ មកលើរដ្ឋាភិបាល និងសម្តេចតេជោ ហ៊ុនសែន យ៉ាងណាក៏ដោយ ប៉ុន្តែ រាជរដ្ឋាភិបាល មិនទាន់ចាត់វិធានតាមផ្លូវច្បាប់ ប្តឹងប្រឆាំងលោកទាំងពីរនៅឡើយទេ ដោយទុកអោយប្រជាពលរដ្ឋជាអ្នកវិនិច្ឆ័យទៅចុះ។

នៅក្នុងសន្និសីទកាសែត នៅទីស្តីការគណៈរដ្ឋមន្ត្រី ឯកឧត្តម កែវ រ៉េមី បានច្រានចោលនូវការលើកឡើងរបស់លោកសមរង្ស៊ី និងលោកកឹមសុខា ពាក់ព័ន្ធនឹងការរិះគន់លើបញ្ហាព្រំដែន ដែលមេបក្សប្រឆាំង លើកឡើងថា រដ្ឋាភិបាល របស់សម្តេចហ៊ុនសែន អនុញ្ញាតឲ្យប្រទេសវៀតណាម រំកិលព្រំដែនស្រេចចិត្ត ចូលទឹកដីកម្ពុជា ដែលត្រូវបានឯកឧត្តម កែវ រ៉េមី អះអាងថា ជាការលើកឡើងខុសការពិត។ឯកឧត្តម បានពន្យល់ថា ផ្ទុយទៅវិញ ការបោះបង្គោលព្រំដែន ដើម្បីការពារទឹកដីកម្ពុជាប៉ុណ្ណោះ។ រដ្ឋាភិបាល ក្រោមការដឹកនាំរបស់សម្តេចហ៊ុនសែន បានបង្កើតគណៈកម្មការ ចរចាលើការបោះបង្គោលព្រំដែន ជាមួយវៀតណាម ហើយសម្តេចក៏បានបកស្រាយបំភ្លឺជាង ៥ ម៉ោង នៅក្នុងរដ្ឋសភារួចហើយ។ ទាំងនេះ គឺបង្ហាញពីការទទួលខុសត្រូវខ្ពស់បំផុតរបស់រាជរដ្ឋាភិបាលចំពោះបូរណភាពទឹកដី។ ឯកឧត្តម កែវ រ៉េមី ក៏បានបកស្រាយលើការលើកឡើងរបស់មេបក្សប្រឆាំង ដែលថា បើគណបក្សសង្គ្រោះជាតិ ឈ្នះឆ្នោត នោះនឹងឲ្យខ្មែរកម្ពុជាក្រោម ឆ្លងដែនចូលកម្ពុជា ដោយមិនចាំបាច់មានលិខិតឆ្លងដែន។ ប៉ុន្តែលោក កែវ រ៉េមី លើកឡើងថា ទឹកកម្ពុជាក្រោម សព្វថ្ងៃ ស្ថិតក្រោមការគ្រប់គ្រងរបស់ប្រទេសវៀតណាម។ រីឯរាជរដ្ឋាភិបាលកម្ពុជា បានប្រកាន់យកគោលនយោបាយរបស់ព្រះមហាវីរក្សត្រ សម្តេចព្រះ នរោត្តម សីហនុ ដោយចាត់ទុកប្រជាពលរដ្ឋខ្មែរកម្ពុជាក្រោម ជាជនជាតិខ្មែរ។ តែបើពលរដ្ឋខ្មែរកម្ពុជាក្រោម ឆ្លងដែនចូលមកកម្ពុជា ត្រូវតែមានលិខិតឆ្លងដែន បើមិនដូច្នោះទេ នាំឲ្យកើតមានការចេញចូល ទឹកដីកម្ពុជា ដោយអាណាធិបតេយ្យ។

