Wednesday, June 10, 2015
សកម្មជន យុវជនហ្វេសប៊ុក គណបក្សប្រជាជនកម្ពុជា ខេត្តតាកែវ ទទួលវគ្គបំពាក់បំប៉នពិសេស លើជំនាញប្រើប្រាស់បណ្តាញផ្សព្វផ្សាយសង្គម
សកម្មជន យុវជនគណបក្សប្រជាជនកម្ពុជាមកពីគ្រប់ស្រុក ក្រុង ទូទាំងខេត្តតាកែវ និងក្រុមការងារថ្នាក់កណ្តាលចុះមូលដ្ឋានប្រមាណ២០០នាក់ ក្នុងនោះក៏មានការចូលរួមផងដែរពីក្រុមប្រឹក្សា និងអភិបាលរងស្រុកទាំង១០ នៃខេត្តតាកែវ ថ្ងៃទី៧ ខែមិថុនា ឆ្នាំ២០១៥ ពេញមួយថ្ងៃ ចាប់តាំងពីព្រឹកដល់ម៉ោង៦ល្ងាច នៅទីស្នាក់ការគណបក្សខេត្ត បានចូលរួមវគ្គបំពាក់បំប៉នជំនាញ និងបទពិសោធន៍ស៊ីជម្រៅ អំពីការប្រើប្រាស់ប្រព័ន្ធផ្សព្វផ្សាយសង្គម ជាពិសេស ការប្រើប្រាស់ហ្វេសប៊ុក ក្នុងគោលបំណងយល់ដឹង និងផ្សព្វផ្សាយគោលនយោបាយ និងសមិទ្ធផលសម្រេចបាននានារបស់គណបក្សប្រជាជនកម្ពុជា ព្រមទាំងពង្រឹងសមត្ថភាពលើការបកស្រាយ បំភ្លឺតបតទៅនឹងការបំពុលព័ត៌មានរបស់ក្រុមប្រឆាំង ដែលពួកគេ បាននិងកំពុងប្រើប្រាស់ហ្វេសប៊ុក បោកប្រាស់សាធារណមតិ ដើម្បីកេងចំណេញនយោបាយ។
នេះគឺជាវគ្គពិសេស និងដំបូងគេបំផុត ដែលក្រុមការងារហ្វេសប៊ុក នៅក្នុងខេត្តតាកែវត្រូវបានបង្កើតឡើង និងបានទទួលនូវការរៀនសូត្រ បណ្តុះបណ្តាលវគ្គបំពាក់បំប៉នដ៏មានសារៈសំខាន់នេះ ដែលរៀបចំដោយឯកឧត្តម សុខ សូកាន អ្នកតំណាងរាស្ត្រមណ្ឌលតាកែវនៃគណបក្សប្រជាជនកម្ពុជា ជាប្រធានក្រុមការងារយុវជនបក្ស និងឯកឧត្តម សុខ ពុទ្ធិវុធ ប្រធានក្រុមការងារយុវជនថ្នាក់កណ្តាលចុះជួយខេត្តតាកែវ សហការជាមួយក្រុមការងារជំនាញថ្នាក់កណ្តាលចុះជួយខេត្តតាកែវ ដឹកនាំដោយឯកឧត្តម ស្វាយ ស៊ីថា។
បន្ទាប់ពីមានមតិស្វាគមន៍អបអរសាទរគាំទ្រចំពោះការបើកវគ្គបំពាក់បំប៉នដោយឯកឧត្តម ឡាយ វណ្ណៈ អភិបាល នៃគណៈអភិបាលខេត្តតាកែវ និងឯកឧត្តមស្រី បេន ប្រធានក្រុមប្រឹក្សាខេត្តតាកែវរួចមក ឯកឧត្តម សុខ ពុទ្ធិវុធ បានមានប្រសាសន៍ថា វគ្គបំពាក់បំប៉នជំនាញហ្វេសប៊ុកនេះ បានផ្តល់ឱកាសឲ្យសកម្មជន យុវជនគណបក្សប្រជាជនកម្ពុជា ធ្វើការរួមគ្នាជាក្រុមៗ ដោយសាមគ្គីគ្នាជាធ្លុងមួយតាំងពីថ្នាក់ខេត្ត