Friday, July 31, 2015
ឯកឧត្តម កែវ រ៉េមី ជួបជាមួយគ្រូបង្រៀន និងយុវជននៅឃុំកុមាររាជា ស្រុកបាទី ខេត្តតាកែវ ក្នុងពិធីប្រគល់ប្រាក់មូលនិធិគ្រូបង្រៀន និងប្រកាសដាក់ឲ្យតំណើរការប្រាក់សន្សំយុវជនភូមិខ្ញុំ
នៅព្រឹកថ្ងៃទី២៦ ខែកក្កដា ឆ្នាំ២០១៥ នេះ ឯកឧត្តម កែវ រ៉េមី រដ្ឋលេខាធិការទីស្តីការគណៈរដ្ឋមន្ត្រី និងសមាជិកក្រុមប្រឹក្សាជាតិប្រឆាំងអំពើពុករលួយ តំណាងដ៏ខ្ពង់ខ្ពស់របស់ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី និងជាអ្នកតំណាងរាស្ត្រមណ្ឌលតាកែវ បានអញ្ជើញជាអធិបតីក្នុងពិធីប្រគល់មូលនិធិគ្រូបង្រៀនរបស់សមាគមគ្រូបង្រៀនឃុំកុមាររាជា និងការប្រកាសដាក់ឲ្យដំណើរការ “ប្រាក់សន្សំយុវជនភូមិខ្ញុំ” នៅក្នុងឃុំកុមាររាជា ស្រុកបាទី ខេត្តតាកែវ ដែលមានការអញ្ជើញចូលរួមពីឯកឧត្តមលោកជំទាវ លោក លោកស្រីអ្នកកញ្ញាដែលជាក្រុមការងារថ្នាក់ជាតិ ចុះមូលដ្ឋានឃុំកុមាររាជា សមាជិកក្រុមប្រឹក្សាឃុំ សមាជិកគណៈកម្មការឃុំ មេភូមិ លោកគ្រូអ្នកគ្រូ ដែលជាសមាជិកសមាគមគ្រូបង្រៀនឃុំកុមាររាជា និងយុវជននៃសម្ព័ន្ធយុវជនកម្ពុជាប្រចាំឃុំកុមាររាជា សរុបប្រមាណ ៣៥០ នាក់។
បន្ទាប់ពីការឡើងធ្វើរបាយការណ៍សង្ខេបរបស់អាជ្ញាធរឃុំកុមាររាជា ប្រធានសមាគមគ្រូបង្រៀនឃុំកុមាររាជា ប្រធានសម្ព័ន្ធយុវជនកម្ពុជា ប្រចាំឃុំកុមាររាជា និងរបាយការណ៍លម្អិតរបស់ឯកឧត្តម ស្វាយ សុវណ្ណរិទ្ធ អនុប្រធានក្រុមការងារថ្នាក់ជាតិ ចុះមូលដ្ឋានឃុំកុមាររាជា ស្តីអំពីការរៀបចំសមាគមគ្រូបង្រៀនឃុំកុមាររាជា មូលនិធិគ្រូបង្រៀន និង “ប្រាក់សន្សំយុវជនភូមិខ្ញុំ” នៅក្នុងឃុំកុមាររាជារួចមក ឯកឧត្តម កែវ រ៉េមី បានថ្លែងសំណេះសំណាលទៅកាន់អង្គពិធី ក្នុងនោះ លោកបានសង្កត់ធ្ងន់អំពីការយកចិត្តទុកដាក់ខ្ពស់បំផុត របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ចំពោះជីវភាពរស់នៅរបស់មន្ត្រីរាជការស៊ីវិល កងកម្លាំងប្រដាប់អាវុធគ្រប់វិស័យ ជាពិសេសលោកគ្រូអ្នកគ្រូ តាមរយៈការពង្រឹងកិច្ចសហប្រតិបត្តិការរវាងអាជ្ញាធរមានសមត្ថកិច្ច ត្រូវចូលរួមជាមួយអាជ្ញាធរពន្ធដារ និងភ្នាក់ងារគយ ក្នុងការពង្រឹងការប្រមូលចំណូលរដ្ឋ ដើម្បីរាជរដ្ឋាភិបាល មានលទ្ធភាព បង្កើនបៀវត្សជូនមន្ត្រីរាជការស៊ីវិល លោកគ្រូអ្នកគ្រូ កងកម្លាំងប្រដាប់គ្រប់វិស័យ ឲ្យបានកាន់តែប្រសើរថែមទៀត។ ដោយឡែកសម្រាប់កម្មករ កម្មការនីនៅក្នុងវិស័យកាត់ដេរ និងស្បែកជើង រាជរដ្ឋាភិបាល បានយកចិត្តទុកដាក់គិតគូរ សម្របសម្រួលជាមួយភាគីពាក់ព័ន្ធទាំងអស់ រហូតសម្រេចបាននូវការកែលម្អរលក្ខខណ្ឌការងារ បញ្ចុះតម្លៃទឹកភ្លើង បង្កើតច្បាប់ស្តីពីការកំណត់ថ្លៃឈ្នួលផ្ទះរបស់កម្មករ តម្លៃទំនិញនៅលើទីផ្សារនិងបង្កើនប្រាក់ឈ្នួលបន្ថែមទៀតនៅក្នុងឆ្នាំ២០១៦ ខាងមុខនេះ។
ពាក់ព័ន្ធនឹងការបង្កើតសមាគមគ្រូបង្រៀនឃុំកុមាររាជា រៀបចំមូលនិធិគ្រូបង្រៀន និងការដាក់ឲ្យដំណើរការ ប្រាក់សន្សំយុវជនភូមិខ្ញុំ ឯកឧត្តម កែវ រ៉េមី បានសង្កត់ធ្ងន់ថា ជាការយកចិត្តទុកដាក់ជាអាទិភាព និងជាគំនិតផ្តួចផ្តើមរបស់ឯកឧត្តម ស្វាយ ស៊ីថា រដ្ឋលេខាធិការទីស្តីការគណៈរដ្ឋមន្ត្រី និងជាប្រធានក្រុមការងារថ្នាក់ជាតិ ចុះមូលដ្ឋានឃុំកុមាររាជា ដែលចំណាយថវិកាផ្ទាល់ខ្លួនរបស់ឯកឧត្តម សមាជិកសមាជិការក្រុមការងារ និងការចូលរូមរបស់សប្បុរសជន ដើម្បីរួមចំណែកដោះស្រាយការលំបាក់ផ្នែកជីវភាពរបស់លោកគ្រូអ្នកគ្រូ និងជំរុញការអភិវឌ្ឍសមត្ថភាព ការបង្កើតការងារ និងការបង្កើនចំណូលគ្រួសាររបស់យុវជននៅក្នុងភូមិឃុំ។
ឯកអគ្គរដ្ឋទូតសាធារណរដ្ឋឥណ្ឌា នៅតែសម្លឹងឃើញពីសក្តានុពល ជាច្រើនរបស់កម្ពុជា
នៅមុនពេលបញ្ចប់អាណត្តិបេសកកម្មការទូតប្រចាំកម្ពុជា ឯកអគ្គរដ្ឋទូតសាធារណរដ្ឋឥណ្ឌា ឯកឧត្តម ឌីនេស ខេ. ផាតនេក [DINESH K. PATNAIK] បានចូលជួបជំរាបលា សម្តេច តេជោ នាយករដ្ឋមន្ត្រី ហ៊ុន សែន នាព្រឹកថ្ងៃទី២៨ ខែកក្តដានេះ នៅវិមានសន្តិភាព។
នៅក្នុងជំនួបនេះឯកឧត្តម ឯកអគ្គរដ្ឋទូត បានជំរាបជូនថា ក្នុងរយៈពេល៣ឆ្នាំ នៃការបំពេញ បេសសកម្មការទូត ឯកឧត្តមបានមើលឃើញពីការរីកចំរើនខ្លាំងរបស់កម្ពុជា ហើយកម្ពុជានៅ តែមានសក្តានុពលជាច្រើនទៀត។ ទន្ទឹមនេះ ឯកឧត្តម ឌីនេស ខេ. ផាតនេក ក៏បានបញ្ជាក់ ផងដែរថា បើទោះបីជាឯកឧត្តមត្រូវបន្តបេសកកម្មទៅកាន់ប្រទេសផ្សេងក៏ដោយ ឯកឧត្តមនៅ តែបន្តសហការជួយអភិវឌ្ឍន៌នៅកម្ពុជា។
ឯកឧត្តម ក៏បានថ្លែងអំណរគុណដល់សមាជិក រាជរដ្ឋាភិបាល និងប្រជាពលរដ្ឋកម្ពុជា ដែលកន្លងមកតែងសហការធ្វើការជាមួយគ្នា ធ្វើឲ្យបេសកម្ម ការទូតរបស់ឯកឧត្តមទទួលបានជោគជ័យនិងធ្វើឲ្យទំនាក់ទំនងរវាងឥណ្ឌានិង កម្ពុជា កាន់តែល្អ ប្រសើរ។
