Friday, August 7, 2015
ក្រសួងកិច្ចការនារីសុំឲ្យអង្គការ មិនមែនរដ្ឋាភិបាលរក្សាជំហរអព្យាក្រឹត
យោងតាមសេចក្តីថ្លែងការណ៍ ចុះថ្ងៃទី ០៦ ខែសីហា ឆ្នាំ២០១៥នេះ ក្រសួងកិច្ចការនារី បានបង្ហាញការសោកស្តាយយ៉ាងខ្លាំង ចំពោះការចេញនូវសេចក្តីថ្លែងការណ៍រួមរបស់អង្គការមិនមែនរដ្ឋាភិបាលមួយចំនួន ដែលមានចំណងជើងថា «រួមគ្នាលើកកម្ពស់សេចក្តីថ្លៃថ្នូររបស់ស្រ្តីដោយពិតប្រាកដ» កាលពីថ្ងៃទី ០៥ ខែសីហា ឆ្នាំ២០១៥កន្លងទៅ ទាក់ទងនឹងប្រសាសន៍របស់ សម្តេចតេជោ ដែលបានថ្លែងក្នុងឱកាសបើកឲ្យប្រើប្រាស់ជាផ្លូវការស្ពានមិត្តភាពកម្ពុជា-ចិន តាខ្មៅ កាលពីថ្ងៃទី ០៣ ខែសីហា ឆ្នាំ២០១៥ ពាក់ព័ន្ធនិងស្រ្តីជាបាតុករមួយរូប ដែលបានយកជើងធាក់ថែម ទៅលើសន្តិសុខមួយរូបដែលកំពុងមានរបួសធ្ងន់ធ្ងរ។ ក្រសួង កិច្ចការនារី សង្ឃឹមថា អង្គការមិនមែនរដ្ឋាភិបាល នឹងរក្សាគោលជំហរអព្យាក្រឹតចៀសវាងផ្សព្វផ្សាយព័ត៌មានដែលមានលក្ខណៈបំប៉ោង និងពង្រឹងកិច្ចសហការជាមួយរាជរដ្ឋាភិបាលក្នុងភាពជាដៃគូរក្នុងការកសាង និងអភិវឌ្ឍប្រទេសកម្ពុជាឲ្យរីកចំរើន។
ក្រសួងកិច្ចការនារី សូមធ្វើការកត់សម្គាល់ថា សេចក្តីថ្លែងការណ៍របស់អង្គការមួយចំនួន គឺ មានគោលបំណងបំភ្លៃព័ត៌មាន និងវាយប្រហាររាជរដ្ឋាភិបាល ព្រោះសម្តេចតេជោ បានមានប្រសាសន៍ផ្តោតទៅលើស្រ្តីមួយរូបតែប៉ុណ្ណោះ ដែលបានទាត់ធាក់លើកសន្តិសុខមួយរូប កំពុងរងរបួសធ្ងន់ និងគ្មានបំណងរើសអើងលើស្ត្រីទូទៅនោះទេ។ សម្តេចតេជោ ក៏បានបញ្ជាក់ផងដែរថា «មិនមែនជាការរំលោភលើសិទ្ធិស្ត្រីទេ ប៉ុន្តែវាអាក្រក់ហួស...»។ ការលើកឡើងរបស់ សម្តេចតេជោ ក៏ជាសារមួយបង្ហាញថា ប្រមុខរាជរដ្ឋាភិបាលកម្ពុជា មិនគាំទ្រដាច់ខាតចំពោះរាល់ការប្រព្រឹត្តអំពើហិង្សា ទោះជនប្រព្រឹត្តនោះជាស្ត្រីឬបុរសក៏ដោយធ្វើយ៉ាងណាសំដៅលើកកម្ពស់នូវវប្បធម៌អហិង្សាដើម្បីភាពសុខដុមរមនាក្នុងសង្គម។
ក្រសួងកិច្ចការនារីបានបញ្ជាក់ថា រាជរដ្ឋាភិបាលកម្ពុជា បានខិតខំប្រឹងប្រែងលើកកម្ពស់សិទ្ធិ និងស្ថានភាពរបស់ស្ត្រី តាមរយៈការអនុវត្តគោលនយោបាយជាតិ ស្តីពីសមភាពយេនឌ័រ ការអនុវត្តអនុសញ្ញា ស្តីពីការលុបបំបាត់នូវរាល់ទម្រង់នៃការរើសអើងប្រឆាំងនឹងនារីភេទ (CEDAW) គាំទ្រ និងផ្តល់ឱកាសឲ្យស្ត្រីបានចូលរួមក្នុងគ្រប់វិស័យការងារ មានតួនាទីធ្វើសេចក្តីសម្រេចនៅគ្រប់លំដាប់ថ្នាក់ទាំងក្នុងស្ថាប័ននីតិបញ្ញត្តិ នីតិប្រតិបត្តិ និងស្ថាប័នតុលាការ៕