ស្រុក ដល់មូលដ្ឋានភូមិ ឃុំ សហការគ្នា បកស្រាយបំភ្លឺ បន្សាបព័ត៌មានបំពុលរបស់ក្រុមប្រឆាំង ជម្រុញការផ្សព្វផ្សាយអំពីសមិទ្ធផលរបស់គណបក្សប្រជាជន ចូលរួមការអភិវឌ្ឍប្រទេសជាតិជាមួយនឹងការប្រើប្រាស់បណ្តាញផ្សព្វផ្សាយសង្គមហ្វេសប៊ុក ឲ្យបានជាអត្ថប្រយោជន៍ដល់ប្រជាពលរដ្ឋទូទៅ ហើយដែលខ្លឹមសារ និងរូបភាពនានាដែលបានបង្ហោះផ្សាយ គឺមិនមែនជាសកម្មភាពហិង្សា និងការបង្កជម្លោះនោះទេ។
ឯកឧត្តម សុខ សូកាន អ្នកតំណាងរាស្ត្រមណ្ឌលតាកែវ និងជាប្រធានក្រុមការងារយុវជនគណបក្សប្រជាជនកម្ពុជាខេត្តតាកែវ បានមានប្រសាសន៍ថា ដោយការកើនឡើងនៃចំនួនអ្នកប្រើប្រាស់ហ្វេសប៊ុក និងការរីកចម្រើននៃអ៊ីនធឺណិត តួលេខចុងក្រោយនៃអ្នកប្រើប្រាស់ហ្វេសប៊ុកនៅក្នុងប្រទេសកម្ពុជា ដែលបានបង្កើត និងចុះឈ្មោះប្រើប្រាស់ មានចំនួនប្រមាណ២លាន២សែននាក់ហើយ ដូច្នេះ តាមរយៈវគ្គបំពាក់បំប៉នពិសេសនេះ សិក្ខាកាមទាំងអស់ នឹងបានយល់ដឹងនូវជំនាញលើការប្រើប្រាស់ហ្វេសប៊ុក ការតភ្ជាប់ប្រព័ន្ធបណ្តាញសង្គមរបស់ក្រុមការងារថ្នាក់កណ្តាលជាមួយនិងថ្នាក់ខេត្ត ក្រុង និងស្រុកនៅក្នុងខេត្តតាកែវ ស្វែងយល់ចំណេះដឹងអំពីស្ថានភាពទូទៅនៃការអភិវឌ្ឍបច្ចេកវិទ្យា និងការប្រើប្រាស់អ៊ីនធឺណិត ជាពិសេសប្រព័ន្ធផ្សព្វផ្សាយសង្គម ដូចជា Facebook ,Twitter, Youtube…..។ល។ ក្រៅពីនេះ សកម្មជន យុវជនទាំងអស់ នឹងបានទទួលនូវចំនេះដឹងអំពីការវិវឌ្ឍនៃបច្ចេកវិទ្យា ការផ្តួចផ្តើមគំនិត និពន្ធ បច្ចេកទេសលើការផលិតខ្លឹមសារព័ត៌មាន ការចែកចាយ ផ្សព្វផ្សាយ និងពង្រីកបណ្តាញជាប្រព័ន្ធ ជាក្រុមៗសម្រាប់ការងារហ្វេសប៊ុកដ៏ពេញនិយមនាពេលបច្ចុប្បន្ន។ វគ្គនេះនឹងបានជួយបង្កើន នូវគំនិតជាជំនួយស្មារតីដល់យុវជនបក្សក្នុងការប្រើប្រាស់ប្រព័ន្ធផ្សព្វផ្សាយសង្គម ជាពិសេស Facebook ឲ្យមានប្រសិទ្ធភាព។