ឯកឧត្តម ក៏បានបន្តច្រានចោលផងដែរនូវការលើកឡើងរបស់មេបក្សប្រឆាំងទាំងពីរ គឺលោកសម រង្ស៊ី និងលោកកឹម សុខា ដែលអះអាងថា វៀតណាម មានបំណងបំបាត់ពូជសាសន៍ខ្មែរ និងពាក្យដែលថា វៀតណាមជាអ្នកបញ្ជាដល់រដ្ឋាភិបាលគណបក្សប្រជាជនកម្ពុជា ឲ្យលុបចោលព្រះរាជពិធីបុណ្យអុំទូក ដោយវៀតណាមបញ្ជាមកលើរាជរដ្ឋាភិបាល ដើម្បីសម្លាប់ខ្មែរ នៅក្នុងឧបទ្ទវហេតុជាន់គ្នាស្លាប់នៅកោះពេជ្រ រួមទាំងការរឹតត្បិតលើការធ្វើបាតុកម្ម ជាដើមនោះ គឺត្រូវបានឯកឧត្តម កែវ រ៉េមី បានចាត់ទុកថា ការលើកឡើងរបស់លោកសមរង្ស៊ី និងលោកកឹមសុខា នៅក្នុងពិធីរម្លឹកខួបថ្ងៃបាត់បង់ទឹកដីខ្មែរកម្ពុជាក្រោម កាលពីថ្ងៃទី៤មិថុនា គឺជាការបំភ័ន្តមតិមហាជន ដោយគ្មានការពិត ហើយក៏ជាការមួលបង្កាច់លើសម្តេចតេជោ ហ៊ុនសែន និងរដ្ឋាភិបាលផងដែរ។ ប៉ុន្តែ ទោះជាយ៉ាងណាក៏ដោយ ឯកឧត្តម កែវ រ៉េមី បានគូសបញ្ជាក់ថា "រាជរដ្ឋាភិបាល ដែលដឹកនាំដោយគណបក្សប្រជាជនកម្ពុជា ព្រមទាំងសម្តេចហ៊ុនសែន មិនទាន់មានវិធានការផ្លូវច្បាប់ ប្រឆាំងមេបក្សប្រឆាំងទាំងពីរនោះទេ! ប៉ុន្តែ ឯកឧត្តម កែវ រ៉េមី បានសង្កត់ធ្ងន់ថា ការលើកឡើងរបស់មេដឹកនាំគណបក្សប្រឆាំងនៅវត្តសាមគ្គីរង្សី ពាក់ព័ន្ធនឹងបញ្ហាខ្មែរកម្ពុជាក្រោម បញ្ហាជនជាតិវៀតណាម និងការចោទប្រកាន់នានាមកលើរាជរដ្ឋាភិបាល គឺជានយោបាយបោកប្រាស់ និងដុតបញ្ឆេះកំហឹងជាតិសាសន៍តែប៉ុណ្ណោះ៕

By: Cambodia News

Thursday, June 5, 2014

សេចក្ដីប្រកាសព័ត៌មាន៖ ពិធីចុះហត្ថលេខាលើកិច្ចព្រមព្រៀង រវាងរដ្ឋាភិបាលកម្ពុជា និងរដ្ឋាភិបាលញីវហ្សឺឡែន (គម្រោងលើកស្ទួយបេតិកភណ្ឌសហគមន៍អង្គរ និងសេដ្ឋកិច្ច)

រាជរដ្ឋាភិបាលកម្ពុជា តាមរយៈអាជ្ញាធរអប្សរា និង រដ្ឋាភិបាល ញីវហ្សឺឡែន តាមរយៈក្រសួងការ បរទេស និងពាណិជ្ជកម្ម បានសម្រេចសហការគ្នាភាពជាដៃគូ ដើម្បីគ្រប់គ្រងឧទ្យានអង្គរ ដោយ ចីរភាព ដោយការពារបេតិកភណ្ឌ ព្រមទាំងផ្ដល់ការរីកចម្រើន សេដ្ឋកិច្ច និងធានាឲ្យបាននូវសន្ដិសុខស្បៀងជូនប្រជាជនដែល រស់នៅក្នុងឧទ្យានអង្គរ។

ឯកឧត្ដម ប៊ុន ណារិទ្ធ អគ្គនាយកអាជ្ញាធរអប្សរា និងលោក ប្រិន រ៉ាប់សុន តំណាងស្ថានទូត ញីវហ្សឺឡែនប្រចាំក្រុងបាងកក នឹងចុះហត្ថលេខាលើកិច្ចព្រមព្រៀងស្ដីពី {គម្រោងលើកស្ទួយ បេតិកភណ្ឌសហគមន៍អង្គរ និងសេដ្ឋកិច្ច} នៅថ្ងៃទី០៤ ខែមិថុនា ឆ្នាំ២០១៤ ក្នុងឳកាសកិច្ចប្រជុំគណៈកម្មការអន្តរជាតិសម្របសម្រួលការថែរក្សា និងអភិវឌ្ឍរមណីយដ្ឋានប្រវត្តិសាស្រ្តអង្គរ (ICC - Angkor)។

តាមពិតទៅគម្រោងថ្មីនេះ ជាគម្រោងសកម្មភាពបន្តពី { គម្រោងគ្រប់គ្រងធនធានធម្មជាតិអង្គរ និងលើកតម្កើងជីវភាព (APNRM & L) } ដែលបានអនុវត្តក្នុងរយៈពេល ៥ឆ្នាំ គឺពីឆ្នាំ២០០៩ ដល់ឆ្នាំ២០១៣ ក្នុង១០ភូមិ នៃឧទ្យានអង្គរ ដោយប្រើប្រាស់ថវិកាប្រមាណ ២លានដុល្លារអាមេរិក ហើយដែលទើបនឹងបានបញ្ចប់នាខែ កញ្ញា ឆ្នាំ២០១៣ កន្លងមកនេះ ដោយអ្នកបច្ចេកទេសប៉ាន់ តម្លៃ បានចាត់ទុកជាជោគជ័យយ៉ាងធំក្នុងការគ្រប់គ្រងបេតិកភណ្ឌ។

