ឯកឧត្តម ឡុង វិសាលោ រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ បានចាត់ទុកពាក្យសម្តីរបស់ឯកឧត្តម សម រង្ស៊ី ថាជាការមើលងាយបន្ទាបបន្ថោករាជរដ្ឋាភិបាលយ៉ាងខ្លាំង។ នេះបើយោងតាម វេទិការតុមូល ស្តីពី «ផែនទី ១/១០០.០០០ ដែលទទួលស្គាល់ជាអន្តរជាតិ ជាមួយប្រទេសជិតខាងគឺពិតជាអាយុជីវិតរបស់ព្រះរាជាណាចក្រកម្ពុជា» ដែលផ្សាយថ្ងៃទី២២ ខែកក្កដា ឆ្នាំ២០១៥។
គួររំលឹកថា កាលពីថ្ងៃទី១៦ ខែកក្កដា ឆ្នាំ២០១៥ កន្លងទៅ ឯកឧត្តម សម រង្ស៊ី បានបង្ហោះនៅលើបណ្តាញផ្សព្វផ្សាយសង្គម(Facebook)ថា ផែនទីបារាំងមុនឆ្នាំ ១៩៥៣ ខ្នាត ១/១០០.០០០ បង្ហាញពីព្រំដែនកម្ពុជា-វៀតណាម ទាំង ២៦ ផ្ទាំង មានដាក់លក់នៅប្រទេសបារាំង ក្នុងតំលៃ ១៥៥,៩១ Euros ស្មើរនឹង ១៦៨ដុល្លារអាមេរិក ហើយគណបក្សសង្គ្រោះជាតិបានទិញផែនទីទាំង២៦ផ្ទាំងយកមកបង្ហាញប្រជាពលរដ្ឋខ្មែរទូទាំងប្រទេស ដោយដាក់ក្នុង DVD។
ឯកឧត្តម ឡុង វិសាលោ បានថ្លែងថា «ពាក្យដែលថាទិញផែនទីតំលៃ ១៦៨$ ពិតជាការបន្ទាបបន្ថោករាជរដ្ឋាភិបាលធ្ងន់ណាស់ ពីព្រោះសម្តេចអគ្គមហាសេនាបតីតេជោ ហ៊ុន សែន បានសរសេរលិខិតទៅសុំ ប្រទេសបារាំង ដែលជាអ្នកផ្តើមគំនិតធ្វើផែនទីបោនខ្នាត ១/១០០.០០០ រួមជាមួយនឹងអ្នកបច្ចេកទេស ដើម្បីយកមកជួយធ្វើការផ្ទៀតផ្ទាត់ផែនទី ដែលយើងកំពុងប្រើនេះថាវាមានខុសវាមានត្រូវកំរិតណា? ដូច្នេះវាជាការខិតខំប្រឹងប្រែងដ៏ម៉ត់ចត់ ដ៏ត្រឹមត្រូវ ហើយច្បាស់លាស់ របស់រាជរដ្ឋាភិបាល ចុះហេតុអ្វីពេលនេះ ឯកឧត្តម សម រង្ស៊ី យកផែនទីដែលទិញតាមផ្សារតំលៃ ១៦៨$ យកមកប្រៀបធៀបជាមួយនឹងការងារដែលរាជរដ្ឋាភិបាលបាន និងកំពុងខិតខំប្រឹងប្រែង សុំមហាអំណាចធំៗយកមកកំណត់ព្រំដែនរបស់យើងឲ្យជាក់លាក់បែបនេះ?»
បន្ថែមពីលើនេះឯកឧត្តម ឡុង វិសាលោ បានសំណូមពរយ៉ាងទទូចដើម្បីឲ្យ ឯកឧត្តម សម រង្ស៊ី សម្តែងនូវភាពក្លាហានហ៊ានបញ្ចេញផែនទីនោះមក កុំបានតែនិយាយចោលយ៉ាងដូច្នេះ ហើយឯកឧត្តម ឡុង វិសាលោ បានហៅអំពើរបស់ឯកឧត្តម សម រង្ស៊ី ថាជាការរោលឲ្យខ្លោច រោចឲ្យឆៅ។