ឯកឧត្តម ស្វាយ ស៊ីថា ក្រុមការងារជំនាញថ្នាក់កណ្តាលចុះជួយខេត្តតាកែវ ដែលបានដឹកនាំ មន្ត្រីជំនាញ និងជាអ្នកសម្របសម្រួលបើកវគ្គបំពាក់បំប៉នពិសេសនេះ បានមានប្រសាសន៍ថា គោលដៅធំចម្បងក្នុងការបើកវគ្គបណ្តុះបណ្តាលជំនាញហ្វេសប៊ុកនេះ គឺការប្រែក្លាយពីការលេងហ្វេសប៊ុក ឲ្យសកម្មជន យុវជនគណបក្សប្រជាជនកម្ពុជា ទៅជាអ្នកធ្វើការងារហ្វេសប៊ុក ដោយត្រូវកំណត់ឲ្យមានគោលដៅ និងការដឹកនាំច្បាស់លាស់ ធ្វើការរួមគ្នាជាប្រព័ន្ធ ស្វែងយល់ពីបច្ចេកវិទ្យា ចែករំលែកព័ត៌មានឲ្យគ្នាទៅវិញទៅមកឲ្យបានលឿនរហ័ស ដោយប្រើប្រាស់បច្ចេកវិទ្យាថ្មីៗ ធ្វើការផលិត ផ្សព្វផ្សាយ ពង្រីកបណ្តាញឲ្យបានទូលំទូលាយ។
ឯកឧត្តម ស្វាយ ស៊ីថា បានថ្លែងថា នេះជាវគ្គបណ្តុះបណ្តាលលើកទី១ ចាប់ផ្តើមពីខេត្តតាកែវមុនដំបូងគេ ដែលបានបង្កើតឡើងនូវក្រុមយុវជនហ្វេសប៊ុក នៅក្នុងក្របខណ្ឌគណបក្សប្រជាជនកម្ពុជា ដែលមានក្បាលម៉ាស៊ីនដឹកនាំគ្រប់គ្រងច្បាស់លាស់ សំដៅការពារសមិទ្ធផល ដែលគណបក្សប្រជាជនកម្ពុជាសម្រេចបាន និងបន្តអនុវត្តការយកចិត្តទុកដាក់ដោះស្រាយ និងលើកកម្ពស់ជីវភាពរស់នៅរបស់ប្រជាពលរដ្ឋឲ្យកាន់តែប្រសើរឡើង។ ជាពិសេស ជាងនេះទៅទៀត គឺក្រុមការងារទាំងអស់ តាំងពីថ្នាក់ខេត្ត ថ្នាក់ស្រុក ឃុំ ត្រូវចូលរួមធ្វើសកម្មភាពឲ្យផុសផុល និយាយការពិត បកស្រាយបំភ្លឺ ប្រឆាំងទៅនឹងការបណ្តុះមនោគមវិជ្ជារបស់ក្រុមប្រឆាំង ដែលបានវាយប្រហារមកលើគណបក្សកាន់អំណាចដោយពុំផ្អែកលើការពិត។ ឯកឧត្តម ស្វាយ ស៊ីថា បានបញ្ជាក់ថា ប្រសិនណាជាយើងមិនធ្វើការបកស្រាយបំភ្លឺ ហើយនិងបន្សាបនូវព័ត៌មានអវិជ្ជមានដែលបានផ្សព្វផ្សាយនៅក្នុងប្រព័ន្ធផ្សព្វផ្សាយសង្គមថ្មី ជាពិសេស ហ្វេសប៊ុកនោះទេ ពេលនោះហ្វេសប៊ុក នឹងក្លាយទៅជាឧបករណ៍មួយដូចជា «ច្រែះស៊ីដែក»។
ក្រៅពីនេះ ឯកឧត្តម ស្វាយ ស៊ីថា បានជម្រុញឲ្យក្រុមការងារទាំងអស់ត្រូវខិតខំបំពេញបេសកកម្មរបស់ខ្លួន លើការអនុវត្តជាក់ស្តែង ដោយចងជាបណ្តាញទំនាក់ទំនងគ្នាឲ្យបានគ្រប់ផ្នែក គ្រប់ជំនាញតាំងពីថ្នាក់លើដល់ក្រោម និងត្រូវតែបន្សាបនូវព័ត៌មានបំភ្លើស បំភ្លៃ និងបំភ័ន្តរបស់ក្រុមប្រឆាំង និងត្រូវតែគោរពឲ្យបានខ្ជាប់ខ្ជួននូវស្មារតីសាមគ្គីភាព ឯកភាពផ្ទៃក្នុង ដើម្បីធ្វើកិច្ចការ ដ៏មានសារៈសំខាន់មួយនេះបានទទួលជោគជ័យ។ មុននឹងបិទបញ្ចប់វគ្គ ថ្នាក់ដឹកនាំ និងសិក្ខាកាមទាំងអស់បានឯកភាពនឹងជួបប្រជុំគ្នាសារជាថ្មីនៅខែបន្ទាប់ខាងមុខ ដើម្បីត្រួតពិនិត្យការងារដែលបានដាក់ចេញ និងយកទៅអនុវត្ត។ ជាមួយគ្នានេះ ដោយមានការជួយឧបត្ថម្ភពីសប្បុរសជន ឯកឧត្តម ស្វាយ ស៊ីថា ក៏បានប្រគល់ជូននូវទូរស័ព្ទម៉ាក SamSung ចំនួន១០គ្រឿងជូនឯកឧត្តម សុខ សូកាន និងឯកឧត្តម សុខ ពុទ្ធិវុធ ដើម្បីប្រើប្រាស់នៅក្នុងការងារយុវជនហ្វេសប៊ុកខេត្តតាកែវផងដែរ៕
អត្ថបទ៖ ក្រុមការងារយុវជនគណបក្សប្រជាជនកម្ពុជាខេត្តតាកែវ
Tuesday, June 9, 2015
ព្រឹទ្ធសភាបោះឆ្នោតជ្រើសតាំងប្រធាន និងអនុប្រធានថ្មី
នៅវេលា ម៉ោង ៣ រសៀល ថ្ងៃទី ០៩ ខែមិថុនា ឆ្នាំ ២០១៥នេះ អគ្គលេខាធិការដ្ឋាន ព្រឹទ្ធសភា បានរៀបចំកិច្ចប្រជុំវិសាមញ្ញមួយ ដើម្បីបោះឆ្នោតជ្រើសតាំង ប្រធានព្រឹទ្ធសភា និងអនុប្រធានទី ១ ព្រឹទ្ធសភា។
នៅក្នុងដំណើការនៃការបោះឆ្នោត ជ្រើសតាំងប្រធាន និងអនុប្រធានទី១ ព្រឹទ្ធសភា ពេលនេះបានដំណើការទៅយ៉ាងរលូន ដោយក្នុងនោះ ឯកឧត្តម សាយ ឈុំ បានជាប់ជាប្រធានព្រឹទ្ធសភា នៃកម្ពុជា ដោយទទួលបានសម្លេងគាំទ្រ ៥២ លើ ៥២ នៃសមាជិកព្រឹទ្ធសភា ដែលបានចូលរួមបោះឆ្នោតទាំងអស់ចំនួន ៥២រូប។ ដោយឡែកឯកឧត្តម នៃ ប៉េណា បានជាប់ជាអនុប្រធានទី១ នៃព្រឹទ្ធសភាជាតិ ដោយសម្លេងគាំទ្រ ៥១ លើ ៥២។
សូមបញ្ជាក់ថា ការបោះឆ្នោតជ្រើសតាំងប្រធានព្រឹទ្ធសភា និងអនុប្រធានទី១ថ្មីនេះ ធ្វើឡើងបន្ទាប់ពីសម្តេចអគ្គធម្មពោធិសាល ជា ស៊ឹម ប្រធានព្រឹទ្ធសភាជាតិ បាន ទទួលមរណភាព កាលពីថ្ងៃទី ០៨ ខែមិថុនា ឆ្នាំ២០១៥កន្លងទៅ ក្នុងជន្មាយុ ៨៣ឆ្នាំ ដោយជរាពាធ៕
អត្ថបទ៖សុភាព
សមាគមយុវជនកំណែទម្រង់រដ្ឋ ចេញសេចក្តីអំពាវនាវ ជុំវិញទង្វើរអសីលធម៌មួយចំនួនដែលកើតឡើងនៅលើបណ្តាញផ្សព្វផ្សាយសង្គមថ្មី
នៅក្នុងសេចក្តីអំពាវនាវ របស់ លោក ប៉ុល សីហា ប្រធានសមាគមយុវជនកំណែទម្រង់រដ្ឋ ដែលចេញផ្សាយនៅថ្ងៃទី ០៩ ខែមិថុនា ឆ្នាំ ២០១៥ បានលើកឡើងថា ដោយមើលឃើញថា យុវជនមួយចំនួន នាពេលសព្វថ្ងៃនេះ បាននិងកំពុងប្រើប្រាស់បណ្តាញសង្គមដូចជា website youtube, twitter, google plus, blog ជាពិសេស facebook