ចំណែកឯគម្រោងថ្មីនេះ មានថវិកាចំនួន ៣,៧៥៣,៣៤០ ដុល្លារអាមេរិក សម្រាប់រយៈពេល៥ឆ្នាំ គឺពីឆ្នាំ២០១៤ ដល់ឆ្នាំ២០១៩។

សកម្មភាពដែលបានគ្រោងទុក នឹងត្រូវអនុវត្តដោយយ៉ាងជិតស្និតជាមួយដៃគូជាច្រើន ដើម្បី បានទៅដល់គោលដៅ គឺ {ការគ្រប់គ្រងឧទ្យានអង្គរដោយចីរភាព ដោយការពារបេតិកភណ្ឌ ព្រមទាំងផ្ដល់ការរីកចម្រើនសេដ្ឋកិច្ច និងធានាបាននូវសន្តិសុខស្បៀងជូនប្រជាជន ដែលរស់នៅក្នុងឧទ្យានអង្គរ } ។

By: Cambodia News

កិច្ចប្រជុំបច្ចេកទេសលើកទី២៣របស់ គណៈកម្មាធិការអន្តរជាតិ សម្របសម្រួលកិច្ចគាំពារ និងអភិវឌ្ឍន៍រមណីយដ្ឋានប្រវត្តិសាស្រ្តអង្គរ

រូបភាពនៃកិច្ចប្រជុំនៅខេត្តសៀមរាប

យោងតាមការចុះផ្សាយនៅគេហទំព័រអង្គភាពព័ត៌មាន និងប្រតិកម្មរហ័ស នៃទីស្តីការគណៈរដ្ឋមន្ត្រី បានអោយដឹងថា កិច្ចប្រជុំបច្ចេកទេសលើកទី២៣របស់គណៈកម្មាធិការអន្តរជាតិ សម្របសម្រួលកិច្ចគាំពារ និងអភិវឌ្ឍន៍រមណីយដ្ឋានប្រវត្តិសាស្រ្តអង្គរ (ICC-Angkor) ត្រូវបានប្រារព្វធ្វើឡើងនៅក្រុងសៀមរាបព្រឹកថ្ងៃទី០៤ ខែមិថុនា ឆ្នាំ២០១៤ មានរយៈពេល២ថ្ងៃ ក្រោមអធិបតីភាព ឯកឧត្ដមបណ្ឌិតសភាចារ្យ សុខ អាន ឧបនាយករដ្ឋមន្រ្តី រដ្ឋមន្រី្តទទួលបន្ទុកទីស្ដីការគណៈ រដ្ឋមន្រ្តី និងជា ប្រធានអាជ្ញាធរអប្សរា ឯកឧត្តម Romain Louvet ទីប្រឹក្សាស្ថានទូតបារាំងផ្នែកសហ ប្រតិបត្តិ ការណ៍ និងការងារវប្បធម៌ និងភាគីជប៉ុន ឯកឧត្តម Yoshihiro Higuchi រដ្ឋមន្រ្តី និងអនុប្រធានបេសកកម្ម ការទូ

១/ លោកបណ្ឌិត Pascal Royère ស្ថាបត្យករជាតិបារាំងបានចំណាយពេល១៦ឆ្នាំសម្រាប់គម្រោងជួសជុលប្រាសាទបាពួន

២/ លោកបណ្ឌិត Hyroyuki Suzuki អ្នកជំនាញអភិរក្សបេតិកភណ្ឌជាត់ជប៉ុន ជួយការងារអង្គរប្រចាំ ICC ១០ឆ្នាំ

៣/ លោកបណ្ឌិត Tsuyoshi Narita អ្នកជំនាញអភិរក្សបេតិកភណ្ឌជាត់ជប៉ុន ជួយ ការងារ អង្គរប្រចាំ ICC ជាង១០ឆ្នាំ។

កិច្ចប្រជុំលើកទី២៣នេះបានផ្តោតលើបញ្ហាសំខាន់មានដូចជា៖

· ពិនិត្យរបាយការណ៍ការងាររបស់ ICC ឆ្នាំ២០១៣

· ស្តាប់របាយការណ៍ការងាររបស់អាជ្ញាធរអប្សរា២០១៣

· ពិនិត្យរបាយការណ៍របស់ស្ថាប័នអន្តរជាតិ និងជាតិចំនួន១១គម្រោង ដែល បានអនុវត្តក្នុងឆ្នាំ២០១៣ ទាក់ទងនឹងការងារអភិរក្សរមណីយដ្ឋាន និងការដ្ឋានជួសជុលប្រាសាទរបស់អាជ្ញាធរអប្សរា ប្រទេសចិន ឥណ្ឌា បារាំង ជប៉ុន

· ស្តាប់របាយការណ៍របស់ស្ថាប័នជាតិ និងអន្តរជាតិទាក់ទងនឹងការងារស្រាវជា្រវបរិស្ថាន ថ្ម បុរាណវិទ្យា

· ការពិភាក្សាអំពីការបណ្ដុះបណ្តាលធនធានមនុស្ស

· កម្មវិធីស្រាវជ្រាវពីលំហអាកាសលើបញ្ហាបរិស្ថាន

· កម្មវិធីថត3D នៅអង្គរវត្ត

· កម្មវិធីស្រាវជ្រាវក្រុងអង្គរធំ កោះកេរ វិធីសាស្រ្តស្រាវជ្រាវកុលាលភាជន៍ និងសាសនា

· គម្រោងអភិវឌ្ឍន៍ប្រកបដោយចីរភាពនៅរមណីយដ្ឋានអង្គរ

· គម្រោងរៀបចំទីចំណត និងទទួលភ្ញៀវនៅអង្គរវត្ត បន្ទាយស្រី និងតាព្រហ្ម

· គម្រោងគ្រប់គ្រងទឹកនៅរមណីយដ្ឋានអង្គរ

· គម្រោងអភិវឌ្ឍន៍សហគមន៍

· គម្រោងអភិរក្សភ្នំគូលេន

· គម្រោងអភិវឌ្ឍន៍វិស័យទេសចរណ៍។

សូមរំលឹកថាគណៈកម្មការ (ICC) បានបង្កើតឡើងនៅឆ្នាំ១៩៩៣ក្រោយសនិ្នសីទអន្តរជាតិលើកទី១ស្តីពីអង្គរនៅទីក្រុងតូក្យូ ប្រទេសជប៉ុន តាមសំណូមពររបស់គណៈកម្មធិការ បេតិកភណ្ឌពិភពលោកពេលទទួលចុះអង្គរទៅក្នុងបញ្ជីបេតិកភណ្ឌពិភពលោក។ ការបង្កើត យន្តការអន្តរជាតិ ICC សម្រាប់អង្គរ ជាលក្ខខណ្ឌមួយក្នុងចំណោមលក្ខខណ្ឌទាំង៥ ដែល តម្រូវឲ្យអាជ្ញាធរកម្ពុជាបំពេញក្នុងរយៈពេល៣ឆ្នាំ(១៩៩៣-១៩៩៦)។

សមាជិកនៃ (ICC) មានចំនួន៣៧ប្រទេស មកពីទ្វីប៥ និងមានអង្គការអន្តរជាតិចំនួន១៣ទៀតចូលរួម ផងដែរ។ បណ្តាប្រទេសទាំងនោះមាន៖ ប្រទេសបារាំង អាល្លឺម៉ង់ អូស្ត្រាលី បែលហ្សិក ប៊្រុយណេ កម្ពុជា កាណាដា ដាណឺម៉ាក អេហ្ស៊ីប អេស្ប៉ាញ អាមេរិក រ៉ូស្ស៊ី ក្រិច ហុងគ្រី ឥណ្ឌា ឥណ្ឌូណេស៊ី អ៊ីតាលី ជប៉ុន ឡាវ លុចហ្សំបួរ ម៉ាឡេស៊ី ម៉ិចស៊ិច ន័រវែស នូវែលហ្សេឡង់ ហូឡង់ ហ្វីលីពីន ប៉ូឡូញ ចក្រភពអង់គ្លេស និងអៀរឡង់ខាងជើង សាធារណរដ្ឋកូរ៉េ ចិន សិង្ហបុរី សិរីលង្កា ស៊ុយអែត ស្វីស ថៃ ទុយណេស៊ី និងវៀតណាម។ ចំណែកអង្គការអន្តរជាតិមានដូចជា៖ សហភាពអឺរ៉ុប ធនាគារអភិវឌ្ឍន៍អាស៊ី អង្គការស្បៀងអាហារ និងកសិកម្ម អង្គការមូលនិធិរូបិយវត្ថុអន្តរជាតិ អង្គការអ៊ីក្រូម អង្គការអ៊ីកូម អង្គការអ៊ីកូម៉ូស អង្គការទេសចរណ៍អន្តរជាតិ អង្គការSEAMEO/SPAFA អង្គការយូណេស្កូ អង្គការយូអិនឌីភី អង្គការយូអិនវី និងមូលនិធិប្រាង្គប្រាសាទពិភពលោក (WMF) ។

· (ICC) គឺជាយន្តការអន្តរជាតិសម្របសម្រួលជំនួយដល់ជូនដោយបណ្តាប្រទេស និងអង្គការផ្សេងៗសម្រាប់ការអភិរក្ស និងអភិវឌ្ឍរមណីយដ្ឋានប្រវត្តិអង្គរ។

· (ICC) ជាវេទិការមួយដែលស្ថាបត្យករ វិស្វករ បុរាណវិទូ អ្នកស្រាវជ្រាវ និងអ្នកបច្ចេកទេសជំនាញផ្សេងៗគ្នាអាចផ្លាស់ប្តូរបទពិសោធន៍ និងទស្សនៈរបស់ពួកគេសម្រាប់ការអភិរក្ស និងការអភិវឌ្ឍនៃឧទ្យានអង្គរ។

