ស្របនឹងកម្មវិធីនយោបាយរបស់រាជរដ្ឋាភិបាល នីតិកាលទី៥ នៃរដ្ឋសភា សេចក្តីព្រាងច្បាប់ស្តីពីទូរគមនាគមន៍ ត្រូវបានរៀបចំឡើងដោយក្រសួងប្រៃសណីយ៍ និងទូរគមនាគមន៍ ដើម្បីឆ្លើយតបទៅនឹងស្ថានភាពប្រែប្រួល រីកចំរើនយ៉ាងឆាប់រហ័ស ប្រកបដោយការប្រឈមនៃវិស័យទូគមនាគមន៍នៅក្នុងព្រះរាជាណាចក្រកម្ពុជា និងដើម្បីគ្រប់គ្រងវិស័យដ៍មានសក្តានុពលនេះដោយការពារ និងជំរុញការវិនិយោគរបស់វិស័យឯកជន ការពារផលប្រយោជន៍អ្នកប្រើប្រាស់ និងប្រមូលចំណូលជាតិពីវិស័យនេះ។
គោលបំណងសំខាន់នៃសេចក្តីព្រាងច្បាប់នេះ គឺការធានា គុណភាព និងប្រសិទ្ធភាពនៃការប្រើប្រាស់ហេដ្ឋារចនាសម្ព័ន្ធ និងបណ្តាញ និងការផ្តល់សេវាទូរគមនាគមន៍ លើកទឹកចិត្ត ចំពោះការវិនិយោគលើវិស័យទូរគមនាគមន៍ និងការការពារអ្នកប្រើប្រាស់ ព្រមទាំងការកៀរគរចំណូលជាតិ។ គោលដៅនៃសេចក្តីព្រាងច្បាប់នេះ គឺកំណត់សមត្ថកិច្ចគ្រប់គ្រង ការចេញបទប្បញ្ញត្តិ និងការត្រួតពិនិត្យ និងតាមដានប្រតិបត្តិការលើវិស័យទូរគមនាគមន៍ និងបែបបទនៃអភិបាលកិច្ចវិស័យ។ ច្បាប់នេះមាន ១៦ជំពូក និង ១១៤មាត្រា មានវិសាលភាពអនុវត្តចំពោះគ្រប់ប្រតិបត្តិការទូរគមន៍ទាំងអស់ នៅក្នុងព្រះរាជាណាចក្រ កម្ពុជាលើកលែងតែវិស័យសន្តិសុខ និងការងារការពារជាតិ។
ជាមួយគ្នានេះដែរ សម្តេចតេជោ ហ៊ុន សែន បានឯកភាពលើសេចក្តីព្រាងអនុក្រឹត្យស្តីពីការបោះពុម្ពសារព្រមានសុខភាពជារូបភាព និងជាភាសាខ្មែរលើកញ្ចប់បារី ដែលត្រូវបានតាក់តែងនិងដាក់ស្នើដោយក្រសួងសុខាភិបាលអនុលោមតាមមាត្រា១០ នៃច្បាប់ស្តីពីការត្រួតពិនិត្យផលិតផលថ្នាំជក់ដែលប្រកាសឲ្យប្រើប្រាស់ដោយព្រះរាជក្រម នស/រតម/០៥១៥/០០៤ ចុះថ្ងៃទី១៨ ខែឧសភា ឆ្នាំ២០១៥ និងស្របទៅនឹងនិន្នាការក្នុងពិភពលោក ជាពិសេសនិន្នាការក្នុងបណ្តាប្រទេសអាស៊ាន។ គោលការណ៍ណែនាំសម្រាប់អនុវត្តមាត្រា១១ នៃអនុសញ្ញាស្តីពីការត្រួតពិនិត្យថ្នាំជក់ ដែលព្រះរាជាណាចក្រកម្ពុជាបានផ្តល់សច្ចាប័នចូលជារដ្ឋភាគីតាំងពីឆ្នាំ២០០៥ តម្រូវឲ្យរដ្ឋភាគីបោះពុម្ពសារព្រមានសុខភាពលើកញ្ចប់បារីឲ្យបានយ៉ាងតិច៥០% គ្របដណ្តប់លើផ្ទៃសំខាន់ទាំងពីរ ដើម្បីបង្ការកុមារ និងយុវជន យុវនារី កុំឲ្យចាប់ផ្តើមជក់បារី និងជំរុញឲ្យអ្នកជក់លះបង់ទំលាប់ជក់។ សេចក្តីព្រាងអនុក្រឹត្យនេះមាន ៦ជំពូក និង១៨មាត្រា។
ក្រៅពីនេះអង្គប្រជុំពេញអង្គគណៈរដ្ឋមន្រ្តី ក៏បានអនុម័តបញ្ជូនកិច្ចព្រមព្រៀង ស្តីពីការបង្កើតធនាគារវិនិយោគហេដ្ឋារចនាសម្ព័ន្ធអាស៊ី ទៅសុំសច្ចាប័នពីស្ថាប័ននីតិប្បញ្ញត្តិផងដែរ។
គួរបញ្ជាក់ថា នៅក្នុងកិច្ចប្រជុំនាព្រឹកមិញនេះ សម្តេចតេជោ ហ៊ុន សែន ក៏បានកោតសរសើរចំពោះការខិតខំរបស់ក្រសួងពាណិជ្ជកម្ម និងក្រសួងសេដ្ឋកិច្ច និងហិរញ្ញវត្ថុ ដែលខិតខំធ្វើការងារជាមួយក្រុមហ៊ុនប្រេងឥន្ធនៈឯកជន ក្នុងការបញ្ចុះតម្លៃប្រេងឥន្ធនៈសម្រាប់ ការប្រើប្រាស់របស់ប្រជាពលរដ្ឋក្នុងរដូវបុណ្យភ្ជំបិណ្ឌ និងការបើកប្រាក់បៀវត្សរ៍ខែតុលា ជូនមន្រ្តីរាជការកងកម្លាំងប្រដាប់អាវុធ បានរហ័សទាន់រដូវបុណ្យភ្ជុំបិណ្ឌ។ សម្តេចតេជោ ក៏បានថ្លែងកោតសរសើរផងដែរ ចំពោះក្រសួងការងារ និងបណ្តុះបណ្តាលវិជ្ជាជីវៈ ដែលខំធ្វើការងារសម្របសម្រួលបានល្អក្នុងកិច្ចប្រជុំត្រីភាគីស្តីពីការតម្លើងប្រាក់ឈ្នួលជូនកម្មកររោងចក្រកាត់ដេរ និងស្បែកជើងរហូតដល់១៤០ដុល្លារអាមេរិកសម្រាប់ឆ្នាំ២០១៦ ដែលធ្វើឲ្យប្រាក់ឈ្នួលអប្បបរមា និងប្រាក់អត្ថប្រយោជន៍ផ្សេងៗរបស់កម្មករកើនឡើងដល់ជិត១៧០ ដុល្លារអាមេរិកក្នុង១ខែ៕