អត្ថបទ៖ សុភាព
ពលរដ្ឋខ្មែររងគ្រោះ៦នាក់ទៀតហើយ ត្រូវបានជួយសង្គ្រោះពីប្រទេសម៉ាឡេស៊ី
យោងតាមសេចក្តីជូនដំណឹងរបស់ក្រសួងការបរទេស និងសហប្រតិបត្តិការអន្តរជាតិ ចុះថ្ងៃទី ០៦ ខែសីហា ឆ្នាំ២០១៥នេះ បានឲ្យដឹងថា ពលរដ្ឋខ្មែររងគ្រោះចំនូន ៦រូប ដែលបានជាប់ឃុំឃាំងនៅ Alor Setarប្រទេសម៉ាឡេស៊ី ត្រូវបានជួយសង្គ្រោះ នឹងរៀបចំឲ្យវិលត្រឡប់មកមាតុប្រទេសវិញនៅថ្ងៃនេះ។
នៅវេលាម៉ោង 15:55 នាទី រសៀល ថ្ងៃទី ០៦ ខែ សីហា ឆ្នាំ២០១៥ នេះ ពលរដ្ឋខ្មែរ ទាំង៦នាក់ដែលរងគ្រោះមកដល់កម្ពុជា តាមជើងយន្តហោះ AK 534 នៅអាកាសយានដ្ឋានអន្តរជាតិភ្នំពេញ។
ក្រសួងការបទេស ក៏បានធ្វើការអំពាវនាវដោយទទូចដល់ពលរដ្ឋខ្មែរ ដែលមានបំណងស្វែងរកការងារនៅក្រៅប្រទេស គួរតែស្វែងរកការងារដែលមានស្រាប់នៅក្នុងស្រុក ចៀសវាងការឃ្លាតឆ្ងាយពីក្រុមគ្រួសារ បងប្អូន និងអាចជួបគ្រោះចាញ់ការបោកប្រាស់ ពីជនដែលមានគំនិតទុច្ចរិតបំរើផលប្រយោជន៍ផ្ទាល់ខ្លួន។
កន្លងមកនេះ ឯកឧត្តមឧបនាយករដ្ឋមន្រ្តី រដ្ឋមន្រ្តីការបរទេស និងសហប្រតិបតិ្តការអន្តរជាតិ តែងតែបានណែនាំជាប្រចាំ ដល់ស្ថានឯកអគ្គរាជទូត និងស្ថានអគ្គកុងស៊ុលកម្ពុជាប្រចាំនៅបរទេស ឲ្យខិតខំជួយសង្រ្គោះពលរដ្ឋខ្មែររងគ្រោះ ដែលបានទៅធ្វើការ ឬចាញ់បោកមេ ខ្យល់នាំយកទៅបំរើការងារនៅក្រៅប្រទេស និងរៀបការជាមួយជនបរទេស ដើម្បីឲ្យបានវិលត្រឡប់មកកាន់មាតុប្រទេសវិញ៕
មជ្ឈមណ្ឌល ថែទាំមនុស្សចាស់ នៅមន្ទីរពេទ្យ ខ្មែរ-សូវៀត ត្រូវបានដាក់សម្ពោធឲ្យប្រើប្រាស់ជាផ្លូវការនៅថ្ងៃទី០៦ ខែសីហា ឆ្នាំ២០១៥នេះ
នៅព្រឹកថ្ងៃទី០៦ ខែសីហា ឆ្នាំ២០១៥នេះ សម្តេចព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរ និង ព្រះករុណាព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ទ្រង់បានយាងជាព្រះរាជាអធិបតី ដ៏ខ្ពង់ខ្ពស់បំផុត សម្ពោធដាក់ឱ្យប្រើប្រាស់មជ្ឈមណ្ឌល ថែទាំមនុស្សចាស់ នៅក្នុងមន្ទីរពេទ្យមិត្តភាពខ្មែរ-សូវៀត (ពេទ្យរស្ស៊ី)។
សម្តេចព្រះមហាក្សត្រី នរោត្តម មុនីនាថ សីហនុ ព្រះវររាជមាតាជាតិខ្មែរ បានមានព្រះរាជបន្ទូលថា ការកសាង អគារមណ្ឌលព្យាបាលមនុស្សចាស់ “ព្រះសីហនុរាជ” នៅមន្ទីរពេទ្យមិត្តភាពខ្មែរ-សូវៀត គឺជាការរំលឹកនូវព្រះរាជគុណូបការៈ ដ៏ធំធេងរបស់ព្រះករុណា ព្រះនរោត្តម សីហនុ ព្រះបរមរតនកោដ្ឋ។