· ភារកិច្ចសំខាន់របស់ (ICC) គឺ ស្រោចស្រង់ អភិរក្ស និងអភិវឌ្ឍប្រកបដោយចីរភាពនៅតំបន់រមណីយដ្ឋានសៀមរាប-អង្គរ។ ICC បានបញ្ចប់ដំណាក់កាលស្រោចស្រង់អង្គរហើយ ក្នុងរយៈពេល១០ឆ្នាំ (១៩៩៣-២០០៤)។ ដំណាក់កាលនេះគឺការអភិរក្ស និងអភិវឌ្ឍន៍ ប្រកបដោយចីរភាព(២០០៤-បច្ចុប្បន្ន)។ ICC រៀបចំកិច្ចប្រជុំរបស់ខ្លួនពីរដងក្នុង១ឆ្នាំ ម្តងជាមួយសមាជិក គឺកិច្ចប្រជុំពេញអង្គ និងម្តងទៀតគឺកិច្ចប្រជុំបច្ចេកទេស ។
តជប៉ុន ជាសហប្រធាននៃកិច្ចប្រជុំ ព្រមទាំងមានវត្តមានលោកស្រី ANNE LEMAISTRE នាយិការអង្គការយូណេស្កូប្រចាំកម្ពុជា និងមានវាគ្មិនតំណាងICC និងអ្នកបច្ចេកទេសស្រាវជ្រាវមកពីបណ្ដាប្រទេសលើពិភពលោកជាច្រើនរូបដែលពាក់ពន្ធ័ និងកិច្ចការការពារ អភិរក្សតំបន់អង្គរ។ កម្មវិធីដំបូងនៃកិច្ចប្រជុំលើកទី២៣នេះ គឺឧទ្ទិសដល់វិញ្ញាណក្ខន្ធរបស់អ្នកជំនាញការអន្តរជាតិបីរូបដែលបានចែកឋានទៅកាលពីពេលថ្មីៗ៖

By: Cambodia News

បដិមាបីអង្គ ទុរយោធន៍ ភីម និងពលរាម បានវិលត្រឡប់មកកម្ពុជាវិញ ក្រោមការដឹកនាំនយោបាយរបស់រាជរដ្ឋាភិបាល

ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី តំណាងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅក្នុងពិធីស្វាគមន៍ការវិលត្រឡប់មកវិញនៃបដិមាទាំងបីនេះមកកាន់មាតុភូមិរបស់យើង នាពេលនេះ បានមានប្រសាសន៍ថា ដំណើររឿងនេះបានចាប់ផ្ដើមតាំងពីជាងមួយពាន់ឆ្នាំមុនម្ល៉េះ នៅពេលដែលព្រះបាទជ័យវរ្ម័នទី៤ បានសម្រេចឱ្យគេឆ្លាក់រូបពិព័ណ៌នាអំពីឈុតឆាកប្រយុទ្ធដ៏ល្បីល្បាញមួយ នៅក្នុងរឿងទេវកថាសាសនាហិណ្ឌូ មហាភារតៈ នៅលើប្រាសាទចិន ដែលជាប្រាសាទមួយក្នុងចំណោមប្រាសាទនានារបស់ព្រះអង្គ។ បន្ទាប់ពីដំណើរដ៏វែងឆ្ងាយជាង៤០ឆ្នាំ ឆ្លងកាត់សង្គ្រាមស៊ីវិល ការលួចការជួញដូរខុសច្បាប់ និងការធ្វើដំណើរទូទាំងពិភពលោក នៅពេលនេះ បដិមាទាំងបីបានទទួលនូវសេរីភាពនិងបានត្រឡប់មកកាន់ទីឋានកំណើតរបស់ខ្លួនវិញហើយ។

បដិមាដ៏ធំនៃដៃគូប្រយុទ្ធគ្នាគឺ ទុរយោធន៍ និង ភីម រួមជាមួយនឹង ពលរាម ដែលជាសាក្សីនៃឆាកប្រយុទ្ធដ៏អស្ចារ្យនោះ បានត្រឡប់មកកាន់ទីឋានកំណើតរបស់ខ្លួនវិញ ដោយសារកិច្ចខិតខំប្រឹងប្រែងប្រកបដោយជោគជ័យរបស់រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន ដោយមានការចូលរួមជាដៃគូជាមួយរដ្ឋាភិបាលសហរដ្ឋអាមេរិក អង្គការយូណេស្កូ សាលាបារាំងចុងបូព៌ា(EFEO) និងអ្នកជំនាញដទៃទៀតជាច្រើននាក់។

បដិមា ទុរយោធន៍ ត្រូវបានប្រគល់ជូនរាជរដ្ឋាភិបាលកម្ពុជាវិញកាលពីខែមុននៅទីក្រុងញូវយ៉ក បន្ទាប់ពីជោគជ័យនៃការតស៊ូក្ដីដែលរៀបចំឡើងដោយការិយាល័យអគ្គរដ្ឋអាជ្ញាសហរដ្ឋអាមេរិកប្រចាំតំបន់ Southern District of New York រួមជាមួយនឹងការគាំទ្រយ៉ាងសកម្មរបស់ក្រុមអ្នកច្បាប់កម្ពុជា ដែលដឹកនាំដោយឯកឧត្តម ច័ន្ទ តានី។