ជាការឆ្លើយតប សម្តេចតេជោ ហ៊ុន សែន បានថ្លែងអំណរគុណដល់ការប្រឹងប្រែងរបស់ឯកឧត្តម ឌីនេស ខេ. ផាតនេក ដែលបានចូលរួមចំណែកទាំងការអភិវឌ្ឍនៅកម្ពុជាផង និងពង្រឹង កិច្ចសហប្រតិបត្តិការរវាងកម្ពុជានិងឥណ្ឌាផង។ ជាងនេះទៀត សម្តេចតេជោ បាន សម្តែងការអរគុណដល់ប្រទេសឥណ្ឌាដែលកន្លងមកបានធ្វើជាសហប្រធាននៃ ICCព្រះវិហារ ហើយសម្តេចក៏បានជូនពរដល់បេសកម្មការទូតបន្តទៅកាន់ប្រទេសផ្សេងរបស់ ឌីនេស ខេ. ផាតនេក ឲ្យទទួលបានជោគជ័យ៕
សម្ព័ន្ធយុវជនកម្ពុជា ចាត់ទុកមន្រ្តីអ្នកនាំពាក្យ ផ្នែកសិទ្ធិមនុស្សរបស់UNនៅកម្ពុជា ថាបានដើរផ្ទុយពីគោលការណ៍នីតិរដ្ឋ
សម្ព័ន្ធយុវជនកម្ពុជា នៅថ្ងៃទី២៨ ខែកក្កដា ឆ្នាំ២០១៥នេះ បានបង្ហាញនូវសេចក្តីសោកស្តាយយ៉ាងខ្លាំង បន្ទាប់ពីបានឃើញសេចក្តីថ្លែងការណ៍របស់អ្នកនាំពាក្យឧត្តមស្នងការអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា ដែលចេញផ្សាយនៅថ្ងៃទី២៧ ខែកក្កដា កន្លងទៅនេះ បន្ទាប់ពីតុលាការបានផ្ដន្ទាទោសសកម្មជនគណបក្សសង្រ្គោះជាតិ ១១នាក់ ឲ្យជាប់ពន្ធនាគារពី ៧ឆ្នាំ ទៅ ២០ឆ្នាំ ពីបទដឹកនាំ និងចូលរួមក្នុងចលនាកុប្បកម្មនាំឲ្យមានហិង្សានៅក្បែរទីលានប្រជាធិបតេយ្យ ដែលមន្ត្រីសិទ្ធិមនុស្សអង្គការសហប្រជាជាតិរូបនេះ បានលើកឡើងប្រាស់ចាកពីការពិតថា « មិនមានការបង្ហាញភស្តុតាងនៅក្នុងតុលាការដែលអាចបញ្ជាក់ថា ចុងចោទបានប្រព្រឹត្តអំពើហិង្សាដោយផ្ទាល់ ឬក៏ហិង្សា»។
សម្ព័ន្ធយុវជនកម្ពុជា បានចាត់ទុកសម្តីបែបនេះ ថា បានធ្វើឲ្យគ្រោះថ្នាក់ដល់ស្ថាប័ននៃប្រទេសកម្ពុជា « ហើយការដែលពួកគេចោទថា រដ្ឋាភិបាលជ្រៀតជ្រែកក្នុងករណីនេះ បានធ្វើឲ្យទំនុកចិត្តរបស់សាធារណជនកាន់តែធ្លាក់ចុះសម្រាប់ប្រព័ន្ធយុត្តិធម៌នៅកម្ពុជាថែមទៀតផង»។
សម្ព័ន្ធយុវជនកម្ពុជា យល់ឃើញថា៖ សេចក្តីថ្លែងការណ៍របស់ឧត្តមស្នងការអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា ជាសេចក្តីថ្លែងការណ៍ដែល «មិនមានលក្ខណៈកត្តវិជា្ជ និងមិនមានយុត្តធម៌» សម្រាប់រាជរដ្ឋាភិបាល និងស្ថាប័នតុលាការនៃប្រទេសកម្ពុជា ដែលជារដ្ឋអធិបតេយ្យ ប្រកាន់ខ្ជាប់នូវគោលការណ៍នីតិរដ្ឋ និងមានការបែងចែកអំណាចដាច់គ្នា រវាងស្ថាប័ននីតិប្បញ្ញត្តិ ស្ថាប័ននីតិប្រតិបត្តិ និងស្ថាប័នតុលាការ។
