បណ្ឌិត សុខ ទូច ប្រធានក្រុមស្រាវជ្រាវ នៃរាជបណ្ឌិត្យសភាកម្ពុជា បានលើកឡើងនៅក្នុងសន្និសីទសារព័ត៌មានស្តីពី ដំណើរការប្រមូលឯកសារពាក់ព័ន្ធបញ្ហាព្រំដែនកម្ពុជា-វៀតណាម នៅរាជបណ្ឌិត្យសភា នៅថ្ងៃទី២២ ខែកក្កដា ឆ្នាំ២០១៥ ថា « ខ្ញុំសូមបដិសេធទាំងស្រុង ទៅលើឯកសារទាំងឡាយណា ដែលចេញពីអាយផេត ចេញពី DVD យើងមិនយកទេ យើងទទួលយក ដើម្បីអី? ដើម្បីសិក្សាឲ្យគ្រប់ព័ត៌មាន ប៉ុន្តែនៅពេលយកទៅអនុវត្ត នៅលើផែនដី និងយកជាឯកសារគោល យើងដាច់ខាត យើងនឹងមិនយកឯកសារ ចេញពីអាយផេត និងឌីវីឌី ដាច់ខាត»។
ការថ្លែងរបស់បណ្ឌិត សុខ ទូច ក៏ជាការបញ្ជាក់ប្រាប់សាធារណៈជនថា រាជបណ្ឌិតសភាកម្ពុជា មិនអាចយកផែនទី DVD ទិញពីប្រទេសបារាំងតម្លៃ ១៦៨ដុល្លារ របស់ ឯកឧត្តម សម រង្ស៊ី មកធ្វើជាគោលដើម្បីស្រាវជ្រាវឲ្យដឹងពីការពិត នៃផែនទីខ្មែរនោះទេ ប៉ុន្តែការយកនេះ គ្រាន់តែអាចយកធ្វើជាព័ត៌មានតែប៉ុណ្ណោះ។
គួរបញ្ជាក់ថា រហូតមកដល់ពេលនេះ រាជបណ្ឌិត្យសភាដែលដឹកនាំដោយ បណ្ឌិត សុខ ទូច កំពុងតែធ្វើការស្រាវជ្រាវពីផែនទីពិត និងចំណុចព្រំដែនពិតរបស់កម្ពុជា ជាមួយប្រទេសជិតខាង បានទទួលឯកសារ ផែនទីពីខាងរាជរដ្ឋាភិបាលកម្ពុជា, លោក ស៊ាន ប៉េងសែ អតីតប្រធានគណៈកម្មាធិការរៀបចំកិច្ចការព្រំដែនកម្ពុជា និងឯកសារជាច្រើនទៀត ប៉ុន្តែមិនទាន់បានទទួលឯកសារផែនទីពីខាង ឯកឧត្តម សម រង្ស៊ី ទិញពីបារាំង និងផែនទីពីអង្គការសហប្រជាជាតិ និងប្រទេសមហាអំណាចទាំងបី ដែលសម្តេចតេជោ ហ៊ុន សែន បានខ្ចីតែប៉ុណ្ណោះ។
បណ្ឌិត សុខ ទូច បានបន្ថែមថា ចំពោះបញ្ហាដែលតំណាងរាស្ត្រគណបក្សប្រឆាំង បានដាក់សំណើ តាមប្រធានរដ្ឋសភាជាតិ គឺសម្តេចអគ្គមហាពញាចក្រី ហេង សំរិន ស្នើទៅរាជរដ្ឋាភិបាល ឲ្យផ្អាកការបោះបង្គោលព្រំដែនជាមួយវៀតណាម រហូតឆ្នាំ២០១៧-២០១៨នោះ គឺរាជបណ្ឌិត្យសភាមិនគាំទ្រទេ ដោយបណ្ឌិត សុខ ទូច បញ្ជាក់ថា តើគណបក្សប្រឆាំងស្នើនេះ ដើម្បីទុកបញ្ហាបោះបង្គោលព្រំដែន សម្រាប់ធ្វើការឃោសនារកប្រជាប្រិយភាព នៅពេលបោះឆ្នោតខាងមុខមែនទេ? បើមែនសូមកុំធ្វើយ៉ាងនេះអី! បក្សប្រឆាំងគួរតែយកបញ្ហាព្រំដែននេះ មកធ្វើការជាមួយរាជរដ្ឋាភិបាល ដើម្បីជាប្រយោជន៍ជាតិទាំងមូល និងដើម្បីឲ្យប្រជាពលរដ្ឋទូទៅមើលឃើញ ពីចេតនាចូលរួមរបស់បក្សប្រឆាំងមួយនេះក្នុងកិច្ការព្រំដែនពិតប្រាកដ៕
អត្ថបទ៖ សុភាព