ព្រះមហាក្សត្រី ព្រះវររាជមាតាជាតិខ្មែរ បានមានព្រះរាជបន្ទូលថា អតីតព្រះមហាក្សត្រ ព្រះករុណា ព្រះនរោត្តម សីហនុ កាលដែលព្រះអង្គនៅគង់ព្រះជន្ម ព្រះអង្គ បានកសាងសមិទ្ធផល ផ្នែកសុខាភិបាល ដើម្បីថែទាំ និងព្យាបាលសុខភាពរបស់ប្រជារាស្រ្តជាកូនចៅ ចៅទួត របស់ព្រះអង្គ។
ព្រះវររាជមាតាជាតិខ្មែរ មានព្រះរាជបន្ទូលបញ្ជាក់ថា ថវិកាដែលបានចំណាយ លើការសាងសង់អគារ ព្យាបាលមនុស្សចាស់ ដែលមានទឹកប្រាក់ប្រមាណ ៣លានដុល្លារអាមេរិក នេះ បានមកពីព្រះមហាក្សត្រ និងតង្វាយរបស់សប្បុរសជនជាតិ-អន្តរជាតិ ដែលបានចូលជាវិភាគទាន ក្នុងឱកាសប្រារព្ធព្រះរាជពិធីបុណ្យថ្វាយព្រះបរមសព ព្រះករុណា ព្រះនរោត្តម សីហនុ។
គួរបញ្ជាក់ថា មជ្ឈមណ្ឌលថែទាំមនុស្សចាស់ ព្រះសីហនុរាជ ដែលស្ថិតនៅក្នុងបរិវេណ មន្ទីរពេទ្យមិត្តភាពកម្ពុជា-សូវៀត បានកសាងឡើង កាលពីដើមឆ្នាំ២០១៤ សម្រាប់ជួយសម្រាលទុក្ខលំបាករបស់ប្រជាពលរដ្ឋកម្ពុជា និងជាការអភិវឌ្ឍផ្នែកវិស័យសុខាភិបាលផងដែរ៕
Wednesday, August 5, 2015
បទអត្ថាធិប្បាយ៖ តើបក្សប្រឆំាងជំរុញ ឲ្យរាជរដ្ឋាភិបាលប្ដឹងទៅ ICJ ជាឆន្ទៈស្នេហាជាតិពិតប្រាកដ ឬក៏ជានយោបាយប្រជាភិថុត?
ស្របពេលដែលប្រជាពលរដ្ឋជាទូទៅមានការអបអរសាទរ និងគាំទ្រយ៉ាងពេញទំហឹងចំពោះការផ្តួចផ្តើមគំនិតប្រកបដោយភាពក្លាហាន និងការទទួលខុសត្រូវខ្ពស់បំផុតរបស់ប្រមុខដឹកនាំរាជរដ្ឋាភិបាល តាមរយៈការផ្ញើលិខិតស្នើសុំខ្ចីជាផ្លូវការនូវផែនទីពីអង្គការសហប្រជាជាតិ និងច្បាប់ចម្លងនៃផែនទីពីប្រទេសមហាអំណាចទាំងបី អមដោយអ្នកបច្ចេកទេសផែនទី ដើម្បីផ្ទៀងផ្ទាត់ជាមួយនឹងផែនទីបោន ខ្នាត១/១០០.០០០ ដែលរាជរដ្ឋាភិបាល បាន និងកំពុងប្រើប្រាស់ ក្នុងគោលបំណងបញ្ជាក់ អំពីភាពត្រឹមត្រូវពិតប្រាកដលើកិច្ចការកំណត់ព្រំដែនជាមួយប្រទេសជិតខាងបែរជាថ្នាក់ដឹកនាំគណបក្សនយោបាយប្រឆាំងយកផែនទីដែលខ្លួនបានទិញនៅតាមផ្សារមកបង្ហោះផ្សព្វផ្សាយ ហើយថ្មីៗនេះ អ្នកតំណាងរាស្ត្រមួយរូបរបស់គណ បក្សប្រឆាំង បានជំរុញឲ្យរាជរដ្ឋាភិបាលប្តឹងទៅតុលាការយុត្តិធម៌អន្តរជាតិ (ICJ) ដោយចោទថា មានការរំលោភទឹកដីពីប្រទេសជិតខាង។
តើសកម្មភាពរបស់ក្រុមប្រឆាំង ដែលបាននិងកំពុងធ្វើនេះ ជាឆន្ទៈស្នេហាជាតិពិតប្រាកដ ឬក៏ជាល្បែងនយោបាយដើម្បីបោកប្រាស់ និងធ្វើប្រជាភិថុត?