ដើម្បីបញ្ចេញ និងផ្សព្វផ្សាយទស្សនៈ គំនិតយោបល់ផ្ទាល់ខ្លួន កាត់តរូបភាព បង្ហោះផ្សាយ រិះគន់ ជេរប្រមាថអ្នកដទៃបែបអនាធិបតេយ្យ ដោយគ្មានសីលធម៌ នាំឲ្យបាត់បង់អស់នូវតម្លៃ សេចក្តីថ្លៃថ្នូររបស់យុវជនយើង និងម្យ៉ាងទៀតវាបានធ្វើឲ្យប៉ះពាល់ដល់ប្រពៃណី វប្បធម៌ និងអរិយធម៌ដ៏ល្អផូរផង់របស់ខ្មែរ ដែលជាជាតិសាសន៍ដ៏ចំណាស់ជាងគេនៅក្នុងតំបន់អាស៊ី បែកអាគ្នេយ៍យើងនេះ។
សេចក្តីអំពាវនាវដដែលបានសង្កត់ធ្ងន់ថា ជាក់ស្តែង ក្រោយពីមរណភាពរបស់លោក ជា ស៊ីម ប្រធានព្រឹទ្ធសភានៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា កាលពីថ្ងៃទី០៨ ខែមិថុនា ឆ្នាំ២០១៥ កន្លងមកនេះ យើងសង្កេតឃើញថា មានយុវជនមួយចំនួន មិនត្រឹមតែមិនចូលរួមរំលែកទុក្ខដ៏ក្រៀមក្រំ នៃការបាត់បង់ឥស្សរជន ថ្នាក់ដឹកនាំប្រកប ដោយវីរភាព ដែលធ្លាប់ចូលរួមដឹកនាំរំដោះប្រទេសជាតិ ពីរបបប្រល័យពូជសាសន៍ រំលត់សង្រ្គាមស៊ីវិលដ៏ប្រល័យ ការផ្សះផ្សារបង្រួបបង្រួមជាតិ និងការស្វែងរកសន្តិភាពជូនប្រទេសជាតិកម្ពុជាប៉ុណ្ណោះទេ ក៏ប៉ុន្តែយុវជនមួយចំនួន បានជេរប្រមាថ ប្រទេចផ្តាសារយ៉ាងធ្ងន់ធ្ងរបំផុតទៅលើអ្នកស្លាប់ និងថ្នាក់ដឹកនាំដែលនៅរស់។
លោក ប៉ុល សីហា ប្រធានសមាគមកំណែទម្រង់រដ្ឋ បានបញ្ជាក់ក្នុងសេចក្តីអំពាវនាវនេះថា ក្នុងស្មារតីលើកស្ទួយសិទ្ធិសេរីភាពក្នុងការបញ្ចេញមតិ ការគោរពសិទ្ធិមនុស្ស និងការជំរុញលទ្ធិប្រជាធិបតេយ្យនៅកម្ពុជា សមាគមយុវជនកំណែទម្រង់រដ្ឋ គាំទ្រឲ្យមានការិះគន់ ការបញ្ចេញមតិស្រប ឬប្រឆាំង ប្រកបដោយសេចក្តីថ្លៃថ្នូរ មានគុណធម៌ មានសីលធម៌ សុជីវធម៌ ដោយរក្សាបាននូវតម្លៃរបស់យុវជន ជាបញ្ញាវន្ត និងជាអ្នកបន្តវេនរបស់ប្រទេសជាតិនៅថ្ងៃក្រោយ។ ដើម្បីរក្សាបាននូវតម្លៃ សេចក្តីថ្លៃថ្នូររបស់យុវជន សមាគមយុវជនកំណែទម្រង់រដ្ឋ សូមអំពាវនាវយ៉ាងទទូចដល់យុវជនខ្មែរ យុវនារី និងបងប្អូនជនរួមជាតិខ្មែរទាំងអស់ មេត្តាបញ្ចេញមតិរិះគន់ដើម្បីស្ថាបនា មានហេតុផល មានសីលធម៌ គោរពគ្នាទៅវិញទៅមក បញ្ចៀសបាននូវការបង្កកំហឹង ជំលោះ ឬការប៉ះពាល់ដល់កេរ្តិ៍ឈ្មោះអ្នកដទៃ ជាពិសេស សូមបញ្ឈប់រាល់អំពើទាំងឡាយដែលកំពុងធ្វើឲ្យសង្គមខ្មែរអាប់ឱន នាំឲ្យសាធារណៈមតិជាតិ និងអន្តរជាតិ គេវាយតម្លៃមកសលើយុវជនខ្មែរ៕