រីឯបដិមា ភីម ដែលសារមន្ទីរ Norton Simon នៅទីក្រុង Pasadena រដ្ឋ California បានទិញនៅក្នុងឆ្នាំ១៩៧៦ ក៏ត្រូវបានបញ្ជូនត្រឡប់មកទីឋានកំណើររបស់ខ្លួនវិញដែរ បន្ទាប់ពីមានកិច្ចចរចារដោយផ្ទាល់ ដ៏វែងអន្លាយ ប៉ុន្តែប្រកបដោយភាពយោគយល់គ្នាជាមិត្តភាព រវាងរាជរដ្ឋាភិបាលកម្ពុជា និងសារមន្ទីររួចមក។ ទន្ទឹមនឹងនេះដែរ បដិមា ពលរាម ក៏បានត្រឡប់ មកវិញ តាមរយៈការព្រមព្រៀងគ្នារវាងរាជរដ្ឋាភិបាលកម្ពុជា និងក្រុមហ៊ុនដេញថ្លៃ Christie’s។

ឥឡូវនេះ ការពិតនានាត្រូវបានរកឃើញ ហើយដំណើរផ្សងព្រេងដ៏វែងឆ្ងាយត្រូវបានបញ្ចប់នៅទីនេះ។ និមិត្តរូបដ៏មានតម្លៃនៃបេតិកភណ្ឌរបស់យើងនេះ បានជួបម្ចាស់ដើមពិតប្រាកដរបស់ខ្លួនវិញហើយ។

ថ្ងៃនេះ គឺពិតជាថ្ងៃមួយដ៏វិសេសវិសាល ដែលឆ្លុះបញ្ចាំងអំពីសមិទ្ធផលមួយដ៏សំខាន់នៃគោលនយោបាយរបស់យើងដើម្បីការពារសម្បត្តិបេតិកភណ្ឌវប្បធម៌ ដែលរាជរដ្ឋាភិបាលកម្ពុជាបាននិងកំពុងអនុវត្តយ៉ាងសកម្មនិងខ្ជាប់ខ្ជួន នៅក្នុងក្របខ័ណ្ឌនៃ «អនុសញ្ញាអង្គការយូណេស្កូឆ្នាំ១៩៧០ស្ដីពីការហាមប្រាមនិងការទប់ស្កាត់ការនាំចូល ការនាំចេញ និងការបញ្ជូនដោយខុសច្បាប់នូវសម្បត្តិវប្បធម៌។»

តាងនាមឱ្យរាជរដ្ឋាភិបាល និងប្រជាជនកម្ពុជាទាំងមូល ឯកឧត្តមឧបនាយករដ្ឋមន្ត្រី សុខ អាន បានសម្តែងនូវការកោតសរសើរយ៉ាងជ្រាលជ្រៅ ចំពោះភាគីពាក់ព័ន្ធទាំងអស់ដែលបានរួមចំណែកធ្វើឱ្យសម្រេចបាននូវសមិទ្ធិផលដ៏វិសេសវិសាលនេះ។ ក្នុងនោះ បានកោតសរសើរជាពិសេស ចំពោះកិច្ចការរបស់លោក Simon Warrack ដែលនៅក្នុងឆ្នាំ២០០៧ ជាមនុស្សទីមួយរកឃើញនូវទំនាក់ទំនងរវាងជើងទម្រនៅឯប្រាសាទចិន នៃរមណីយដ្ឋានកោះកេរ ដែលស្ថិតនៅតំបន់ដាច់ស្រយាលភាគខាងជើងនៃប្រទេសកម្ពុជា ជាមួយនឹងបដិមាដែលបានបាត់បង់។ ជាមួយគ្នានេះក៏សូមអបអរសារទរផងដែរចំពោះសាលាបារាំងចុងបូព៌ា(EFEO) ជាពិសេសលោកបណ្ឌិត Eric Bourdonneau និងលោកបណ្ឌិត Bertrand Porte ដែលបានធ្វើការងារជាច្រើន ពាក់ព័ន្ធនឹងប្រាសាទចិន ដែលបាននាំទៅដល់ការបញ្ជាក់យ៉ាងជាក់ច្បាស់នូវភាពជាម្ចាស់កម្មសិទ្ធិរបស់កម្ពុជាលើបដិមា ទុរយោធន៍។