វាមិនមែនជាការពិបាកយល់ពេកនោះទេ ក្នុងការឆ្លើយតបនឹងសំនួរបែបនេះ គឺប្រជាពលរដ្ឋអាចចាប់ផ្តើមពិចារណា ស្វែងយល់ អំពីទង្វើមួយចំនួនដែលបង្កប់ដោយការញុះញង់ ដុតកំហឹងពូជសាសន៍ បង្កើតស្មារតីជាតិនិយមជ្រុល ក្រោមហេតុផលកេងចំណេញខាងនយោបាយ គឺពួកគេពុំបានគិតគូរទាល់តែសោះ អំពីផលវិបាក និងគ្រោះមហន្តរាយដ៏ធំធេងដល់ជាតិកម្ពុជាទាំងមូលដែលអាចនឹងកើតចេញពីទង្វើគ្មានការទទួលខុសត្រូវទាំងនោះ។
ពិតណាស់ថា អធិបតេយ្យភាពជាតិ មិនមែនមានតម្លៃត្រឹមតែ១៦៨ដុល្លារ ដូចបុគ្គលអ្នកនយោបាយរូបនោះ ដែលខ្លួនគេបានយកផែនទីទិញពីផ្សារមកបំពុលសាធារណមតិនោះទេ ហើយប្រជាពលរដ្ឋក៏អាចនឹងនៅចងចាំបានដែរថា ក្នុងអំឡុងពេលដែលកម្ពុជាកំពុងមានបញ្ហានៅព្រំដែនខាងលិច និងត្រូវការប្រមូលកម្លាំងសរុប មធ្យោបាយសរុប ជាស្មារតីសាមគ្គីជាតិតែមួយក្នុងការការពារបូរណភាពទឹកដី បែរជាបុគ្គលអ្នកដឹកនាំនយោបាយប្រជាភិថុតរូបនោះ សុខចិត្តហែកកម្លាំងឯកភាពផ្ទៃក្នុងជាតិ ដើម្បីគ្រាន់តែបំរើនូវមហិច្ឆតានយោបាយ និងការកេងចំណេញប្រជាប្រិយភាពរបស់ខ្លួនតែប៉ុណ្ណោះ។
ដើម្បីសម្រេចនូវគោលបំណងរបស់ខ្លួន បុគ្គលរូបនេះ បានលើកឡើងដោយគ្មានសតិសម្បជញ្ញៈ និងពុំបានបង្ហាញនូវភាពស្មោះត្រង់ចំពោះជាតិទាល់តែសោះ ដោយបាននិយាយថា « បើរដ្ឋាភិបាលគិតព្រំដែនខាងលិច សូមកុំភ្លេចខាងកើត» និងថែមទាំងបានយកផែនទី Google ដែលជាផែនទីមិនផ្លូវការ មកធ្វើជាអំណះអំណាងបញ្ជាក់អំពីអធិបតេយ្យជាតិរបស់កម្ពុជា ក្រោមលេសថា ខ្លួនគឺជាអ្នកសេ្នហាជាតិ ទឹកដី។
ការលើកឡើងដូច្នេះ គឺគ្មានអ្វីក្រៅពីដើម្បីទាញបង្វែរការចាប់អារម្មណ៍ពីបញ្ហាដែលកំពុងប្រឈមមុខយ៉ាងក្តៅគគុកនៅព្រំដែនខាងលិចនៅពេលនោះ មកបំរើកលល្បិចនយោបាយញុះញង់ចង់ឲ្យមានជម្លោះ អារិភាពជាមួយព្រំដែនខាងកើតថែមទៀតនោះឡើយ។
ដោយសារជាតិជាបុគ្គលបំរើនយោបាយប្រឆាំងផ្កាប់មុខដូចគ្នា ថ្មីៗនេះ តំណាងរាស្ត្រមួយរូបរបស់គណបក្សប្រឆាំង បានជំរុញឲ្យរាជរដ្ឋាភិបាលប្តឹងប្រទេសវៀតណាមទៅកាន់តុលាការ ICJ។
តើក្រុមគណបក្សប្រឆាំងបានយល់ដឹងពីគោលការណ៍ច្បាប់អន្តរជាតិពាក់ព័ន្ធនឹងតុលាការ ICJ ដែរឬទេ? អ្វីទៅដែលហៅថា ICJ? ហើយតំណាងរាស្ត្ររូបនោះ មានបានយល់ដឹង ពីលក្ខន្ដិកៈ និងយុត្តាធិការរបស់ICJដែរឬទេ ? ការដោះស្រាយជម្លោះអំពីអធិបតេយ្យជាតិជាមួយប្រទេសវៀតណាមនៅក្នុងខណៈនេះ បើកម្ពុជាប្តឹងទៅ ICJ តើចំណេញ ឬក៏ខាត?