សម្ព័ន្ធយុវជនកម្ពុជា ដែលគេដឹងថា ដឹកនាំដោយលោក សៅ សុភៈ បានហៅសេចក្តីថ្លែងការណ៍ដដែលរបស់អ្នកនាំពាក្យអង្គការសហប្រជាជាតិទទួលបន្ទុកសិទ្ធិមនុស្សរូបនេះ ថាបានតាក់តែងឡើង ដោយមិនទទួលបានព័ត៌មានពិតគ្រប់ជ្រុងជ្រោយនៃអង្គហេតុ លើបញ្ហាជុំវិញចំណាត់ការតាមផ្លូវច្បាប់របស់អាជ្ញាធរមានសមត្ថកិច្ច និងតុលាការ ក្នុងសំណុំរឿងព្រហ្មទណ្ឌទាក់ទងនឹងការប្រព្រឹត្តបទល្មើសធ្ងន់ធ្ងរ ដែលបង្កទ្បើងដោយបុគ្គលទាំង១១រូប។
សម្ព័ន្ធយុវជនកម្ពុជា បានលើកឡងើងថា ក្នុងនាមឧត្តមស្នងការអង្គការសហប្រជាជាតិ លោកស្រីគួរណាស់តែបែងចែកឲ្យច្បាស់រវាងការអនុវត្តច្បាប់ និងសេរីភាពនៃការបញ្ចេញមតិ ហើយមិនត្រូវយកករណីព្រហ្មទណ្ឌមកលាយលំជាមួយបញ្ហាសិទ្ធិមនុស្ស ឬនយោបាយដើម្បីឲ្យជនប្រព្រឹត្តបទល្មើសរួចផុតពីការទទួលខុសត្រូវតាមផ្លូវច្បាប់ ដែលជាហេតុបង្កើតឲ្យមាននីទណ្ឌភាពនៅកម្ពុជា។ ដូចនេះការកាត់ទោសអ្នកប្រព្រឹត្តបទល្មើស គឺមិនពាក់ព័ន្ធនឹងបញ្ហាសិទ្ធិមនុស្សទេ តែវាជាបញ្ហារបស់អ្នកដែលបានប្រព្រឹត្តបទល្មើសជាក់ស្តែង ដែលផ្ទុយអំពីច្បាប់តែប៉ុណ្ណោះ ហើយមិនពាក់ពន្ធនឹងរាជរដ្ឋាភិបាលនោះទេ។
សម្ព័ន្ធយុវជនកម្ពុជា បានទទូចឲ្យ ឧត្តមស្នងការអង្គការសហប្រជាជាតិ ទទួលបន្ទុកសិទ្ធិមនុស្សប្រចាំកម្ពុជា បញ្ឈប់ជាបន្ទាន់នូវការចោទប្រកាន់រាជរដ្ឋាភិបាល ប្រជាជាតិអធិបតេយ្យ នីតិរដ្ឋ តំណាងឆន្ទៈប្រជាពលរដ្ឋ ថាជ្រៀតជ្រែកទៅលើសេចក្តីសម្រេចរបស់តុលាការ ដែលជាស្ថាប័នឯករាជ្យជាឆន្ទានុសិទ្ធិរបស់ចៅក្រម ដោយសម្ព័ន្ធយុវជនកម្ពុជា បានពិនិត្យឃើញថា គ្មានស្ថាប័នណាមួយជ្រៀតជ្រែក ឬបង្គាប់បញ្ជានូវដំណើរការយុត្តិធម៌នេះបានទ្បើយ៕
Tuesday, July 28, 2015
រាជរដ្ឋាភិបាលសម្រេចកាត់បន្ថយរយៈពេល នៃការផ្តល់ដីសម្បទានសេដ្ឋកិច្ចមកនៅត្រឹម ៥០ឆ្នាំយ៉ាងយូរបំផុត
យោងតាមសេចក្តីប្រកាសព័ត៌មានរបស់ក្រសួងបរិស្ថាន ចុះថ្ងៃទី ២៨ ខែកក្កដា ឆ្នាំ២០១៥នេះ ស្តីពីលទ្ធផលនៃការវាយតម្លៃ លើក្រុមហ៊ុនសម្បទានដីសេដ្ឋកិច្ចចំនួន ១៦ នៅក្នុងខេត្តមណ្ឌលគិរី រតនគិរី និងកំពង់ស្ពឺ ក្រោមការគ្រប់គ្រងរបស់ក្រសួងបរិស្ថាន បានបញ្ជាក់ថា ក្រោយដោះស្រាយពីផលប៉ះពាល់រួច ក្រុមហ៊ុនទាំង១៦នេះ នឹងត្រូវចុះកិច្ចសន្យាឡើងវិញ និងកាត់បន្ថយរយៈពេលនៃការវិនិយោគ ដែលផ្តល់ឲ្យពីមុនមកមាន ៩៩ឆ្នាំ ៨០ ឆ្នាំ និង៧០ឆ្នាំឲ្យមកនៅត្រឹមរយៈពេល ៥០ឆ្នាំវិញ។