ឯកឧត្តមឧបនាយករដ្ឋមន្ត្រី សុខ អាន បានបន្តថា យើងក៏មិនត្រូវភ្លេចឡើយថា ការប្តេជ្ញាចិត្តនិងសមត្ថភាពជំនាញរបស់អង្គការយូណេស្កូគឺជាជំនួយដ៏ចាំបាច់ មិនមែនត្រឹមតែនៅក្នុងរឿងក្ដីនេះមួយប៉ុណ្ណោះទេ ប៉ុន្តែថែមទាំងសម្រាប់ការអភិរក្សវប្បធម៌ផ្សេងៗទៀតរបស់កម្ពុជាផងដែរ និងថែមទាំងបានថ្លែងអំណរគុណយ៉ាងជ្រាលជ្រៅផងដែរដល់រដ្ឋាភិបាលសហរដ្ឋអាមេរិក ជាពិសេសស្ថានទូតសហរដ្ឋអាមេរិកប្រចាំនៅភ្នំពេញ ចំពោះការគាំទ្រនៅក្នុងការប្រយុទ្ធប្រឆាំងនឹងការជួញដូរខុសច្បាប់ និងឆន្ទៈដ៏មុះមុតក្នុងការលើកកម្ពស់មិត្តភាព និងសហប្រតិបត្តិការរវាងប្រជាជាតិយើងទាំងពីរ។

ជាការពិត ការបញ្ជូនត្រឡប់មកវិញនូវបដិមាទាំងប្រាំរូបនេះ នឹងមិនអាចសម្រេចបានឡើយ ប្រសិនបើគ្មានកិច្ចខិតខំប្រឹងប្រែង ដោយមិនខ្លាចនឿយហត់របស់ក្រុមការងារកម្ពុជាយើងនោះទេ។ ខ្ញុំសូមថ្លែងអំណរគុណជាពិសេសចំពោះឯកឧត្តម ច័ន្ទ តានី ពីទីស្ដីការគណៈរដ្ឋមន្ត្រី ឯកឧត្តម ហាប់ ទូច ពីក្រសួងវប្បធម៌និងវិចិត្រសិល្បៈ អាជ្ញាធរអប្សរា ក្រុមអភិរក្សនៃសារមន្ទីរជាតិ និងក្រុមអ្នកច្បាប់ដែលដឹកនាំដោយលោក Bretton Sciaroni ។

ឯកឧត្តម បានបញ្ជាក់ថា « ជឿជាក់ថា មិនមែនគ្រាន់តែប្រទេសកម្ពុជាប៉ុណ្ណោះទេ ប៉ុន្តែគឺពិភពលោកទាំងមូល ដែលនឹងមានសេចក្តីរីករាយ ចង់ឃើញនូវទីបញ្ចប់នៃការបែកខ្ញែកនៃក្រុមបដិមាដ៏មានសារសំខាន់ និងការវិលត្រឡប់មកទីឋានកំណើតរបស់បដិមាទាំងនេះ» ។

ជាទីបញ្ចប់ រាជរដ្ឋាភិបាលកម្ពុជាសូមអំពាវនាវដល់សារមន្ទីរដទៃទៀត និងអ្នករក្សាទុកវត្ថុបុរាណនៅទូទាំងពិភពលោកទាំងអស់ សូមធ្វើតាមគំរូនេះ ដោយប្រគល់វត្ថុបុរាណដែលត្រូវបានលួចទៅឱ្យម្ចាស់ដើមពិតប្រាកដវិញ ជាផ្នែកមួយនៃយុទ្ធនាការសកលដើម្បីការពារសម្បត្តិបេតិកភណ្ឌវប្បធម៌។

By: Cambodia News

Monday, June 2, 2014

សេចក្តីប្រកាសព័ត៌មាន ចុះថ្ងៃទី២ ខែមិថុនា ឆ្នាំ២០១៤ ស្តីពី ពិធីអបអរសាទរការ វិលត្រឡប់ មកវិញ នៃបដិមាបីអង្គ ដែលបានឃ្លាតឆ្ងាយពីកម្ពុជា

សេចក្តីប្រកាសព័ត៌មាន ចុះថ្ងៃទី២ ខែមិថុនា ឆ្នាំ២០១៤ ស្តីពី ពិធីអបអរសាទរការ វិលត្រឡប់ មក វិញ នៃបដិមាបីអង្គ ដែលមានដើមកំណើតនៅប្រាសាទចិន នៃរមណីេយដ្ឋានកោះកេរ ដែលនឹង ប្រារព្ធឡើងនៅថ្ងៃទី៣ ខែមិថុនា ឆ្នាំ២០១៤ វេលាម៉ោង៤រសៀល នៅវិមានមិត្តភាព នៃទីស្តីការ គណៈរដ្ឋមន្ត្រី

Sunday, June 1, 2014

[Youtube] Kem Sokha's statement about being investigated subversive CPP

Saturday, May 31, 2014

CNRP against Vietnam aggression - Vietnam aggression - khmer Border

Friday, May 30, 2014

សាលាដំបូងក្រុងភ្នំពេញសម្រេចដោះលែងក្រុមលោក វ៉ន ពៅ ទាំង២១នាក់អោយមានសេរីភាពវិញ ប៉ុន្តែ ម្នាក់ៗត្រូវផ្តន្ទាទោសទៅតាមបទល្មើសរៀងៗខ្លួន