ផ្អែកលើគោលការណ៍ច្បាប់ យើងយល់ឃើញថា តំណាងរាស្រ្ដរូបនេះពិតជាខ្វះខាតខ្លាំងបំផុតនូវការស្រាវជ្រាវរបស់ខ្លួនក្នុងឋានៈជាអ្នកតំណាងរាស្ត្រ គឺមិនមានការយល់ដឹងអំពីច្បាប់ និងគ្មានបទពិសោធន៍ទាល់តែសោះ ដែលយើងសូមណែនំា ដូចតទៅ៖ «យ៉ាងហោចណាស់ ត្រូវទៅសិក្សាមាត្រា៣៦ កថាខណ្ឌ២ នៃលក្ខន្ដិកៈ ICJ ដែលចែងពី សេចក្ដីប្រកាស ទទួលស្គាល់ជាកំហិត នូវយុត្តាធិការរបស់តុលាការ -Declaration recognizing the Jurisdiction of the Court as Compulsory» ដែលមកដល់បច្ចុប្បន្ន មានប្រទេសតែ៧៧ប៉ុណ្ណោះនៅលើពិភពលោក ដែលបានធ្វើសេចក្ដីប្រកាសជាផ្លូវការ ហើយបានដាក់ជូនទៅអគ្គលេខាធិការអង្គការសហប្រជាជាតិ ក្នុងនោះ កម្ពុជាបានធ្វើសេចក្ដីប្រកាសនៅថ្ងៃទី១៩ ខែកញ្ញា ឆ្នាំ១៩៥៧ រីឯប្រទេសវៀតណាមមិនបានធ្វើសេចក្ដីប្រកាសទទួលស្គាល់យុត្តាធិការនៃតុលាការនេះទេ»។ ក្រៅពីនេះ កត្តាដ៏សំខាន់បំផុតដែលត្រូវសិក្សាស្វែងយល់ឲ្យបានស៊ីជម្រៅផងដែរនោះ គឺពាក់ព័ន្ធនឹងបរិការភូមិសាស្ត្រនយោបាយជាយុទ្ធសាស្ត្រដែលកំពុងតែមានការប្រកួតប្រជែងគ្នាយ៉ាងស្រួចស្រាវ រវាងប្រទេសមហាអំណាចនៅតំបន់អាស៊ី ហើយប្រទេសមហាអំណាចមួយចំនួននោះ ដែលជាសមាជិកក្រុមប្រឹក្សាសន្តិសុខអង្គការសហប្រជាជាតិ ដូចជា សហរដ្ឋអាមេរិក បារំាង ចិន និង រុស្ស៊ី ក៏មិនបានធ្វើសេចក្ដីប្រកាសទទួលស្គាល់យុត្តាធិការ ICJ នេះដែរ ។
ការទាមទារណាមួយឲ្យរាជរដ្ឋាភិបាលប្តឹងទៅតុលាការអន្តរជាតិ គឺគប្បីអ្នកតំណាងរាស្ត្រគណបក្សប្រឆាំង បង្ហាញនូវអង្គហេតុ និងអង្គច្បាប់នានាទាក់ទងនឹងបណ្តឹងនេះឲ្យបានច្បាស់លាស់ជាមុនសិន និងត្រូវផ្តល់ឯកសារពាក់ព័ន្ធ រឺសារណាផ្លូវការ ដោយសិក្សាផ្លូវច្បាប់លើគ្រប់ទិដ្ឋភាពទាំងអស់ ដែលវាជារឿងរបស់អ្នកតំណាងរាស្ត្ររូបនោះត្រូវធ្វើមុនគេបំផុត។ ក្នុងន័យថា « បើប្តឹងដើម្បីសម្លាប់ខ្លួនឯង ពុំគួរគប្បីប្តឹងឡើយ»។
ជាការពិត បញ្ហាជម្លោះព្រំដែនជាមួយប្រទេសជិតខាង រវាងព្រំដែនខាងលិច និងខាងកើត គឺមានលក្ខណៈផ្សេងពីគ្នា ។ ក្នុងបរិការនេះ តំណាងរាស្ត្ររូបនេះ គួរសិក្សាស្វែងយល់ថា តើហេតុអ្វីបានជាព្រះករុណា ព្រះបរមរតនកោដ្ឋ មិនប្តឹងទៅតុលាការ ICJ កាលពីសម័យមុន ដែលមានការឈ្លានពានដោយការទម្លាក់គ្រាប់បែក ហើយបែរជាព្រះអង្គសម្រេចព្រះរាជហរទ័យត្រឹមតែប្តឹងទៅអង្គការសហប្រជាជាតិទៅវិញ?