ក្រសួងបរិស្ថានបានឲ្យដឹងថា កាលពីពេលថ្មីៗនេះ រាជរដ្ឋាភិបាលកម្ពុជា បានសម្រេចអនុញ្ញាតឲ្យក្រុមហ៊ុន ១៦ ដែលទទួលបានសិទ្ធិវិនិយោគលើផ្ទៃដីសេដ្ឋកិច្ច នៅតំបន់ប្រើប្រាស់ដោយចីរភាពនៃដែនជម្រកសត្វព្រៃភ្នំណាមលៀរ ដែនជម្រកសត្វព្រៃភ្នំពេ្រច នៅខេត្តរតនៈគិរី មានចំនួន ៤ក្រុមហ៊ុន ដែលទទួលបានសម្បទានដីសេដ្ឋកិច្ច នៅដែនជម្រកសត្វព្រៃលំផាត់ និងក្នុងខេត្តកំពង់ស្ពឺមានចំនួន៧ ដែលទទួលបានសម្បទានដីសេដ្ឋកិច្ចនៅតំបន់ដែនជម្រកសត្វព្រៃភ្នំឱរ៉ាល់ និងឧទ្យានជាតិសុរាម្រិត-កុសុមៈ គិរីរម្យ បន្តអនុវត្តគម្រោងនិងបំពេញនីតិវិធីលើផ្ទៃដីដែលបានដោះស្រាយផលប៉ះពាល់រួច ដោយត្រូវចុះកិច្ចសន្យាឡើងវិញ និងកាត់បន្ថយរយៈពេលនៃការវិនិយោគដែលផ្តល់ឲ្យពីមុនមកមាន ៩៩ឆ្នាំ ៨០ ឆ្នាំ និង៧០ឆ្នាំឲ្យមកនៅត្រឹមរយៈពេល ៥០ឆ្នាំវិញ។ សូមបញ្ជាក់ថា រាជរដ្ឋាភិបាលកម្ពុជា បានសម្រេចជាគោលការណ៍ ក្នុងការកាត់បន្ថយរយៈពេលនៃការអនុវត្តគម្រោងវិនិយោគអភិវឌ្ឍន៍ សម្បទានដីសេដ្ឋកិច្ចទាំងអស់មកនៅត្រឹមយ៉ាងយូរ៥០ឆ្នាំ។
តាមសេចក្តីប្រកាសព័ត៌មានរបស់ក្រសួងបរិស្ថាន រហូតមកដល់ពេលនេះ ក្រសួងបានពិនិត្យ និងវាយតម្លៃគម្រោងវិនិយោគអភិវឌ្ឍន៍ទាំងអស់ចំនួន ១១៣ ដែលមានផ្ទៃដីសរុប ៦២៨ ២៩៨,៧៥ ហិកតា ដែលក្នុងនោះគម្រោងចំនួន ៨១ ត្រូវបានដាក់ឆ្លងអង្គប្រជុំគណៈកម្មាធិការអន្តរក្រសួង ដើម្បីពិភាក្សា និងលើកសំណើជូនប្រមុខរាជរដ្ឋាភិបាលក្នុងការពិនិត្យ និងសម្រេច ហើយជាលទ្ធផលគម្រោងរបស់ក្រុមមហ៊ុនចំនួន ២៣ ដែលមានផ្ទៃដីសរុប ៩០ ៦៨២ ហិកតា ត្រូវបានរាជរដ្ឋាភិបាលសម្រេចនិរាករណ៍ សិទ្ធិវិនិយោគដោយសារតែក្រុមហ៊ុនទាំងនោះ មិនបានគោរពតាមគោលការណ៍ និងនីតិវិធីនានាដែលបានកំណត់។
ក្រសួងបរិស្ថានបានបញ្ជាក់ផងដែរថា ការត្រួតពិនិត្យ វាស់វែង និងវាយតម្លៃគម្រោងសម្បទានដីសេដ្ឋកិច្ចឡើងវិញនេះ ពិតជាមានសារៈសំខាន់ណាស់ ដើម្បីគ្រប់គ្រងឲ្យមានប្រសិទ្ធិភាពលើសម្បទានដីសេដ្ឋកិច្ច ដែលស្ថិតក្រោមការគ្រប់គ្រងរបស់ក្រសួងបរិស្ថាន បំណងដើម្បីផ្តល់ភាពកក់ក្តៅដល់អ្នកវិនិយោគទុន ក៏ដូចជាដោះស្រាយលើផលប៉ះពាល់ទាំងឡាយឲ្យបានត្រឹមត្រូវ និងកំណត់ច្បាស់លាស់ថា សម្បទានដីសេដ្ឋកិច្ចទាំងអស់នឹងមិនមានការប៉ះពាល់ដល់ដីធ្លីរបស់ប្រជាពលរដ្ឋ៕
អត្ថបទ៖ សុភាព
ក្រសួងអប់រំប្រកាសហាម មិនឲ្យបេក្ខជន ដែលប្រឡងបាក់ឌុបឆ្នាំនេះ យកឧបករណ៍អេឡិចត្រូនិច ចូលក្នុងមណ្ឌលប្រឡង