ព្រឹកថ្ងៃសុក្រ ទី៣០ ខែឧសភា ឆ្នាំ២០១៤នេះ សាលាដំបូងរាជធានីភ្នំពេញ បានសម្រេចដោះលែងក្រុមលោក វ៉ន ពៅ សមាគមឯករាជ្យសេដ្ឋកិច្ចក្រៅប្រព័ន្ធ អោយមានសេរីភាពវិញ ប៉ុន្តែ អ្នកអស់នោះត្រូវស្ថិតនៅក្នុងការព្យួទោស ទៅតាមបទល្មើសរៀងៗខ្លួនដែលបានបង្កចលាចលដល់សង្គម ប៉ះពាល់ដល់សន្តិសុខ សណ្តាប់ធ្នាប់សាធារណៈ។

តាមប្រភពពីមន្ត្រីនៅតុលាការបានអោយដឹងថា ក្នុងចំណោមជនទាំង២១រូប ដែលត្រូវដោះលែងនោះ មាន ៤នាក់ បានរួចទោស មានឈ្មោះ រ៉េត រដ្ឋា , ឡូ សំអន ,លន់ សាន និងឆេង វុទ្ធី។ ក្រៅពីនេះមេក្លោងក្នុងការប្រព្រឹត្តបទល្មើស រួមមានលោក វ៉ន ពៅ លោក ចាន់ ពុទ្ធិសក្តិ លោក គុណ សម្បត្តិវាសនា ត្រូវផ្តន្ទាទោស៤ឆ្នាំ៦ខែ និងពិន័យជាប្រាក់៨លានរៀល ចំណែកឯលោក តេង សារឿន ជាប់ទោស៤ឆ្នាំ និងអ្នកមួយចំនួនទៀតផ្តន្ទាទោស អ្នកខ្លះ៣ឆ្នាំ ខ្លះ២ឆ្នាំកន្លះ ប៉ុន្តែ ទោសដាក់ពន្ធនាគារ គឺគិតចាប់ត្រឹមពីថ្ងៃឃុំខ្លួនរហូតមកដល់ថ្ងៃនេះ រីឯទោសនៅសល់ព្យួរ។

ការដោះលែងជនទាំងអស់នោះអោយមានសេរីភាពវិញ បានធ្វើឡើងបន្ទាប់ពីជនទាំងនោះត្រូវបានចាប់ខ្លួន កាលពីថ្ងៃទី២‑៣ ខែមករា ឆ្នាំ២០១៤ ខណៈដែលពួកគេបាននាំគ្នាប្រើអំពើហឹង្សា វាយបំផ្លាញទ្រព្យសម្បត្តិសាធារណៈរដ្ឋ ឯកជន និងបង្កចលាចល ប៉ះពាល់ដល់សន្តិសុខ សណ្តាប់ធ្នាប់សង្គម ដែលក្រុមអ្នកតវ៉ាទាំង ២១នាក់នោះ ត្រូវសាលាដំបូងរាជធានីភ្នំពេញ សម្រេចឃុំខ្លួន ជាបណ្តោះអាសន្ននៅ មណ្ឌលកែប្រែត្រពាំងផ្លុង ក្នុងខេត្តកំពង់ចាម ក្រោយការផ្ទុះអំពើហិង្សា ជាមួយសមត្ថកិច្ច នៅតំបន់សេដ្ឋកិច្ចពិសេស ភ្នំពេញនិងលើផ្លូវវ៉េងស្រេង ក្នុងខណៈ ដែលមានការធ្វើមហាបាតុកម្មទាមទារដំឡើងប្រាក់ខែ១៦០ដុល្លារដល់កម្មករ ដែលបាតុកម្មនោះ ត្រូវបានគេគិតថា មានការញុះញង់ពីក្រោយខ្នងដោយមេដឹកនាំគណបក្សសង្គ្រោះជាតិ។

បើទោះជាមានការដោះលែងក្តី ប៉ុន្តែ គេបានមើលឃើញថា តុលាការបានចាត់ការត្រឹមត្រូវតាមនិតិវិធីច្បាប់ ក្នុងការសាកសួរ ស្រាវជ្រាវស៊ើបអង្កេត ប្រមូលភ័ស្តុតាង ក្នុងការដាក់បន្ទុក ហើយបានរកឃើញថា ក្នុងចំណោមជនទាំង២១រូប គឺតុលាការបានរកឃើញបទល្មើសជាក់ស្តែងដែលពួកគេបានប្រព្រឹត្តពិតប្រាកដ មិនមែនបានន័យថា ការចាប់ឃុំខ្លួននោះ ធ្វើឡើងពាក់ព័ន្ធក្នុងរឿងនយោបាយ ឬរកកំហុសមិនឃើញ ដូចការ លើកឡើងរបស់ក្រុមបក្សប្រឆាំង និងអង្គការ សមាគម សហជីពមួយចំនួនបានចោទប្រកាន់នោះទេ៕

By: Cambodia News