ម៉្យាងវិញទៀត ក្នុងពេលដែលព្រះករុណាអតីតព្រះមហាវីរក្សត្រប្តឹងពីបញ្ហាព្រំដែនខាងលិច ក្នុងរឿងប្រាសាទព្រះវិហារទៅ ICJ ហេតុដូចម្តេចបានជាព្រះអង្គមិនព្រមប្តឹងរឿងព្រំដែនខាងកើតផងដែរ ?
ការដោះស្រាយបញ្ហាព្រំដែន កិច្ចការពារអធិបតេយ្យជាតិ បូរណភាពទឹកដី និងការងារបោះបង្គោលព្រំដែនជាមួយប្រទេសជិតខាង គឺជាការងារអទិភាពដ៏ចម្បងបំផុតរបស់រាជរដ្ឋាភិបាល ដែលបាន និងកំពុងអនុវត្តក្នុងមនសិការទទួលខុសត្រូវខ្ពស់ និងដោយប្រយ័ត្នប្រយែងបំផុត ពីព្រោះ ព្រំដែនជាបញ្ហាអាយុជីវិតរបស់ជាតិ គឺមិនអាចបន្លំភ្នែកដូចក្រុមអ្នកនយោបាយប្រឆាំង ដែលបាននិងកំពុងអនុវត្តដូចពេលសព្វថ្ងៃនេះឡើយ។
ផ្ទុយទៅវិញ រាជរដ្ឋាភិបាល បាន និងបន្តដោះស្រាយបញ្ហាព្រំដែនដោយសន្ដិវិធីជាមួយ ប្រទេសវៀតណាម តាមយន្ដការដែលមានស្រាប់ គឺ «គណៈកម្មការចំរុះកិច្ចការព្រំដែន» ដើម្បីបន្តដោះស្រាយបញ្ហាដែលនៅសេសសល់។
ដូច្នេះ ការយកផែនទីទិញតាមផ្សារមកបង្ហោះផ្សាយដោយមេដឹកនាំគណបក្សប្រឆាំង ក៏ដូចជាការចាប់បង្ខំជំរុញយ៉ាងគឃ្លើនរបស់តំណាងរាស្ត្រគណបក្សប្រឆាំង ឲ្យរាជរដ្ឋាភិបាលប្តឹងទៅតុលាការ ICJ ដោយពុំបានសិក្សាស្វែងយល់ឲ្យបានគ្រប់ជ្រុងជ្រោយអំពី អង្គហេតុ អង្គច្បាប់ ប្រវត្តិសាស្ត្រ ក៏ដូចជាយុត្តាធិការរបស់ ICJ គឺបានបង្ហាញឲ្យឃើញយ៉ាងច្បាស់ពីភាពល្ងង់ខ្លៅដ៏ខ្លាំងបំផុតអំពីច្បាប់អន្តរជាតិរបស់មន្ត្រីរូបនោះ ដែលចង់រុញរាជរដ្ឋាភិបាលទាំងមូលឲ្យទៅខុសដូចអ្វីដែលខ្លួនគិត គឺពួកគេចង់អុចអាលឲ្យមានកំហឹងពូជសាសន៍ បង្កការប្រទូសរ៉ាយជាមួយប្រទេសវៀតណាម ជំរុញឲ្យទៅប្តឹងប្រទេសមួយដែលគេមិនបានធ្វើសេចក្តីថ្លែងការណ៍ទទួលស្គាល់យុត្តាធិការរបស់ ICJ។ តើការធ្វើបែបនោះ សកលលោកដែលគេចេះដឹងអំពីច្បាប់អន្តរជាតិ គេនឹងរិះគន់ពេបជ្រាយមកលើរាជរដ្ឋាភិបាលយ៉ាងដូចម្តេចទៅ?