អត្ថបទ៖ សុភាព
ក្រុមប្រឹក្សាសហជីពជាតិកម្ពុជា ស្នើសុំបើកកិច្ចប្រជុំត្រីភាគី ដើម្បីពិភាក្សាពីការតម្លើងប្រាក់ឈ្នួលអប្បបរមាកម្មករ សម្រាប់ឆ្នាំ២០១៦
យោងតាមលិខិតរបស់ លោក សោម អូន ប្រធានក្រុមប្រឹក្សាសហជីពជាតិកម្ពុជា ផ្ញើជូនឯកឧត្តម អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានគណៈកម្មការដោះស្រាយបញ្ហាកូដកម្ម បាតុកម្មនៅតាមគ្រប់មុខសញ្ញា នៅថ្ងៃទី ០៩ ខែមិថុនា ឆ្នាំ២០១៥នេះ បានបញ្ជាក់ថា ក្រុមប្រឹក្សាសហជីពជាតិកម្ពុជា សុំបើកកិច្ចប្រជុំត្រីភាគី ដើម្បីពិភាក្សាលើការតម្លើងប្រាក់ឈ្នួលអប្បបរមាកម្មករនិយោជិត នៅក្នុងវិស័យកាត់ដេរសំលៀកបំពាក់ និងស្បែកជើង សម្រាប់ឆ្នាំ២០១៦។
នៅក្នុងលិខិតដដែលបានឲ្យដឹងថា ការឯកភាពត្រីភាគីនៃនយោបាយប្រាក់ឈ្នួលអប្បបរមា ត្រូវបានពិភាក្សាតម្លើងជារៀងរាល់ឆ្នាំ។ ផ្អែកលើស្មារតីអង្គប្រជុំក្រុមប្រឹក្សាភិបាល CCNU ថ្ងៃទី ០៣ ខែមិថុនា ឆ្នាំ២០១៥ សមាជិកក្រុមប្រឹក្សាភិបាល បានបើកកិច្ចប្រជុំពិភាក្សាទៅលើការតម្លើងប្រាក់ឈ្នួលអប្បបរមារបស់កម្មករនិយោជិតសម្រាប់ឆ្នាំ២០១៦ ដែលពេលវេលាគួរតែមានការចាប់ផ្តើមនៅកិច្ចដំណើរការប្រជុំត្រីភាគី ចាប់ពីខែកក្កដា ឆ្នាំ២០១៥នេះតទៅ ដើម្បីផ្តល់ឱកាសសមស្របដល់ភាគីពាក់ព័ន្ធ ក្នុងការពិភាក្សាដោយយោងតាមស្មារតីយន្តការត្រីភាគីដែលបានឯកភាពគ្នា ជាគោលការណ៍ចំពោះការពិភាក្សា ការតម្លើងប្រាក់ឈ្នួលអប្បបរមារៀងរាល់មួយឆ្នាំម្តង។
ក្រុមប្រឹក្សាសហជីពជាតិកម្ពុជា (CCNU) កំពុងតែធ្វើការសិក្សាអំពីលទ្ធផលនៃការតម្លើងប្រាក់ឈ្នួលអប្បបរមានេះ ដោយផ្នែកលើកត្តាសេដ្ឋកិច្ច កត្តាអតិផរណា កត្តាប្រកួតប្រជែង និងកត្តាជីវភាពរបស់កម្មករ។ល។ លោក សោម អូន បានបញ្ជាក់ក្នុងលិខិតថា បន្ទាប់ពីសិក្សាចប់យើងខ្ញុំនឹងជូនអំពីទូរលេខទៅ (LAC) អំពីចំនួនស្នើសុំតម្លើងប្រាក់ឈ្នួលអប្បបរមានេះ។
អត្ថបទ៖ សុភាព