យោងតាមសេចក្តីប្រកាសព័ត៌មានរបស់ក្រសួងអប់រំ យុវជន និងកីឡា ចុះថ្ងៃទី ២៧ ខែកក្កដា ឆ្នាំ២០១៥ ស្តីពីការប្រឡងសញ្ញាប័ត្រមធ្យមសិក្សាទុតិយភូមិចំណេះទូទៅ និងបំពេញវិជ្ជាសម័យប្រឡងថ្ងៃទី ២៤ ខែសីហា ឆ្នាំ២០១៥ បានឲ្យដឹងថា ដើម្បីឲ្យដំណើរការប្រឡងប្រពឹត្តទៅប្រកបដោយគោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន ក្រសួងអប់រំយុវជននិងកីឡា សូមអំពាវនាវដល់បេក្ខជនទាំងអស់ត្រូវគោរពបទប្បញ្ញត្តិនៃការប្រឡងឲ្យបានល្អប្រសើរ ជាពិសេសមិនត្រូវលាក់ទុកជាប់នឹងខ្លួននូវឧបករណ៍អេឡិចត្រូនិចគ្រប់ប្រភេទចូលក្នុងមណ្ឌលប្រឡង ឬបន្ទប់ប្រឡង ជាដាច់ខាត។ ក្នុងករណីរកឃើញ ត្រូវចាត់ទុកថាបានប្រព្រឹត្តសកម្មភាពផ្ទុយនឹងបទប្បញ្ញតិ្ត និងកម្រិត វិន័យចំពោះបេក្ខជន និងត្រូវបានកំណត់ឲ្យធ្លាក់ជាស្វ័យប្រវត្តិ។
ការប្រឡងសញ្ញាប័ត្រមធ្យមសិក្សាទុតិយភូមិចំណេះទូទៅ និងបំពេញវិជ្ជាដែលមានថ្នាក់វិទ្យាសាស្ត្រ និងថ្នាក់វិទ្យាសាស្ត្រសង្គម រួមមានបេក្ខជនប្រឡងសរុបចំនួន ៨៨៤៨៨ នាក់ និងមានមណ្ឌលប្រឡងចំនួន ១៥០ មណ្ឌលចែកចេញជា៣៥៧៦បន្ទប់ នៅរាជធានី ខេត្តទាំង ២៥នៃព្រះរាជាណាចក្រកម្ពុជា។
ការប្រឡងនេះ នឹងត្រូវប្រកាសលទ្ធផលនៅតាមណ្ឌលប្រឡងនីមួយៗ នៅរសៀលថ្ងៃទី ១៥ ខែកញ្ញា ឆ្នាំ២០១៥ សម្រាប់មណ្ឌលប្រឡងនៅរាជធានីភ្នំពេញ និងខេត្តកណ្តាល និងនៅថ្ងៃទី ១៦ ខែកញ្ញា ឆ្នាំ២០១៥ សម្រាប់មណ្ឌលប្រឡងនៅខេត្តផ្សេងៗទៀត៕
អត្ថបទ៖ សុភាព
Monday, July 27, 2015
ឯកឧត្តមបណ្ឌិតសភាចារ្យ សុខ អាន អញ្ជើញជាអធិបតីពិធីបុណ្យបញ្ចុះខ័ណ្ឌសីមា ព្រះវិហារ និងសម្ពោធសមិទ្ធផលក្នុងវត្តរស្មីមហារះភ្នំសន្លុង
ព្រះវិហារ បដិមាករ សាលាធម្មសភា ដងទង់សាសនា កុដិ ជណ្តើរឡើងភ្នំ ខ្លោងទ្វារវត្ត សាលាសំណាក់ និងរូបសំណាក់ផ្សេងៗនៅក្នុងវត្តរស្មីមហារះភ្នំសន្លុង ដែលមានតម្លៃសាងសង់ជាង ៥៨ម៉ឺនដុល្លារសហរដ្ឋអាមរិក ស្ថិតនៅក្នុងឃុំសន្លុង ស្រុកទ្រាំង ខេត្តតាកែវ ត្រូវបានបញ្ចុះខ័ណ្ឌសីមា និងសម្ពោធដាក់ឲ្យប្រើប្រាស់ជាសាធារណៈក្រោមអធិបតីភាព ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី នាព្រឹកថ្ងៃទី២៦ ខែកក្កដា ឆ្នាំ២០១៥។