ការជំរុញឲ្យរាជរដ្ឋាភិបាលប្តឹងទៅ ICJ គឺសំដែងឲ្យឃើញថា បុគ្គលទាំងនោះពុំមានភាពហ្មត់ចត់ និងគ្មានស្មារតីទទួលខុសត្រូវខ្ពស់ពិតប្រាកដចំពោះជោគវាសនារបស់ប្រទេសជាតិនោះទេ ហើយក៏កាន់តែបង្ហាញយ៉ាងច្បាស់ផងដែរអំពីការបន្តអនុវត្តនូវឧបាយកលទុច្ចរិត ភូតកុហក បោកប្រាស់ បំភាន់សាធារណមតិ ក្រោមហេតុផលប្រឆាំងដើម្បីកេងចំណេញនយោបាយតែប៉ុណ្ណោះ ពោល គឺគ្មានអ្វីក្រៅពីបន្តធ្វើនយោបាយប្រជាភិថុត «ដុតឲ្យខ្លោច រោចឲ្យឆៅ» នោះឡើយ៕
រាជធានីភ្នំពេញ ថ្ងៃទី៥ ខែសីហា ឆ្នាំ២០១៥
អង្គភាពព័ត៌មាន និងប្រតិកម្មរហ័ស នៃទីស្តីការគណៈរដ្ឋមន្ត្រី
ឯកឧត្តម គឹម សន្តិភាព បដិសេធការលើកឡើង របស់បក្សប្រឆាំងថា ការចាប់ខ្លួនសកម្មជន CNRP ជារឿងនយោបាយ
បន្ទាប់ពីមានការចាប់ខ្លួន សកម្មជនគណបក្សសង្គ្រោះជាតិ២រូប កាលពីថ្ងៃទី ០៤ ខែសីហា ឆ្នាំ២០១៥ ពាក់ព័ន្ធនឹងអំពើហិង្សាដែលកើតឡើង នៅកំឡុង ខែកក្កដា ឆ្នាំ២០១៤កន្លងមក ឯកឧត្តម អ៊ូ ច័ន្ទឬទ្ធិ មន្ត្រីជាន់ខ្ពស់គណបក្សសង្គ្រោះជាតិបានលើកឡើងថា ការចាប់ខ្លួនរបស់តុលាការគឺជារឿងនយោបាយ។ ឆ្លើយតប និងការលើកឡើងនេះ ឯកឧត្តម គឹម សន្តិភាព អ្នកនាំពាក្យក្រសួងយុត្តិធម៌ បានប្រាប់បណ្តាញព័ត៌មាន GNN នៅថ្ងៃទី ០៥ ខែសីហា ឆ្នាំ២០១៥ ថាដំណើការលើសំណុំរឿងក្តីនេះ គឺជារឿងព្រហ្មទណ្ឌសុទ្ធសាធ និងស្នើកុំឲ្យអ្នកនយោបាយទាញសំណុំរឿងនេះមកជារឿងនយោបាយអី។
ឯកឧត្តម គឹម សន្តិភាព បានមានប្រសាសន៍ថា «តុលាការបានដំណើរការលើសំណុំរឿងក្តីនេះតាំងពីខែកក្កដា ឆ្នាំ២០១៤ រហូតមកដល់ពេលនេះ គឺរយៈពេលជិតមួយឆ្នាំមកហើយ ដែលរឿងក្តីនេះកំពុងតែសិក្សាអំពីចំណាត់ការដែលស្ថិតក្នុងដៃតុលាការហើយ ជាធម្មតាចំណាត់ការនីមួយៗក្នុងរឿងព្រហ្មទណ្ឌគឺពិបាក និងស្មុគស្មាញបំផុត»។
ឯកឧត្តមបន្តថា តុលាការមានអាណត្តិរបស់គាត់មួយ ដែលឈរលើក្រមព្រហ្មទណ្ឌហើយសំណុំរឿងព្រហ្មទណ្ឌនេះយើងអាចមើលតាមសកម្មភាពថាជារឿងហិង្សាមួយ ដែលកើតមានឡើងនៅក្បែរទីលានប្រជាធិបតេយ្យ។ សកម្មភាពហិង្សាទាំងនោះ វាជារឿងព្រហ្មទណ្ឌ មិនមែនជារឿងនយោបាយទេ ហើយក៏មិនមានអ្នកនយោបាយណាមួយទៅដាក់សម្ពាធសង្កត់ទៅលើស្ថាប័នតុលាការដែរ ពីព្រោះសំណុំរឿងនេះគេបង្កតាំងពីខែ កក្កដា ឆ្នាំ២០១៤មក។