អង្គជំនុំជម្រះសាលាដំបូង បើកសវនាការលើអង្គហេតុការដ្ឋានការងារ ព្រលានយន្តហោះកំពង់ឆ្នាំង
តាមការឲ្យដឹងពីលោក នេត្រ ភក្ត្រា មន្ត្រីនាំពាក្យសាលាក្តីខ្មែរក្រហម នៅថ្ងៃទី៩ ខែមិថុនា ឆ្នាំ ២០១៥ នេះ អង្គជំនុំជម្រះសាលាដំបូងនៃអង្គជំនុំជម្រះវិសាមញ្ញក្នុងតុលាការកម្ពុជា បានផ្តើមបើកសវនាការ លើអង្គហេតុការដ្ឋានការងារព្រលានយន្តហោះកំពង់ឆ្នាំង ស្ថិតនៅក្នុងក្របខណ្ឌនៃការជំនុំជម្រះលើសំណុំរឿង ០០២/០២ វគ្គទី ២ ដែលផ្តោតលើការដ្ឋានការងារនៅក្នុងរបបខ្មែរក្រហម។ សាក្សី និងដើមបណ្តឹងរដ្ឋប្បវេណីដែលពាក់ព័ន្ធនឹងត្រូវកោះហៅមកផ្តល់សក្ខីកម្មជាបន្តបន្ទាប់។ សាក្សីដំបូងដែលត្រូវបាន កោះហៅមកផ្តល់សក្ខីកម្ម គឺលោក ចាន់ ម៉ន ដែលជានិរសារនៅក្នុងតំបន់ការដ្ឋានការងារព្រលានយន្តហោះ ចាប់ពីដើមដំបូងមក បានឡើងមកផ្តល់សក្ខីកម្ម។
លោក ចាន់ ម៉ន បានប្រាប់ទៅកាន់អង្គជំនុំជម្រះសាលាដំបូងអំពីដំណើរនៃការកសាងព្រលានយន្តហោះ និងការទទួលបានសម្ភារៈបរិក្ខារផ្សេងៗ ដូចជាគ្រឿងចក្រ រំសេវផ្ទុះសម្រាប់បំបែកថ្ម និងសម្ភារៈចាំបាច់ផ្សេងៗទៀត ត្រូវបានបញ្ជូនពីប្រទេសចិនមក។ លោកបានឱ្យដឹងថា តាមអ្វីដែលគាត់បានដឹងអ្នកបច្ចេកទេសចិន ប្រមាណ១២០នាក់ បានចូលរួមក្នុងការកសាងព្រលានយន្តហោះកំពង់ឆ្នាំង និងក្រោយមកត្រូវបានបញ្ជូនទៅកាន់តំបន់ផ្សេងៗ។
សាក្សីក៏បានរៀបរាប់អំពីស្ថានភាពការងារនៅទីនោះ ដោយបានរៀបរាប់ពីការងារដ៏លំបាកដែលធ្វើឡើងដោយកម្មករជាប្រជាពលរដ្ឋ។ លោកបានជម្រាបទៅកាន់អង្គជំនុំជម្រះថា កម្មករខ្លះដែលធ្វើការងារនៅទីនោះ ជាទាហានដែលបានមកឮ ពីភូមិភាគបូព៌ា ត្រូវបានបញ្ជូនមកធ្វើការងារដ៏លំបាកនៅក្នុងការដ្ឋាននេះ ដោយសារតែគេចោទប្រកាន់ពួកគាត់ថាមានជាប់និន្នាការខ្មាំង។ សាក្សីបាននិយាយថា នៅពេលខ្លះ កម្មករជានារីបានលោតចូលរថយន្តរូលូកិនថ្នល់សម្លាប់ខ្លួន ដោយសារតែមិនអាចនឹងទ្រាំទ្រនឹងស្ថានភាពដ៏លំបាកនៃការងារ។ លោកក៏បានប្រាប់ផងដែរថា មានការចាប់ខ្លួនកម្មករ និងបានបញ្ជូនចេញនៅពេលយប់។
