ក្រុមហ៊ុនវិនិយោគមកពីសហរដ្ឋអាមេរិកមានចំណាប់អារម្មណ៏ចំពោះវិស័យកសិកម្មនៅកម្ពុជា ដោយបានមកធ្វើការស្វែងយល់អំពី ឱកាសថាតើត្រូវវិនិយោគអ្វីដែលអាចផ្តល់ផលប្រយោជន៏ដល់កសិករកម្ពុជាដោយផ្ទាល់។
លើកឡើងនៅក្នុងជំនួបពិភាក្សាការងារនៅវិមានមិត្តភាពនៃទីស្តីការគណៈរដ្ឋមន្រ្តី នារសៀលថ្ងៃទី ២២ ខែ កក្កដា ឆ្នាំ២០១៥ លោក សាមុអែល អាល់លែន (Samuel Allen) អគ្គនាយកប្រតិបត្តិ និងជាប្រធានក្រុមប្រឹក្សាភិបាលក្រុមហ៊ុនDeer &Company បានជំរាបជូនឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្រ្តី រដ្ឋមន្ត្រីទទួលបន្ទុកទីស្តីការគណៈរដ្ឋមន្រ្តី អំពីចំណាប់អារម្មណ៏ក្នុងការវិនិយោគលើវិស័យកសិកម្មនៅកម្ពុជា ដោយលោកនឹងធ្វើការស្វែងយល់ឲ្យបានច្បាស់ថាតើ មានវិធីណាអាចជួយដល់កសិករកម្ពុជាក្នុងការជួយអភិវឌ្ឍវិស័យកសិកម្មនេះឲ្យទទួលបានការរីកចំរើន។
លោក Samuel Allen បានជំរាបជូនឯ.ឧ ឧបនាយករដ្ឋមន្ត្រីសុខ អានថា ប្រតិភូលោក មកកាន់កម្ពុជាពេលនេះគឺដើម្បីសិក្សា ស្វែងយល់បន្ថែមទៀត ថាតើធ្វើយ៉ាងណាការលក់ផលិតផលក្រុមហ៊ុនអាមេរិក(ត្រាក់ទ័រ)សម្រាប់វិស័យកសិកម្មអាចជួយធ្វើឲ្យកសិករទទួលបានផលិតផលល្អផង ហើយថាតើត្រូវ វិនិយោគបែបណាជាមួយកសិករកម្ពុជាថ្វីត្បិតតែកម្ពុជាមានដីកសិកម្មច្រើនប៉ុន្តែដីទាំងនោះបានបែងចែកជាចំណែកតូចៗ ឬមួយអាចប្រមូលផ្តុំជាលក្ខណៈកសិដ្ឋានធំៗដើម្បីភាពងាយស្រួលដល់គ្រឿងចក្រអាចដំណើរការបាន។
គួរបញ្ជាក់ថាប្រតិភូក្រុមហ៊ុនអាមេរិកដែលមកកាន់កម្ពុជានេះ គឺជាក្រុមហ៊ុនត្រាក់ទ័រចនឌៀរ ដែលជាក្រុមហ៊ុនលក់សម្ភារៈកសិកម្មដ៏ធំរបស់សហរដ្ឋអាមេរិកក្នុងមួយឆ្នាំៗបានលក់ត្រាក់ទ័រទៅឲ្យប្រទេសថៃប្រមាណ៥ម៉ឺនគ្រឿង និងលក់ទៅកាន់ប្រទេសឥណ្ឌាប្រមាណជាង៦០០ពាន់គ្រឿង ដោយឡែកសម្រាប់ប្រទេសកម្ពុជាក្រុមហ៊ុនអាមេរិកនេះបាននាំត្រាក់ទ័រចូល បានប្រហែលត្រឹម២ពាន់៥រយគ្រឿងប៉ុណ្នោះ។
ជាការឆ្លើយតប ឯកឧត្តមឧបនាយករដ្ឋមន្ត្រី សុខ អាន បានស្វាគមន៏និងគាំទ្រចំពោះក្រុមហ៊ុន អាមេរិក ដែលមានចំណាប់អារម្មណ៏លើវិស័យកសិកម្ម ដោយឯ.ឧបានជំរាបជូនថា កម្ពុជានៅមានសក្តានុពលខ្ពស់ខាងវិស័យកសិកម្ម រីឯប្រជាជនកម្ពុជាប្រហែលពី ៧០ទៅ៨០% ជាកសិករប្រកបរបរកសិកម្ម ដូច្នេះការវិនិយោគលើវិស័យកសិកម្មនឹងផ្តល់ប្រយោជន៏ផ្ទាល់ក្នុងការជួយធ្វើឲ្យប្រជាពលរដ្ឋកម្ពុជាមានការរីកចំរើន។
ក្នុងនាមរាជរដ្ឋាភិបាលកម្ពុជាឯ.ឧសុខ អានបានលើកទឹកចិត្តដល់ក្រុមហ៊ុនអាមេរិក ឲ្យចូលមកធ្វើការវិនិយោគឲ្យបានច្រើនលើវិស័យកសិកម្មនេះ ដោយនាំមកនូវសេវាបច្ចេកវិទ្យាទំនើបៗដើម្បីធ្វើការអភិវឌ្ឍវិស័យកសិកម្ម ឲ្យបានរីកចំរើន ក្នុងការជួយទ្រទ្រងជីវភាពកសិករឲ្យបានធូធារថែមទៀត។
ឯកឧត្តមឧបនាយករដ្ឋមន្ត្រី ក៏បានជំរាបជូនដែរថាក្រៅពីវិស័យកសិកម្ម កម្ពុជានៅមានសក្តានុពលជាច្រើនទៀតសម្រាប់ការវិនិយោគ មានវិស័យវាយនភណ្ឌកាត់ដេរសម្លៀកបំពាក់ និងស្បែកជើងការវិនិយោគលើដំណាំកៅស៊ូជាពិសេសវិស័យទេសចរណ៏ក៏អាចធ្វើការវិនិយោគផងដែរ ពីព្រោះកម្ពុជាមានប្រាង្គប្រាសាទជាង១ពាន់ ដែលជាគោលដៅទេសចរណ៏វប្បធម៌ កំពុងទាក់ទាញភ្ញៀវឲ្យចូលមកទស្សនាកម្ពុជា មានកំណើនកើនឡើងជាលំដាប់ពីមួយឆ្នាំទៅមួយឆ្នាំ។
ឆ្លៀតក្នុងឱកាសនេះឯកឧត្តម ក៏បានអគុណដល់សហរដ្ឋអាមេរិកដែលបានជ្រោមជ្រែងវិស័យវប្បធម៌ដល់កម្ពុជា ក្នុងការជួយគាំទ្រដល់ការចុះបញ្ចីប្រាសាទព្រះវិហារចូលក្នុងសម្បត្តិបេតិកភណ្ឌវប្បធម៌ពិភពលោក កាលពីឆ្នាំ២០០៨ កន្លងមក ក៏ដូចជាការបញ្ចូនរូបបដិមាមកឲ្យកម្ពុជាក្នុងពេលថ្មីៗនេះដែលបង្ហាញ្ញឲ្យឃើញពីការគិតគូរជួយការពារសម្បត្តិវប្បធម៌របស់ខ្មែរឲ្យបានគង់វង្ស៕
អត្ថបទ៖សុវណ្ណតារា
