AKP ភ្នំពេញ ថ្ងៃទី២៨ ខែកក្កដា ឆ្នាំ២០១៤—មន្រ្ដីជាន់ខ្ពស់ នៃគណៈកម្មាធិការជាតិសុវត្ថិភាពចរាចរណ៍ផ្លូវគោក បាន លើកឡើងថា ជនរងគ្រោះ ដែលស្លាប់ដោយគ្រោះថ្នាក់ចរាចរក្នុងរយៈពេល៦ខែ ដើម ឆ្នាំ២០១៤ នេះគឺមានប្រមាណជាង១ ០០០ នាក់ បើប្រៀបធៀបទៅនឹងឆ្នាំ ២០១៣ គឺមានការកើនឡើងខ្ពស់គួរឲ្យព្រួយបារម្ភ។
ក្នុងសិក្ខាសាលាស្ដីពីកត្តាហានិភ័យលើការមិនពាក់មួកសុវត្ថិភាព និងការ បើកបរក្រោមឥទ្ធិពល នៃគ្រឿងស្រវឹង កាលពីព្រឹកថ្ងៃទី២៨ ខែកក្កដា ឆ្នាំ ២០១៤ នៅក្រសួងការពារជាតិ ឯកឧត្តម ពៅ ម៉ាលី អគ្គលេខាធិការនៃគណៈកម្មាធិការ ជាតិសុវត្ថិភាពចរាចរណ៍ផ្លូវគោកបានមានប្រសាសន៍ថា ចំនួនអ្នកស្លាប់ដោយ គ្រោះថ្នាក់ចរាចរមានការកើនឡើងច្រើន បើប្រៀបធៀបទៅនឹង ឆ្នាំ២០១៣ ពោលគឺកើនឡើងប្រមាណជាង១០០នាក់ ដោយតួលេខនេះគឺគិតតែក្នុងរបាយ ការណ៍របស់ក្រសួងមហាផ្ទៃមួយប៉ុណ្ណោះ មិនទាន់រាប់បញ្ចូលទិន្នន័យរបស់ក្រ សួងសុខាភិបាលបន្ថែមនោះទេ។ ឯកឧត្តមបញ្ជាក់ថា អ្វីដែលយើងមើលឃើញ ចំពោះរាល់គ្រោះថ្នាក់ចរាចរភាគច្រើន ដែលបានធ្វើការត្រួតពិនិត្យឡើងវិញ នោះគឺទាក់ទងនឹងបញ្ហាល្បឿន បន្ទាប់មកគឺបញ្ហាគ្រឿងស្រវឹង ហើយបញ្ហា សំខាន់មួយទៀត ដែលបណ្ដាលឲ្យមានការគ្រោះថ្នាក់ចរាចរនោះគឺការមិន គោរពសិទ្ធិអាទិភាព និងការមិនគោរពច្បាប់ចរាចរណ៍។
ឯកឧត្តមលើកឡើងថា តាមប្រព័ន្ធទិន្នន័យគ្រោះថ្នាក់ចរាចររបស់គណៈ កម្មាធិការជាតិសុវត្ថិភាពចរាចរណ៍ផ្លូវគោក គឺអ្នកដែលស្លាប់ភាគច្រើនជាកម្មករ និងកសិករ ដែលបានប្រើប្រាស់ទោចក្រយានយន្ដ និងយានយន្ដសម្រាប់ដឹក មនុស្សច្រើនធ្វើដំណើរនៅតាមដងផ្លូវ។ ប៉ុន្ដែអ្វីដែលគួរឲ្យចាប់អារម្មណ៍ខ្លាំង ជាងគេគឺមន្រ្ដីរាជការ ដែលមានប្រមាណជាង១០ភាគរយ ស្លាប់ដោយគ្រោះ ថ្នាក់ចរាចរ ហើយភាគច្រើនគឺបណ្ដាលមកពីការបើកបរហួសល្បឿនកំណត់ និងការសេពគ្រឿងស្រវឹង។ ជាមួយគ្នានេះដែរ ក្នុងចំណោមអ្នកស្លាប់ប្រមាណ ៧០ភាគរយ ភាគច្រើនគឺជាយុវជន ដែលមានអាយុចាប់ពី១៥ឆ្នាំដល់៣៥ឆ្នាំ ដែលតាមការត្រួតពិនិត្យ និងវាយតម្លៃលើជនរងគ្រោះទាំងអស់ភាគច្រើនអ្នក ដែលស្លាប់ទាំងនោះគឺបណ្ដាលមកពីការមិនពាក់មួកសុវត្ថិភាព។
ឯកឧត្តមអគ្គលេខាធិការក៏បានសំណូមពរដល់ប្រជាពលរដ្ឋ មន្រ្ដីរាជការ កងកម្លាំងប្រដាប់អាវុធ និងអ្នកប្រើប្រាស់ផ្លូវទាំងអស់ ត្រូវគោរពច្បាប់ចរាចរណ៍ ស្លាកសញ្ញាចរាចរណ៍ និងមានការយោគយល់អធ្យាស្រ័យគ្នាទៅវិញទៅមក ហើយនៅពេលបើកបរសូមកុំសេពគ្រឿងស្រវឹង និងត្រូវពាក់មួកសុវត្ថិភាពឲ្យ បានគ្រប់ៗគ្នា។
លោកជំទាវ ដាំ ដារីនី រដ្ឋលេខាធិការក្រសួងការពារជាតិបានកត់សម្គាល់ ថា ការផ្សព្វផ្សាយនេះគឺជាផ្នែកមួយយ៉ាងសំខាន់ នៃការបន្ដអនុវត្ដន៍នូវគម្រោង សុវត្ថិភាពចរាចរណ៍ និងកាត់បន្ថយគ្រោះថ្នាក់ចរាចរក្នុងគោលដៅលើកកម្ពស់ ការយល់ដឹងរបស់សាធារណៈជនទូទៅ មន្រ្ដីរាជការក៏ដូចជានាយទាហាន ពល ទាហានក្នុងកងយោធពលខេមរភូមិន្ទ ពិសេសការអប់រំផ្សព្វផ្សាយអំពីសុវត្ថិភាព ចរាចរណ៍ បញ្ហាប្រឈម និងកត្តាហានិភ័យនានា នៃការបើកបរយានយន្ដគ្រប់ ប្រភេទ ដោយមិនគោរពច្បាប់ចរាចរណ៍ ការមិនពាក់មួកសុវត្ថិភាព និងការបើក បរក្រោមឥទ្ធិពលនៃគ្រឿងស្រវឹង។
យោងតាមទិន្នន័យរបស់គណៈកម្មាធិការជាតិសុវត្ថិភាពចរាចរណ៍ផ្លូវគោគ បានបង្ហាញឲ្យដឹងថា ក្នុងឆ្នាំ២០១៣ មានអ្នកស្លាប់ដោយគ្រោះថ្នាក់ចរាចរសរុប ១ ៩៥០នាក់ ហើយនៅក្នុងរយៈពេល៦ខែដើម ឆ្នាំ២០១៤នេះ មានអ្នកស្លាប់ ប្រមាណជាង១ ១១៧នាក់ បើប្រៀបធៀបទៅនឹងគ្រោះថ្នាក់នៃការស្លាប់ក្នុងឆ្នាំ កន្លងទៅគឺមានការកើនឡើងខ្ពស់៕
ដោយ អ៊ុន រិទ្ធី