លោក នេត្រ ភក្រ្តា បានមានប្រសាសន៍បន្ថែមទៀតថា នៅថ្ងៃនេះក្នុងដំណើការសវនាការ លើការដ្ឋានការងារព្រលានយន្តហោះកំពង់ឆ្នាំងនេះដែរប្រជាពលរដ្ឋ មកពីស្រុករលៀផ្អៀរ និងកំពង់ត្រឡាច ខេត្តកំពង់ឆ្នាំងចំនួន ៥០០ នាក់ ដែលនៅជាប់នឹងទីតាំងការដ្ឋានព្រលានហោះកំពង់ឆ្នាំង នឹងមកចូលរួមស្តាប់ដំណើរការសវនាការនេះ។ ការដ្ឋានការងារព្រលានយន្តហោះកំពង់ឆ្នាំង មានទីតាំងនៅក្នុងភូមិប៉ាតឡាង ឃុំក្រាំងលាវ ស្រុករលាប្អៀរ ខេត្តកំពង់ឆ្នាំង។ ព្រលានយន្តហោះនេះនៅមានរូបរាងនៅឡើយ ដែលគ្របដណ្តប់លើផ្ទៃដីចំនួន ៣០០ ហិកតា រួមមានផ្លូវយន្តហោះរត់ចំនួនពីរខ្សែ មានបណ្តោយប្រវែង ២៤០០ម៉ែត្រ និងមានប៉មត្រួតពិនិត្យការហោះហើរ និងអគាររដ្ឋបាលផ្សេងទៀត។ ទីតាំងនេះមានបណ្តោយប្រវែង ៧ គីឡូម៉ែត្រ ដែលនៅក្នុងទីតាំងនោះមានផ្ទះរបស់ប្រធានគ្រប់គ្រងការដ្ឋាន និងរោងបាយរួមមួយ ព្រមទាំងមានរូងក្រោមដីមួយ ដែលសាងសង់មិនទាន់រួចនៅក្បែរច្រកភ្នំជិតទីតាំង។ ផែនការក្នុងការកសាងព្រលានយន្តហោះយោធាថ្មីមួយ ត្រូវបានយកមកពិនិត្យ និងពិភាក្សា ដោយគណៈអចិន្ត្រៃយ៍នៃបក្សកុម្មុយនិស្តកម្ពុជា នៅក្នុងកិច្ចប្រជុំរបស់ខ្លួន នាចុងឆ្នាំ ១៩៧៥ ឬដើមឆ្នាំ ១៩៧៦ ហើយជម្រើសនៃការជ្រើសរើសខេត្តកំពង់ឆ្នាំង បានប្រកាសជាផ្លូវការនៅក្នុង អង្គប្រជុំថ្ងៃទី១៩ ដល់ថ្ងៃទី២១ ខែមេសា ឆ្នាំ ១៩៧៦។ តាមកំណត់ហេតុអង្គប្រជុំនៃគណៈអចិន្ត្រៃយ៍បានបង្ហាញថា ការដ្ឋាននេះបានចាប់ផ្តើមរួចទៅហើយក្នុងអំឡុងខែឧសភា ឆ្នាំ ១៩៧៦។ ការដ្ឋាននេះបានដំណើរការរហូតដល់ ខែមករា ឆ្នាំ ១៩៧៩ ដែលពេលនោះមិនទាន់បានរួចរាល់ជាស្ថាពរនៅឡើយ។
ការបើកសវនាការលើអង្គហេតុទាក់ទងនឹងការដ្ឋាន ការងារព្រលានយន្តហោះកំពង់ឆ្នាំងនេះធ្វើឡើងបន្ទាប់ពីអង្គជំនុំសាលាដំបូងបានបើកសវនាការ លើអង្គហេតុការដ្ឋានការងារទំនប់ ១ មករា នៅក្នុងខេត្តកំពង់ធំ។ សាក្សី និងដើមបណ្តឹងរដ្ឋប្បវេណីចំនួន ៨ រូបត្រូវបានកោះហៅមកផ្តល់សក្ខីកម្មចន្លោះពីថ្ងៃទី ១៩ ខែឧសភា ដល់ថ្ងៃទី ៥ មិថុនា ឆ្នាំ ២០១៥។ សាក្សី និងដើមបណ្តឹងរដ្ឋប្បវេណីទាំងនេះ ជាជនរងគ្រោះ និងជាអ្នកពាក់ព័ន្ធដោយផ្ទាល់លើការដ្ឋានការងារទំនប់ ១មករា។
Subscribe to:
Posts (Atom)