ឯកឧត្តម គឹម សន្តិភាព បានបញ្ចេញនូវទស្សនៈផ្ទាល់ខ្លួនថាប «ខ្ញុំយល់ថាអ្វីៗដែលជារឿងរបស់ស្ថាប័នតុលាការ គួរទុកឲ្យតុលាការជាអ្នកសម្រេច យើងមិនគួរណាលូកម៉ាត់ ទិទៀនអំពីដំណើរការរបស់តុលាការ រឺក៏ទាញហេតុផលនេះហេតុផលនោះ ឲ្យពាក់ព័ន្ធនឹងរឿងនយោបាយទេ ។ ខ្ញុំគិតថាអ្នកពាក់ព័ន្ធជាមួយនឹងសំណុំរឿងនេះគួរតែខិតខំរកសក្ខីកម្មបន្ថែម។ ឯកឧត្តមបានបន្ថែមថា ខ្ញុំសូមបញ្ជាក់ថាក្នុងដំណាក់កាលស៊ើបសួរនេះគឺចៅក្រមស៊ើបសួរ គាត់មានកាតព្វកិច្ចក្នុងការស៊ើប និងរកភ័ស្តុតាងដាក់បន្ទុកថែម និងរកភ័ស្តុតាងដោះបន្ទុកផង។ ដូច្នេះភាគីណាដែលពាក់ព័ន្ធនឹងសំណុំរឿងនេះ សូមបញ្ជូនភ័ស្តុតាងទៅកាន់ចៅក្រមស៊ើបសួរចុះដើម្បីឲ្យចៅក្រមស៊ើបសួររៀបចំដំណើរនីតិវិធីបន្តទៀត»៕
អត្ថបទ៖ សុភាព
សាលាក្រុងភ្នំពេញ ស្នើឲ្យគណបក្សសង្គ្រោះជាតិ បញ្ឈប់ការប្រមូលប្រាក់បង្កើត ទូរទស្សន៍ ព្រះអាទិត្យនៅតាមផ្លូវ ដោយប្តូរទៅទីស្នាក់ការរបស់ខ្លួនវិញ
យោងតាមលិខិតមួយច្បាប់របស់សាលារាជធានីភ្នំពេញ ចុះថ្ងៃទី ០៣ ខែសីហា ឆ្នាំ២០១៥ ជម្រាបជូនប្រធានគណៈកម្មាធិការប្រតិបត្តិគណបក្សសង្គ្រោះជាតិ រាជធានីភ្នំពេញ ស្តីពីការប្រមូលវិភាគទានទ្រទ្រង់ការបង្កើតស្ថានីយ៍ទូរទស្សន៍ព្រះអាទិត្យដោយ បានបញ្ជាក់ថា អស់រយៈពេលប្រមាណជាងមួយខែកន្លងមកនេះ សាលារាជធានីភ្នំពេញសង្កេតឃើញថា គណបក្សសង្គ្រោះជាតិ បានរៀបចំឲ្យមានការប្រមូលវិភាគទាន ដើម្បីទ្រទ្រង់ការបង្កើតស្ថានីយ៍ទូរទស្សន៍ព្រះអាទិត្យរបស់ខ្លួន នៅតាមទីសាធារណៈមួយចំនួន ដោយមិនមានការសុំច្បាប់អនុញ្ញាតពីអាជ្ញាធរមូលដ្ឋានមានសមត្ថកិច្ចឡើយ ដែលប្រការនេះបណ្តាលឲ្យមានការប៉ះពាល់ និងបាត់បង់របៀបរៀបរយសណ្តាប់ធ្នាប់សាធារណៈក្នុងរាជធានីភ្នំពេញ។
ដូច្នេះដើម្បីកាត់បន្ថយភាពអសកម្ម ដែលកើតមានកន្លងមក សាលារាជធានីភ្នំពេញ ស្នើសុំឲ្យប្រធានគណៈកម្មាធិការប្រតិបត្តិគណបក្សសង្គ្រោះជាតិរាជធានីភ្នំពេញ ធ្វើការរៀបចំប្រមូលវិភាគទាននេះ នៅតាមទីស្នាក់ការ ឬទីតាំងឯកជនរបស់គណបក្សសង្គ្រោះជាតិវិញ៕
អត្ថបទ៖ សុភាព
Subscribe to:
Posts (Atom)