ឯកឧត្តមបណ្ឌិតសភាចារ្យ សុខ អាន បានមានប្រសាសន៍ឲ្យដឹងថា សមិទ្ទផលនានាក្នុងវត្តរស្មីមហារះភ្នំសន្លុងនេះ ត្រូវបានកសាងឡើងដោយមានការចូលរួមពីថ្នាក់ដឹកនាំគណបក្សប្រជាជនកម្ពុជា ពិសេសក្រុមការងារថ្នាក់ជាតិរបស់គណបក្សប្រជាជនប្រចាំស្រុកទ្រាំង និងឃុំសន្លុង ពិសេសឯកឧត្តម ហ៊ីង ថូរាសី រដ្ឋលេខាធិការទីស្តីការគណៈរដ្ឋមន្ត្រី និងជាប្រធានក្រុមការងារថ្នាក់ជាតិគណបក្សប្រជាជនកម្ពុជាចុះជួយឃុំសន្លុង ព្រះចៅអធិការវត្តរស្មីមហារះភ្នំសន្លុង និងពុទ្ធបរិស័ទក្នុង និងក្រៅប្រទេស។
ឯកឧត្តមបណ្ឌិតសភាចារ្យ សុខ អាន បានអំពាវនាវឲ្យយុវជន យុវនារី ចូលរួមរក្សាប្រពៃណីវប្បធម៌ជាតិ ដោយឧស្សាហ៍មកចូលកំសាន្តលេងនៅក្នុងវត្ត ក៏ដូចជាស្តាប់ព្រះសង្ឃទេសនាក្នុងពិធីបុណ្យទាន ទើបយើងអាចទប់ស្កាត់ការលុកលុយរបស់វប្បធម៌បរទេសក្នុងចំណោមយុវវ័យបាន។ ឯកឧត្តមបណ្ឌិតសភាចារ្យ សុខ អាន បានមានប្រសាសន៍បញ្ជាក់ថា យុវជនត្រូវតែស្គាល់អ្វីដែលជាស្នូលនៃវប្បធម៌ អរិយធម៌របស់ជាតិ។ វត្តអារាម គឺជាទីកន្លែងដែលអាចជួយបណ្តុះបណ្តាល និងអប់រំយុវជនយើងឲ្យយល់ពីវប្បធម៌ អរិយធម៌របស់យើង។
ទាក់ទងនឹងក្រុមការងារគណបក្សប្រជាជនកម្ពុជា ដែលចុះជួយប្រជាពលរដ្ឋនៅស្រុកទ្រាំង ក៏ដូចជានៅឃុំសន្លុង ឯកឧត្តមបណ្ឌិតសភាចារ្យ សុខ អាន បានមានប្រសាសន៍ឲ្យដឹងថា ក្រុមការងារថ្នាក់ជាតិចុះជួយអាជ្ញាធរនៅមូលដ្ឋាននេះ គឺក្នុងគោលបំណងជួយលើកកម្ពស់ជីវភាព សុខមាលភាពរបស់ប្រជាពលរដ្ឋ ពិសេសគឺការជួយរំរុញកែលំអការផ្តល់សេវាសាធារណៈជូនប្រជាពលរដ្ឋ។ ឯកឧត្តមបណ្ឌិតសភាចារ្យ សុខ អាន ក៏បានមានប្រសាសន៍ឲ្យដឹងផងដែរថា ថវិកាដែលឯកឧត្តមអំពាវនាវប្រមូលបានពីសម្បុរជនដែលជួយបាកបាទក្រហមកម្ពុជា គឺមួយចំនួនធំយកមកទិញជាកញ្ចប់សំភារៈ (ឃីត) សំរាប់ឧបត្ថម្ភស្ត្រីដែលទើបសំរាលកូន ដោយមិនរើសមុខ និងនិន្នាការនយោបាយឡើយ។
ឯកឧត្តមបណ្ឌិតសភាចារ្យ សុខ អាន ក៏បានឲ្យដឹងថា ក្រុមការងារថ្នាក់ជាតិដឹកនាំដោយឯកឧត្តម សុខ ផេង រដ្ឋលេខាធិការក្រសួងសុខាភិបាល និងជាប្រធានក្រុមការងារថ្នាក់ជាតិចុះជួយស្រុកទ្រាំង ខេត្តតាកែវ នឹងរៀបចំក្រុមគ្រូពេទ្យស្ម័គ្រចិត្តមកជួយពិនិត្យសុខភាពជូនប្រជាពលរដ្ឋក្នុងមួយឆ្នាំពីរដង។ ក្រៅពីនេះ ក្រុមការងារថ្នាក់ជាតិរបស់គណបក្សប្រជាជន ក៏នឹងមានរៀបចំជាមូលនិធិសំរាប់ជួយប្រជាពលរដ្ឋក្រីក្រ ដែលមានបញ្ហាខាងសុខភាពត្រូវទទួលការព្យាបាលផងដែរ។
ទាក់ទងនឹងបញ្ហាជីវភាពរបស់ប្រជាពលរដ្ឋក្នុងខេត្តតាកែវដែរ ឯកឧត្តមបណ្ឌិតសភាចារ្យ សុខ អាន ប្រធានក្រុមការងារថ្នាក់ជាតិចុះជួយខេត្តតាកែវ ក៏បានប្រកាសឲ្យដឹងពីផលវិបាកនៃប្រាក់កំចីដែលប្រជាពលរដ្ឋខ្ចីពីស្ថាប័នមីក្រូហិរញ្ញវត្ថុផ្សេងៗ ដែលធ្វើសកម្មភាពនៅតាមមូលដ្ឋាន គឺសុទ្ធសឹងតែជាស្ថាប័នឯកជន មិនមែនរបស់រដ្ឋដូចការឃោសនារបស់អ្នកនយោបាយទេ។
ក្នុងគោលបំណងចូលរួមដោះស្រាយទុន លើកកំពស់ជីវភាពជូនប្រជាពលរដ្ឋជាកសិករ ឯកឧត្តមបណ្ឌិតសភាចារ្យ សុខ អាន បានឲ្យដឹងថា ឯកឧត្តមបានបង្កើតជាមូលនិធិសហគមន៍កសិកម្មមួយនៅក្នុងខេត្តតាកែវនេះ សំរាប់ឲ្យប្រជាពលរដ្ឋខ្ចី ជាពិសេសសំរាប់ទិញជីមកបង្កើនទិន្នផលស្រូវ ដែលជាពូជស្រូវមានគុណភាព និងតម្លៃខ្ពស់។
មានប្រសាសន៍ទាក់ទងបញ្ហាព្រំដែន ឯកឧត្តមបណ្ឌិតសភាចារ្យ សុខ អាន ក៏បានឲ្យដឹងថា មូលហេតុដែលសម្តេចអគ្គមហាសេនាបតីតេជោ ហ៊ុន សែន ធ្វើលិខិតស្នើសុំខ្ចីផែនទីពីអង្គការសហប្រជាជាតិ និងប្រទេសធំៗចំនួនបី គឺបារាំង អាមេរិក និងអង់គ្លេស ក្នុងគោលបំណងបញ្ជាក់អះអាងថា រាជរដ្ឋាភិបាលធ្វើការកំណត់ព្រំដែនជាមួយប្រទេសវៀតណាម គឺប្រើប្រាស់ផែនទីត្រឹមត្រូវ ដែលអតីតព្រះមហាក្សត្រ ព្រះបរមរតនកោដ្ឋ ព្រះអង្គបានយកទៅតម្កល់ទុកនៅឆ្នាំ១៩៦៤ គឺមិនមែនប្រើប្រាស់ផែនទីក្លែងក្លាយដូចការឃោសនារបស់អ្នកនយោបាយប្រឆាំងទេ។
ឯកឧត្តម ឡាយ វណ្ណៈ អភិបាលខេត្តតាកែវក្នុងពិធីបុណ្យបញ្ចុះខ័ណ្ឌសីមា ព្រះវិហារ និងសម្ពោធសមិទ្ធផលក្នុងវត្តរស្មីមហារះភ្នំសន្លុងនេះ បានមានប្រសាសន៍ឲ្យដឹងថា នៅក្នុងខេត្តតាកែវទាំងមូលមានវត្តចំនួន ៣៣០ កន្លែង ក្នុងនោះ វត្តគណៈមហានិកាយ ចំនួន ៣១៣វត្ត មានព្រះសង្ឃ ២៩៥០អង្គ និងវត្តគណៈធម្មយុត្តិកនិកាយចំនួន ១៧វត្តព្រះសង្ឃ ចំនួន ១៣០អង្គ។ វត្តរស្មីមហារះភ្នំសន្លុង ជាវត្តធម្មយុត្តិកនិកាយ ដែលក្នុងពិធីបញ្ចុះខ័ណ្ឌសីមានោះ សម្តេចព្រះសង្ឃរាជ ប៊ូ គ្រី បាននិមន្តយាងចូលរួមផងដែរ។ ដែលបញ្ហានេះ ឯកឧត្តមបណ្ឌិតសភាចារ្យ សុខ អាន បានចាត់ទុកព្រះរាជវត្តមានសម្តេចព្រះសង្ឃរាជ ប៊ូ គ្រី ជាប្រត្តិសាស្ត្រសំរាប់វត្តរស្មីមហារះភ្នំសន្លុង៕
សន្និសីទសារព័ត៌មានស្តីពី ដំណើរការប្រមូលឯកសារពាក់ព័ន្ធ នឹងបញ្ហាព្រំដែនប្រទេសកម្ពុជា ជាមួយប្រទេសវៀតណាម
សន្និសីទសារព័ត៌មានស្តីពី ដំណើរការប្រមូលឯកសារពាក់ព័ន្ធ នឹងបញ្ហាព្រំដែនប្រទេសកម្ពុជា ជាមួយប្រទេសវៀតណាម
ដោយរាជបណ្ឌិតសភាកម្ពុជា, ថ្ងៃទី២២ ខែកក្កដា ឆ្នាំ២០១៥
Subscribe to:
Posts (Atom)